ما تقوليش خليها لمصر

[المدهش]

ما تقوليش خليها لمصر..هذه الجملة سمعتها من طفل يحدث أبيه في أحد محلات بيع الملابس بجدة..الولد يلح على أبيه أن يسمح له بارتداء الحذاء الغالي الذي اشتراه له ..ويقول ..لا يا بابا ما تقوليش خليها لمصر..أنا عايز البسها هنا"يقصد الحذاء"..وهذا نموذج يتكرر كثيراً ولا أعرف تفسيره المنطقي أو النفسي..المصريون في بلاد الغربة ..وخصوصاً في الخليج يشترون كل شئ ويركنوه حتى يعودون لمصر..بداية من الحذاء والبنطلون والفستان والقميص وحتى البطانية والكوب ووعاء الطبخ..رغم أن بعضهم يعمر هناك كأنه سيعيش في الغربة أبداً..تقدروا يا مغتربين تقولوا لي ليه..ولا نخلي الاجابة لما نرجع مصر.

[م الغزالى]

عزيزى المدهش

لوكان على الملابس تهون

انا أعرف ناس عندهم شقق إشتروها من 20 او ثلاثين عاما وقد تم تأثيثها لإستعمالها مايقارب من شهر فى السنة و أخيانا كل سنتين

ومن بعد تركت للتراب و طبعا أصبح الأثاث قديم ويحتاج تجديد ومن بعد الشقة محتاجة ترميم و الخ بمعنى الذى يعمل به فى الخارج ويتغرب لأجله يصرفة بالطريقة الخطأ .

أعتقد انها العقلية المصرية التى لابد ان تتغير

[nancy]

فعلا دى مشكلة كبيرة جدا عند المصريين بيعيشوا فى اى بلد عربى عمر طويل جدا ويحرموا نفسهم من كل حاجة علشان لما ينزلوا مصر انا اعرف دكتور مصرى وعائلتة فضلوا يحوشوا اكتر من 20 سنة تدخل بيت الغربة ممكن تفتكرة غرفة البواب وفى مصر اكتر من شقة وموبيليا غالية جدا ولما نزل مصر وبعد ما دخل ولادة الجامعة ولسة حا يستقر ويستمتع بالى تعب علية عمرة كلة مات

واكتر من كدة لما انت كمصرى تقرر تعيش حياتك وتشترى عربية غالية وتعيش فى بيت مستوا عالى يقولك دة مجنون ياما معاة مليون جنية انما مش ممكن يفكر انك بتعيش لان العمر بايد ربنا فمش حتحوش وتاجل حياتك وتضيع احلى ايامك فى انتظار الرجوع لان بصراحة محدش بيتغرب وبيرجع لمصر تانى الا لو مضطر للرجوع انما بكامل ارادة مستحيل

[nemr111]

يمكن يا عمنا الراجل هاينزل مصر قريب و الواد ها يبوظ الجزمة لا مؤاخذة فعشان كده كان بيقول له خليها لمصر .. هو الراجل بعد اذنك يعنى لو كان بخيل كان ها يجيب لابنه جزمة غالية مانت عارف سيادتك أنه فى الخليج ممكن بريالين يشترى جزمة مادام كله لمصر يبقى يخليها فلوس احسن..و معلشى يعنى انا مش هاضم موضوع ان الجزمة غالية و يشيلها لمصر لأن الجزم فى مصر ارخص بكثير من الخليج و بخاصة للانواع التى تليق بالانسان ..و مفيش داعى نحقر من من كلمة خليها لمصر .. الكلمة تحمل معانى عميقة جدا و منها ان مصر فيها يام الرفاهية و فيها المستقر للاستماع بخيرات سنوات الشقاء و الغربة ..اما ان تلاقى واحد ساكن فى بيت بواب فى الغربة ..ممكن جدا و لكن هل كل المصريين عايشين كدا , انا لا اعتقد بالعكس المصري يتكيف حسب ظروفه و لما تسمح له بسنة بحبحة بيقوم بالواجب و يكون خدوم و فنجرى مع اللى حواليه لأنه حاسس ان النعمة يجب أن تعم الكل

[مريوم المصرية]

الواحد المفروض ما يحرمش نفسو من حاجة بالذات الأساسيات زي الهدوم واللحمة

تخيلو يا جماعة اتعرفت على واحدة عايشة ف مكة أبوها مهندس ف شركة كبيرة،ف وسط الكلام عرفت ان اللحمة ما بتدخلش بيتهم!!!!!!!!!!!

مش عشان اليوريك أسيد والنقرس والأملاح والبلاوي دي (منظور صحي يعني)

لأ.عشان يوفروا ويقدروا يعيشوا لما يرجعوا مصر.تخيلوا انهم عالحال دة من يوم ما جم والبنت عندها 16 سنة ومولودة هناك!!!!!!!!!!!!!!!

16 سنة أو أكتر من غير لحمة؟؟؟؟؟؟؟؟؟؟

دة غير ان مافيش حاجة اسمها خروج ولا فسح ولا أكل من برا!!!!!!!!

.. غير منظر بيتهم ومستواه اللي فعلا لو أي حد سعودي دخلو يخرج يسب ويلعن في اللي خلفونا (المصريين)

يا رب ما تجعلناش سبب لكره الناس للمصريين.

