كائنات الخليج المنقرضة

[المدهش]

فيه حد منكم كان في الخليج..ورجع مصر بمزاجه..يعني مش همه اللي قالوا له مع السلامة..يا ريت لو هناك من تنطبق عليه هذه الشروط يحكي لي تجربته..لأن العائد من الخليج"بمزاجه" أصبح فصيل نادر من البشر..وأعتقد أنه يمكن أن يكون من الكائنات المنقرضة!

[احمد هادي]

من الجيل الحالي ......

ما شفتش .....من الجيل السابق

شفت كتير

والله في

أبويا مثلا

ربنا يمسيه بكل خير

رجع من الخليج بمزاجه

في منتصف الثمانينات

يعني ايام العز

عشان حس انه لو طولنا هناك

في ظل النظام التعليمي هناك

هنتعب في المستقبل في مصر

وطبعا مكانش ينفع يسيبنا في فتره المراهقة في مصر من غيره

وبعدها جاله عروض من كذا بلد خليجي

بس هو رفض .....

في إباء وشمم

والحمد لله فلحنا

بس للأسف

اضطريت أرجع الخليج

مع ان الوالد كان بيقولهم

يمكن في المستقبل الوضع يتقلب

وانتوا اللي تيجوا تشتغلوا في مصر

يمكن جيل الأحفادهو اللي يشوف الأيام دي ؟؟

الله أعلم

تحياتي

[nemr111]

المصريين فى الخليج أو خارج مصر ..يطلق عليهم الطيور المهاجرة..على رأى الست نجاة و بعتنا مع الطير المهاجر سلامات و جوابات..و طبعا بعد مشوار الهجرة بالنسبة الطيورحين تحط على اعشاشها و ترتوى لتعاود رحلتها .. هذا التسلسل الطبيعى للهجرة ..يعنى لما نعمل لنا قرشين و نستريح نرجع نكمل مسيرتنا فى البهية ام الدنيا..لكن تقدر تقولى يا عم المدهش نعمل ايه مادام البلد زى الزفت و اللى النهاردة بقرشين بكرة تلاقيه بجنيه .. الاخ اللى بيقول ان ابوه عمل كده و رجع عنده حق لانه فى الثمانينات كان اللى بيسافر سنه يرجع يبنى بيت و بعد خمس سنين يكون عنده عمارة كويسة يرتاح فيها و عليها طول عمره..لكن انت يا عم المدهش عاوز اعرف انت بعد كام سنه غربة عرفت تبنى عشة .. و لا تفتح مشروع علشان تكمل حياتك بالحلال و برضا تام و قناعة نابعة منك شخصيا لا بقبول الامر الواقع ان دا حال الدنيا و لازم نرضى بالنصيب ..الاخ المدهش انا ازعم اننى فى مصر مرتاح ماديا و بالرغم من ذلك رحلتي الى الخارج طالت , تعرف لماذا لاننى عملت بالخليج و وسط اوروبا و عرفت معنى ان تتعامل مع خليجي و أن تعيش حياتك فى الغرب كأنسان .. يا سيدى العودة قد تكون حميدة فى ظروف و فى اخرى قد تكون غير مباركة ..مصر الان فى منحنى و منزلق خطر جدا .. الأخلاق فى تدهور و السرقات على ودنه .. ناهيك عن الرشاوي .

كيف تعود فى ظروف ( نأمل ان تنتهى قريبا ) و معك اولاد و قد ضحيت بالغالى و النفيس لكى يكبرو .. هل ينزلوا الشارع كجامعة الدول العربية او شارع اللاسلكى فى المعادى علشان يضربوا المزاج او يكونوا بلطجية .هل تستطيع ان تستثمر اموالك فيهم من حيث التعليم فى المدارس الاجنبية و الخاصة لكى تنشئ جيل يستطيع ان يفكر بدلا من الصراع على النقطة و المواد المحشورة علشان لما يكبر يكون حمار على رجلين اتنين.

انا من رأيي العودة تكون مبكرة جدا و الاولاد صغار و الاحلام بسيطة.. أن العودة مع الاولاد و هم كبار صعب جدا لأن القرار لا يتخذه رب الاسرة بل يتشارك فيه جميع افراد الاسرة و الحلم الواحد اصبح احلام كثيرة بعد افراد الاسرة ..بين الباشمهندس اللى ها يكون و الدكتورة باعتبار ما سيكون و اللى ناوى يفتح مطعم و يجيب من الأخر علشان يلم الدور

[Lembic]

أنا والدى رجع بعد 22 سنة بالخليج وقال كفاية بهدلة وأنا لو حموت من الجوع مش رايح الخليج مع العلم بأن والدى كان ممن يطلقون عليهم "كبار الموظفيين" يعنى سكن مجانى وكهرباء مجانية وعلاج مجانى لكن برضه بهدلة .