تشكيل حكومة ظل المحاورات

[yasovinas]

المعلم ياسو عمال يفرق في الوزارات وكإنه بيفرق حلاوة مولد النبي

ياسو

قسمه .. وتيفتي تيفتي .. خلي بالك أنا رئيس وزراء سابق

يا صاحبي ما انا عكمتك الماليه اهو يا باشا

يعني الخزنة

يعني الضرايب

يعني الجمارك

يعني المعاشات

يعني البورصه

يعني الحبايب والريس ولجنة السياسات

وانا اونت واللي بيحبنا ما يضربش نار

[kokowawa1979]

رئيس الوزراء سي السيد كتب :

وزارة الزراعة : ودي هايتولاها أخونا كوكو واوا على أساس إن عنده خبرة في مزارع الفراولة ... هايبقى مطلوب منه يغرق البلد فخفاخينا .

شكرا لكم صاحب الفخامة رئيس الوزراء

وده أول تصريح صحفي لوزير الزراعة :

بناءا على توجيهات السيد سي السيد رئيس الوزراء سوف يتم فخفخة كل مواطن !!!

واوعدكم بعدم استخدام المبيدات نهائيا والاتجاه إلى الزراعة النظيفة العضوية وعلاج كل شعب مصر بالاشتراك مع أخي الدكتور خالد وزير الصحة من كل الأمراض التي تسبب فيها يوسف والي وشركاه !!!

تم تعديل 10 أبريل 2006 بواسطة kokowawa1979

[kokowawa1979]

فيه كمان ملحوظة صغيرة فين أخونا الفاضل White Heart في الوزارة دي واللا علشان الرجل هادئ ورصين باستمرار ومابيحبش يفرض رأيه على حد ننساه !!!

أنا شخصيا أرشح white heart وزيرا للثقافة

تم تعديل 10 أبريل 2006 بواسطة kokowawa1979

[yacho]

لغتنا العربيه يسر لا عسر ونحن نملكها كما كان القدماء يملكونها ... ولنا ان نضيف اليها ما نحتاج اليه

من الفاظ لم تكن مستعملة فى العصر الحديث .

طه حسين

هذه المقوله الجميلة كانت مقدمة لبرنامج اذاعي قديم اسمه لغتنا الجميله والله يا ياكو هانم انت كده بتزيدي من حيرتي ممكن حضرتك تتكرمي وتقبلي وزارة التعليم مع وزارة النقل البحري

عقلي الباطن

يا خوفي لا تقولي كلمتين على حسن شحاته ولا على الكابتن شحتة الاسكندراني ولا تيجي على الجرح وتجيب لي سيرة عرابي اقوم امسكها وزارة الرياضه كمان

لعلمك يا ياسو انا حفكرك بواحد تانى خالص .. فاكر جمال الدولى المشجع بتاع الاتحاد وكان له

واقعه شهيره فى ماتش من الماتشات :angry: .. وافكرك ب بوبو .. ولسه .. مسكنى الرياضه بقى

وبص شوف وزارتنا حتعمل ايه .. :blink:

[yasovinas]

جمال الدول هذا الثائر الفطري الجميل ملء جدران اسكندريه بحكم ومواعظ واسم لا يمكن ان ينساه اي اسكندراني

وطبعا نزوله الملعب كما ولدته امه واقعه لا يمكن ان تنسى

بقول لك ايه خدي مفتاح المكتب وروحي شغلي الوزارة كلها على كيفيك؛؛؛؛ بس الله يخليكي سيبي الماليه لسي السيد علشان الراجل له افضال علينا كتير وبعدين يعني رئيس وزارة سابق ومش هنبقى احنا والزمن عليه

تم تعديل 11 أبريل 2006 بواسطة yasovinas

[dr khaled]

رئيس الوزراء سي السيد كتب :

وزارة الزراعة : ودي هايتولاها أخونا كوكو واوا على أساس إن عنده خبرة في مزارع الفراولة ... هايبقى مطلوب منه يغرق البلد فخفاخينا .

