تهافت و تكرارية أخبار زيارات الرئيس

[لخبطه]

الراجل دا هيجنني من يوم ما وعيت على الدنيا وانا بسمع الكلمتين دول

عمق العلاقات الأخوية

توطيد العلاقات التجارية بين البلدين

مصر صاحبة دور أقليمي مهم

لدينا مع مصر علاقات تاريخيه

ألخ ..............

جمل مالهاش مضمون ولا معني مايعة المعني فضفاضه هلامية

تتقال بمناسبة إيه بمناسبة زيارة مبارك لأي بلد في العرب أو العجم أو البربر حتى

ملايين تصرف على الرحلات المكوكية وبعدين هما نفس المجموعة من التصريحات دي عقب كل سفريه

يرد واحد دماغة عاليه ويقول حاسب ياعم الحج دا المعلن الراجل بيعمل شغل من تحت لتحت

طيب هو فين الشغل دا هيظهر أمتى في القرن الكام طيب رحلات الصين والهند وامريكا السنويه فين نتايجها ؟

حد يرد ياناس حد يقول حاجه

نيجي بقا لموضوع المروحه ( مع الإعتذار لحسن حسنى )

فعلا المروحه لها فايده واحده على الاقل في الصيف هتيجب هوا لكن دا فايدته ايه

في الشتا هتشيلها في الدولاب وتكون من أصحاب المراوح يعني من ذوي الأملاك لكن الراجل دا فايدته ايه

أيه بقا المناسبة للكلام دا

افتتاحية الأهرام النهارده

طبعا الست ميركل بتقول ايه

اهلا بك في برلين ( المفترض يعني انها تقوله أهلا بيك في شبرا ) مهمه أوي الكلمة تتحط في افتتاحيه

مصر شريك مهم في المنطقه ( ماشي نعرف بقا مين اللى مش مهم كلهم مهمين )

تقوية موقف أبو مازن ( هيا هيا الرئيس هيقوي موقف أبو مازن في 2020 أبو مازن هيكون أقوي واحد في الحته

تسوية ملف أيران سلميا ( خلاص ياجماعه مين اللى قال الحرب الجايه على ايران مافيش الكلام دا الرئيس ضبط الموضوع مع الست ميركل

تم تغيير عنوار الموضوع ليعبر عن المحتوى

تم تعديل 12 مارس 2006 بواسطة عادل أبوزيد

[dr khaled]

عزيزي لخبطه

سئل السيد توني بلير في لقاء صحفي عن اهم الرؤساء الدي يحرص علي مقابلتهم بجانب امريكا و روسيا

فاجاب علي الفور رئيس وزراء اسبانيا لانها دوله اوروبيه قويه وفي تصاعد مستمر

بجانب طبعا الصين القوي العالميه الجديده

اما بخصوص حكامنا العرب فانهم ياتون الي لندن للتصوير بجانب رئيس الوزراء الانجليزي ليقولوا لشعوبهم انهم قالوا وفعلوا

تصدق ان ده والله كلام توني بلير

يعني العالم كله فاهمهم و هما لسه مش فاهمين

واحب اهديله بهده المناسبه فيلم اضحك الصوره تطلع حلوه :lol:

[Sherief AbdelWahab]

أي تغيير ، وأي حراك سياسي يتحدثون عنه طالما شكل الأخبار بهذه الطريقة..

كان من المفترض أن يحدث "البيه" الحراك حراكاً في طريقة صياغة الخبر الصحفي ، وفي طريقة تعامل الصحفي مع السلطة ، بدون نفاق أو تكرار لعبارات بلهاء ومبتذلة ومستهلكة وعديمة المعنى من أساسه..

لكن تقول إيه..

بركات أنس الفقي!

خلص الكلام

[لخبطه]

الموقر الدكتور / خالد

فعلا معلومة قيمه وأول مره أسمعها يعني الناس دي بتسافر بس علشان التصوير طيب وما يوفروا الفلوس دي وطالما هما مهروشين كدا مش ينكسفوا بقا من الناس دي

الاستاذ شريف

ازاى هيعمل حراك في الخبر والزياره نفسها كلها مش قادره تعمل حراك لأي حاجه دا لو صحفي قدر يعمل حراك لزيارة زي كدا يبقا يستحق جائزة نوبل لانه هيكون عبقري

تم تعديل 12 مارس 2006 بواسطة لخبطه

[م الغزالى]

- الحقيقة أننى منذ أن تركت مصر ومنذ 14 عام تقريبا وأنا فى كل مرة يزور فيها السيد مبارك ألمانيا وأنا أقرأ فى الصحف المصرية عن هتمام الصحف ووسائل الإعلام العالمية بزيارة الرئيس مبارك وإعطاء الإيحاء بأن السيد مبارك هو حافظ توازن هذا الكون من الإنهيار وأقسم لكم بالله أننى أتابع هذه الصحف ووسائل الإعلام خصيصا عند زيارته المبجلة وأرجوكم أن يدلنى أحد على هذه الوسائل التى إهتمت غير الدويتشة فيله وهى موجهة أصلا لمنطقتنا وللامانه خبر صغير عن إتفاق سعادته مع الجانب الألمانى بخصوص البرنامج النووى الإيرانى وكان باحد الصحف المحلية وهى برلينر بوست حاجه كده زى جريدة أخبار دمنهور

.

