حد جرب يموت قبل كده ؟

[احمد هادي]

طبعا مش واضح من العنوان اني بتكلم عن الموت .... :D :D

موت ايه يا عم احنا ناقصينك ؟ :sad:

استني بس B)

طالما دخلت الصفحة دي يبقي نصيبك انك تسمع

وانا هكلمك في كلام مهم :mellow:

وكونك ما بتحبوش ........ ومش عايز تجيب سيرته

مش معناه انه بعيد عنك :D

بالعكس - ابسلوتلي - علي رأي اللمبي

انا بس عايز افيدك :sad:

واديلك خبرات حلوة هتنفعك

لو مش النهادره اكيد بكره

ولا بعده

يا رواد المنتدي الكرام

حد جرب يموت قبل كده ؟

طب حد مات ورجع تاني يحكيلنا ؟

طب حد حس مرة ان الموت قرب أوي منه .... أو انه قرب من الموت ؟

حياتنا قصيره قوي يا جماعة

والموت قريب مننا جدا

عشان كده

انا شايف ان الواحد محتاج يفتكره من وقت للتاني

ويتكلم عنه كمان

انا شفت الموت بعينيه مرتين

مره ايام الخدمة العسكريه

في قطار السويس

بالليل

لأن الدنيا كانت ضلمة جدا

والقطر كان ابتدا يتحرك

بدل ما اخطو داخل القطار

اكتشفت اني خطيت بين عربتين

وان رجلي علي واحد من الخراطيم اللي بتوصل العربات ببعضها

ومرت ثانية

او اقل

او اكثر ..... مش عارف

بس كل اللي انا فاكره اني حاولت اصرخ .... لكن صوتي ما طلعش

وحسيت اننا قربت جدا جدا

وانها اللحظه الاخيره

لكن لقيت ايادي كتيره بتتمد

من العربة اللي علي يميني

وكان في أخرها باب مفتوح

واتسحبت

لداخل القطار

تاني مره

كان علي كوبري اكتوبر

المسافة اللي بعد العباسية

المسافه دي بتنتهي بمنحني حاد الي حد ما

وسرعتي كانت كبيره

والعربيه عامت

وليت نفسي بقرب من السور الحديد

وحسيت اني هطير وانزل علي البيوت القديمة اللي تحت

سبت الدريكسون خالص

لما لقيت ما فيش فايدة

بس في اللحظة الاخيرة

مسكته تاني

وعدلت اتجاهي

واستجاب الدركسيون

وده طبعا لأن ربنا استجاب لدعاء ابويا وامي قبلها

أعتقد ان في ناس عندها تجارب اقوي من كده مع الموت

وتقدر توصف اللحظات دي اعمق وافضل

واعتقد اكتر

ان احنا - أو انا علي الأقل - محتاج اسمع كلام من النوع ده

خصوصا اليومين دول

لان الكل بيموت نفسه فعلا

بس علي الدنيا

ها....في حد مات قبل كده وعايز يحكي تجربته؟

طب في حد قرب من الموت وعايز يوصف اللحظه دي ؟

آخر كلامي حديث عن الرسول عليه الصلاة والسلام بيقول فيه

( الناس نيام , فإذا ماتوا انتبهوا )

اصحو بقي يا بشر

تم تغيير الموضوع ليعبر عن المحتوى

تم تعديل 7 مارس 2006 بواسطة عادل أبوزيد

[الاسكندرنى]

السلام عليكم

استاذ احمد هادى

موضوعك جميل وله حكمه لمن اكمل قرأته الموت يعتبر شعور يومى يمر على الانسان انا ليه بقول كده لان النوم فى حد ذاته حاله من حالات الموت ولذلك اعتبره شعور يومى

عن تجربتى مع الموت تتلخص فى طبيعة علمى حيث اعمل كغواص فانا اغوص تحت الماء ولا اتصل مع السطح غير بمايكروفون و سماعه و كاميرا

انت متخيل الوضع ده طيب اوصفلك تانى

بتنزل على عمق 100 متر يعنى تقريبا الدنيا بتبقى سوده ليس فيها اى نوع من الالوان

تلمس القاع و تقف و حيدا بين هذا الظلام :D

عن تعرضى للموت و تجاربى معه

فقد تعرضت كثيرا للموت اما عن قطع فى الهواء الموصول من السطح

هجوم بعض الكائنات البحريه عليك

تشابك فى خراطيم و اسلاك الاتصال بالسطح

انهيار بعض المبانى التحت مائيه فوق راسى و سقوط بعض الاشياء ذات الاوزان من السطح الى القاع و تكون قريبه منى

طبعا كل ده خلانى احس فعلا ان الموت اقرب ما يكون الى الانسان جعلنى استشهد كل مره اغوص فيها يمكن المرة اموت فيها بجد فاستشهد حتى تكون اخر كلامتى يعنى اخذتها عادة

على فكرة الاحساس بالموت مش حلو و مش وحش يعنى

لو انت مرت بموقف حسيت انك بتموت اظن ده ممكن يكون احسن عظه ليك لتحسين سلوكك او ممكن يكون تكفير من الله عز و جل على بعض سيئاتك والله اعلم

[Lembic]

شكرا جدا على الموضوع المهم جدا ده.

أنا بالمناسبة على يقين تام بأن لكل إنسان أجل معين مش حيموت قبله بثانية ولا بعده بثانية.

مرة من فترة طويلة قوى كنت إتخبط فى عقلى وخرجت مع واحدة أمريكية قال إيه الgirl friend "بلا نيلة". وكنت مبسوط قوى وفاكر إنى واد مطقطق! وكنت سايق السيارة وماشى ومش واخد بالى قوى لأن الطريق كان جانبي ومفيش فيه سيارات تقريبا إلا كل فين وفين. وأعتقد إنى مكنتش نايم كويس كمان. المهم كنت سايق على سرعة تقريبا 50 ميل/ساعة يعنى كده 80 ك/ساعة. ومرة واحدة قطعت highway سريع متعامد على الطريق اللى كنت سايق عليه من غير ما أقف أو أخد بالى من الطريق السريع! وعلى فكرة الhighway اللى أنا قطعته من غير ماخد بالى دائما عليه عربيات مسرعة جدا يعنى نظام 75 أو 85 ميل/ساعة (120 -135 ك/ساعة) ومفيش عليه إشارات ولا مخارج.

من وقتها وأنا كل ما أفتكر إنى كان ممكن أقابل ربنا وأنا عاصى جسمى يرتجف وأشكر ربنا انه أعطانى فرصة ثانية علشان مخصرش دنياي وأخرتى.

الحمد لله.

لازم الواحد يكون دائما مستعد للقاء ربه لأنه ممكن يستدعى فى أي وقت والله! ربنا يرحمنا جميعا إن شاء الله.

[khedr]

الموت

تحس انك مش عارف اي شئ في تلك اللحظه او الفيمتو ثانيه لان فعلا اللحظه وقتها طويله جدا

متعرفش انت كنت فين وايه اللي حصل ...اغماءه...فقدان وعي...عدم ادراك

فيه حاجه بتحصل لكن ايه هي ... ؟ ...!

مش ممكن تقدر تفتكرها ولا توصفها.. .

تحس كأن الشريط عندها فاضي ممسوح...

ولا تاخد بالك من اللي معاك او من اللي حصل في تلك الفيمتو ثانيه

وما تدري نفس باي ارض تموت

كان زمان فيه كتاب للا ستاذ انيس منصور اسمه ارواح واشباح كان بيتكلم عن الموضوع ده

بس كتاب للكبار فقط.....لانه مرعب شويه