وده أول تصريح صحفي لوزير الزراعة :

بناءا على توجيهات السيد سي السيد رئيس الوزراء سوف يتم فخفخة كل مواطن !!!

واوعدكم بعدم استخدام المبيدات نهائيا والاتجاه إلى الزراعة النظيفة العضوية وعلاج كل شعب مصر بالاشتراك مع أخي الدكتور خالد وزير الصحة من كل الأمراض التي تسبب فيها يوسف والي وشركاه !!!

كويس ان لسه ماحدش طمع في كرسي الصحه

القرارات :

1) يتم نهائيا منع الفلاحين من نزول الترع او قضاء حاجتهم فيها و انشاء شرطه الترع و المصارف لتنفيد هدا القرار والعقوبه للمخافين قاسيه جدا ودلك للقضاء نهائياعلي البلهارسيا اللي بقالنا فيها 5000 سنه و بصراحه لانا لاهي

2) يتم منع تبادل القبل بين الرجال منعا باتا حيث ثبت انها تسبب انتشار التهاب الكبد الوبائي و تعيين قوات خاصه لتنفيد دلك ومن يضبط متلبسا سنقوم بجلده في مكان عام

اصلي مصمم انضف البلد من الاوبئه دي

3) كل من يضبط متلبسا بتدخين سيجاره مخدرات يتم سجنه لمده لاتقل عن 5 سنوات

4) منع زرع الملوخيه حيث ان نباتها يشبه البانجو وهدا ما يستغله التجار

5) يتم ابقاء السيدات في البيت بعد اتمامهم للدراسه الجامعيه حتي يتفرغوا لتربيه اجيال قويه و متربيه و سجن الازواج الدين يمتنعون عن الانفاق عن زوجاتهم

والله من وراء القصيد

د.خالد

وزير الصحه الدي سيدكره التاريخ

[سهيلة]

)

يتم ابقاء السيدات في البيت بعد اتمامهم للدراسه الجامعيه حتي يتفرغوا لتربيه اجيال قويه و متربيه و سجن الازواج الدين يمتنعون عن الانفاق عن زوجاتهم

dr khaled مشاركة بتاريخ اليوم, 04:01 PM

اعتراااااااااااض

اظن دة مش من اختصاص وزير الصحة

فين يا جماعة وزير القوى العاملة يرد علية

وفين ستات مصر اللى شعارهم انهم بيشتغلو عشان يثبتوا ذاتهم موش عشان الفلوس والكلام الفاضى دة

وبعدين اجيال اية بس

الاجيال بايظة بايظة ومش كل حاجة تلاقوها غلط ف الدنيا تعلقوها على شغل المراة

معلش احنا بنتكلم بردة :angry2:

[yasovinas]

امر من وزير العدل الى وزير الداخلية بضبط واحضار المدعوة سهيله وحبسها في بيت جوزها او بيت اهلها لغاية ما تعرف ان الله حق وتسحب اعتراضها

وامر اخر للدكتور خالد وزير الصحه بمنح مفتشي الصحه صفة الضبطية القضائية لاي ست تشتغل برة بيتها ولاي ام تهمل في متابعة اولادها من النواحي الصحية والتربويه والتعليميه بحجة اثبات الذات التي لن تثبت الا في اولادها واسرتها

[yasovinas]

انا عندي وزارة بس بدور لها على وزير

وزارة شعارها "مناولة مش مقاولة " {وزارة الدممممااااغغغغ}

وزارة الدماغ يا حضرات تختص بتنظيم تجارة كل ما يضبط دماغ المواطن المصري :angry2: وسيقتصر نشاطها على الحشيش والبانجو واقراص الصراصير واقراص الترامه والباركينول والترامادول والطوابع والبيسة وايضا الكوله للاطفال

سيكون مقر هذه الوزارة في مكان عالي (جبل المقطم مثلاً)