[Th!nk]

فعلا يا جماعة سيادته أحد أهم الأقزام فى عالمنا الحالى وأعلامنا يحاول جاهدا أخفاء هذه الحقيقة

الناس دى فقدت الأحترام من الجميع لأنها فقدت أحترامها أمام نفسها

ولو عندهم كرامة وعزة نفس كانوا أشتغلوا فى بلادهم بما يرضى الله وأتقنوا الحكم ونشروا العدل وأعطوا المراكز القيادية للمجتهدين وليس للفاشلين فاقدى الشرف والكرامة

لكن على العكس تجدهم يمارسوا البلطجة على شعوبهم وبيفردوا صدرهم علينا أوى ولما تيجى على حد من الخارج يتحولون الى ضباع !

مش حنسى كذبه المتواصل على مدار فترة رآسته وأحتجاجه بالكثافة السكانية على فشله فى أدارة الدولة

مش حنسى تصريحه فى أفتتاح مشروع توشكى(اللى فشل وفلّس البلد) لما قال قوله المأثور: أمريكا أقوى بلد فى العالم ومحدش حيقدر عليها(منتهى الطموح من رئيس بلد)

مش حنسى أن الجنية فى ساعة زمن فقد 40 % من قيمته

ومش حنسى يوم ما كانت الأسعار مولعة فى الشارع واذا به يقول فى خطبته الشهيرة : أننا أصدرنا مجموعة من القرارات للسيطرة على الأسعار... وكله بقى تمام يعنى

مش حنسى أن واحد أسمه رامى لقح(مش متأكد من الأسم التانى) لهف لوحده 9 مليار جنيه ويعيش الآن فى فرنسا بفلوسنا ملكا غير المليارات العديدة الأخرى لأسامى لا أذكرها والكل أخذ الفلوس وطار وبعدها بوز الأخس يظهر بتصريح ع التليفزيون وبعاميته السمجة يقول: هو أنتم فاكرين أننا حنسيبهم... لآ بلابلا برلابلا مش فاكر

والأيام تعدى والفلوس ما ترجعش وخلاص محدش بيتكلم عن الفلوس ولا يحاسبه ... الفلوس فى البنوك خادها الغراب وطار

أصل موضوع ذى ده فى أى دولة محترمة مكنش عزله بس... دا كان شمّع البلد من فوق لتحت وجاب كل المسئولين وأعطاهم عقوبات تبدأ بالأعدام وتنتهى بالحبس عشان فلوس الناس الغلابة... لكن مصر يا جماعة دى لهطة قشطة... ليك كل السلطات ومحدش يقدر يحاسبك... والله آخر سلطنة... ليه حق يلزق بغرة ويخش بحماره... القانون ودستور البلد بيقوله "أستبد وملكش دعوة" وفعلا كله بالقانون... يعنى الراجل المستبد عدّاه العيب...

لكن أنا لسه مش فاهم هو الراجل ده بيحتقرنا ليه... أحنا الشعب المهاود الصبور كالجمل أحتملنا مخه التخين وضلامته وفشله فى كل الأتجاهات وسكنا فى المقابر وغرقنا فى العبارات وفى القطارات وفى حوادث السيارات وبنشم هواء فاسد بقالنا 25 سنة وعمّالين لسه بنشد الحزام... ليه بعد كل ده لسه بيحتقرنا!! وليه بيسافر بفلوسنا عشان يجرسنا أدّام اللى يسوى واللى ما يسواش على أساس أننا شعب جاهل لا يعرف كيف يختار! وهل اذا أخترنا هل يمكن أن نختار أسوأ منه!!

يا ريّس سلّم الراية ابوس أيد اللى خلفوك... البلد أتجمدت فى الوقت اللى أحنا شايفين فيه بلاد الدنيا بتعلى وبتعلى كرامتها!

أن لم يكن ما فعله بالبلد وبالناس خيانة عظمى فماذا نسمى ما فعله!

تذكروا موضوع المبيدات المسرطنة اللى صاحبها حر طليق فى ظل عصر الحرية!

[Sherief AbdelWahab]

وعندما تشاهد عناوين روزا اليوسف في الزيارات الرئيسية .. ستضحك أكثر..

الإصرار الفائق على جعل الزيارة ، والتصريحات مادة "مشوقة" بأي طريقة ، كما لو كانت قد انعدمت المواضيع التي توضع في مقدمة الصفحة الرئيسية في الجريدة ، وبعبارات تنم عن عبط صارخ : "ما لم ينشر من تصريحات الرئيس" ، "أسرار زيارة الرئيس".... الخ..

الغيظ مضحك اليومين دول.. :closedeyes:

الزميل Think:

اسم رجل الأعمال رامي لكح.. وهذا للتوضيح..

خلص الكلام

[لخبطه]

المحترم جدا Koenig der Loewen

كلامك جميل عارف الناس في الإعلام في مصر متهيالهم أنهم في القرن الثاني عشر يعني هيقولوا الصحف الألمانية أبرزت زيارة الرئيس هنقول أمين مش عارفين أن العالم أصبح مربوط ببعضه وانه واحد زي حالاتك يقدر يفضح كذبهم العلني

الاستاذ think

انته الظاهر فايض الكيل معاك من الريس لذلك ما صدقت فحاولت تجمع كل مصايبه في مقال واحد ياعم كلنا عارفين

لذلك انا هكتفي بجزء من كتابتك وهو

وليه بيسافر بفلوسنا عشان يجرسنا أدّام اللى يسوى واللى ما يسواش على أساس أننا شعب جاهل لا يعرف كيف يختار! وهل اذا أخترنا هل يمكن أن نختار أسوأ منه!!

فعلا كلامك منطقي زيارات الريس وكلامه مع الناس في اوربا إساءه بليغة للشعب المصري بكل حضارته بنقول للناس دا أحسن واحد في البلد