استفسار بخصوص سفر عمل للسعوديه من خلال مكتب سفريات

[Mohamed Badawy]

السلام عليكم ورحمة الله وبركاته

يا جماعه انا جالى عرض من شركه سعوديه اسمها بن دايل عن طريق مكتب سفريات اسمه توظيف.

رحت عملت مقابله وكل حاجه ماشيه تمام تانى يوم مكتب السفريات كلمنى عشان نبدأ فى الاجراءات وتجهيز الاوراق. و محدش من الشركه نفسها كلمنى ولا خاطبنى..

اجمالى المبلغ اللى المكتب طلبه 13000 جنيه.

طبعا بدأ فى شرح الخطوات انى هروح لهم المكتب هو اللى هيجيب ورقة النت بتاعه انجاز مع انى اعرف اجيبها بس هو مصر انها تكون من خلاله.

ثم هيطلع معايا مندوب للكشف وخلافه ودى عاوز فيها 1000 عموله ليه وللمندوب و 2000 جنيه كشفوفات.

وطبعا عاوز شهادة التخرج عشان يبعتها للتصديق عليها من القنصليه ودى لوحدها عاوز فيها 4000 جنيه عشان هيدفع فلوس لناس عشان تخلص بسرعه.

وطبعا عمولة المكتب .

و عاوزنى اغير المسمى الوظيفي وبيقولى اختم ورق البطاقه من شركتك عادى واغير البطاقه عادى على الرغم من ان فيه ناس قالولى لازم لما تغير المسمى تغيره بالمسمى اللى جى فى عقد العمل عشان التأشيره تمشي .

ولما سألته فين العقد لأن اللى اعرفه ان المفروض قبل اى حاجه يكون فيه عقد وبعد ما امضيه ابدأ فى الخطوات دى قالى لأن العقد بيكون مكلف على الشركه فا مش بيعملوه غير لما الاجراءات تخلص الاول لضمان مصداقيه الموظف انه فعلا هيسافر لأنهم بيكونوا متخوفين انهم يعملوا عقد للموظف وبعدها ميسافرش تبقى الشركه خسرت تكلفة العقد ثم سألته على الاقل يبعت ليا اوفر ليتر او جوب ليتر . قالى حاضر ومبعتش حاجه.. وكمان حاجه كان الاتفاق مع ممثلى الشركة ان الاقامه عليهم كامله ولقيت ممثل الشركه بيقولى ان انا هتحمل 750 ريال من ثمن الاقامه اللى هو 4000 ريال.

يا هل الخير انصحونى اعمل اللى بيقول عليه ولا لا لأنى حاسس ان فيه حاجه غلط لأنه كمان بيقولى ان لو حصل والتأشيره اترفضت او الموضوع فشل وماسافرتش هيرد ليا جزء من عمولة المكتب وبكده هيروح عليا مبلغ كبير.

تم تعديل 27 يوليو 2017 بواسطة Mohamed Badawy
اضافة

[Mohamed Badawy]

يا شباب 48 مشاهده بدون رد واحد حد يفيدنا بالله عليكم 

[Guest قارئ على أد حاله]

صدقني حاسس بيك و بقلقك و الكلام ده و الطلبات دي و تفنطيتها بالطريقة دي تقلق و بتفكرني بالعروض التي تأتي من افريقيا و خاصة نيجيريا.

متهيألي أول حاجة تعملها اسأل عن الشركة اللي جايلك عقد عليها و مش بس كدة  انتظر هنا يمكن حد من اللي مروا بتجربة السفر حديثا  ممكن يدلي بدلوه و يكون مفيد أكثر مني.

 

[Guest محمود]

انا صدقت شهادتي من الملحق الثقافي والقنصلية السعودية في سنة 2009 بـ 280 جنيه من مكتب الفجر لالحاق العمالة

مبلغ 4000 جنيه دا يكفي لانك تعرف ان المكتب اللي بتتعامل معاه نصاب درجة أولى

انت مش محتاج مندوب يمسك ايدك عشان تروح تكشف ، أي حاجة بتعملها بنفسك الا انك تدخل السفارة السعودية وديه الحاجة الوحيدة اللي بتبقى من حق مكتب السفريات

الخلاصة:

فيه ناس كتير بتدفع كل حاجة على حسابها طالما هو طالع حر ـ يعني باتفاق مع الكفيل انه هايطلع يدور على شغل من نفسه 

لكن لو جالك عقد من شركة يبقى كل حاجة عليهم ، لكن دا مايمنعنش ان فيه بعض الشركات بتقولك حاول تتصرف انت في الفيزا عن طريقك لأنهم معندهمش تأشيرات

 

[Mohamed Badawy]

والله يا جماعه انا شاكر ردكم جدا وواضح من الردود ان الموضوع مش مطمئن وانا فعلا مكنتش مرتاح للكلام بعد ما اتقبلت فى المقابله.. فا انا هصرف نظر عن الموضوع وربنا يعوض عليا بحاجه تانيه شكرا ليكم مره تانيه وربنا يوفقكم ويجزيكم خير.

[Guest المستشار]

نصبببببب

[Mohammed Ali Alqadry]

سيدي الفاضل

أنا حاسس من كلامك إن المكتب بستغل سيادتك و كل شويه عمال لا مؤاخذه يعني يمص دمك

سيادتك كلم مكتب كويس موثوق فيه من قبل الأعضاء

أنا مش عارف أنت منين أنا من الشرقيه لو عايز مكتب كويس أقولك

بس خلي بالك كل المكاتب بتستغل لأنهم بيتاجروا فينا

إحنا بندور على أقلهم إستغلالا ً