وطبعا سيكون لها مكاتب في كل انحاء مصر المحروسة وسيقوم كل مكتب بتوزيع الضربيات باسعار حكوميه مدعومه وببطاقات التموين او بالرقم القومي

وبجرعات محددة علشان الشعب ما يسقطش على البلد

وستقوم الوزارة بتكوين وانشاء شركة مساهمه اسمها "الاهرام للمضروبات" ونشاطها يقتصر على تنظيم التوزيع ولم الغله

ستصرف الوزارة لكل مواطن قرش حشيش واحد كل شهر من النوع البلدي الطري المخلوط بالحنه والجاز والماكستون فورت ؛؛ وسيقدم للجمهور بسعر مدعم {خمسين جنيه للقرش} مع دفنر اوتومان مجاناً ،،، كذلك سوف يكون من حق كل مواطن ان يشتري "عرنوس " بانجو واحد كل اسبوع وبسعر 7 جنيهات فقط للعرنوس بالبذر او بسعر 10 جنيهات للعرنوس الجاهز على الضرب مباشرة

سيتم صرف الكوله للاطفال بمعرفة الامهات ؛؛ وستفتح الوزارة معاهد لتعليم المواطن اللف والتكريس وتنظيف البانجو وعمل الفله الكرتون او الكاملة وسوف يتم تقديم كورسات في كيفية علاج الافورة والتهبيط وذلك بالتعاون مع كل من وزارة التعليم ووزارة الصحه

وستقيم الوزارة بالتعاون مع وزارة السياحه ووزارة الاعلام مهرجان سنوي في الجبل الاصفر بحيث يكون تكريس الحجارو لايف ويشاهده العالم اجمع ليعرف ان المصري "دماغه عالية " <<النيل رواه والبفرة معاه >> وسوف يكون اللمبي هو ضيف شرف المهرجان لانه صاحب الصيحه الشهيرة ((يا توفروا لهم مساكن ؛؛ يا توفروا لهم الكله)) وسوف يكون الرعاه الرسميون للمهرجان

اتوبيس شرق الدلتا اللي بيروح سيناء

شركة بنجو ك للطيران

الشرقية للدخان

ها مين عايز يمسك الوزارة دي

[سهيلة]

yasovinas مشاركة بتاريخ اليوم, 08:46 PM

امر من وزير العدل الى وزير الداخلية بضبط واحضار المدعوة سهيله وحبسها في بيت جوزها او بيت اهلها لغاية ما تعرف ان الله حق وتسحب اعتراضها

وامر اخر للدكتور خالد وزير الصحه بمنح مفتشي الصحه صفة الضبطية القضائية لاي ست تشتغل برة بيتها ولاي ام تهمل في متابعة اولادها من النواحي الصحية والتربويه والتعليميه بحجة اثبات الذات التي لن تثبت الا في اولادها واسرتها

انا موش هتكلم الا ف وجود المحامى بتاعى

ما فيش محامى هنا ف المحاورات ياجماعة يلحقنىىىىىىىىىىىىىىى

دة ظلم هوة دة قانون الطوارىئ اللى بيقولوا علية

فليسقط قانون الطوارىئ

[yasovinas]

وادي وزارة كمان تبحث عن وزير

وزارة (دلع المواطن ) وشعارها "ما بحبش حد الا انت"

هذه الوزارة سوف تكن مسئوله عن ترويش الشعب ،لاننا عارفين ان المواطن المصري ممكن تاخد منه كتير قوي لو دلعته ؛؛ ستقوم هذه الوزارة باجراء اعفاءات عشوائية حيث سيتم اختيار 200 مواطن كل شهر واعفاء كل واحد منهم من اي التزام حكومي مادي يختارة المواطن مثلا فاتورة الكهربا مخالفات المرور فاتورة التليفون فاتورة في القصر العيني

كما ستقوم باختيار عشر مواطنين عشوائياً برضه ودعوتهم الى حفل غذاء جماعي بحد اقصى 80 جنية للفرد وخمسة افراد للعائله الواحده وذلك في الازهر بارك وعلى انغام ال دي جى ياسر الحريري

وستحتفل الوزارة سنويا بعيد المواطن يوم الخميس الاول من شهر يناير - علسان الموطن يدخل السنه الجديده وهو فريش ومبسوط

وفي هذا اليوم وبالتعاون مع وزارة الثقافة وبيوت الفن ومراكز ثقافة الطفل ستنتشر فرق الاطفال يرتدون الازياء الشعبية المصريه {البنطلون ابو وسط واقع وجلابية نانسي عجرم وهي قاعده على طشت الغسيل للبنات }

وستننشر هذه الفرق على نواصي المدين حاملة ورود حمرا من النوع البلدي وسيتم تقديم ورده لكل مواطن وهو في طريقة الى عمله صباحا مصحوبة بابتسامه جميلة وتمنيات وزارة المواطن لك بيوم سعيد

[yasovinas]

في هذا اليوم هيكون لكل المواطن الحق في مشوار واحد فقط مجانا بتاكسي العاصمه ابو 3 جنيه في الكيلو وايضا كل مواطن هنصرف له كارت منزلي مجانا بقيمة 10 ىجنيه من المصريه للاتصالات وكمان واحد فخفخينا من عند اجدع محل في منطقته نقول فرغلي مثلاً وطبعا الفخفخينا هتتكون من موز وفراوله ومانجو وجوافه

وستحصل كل شقه على كيس به خليط من الفستق والمكسرات والكاجو زقطع ن الشيكولاته الباتشي

ستقام شاشات عرض كبيرة في الميادين والشوارع الكبرى تعرض احدث الكليبات برعاية قناة مزيكا ودريم واحد

وسيتم بث معطر الجو من سيارات تمشي في شوارع البلد برعاية جليد للعطور

كما سيتم اضافه ماء الورد الى خزانات سيارات الرش - برعاية خضر العطار

ومن اهم القرارات التي ستتخذ في هذا اليوم الغاء الكلاكس نوهائيا واي سائق يطلق كلاكس سوف يحرم من الكارت المنزلي

ايضا سوف تتوقف كافة رحلات اتوبيسات النقل العام وتستبدل برحلات الاتوبيس النهري

كما سوف تمنع كافة انواع السيارات والمركبات من دخول منطقة وسط البلد ، فقط المشاه وراكبي الدراجات من لهم الحق في التواجد في منطقة وسط البلد

سوف تقوم الوزارة بتشكيل وفد نسائي على اعلى مستوى لزيارة سجون الرجال في هذا اليوم ويتكون من

• مروة "اما نعيمه"
  
• نجلا "بح"
  
• وتينا "هقلع القناع يا بويا"
  
• وماريا "العب العب العب"
  
• واخيرا هايفا "بوس الواوا"
  

واما سجون النساء فيتكون الوفد من السادة

• احمد عز
  
• محمد رجب
  
• وطلعت زين
  

[yasovinas]

وكمان وزارة من واقع الحال في مصر المحروسة

(وزارة العيال الجديده) شعارها {بابا في الكويت}

بعد العجز الواضح للحكومات المتعاقبة على مصر المحروسه منذ تولي بطل الحرب والسلام وصاحب الطلعه الجوية اطال الله لنا في عمرة وادام بقاؤه - في التعامل والتفاهم معالعيال الجديده الذين ظهروا في البلد وانتشروا بشكل اسرع من ال دي اس ال ؛؛؛ فسوف اعلن عن وزارة العيال الجديده في التشكيل المقترح للوزارة

ستكون مسئولية هذه الوزارة تنظيم عمليات البودي بلدنج التي ادمنها شباب اليومين دول وحولت بعضهم الى جودزيلات تسير في شوارع قاهرة المعز ؛؛ حيث ستقوم الوزارة بتحديد شاسية للجسم يلتزم بيه الشباب كل واحد حسب مقاساته وكل من يخالف ذلك ويتجاوز حجمه يصدر له امر ازاله فوراً

تنظيم شروط الصحوبية للحد من مطاردة الشباب "البيئة" للبنات ال level وما يتبعها من فضائح ؛؛

كذلك الزام كل بنت بانها تصاحب من منطقتها فقط او من النادي

كما ستقوم الوزارة بعمل حفلات بالتعاون مع وزارة الاعلام خيرية وستقام اول حفلة في كلوب محمد على وسيخصص دخلها لضحايا " التسلخات"

وستقوم الوزارة بالسيطرة على منيمم تشارج الكافيهات وجعله بالدولار في احياء الدقي والزمالك والمهندسين والاحياء المماثله لها في باقي المحافظات علشان الكافيهات لمت قوي - وكذلك الزام الكافيهات بان يكون الدخول "كوبلز" علشان نقضي على ظاهرة الشقط

[yasovinas]

ايه الحكاية انا مش شايف ولا عبده مشتاق واحد اتقدم لاي وزارة من الوزارات الجديده

طيب حيث كده بقى الوزارة اللي جايه دي انا اللي هعين عليها وزير

وزارة العاطلين وسيكون شعارها "قوم يا مصري ،،،، ياللا يا حبيبي"

وبناء على اخر قرار اتخذته وهو تعيين الوزراء فسوف تكون هذه الوزرة من نصيب الكابتن احمد" شوبير" (سابقاً) "مبارك" حالياً فالراجل والشهادة لله اكثر واحد بيشتغل في البلد دي وبيتعب كتير اوي خالص فهو لاعب كرة سابق ومُعد للبرامج الرياضيه ومذيع ايضا ومعلق كروي وكاتب في اكثر من صحيفه ومجله وايضا عضو في اتحاد الجبلاية ورجل اعمال وخبير كروي وخبير صفقات بيع اللاعبين وعضو مجلس الشعب واللي يحبنا ما يضربش نار واوعى وششششك

سيقوم الكابتن شوبير بنقل خبرته لاكثر من عشرة ملايين عاطل مش لاقيين نصف وظيفه في مصر الموكوسه

ستقوم الوزارة بالتعاون مع وزارة الاسكان والتعمير بانشاء تكيات على مستوى الجمهوريه كله ،،، تكية في كل محافظة تستضيف فيها العاطلين طوال اليوم " علشان الحكومه تتقي شرهم " وتقدم لهم وجبتين في اليوم زي بتوع السجن ،، وستقيم لهم دورة كوتشينة "استيميشن " وايضا دورات دومينو عادي وامريكاني وكذلك دورات طاوله (محبوسة بس :angry2: ) وسيتم تدريبهم للعمل في مناسبات معينة

في موسم الانتخابات كبلطجية واصوات على بعضها تاخدها الحكومه ،،

كما وسيم اطلاقهم في المظاهرات على اعداء البلاد خصوصا الحريم حتى يكون الحماس دافع لهم

ايضا سيتم الاستعانه بهم في ماتشات منتخب الكورة كجمهور درجة تالته

وفي افتتاح المشروعات القومية كمواطنين

وفي زيارات المسئولين للمدن الجديده اللي مش ساكن فيها حد كسكان واقفين في البلكونات بالصدفه

كذلك في تصوير جلسات مجلس الشعب تليفزيونيا عندما يتغيب الاعضاء وممكن يتم تصويرهم بعد الجلسه ويتم تركيب الصور على الاصوات وخلاص

كمان سوف يتم استخدامهم في افلام احمد السقا "هينضربوا" وفي المسلسلات الدينيه يعملوا دور الكفار وكده

وايضا سوف يتم الغاء اسمائهم ونصدر لهم رخصة برقم ومهنة "عاطل تحت الطلب" يتم تجديدها سنويا بواسطة الكابتن شوبير

[tarek_almeghallawy]

ايه الحكاية انا مش شايف ولا عبده مشتاق واحد اتقدم لاي وزارة من الوزارات الجديده

دولة الرئيس ياسو فيناس المشتاقين كتير

لكن الوزارة بتاعة سيادتك غريبة حبتين

بتخوف المشتاقين والزاهدين

شوبير ما ينفعش لأنه مش عضو في المحاورات

اختار سيادتك من الأعضاء والوزارة تكليف مش تشريف

وكله حسب توجيهات سعادة جنابك

تم تعديل 15 أبريل 2006 بواسطة tarek_almeghallawy

[Guest النسر المصري]

فيه كمان ملحوظة صغيرة فين أخونا الفاضل White Heart في الوزارة دي واللا علشان الرجل هادئ ورصين باستمرار ومابيحبش يفرض رأيه على حد ننساه !!!

أنا شخصيا أرشح white heart وزيرا للثقافة

اية ياعم كوكو واوا

انت ناوي تخربلنا الوزارة زي مامرتضى خربها في الزمالك ولا اية...وايت مين وهارت مين اللي يمسك ثقافة.......هي ناقصة ياعمنا.....

ثم معلش...بما انا البنت مصرية شاعرة المنتدى..وبما ان مهيب ادمث المثقفين اخلاقا...وبما ان غير الوايت ده محبوبين كتير فاي واحد فيهم يستحق ذلك اللقب الغالي

ولا اقولك كمان....انت ناسي اني انا مدير فني في المم المتحدة وبشتغل في تطوير العملية التعليمية لاطفال الوطن العربي

طب مين اولى.....ياشيخ حرام عليك....طب وتصدق وتآمن بالله

لو الوايت ده دخل عندنا في الوزاه لكون اول من يقفل الوزارة بالضبه والمفتاح

وهسرح الوزارة كلها

ايه رايك بقى ..هه مليش دعوة <_<

[لماضة مصرية جدا]

السلام عليكم و رحمة الله و بركاته

عجبني انا اوي التوبيك دوت

حكومة ظل المحاورات

هييييييييييييييييييييييييييييييييه

هنعمل انقلاب يا جدعان ....(وش اي عسكري امن مركزي واقف و مش فاهم حاجة)

بس هو انا ليه كالمعتاد فهمتها ناحية تانية..

احنا خير اللهم اجعله خير

المحاوروات دي.....دولة قايمة بذاتها حلو

احنا بقي ننتخب مين حكومة المحاورات

يعني

مين وزير المية.....الللي بيرش ميه يا اما المحاورين يلعبوا مع بعض كويس....يا اما عشان يلعبوا بعيد؟

مين وزير المحاورات للشئون الاجتماعية......يعني مين اللي بيلم شمل المتشحتفين و المتشحتفات؟

مين وزير العلاقات الدولية.....يعني لما تبقي هتقوم عركة بينا و بين منتدي تاني....مين يمسك الشوم و يزقنا....قصدي مين يظبط المظابيط؟؟؟

مين...وزيرالمحاورات للشباب و الرياضة.....و علي الله تختاروا حد بكرش......هعترض و احتمال كبير افيرس المحاورات

و كده يعني

انتخبوا بقي

و تذكروا ان احنا في بلد درقماطي....(وش عمرو عبد الجليل قبل ما ينزل اليافطة الانتخابية و يعملها سالوبت....بس شعبي شوية :lol: )

سمعنا صوتك....و خليك ايجابي

كان معكم مراسل الساحة الشعبية

حوكشة

مؤقتا لغاية ما نشوف الاسم هيروح فين....(ورا الشمس باذن الله ....ده العقل الباطن بتاع امي....كل ما احكيلها علي حاجة mfb: )

[Simba]

ينفع الواحد يجيب شمسية ويبقي رئيس الوزرا

اهو كله ضل