كل واشرب والبس على قد مستواك المادي والاجتماعي.من غير اسراف

وما تنساش دماغك عشان مهمة أوي.وللبنات خصوصا روحي اشتري عطر وماكياج واستعمليه من غير تبذير

بس لازم تعيش...والواحد مش واخد منها حاجة غير عملو الصا لح...

تم تعديل 17 مارس 2006 بواسطة مريوم المصرية

[MZohairy]

للأسف شفت نماذج كتيير جدا من دي في السعوديه

في مكه

و في جده

و في الرياض

و في الخبر

وكلها العن من بعضها

و ده بيخلي سمعتنا مش ولا بد ابدا

وبيعتقدوا ان المصري مش متعود يصرف

وبالتالي مفيش داعي ياخد مرتب عالي

و للأسف السيئه بتعم

ربنا يجازي اللي كان السبب

[ايهاب سالم]

وبيعتقدوا ان المصري مش متعود يصرف

وبالتالي مفيش داعي ياخد مرتب عالي

النقطه دي صحيحه ميه في الميه

دايما المصري ياخد مرتب أقل لنفس الوظيفه لأنه مشهور عنه انه ما بيصرفش و بيعيش بأي حاجه

و بيركب أرخص العربيات (ده إذا اشترى عربيه أصلا)

و بيفرش بيته من سوق الأثاث المتكهن (مش المستعمل)

و الكلام ده ينطبق على ناس بتاخد مرتبات عاليه مش عمال غلابه

[nancy]

زمان كان عادل امام بيقول بلد شهادات على المصريين دلوقت الدول العربية بلد مظاهر

يعنى علشان تطلب فاى شغل مبلغ لازم يكون العميل شايف انت عايش فى مستوى ازاى وعندك عربية قريبة من نوع عربيتة

وانت كل حاجة حواليك غاليا ولا حيستخسر الى حتطلبة وممكن يقولك كفاية نص دة

يعنى العميل بيقيم شغلك ومظهرك مع بعض

فلازم تعيش كويس علشان يكون عندك دخل كويس

[MZohairy]

يعنى علشان تطلب فاى شغل مبلغ لازم يكون العميل شايف انت عايش فى مستوى ازاى وعندك عربية قريبة من نوع عربيتة

وانت كل حاجة حواليك غاليا ولا حيستخسر الى حتطلبة وممكن يقولك كفاية نص دة

يعنى العميل بيقيم شغلك ومظهرك مع بعض

فلازم تعيش كويس علشان يكون عندك دخل كويس

صح 100 %

ما عدا التخصصات العلميه النادره

[مصرية الهوى]

أنا هأقول رأيي من الضفة الشرقية .. بس ارجوكم محدش ياخده بحساسية .. اعتبروني مصرية :closedeyes: ..

فعلاً للأسف الشديد فيه كتير مصريين بيشوهوا جدا صورة المصري .. وخاصة من الناحية الاقتصادية والنظافة الشخصية .. أقولكو النماذج اللي قابلتني ..

أغلب الدكاتره اللي بيدرسولي مصريين .. بعضهم – مش كلهم - للأسف بيدي صورة سيئة جدا للمصريين .. مثلا بتلاقي الدكتورة جايه بهدوم مبهدلة وشكلها مبهدل وشعرها كله زيت .. واحيانا هدوم مقطعة .. اه والله .. دي وهي دكتورة .. امال نقول ايه على الناس الجهلة .. فالبنات بيقولوا يعني هي مش لاقيه 20ريال تشتري بيهم جاكيت جديد .. والا خمس دقايق الصبح عشان تستحمى .. ان الله يحب ان يرى اثار نعمته على عبده ..

وبنت خالتي قابلت نماذج كده .. فتكون عندها اتجاه ان كل المصريين لا مؤاخذة يعني مش نضاف .. حاولت اقنعها ان مش كل المصريين كده بس للأسف .. تقولي البنات اللي معايا في المدرسة والمدرسات اللي بروح ادرس عندهم كلهم كده .. مين المصريين اللي بتتكلمي عليهم انتي !!!!

مرة رحت عشان اخدها من الدرس عند مدرسة مصرية .. وانا تحت كلمتها وقولتلها انزلي بسرعة .. قالتلي بصي انا محتاجه ربع ساعة .. اطلعي انتي ووطت صوتها وقالت عشان تشوفي برضه اللي قلتلك عليه ..

المهم طلعت .. لقيت باب الشقة مفتوح .. والدوشة واصلة لاخر الشارع .. وقفت عند الباب جه عيل صغير لابس هدوم بيتهيألي بقالها شهر متغسلتش وهو كمان بقاله شهر مستحماش قالي ادخلي .. دخلت الشقة يا ساتر .. ريحه بصل على توم على قرف .. والارضية موكيت .. زبالة والله العظيم زبالة .. ورق وعلب ومناديل مرمية على الارض .. والبيت مبهدل عالاخر .. سلمت على الست .. وقعدت على الكنبة وانا قرفانه ومش طايقة نفسي .. يا جماعة دي النظافة من الايمان .. يعني حرام عليكي اتكسفي من الناس اللي بتخش البيت .. أول مرة أشوف بيت ساكنينه بني ادميين بالمنظر ده .. يعني مش لاقيين ريالين يشتروا بيهم مقشة يكنسوا بيها الارض .. والست متعلمة وجامعية .. مش معقولة كده والله .. المهم عيالها عملوا دوشة جامدة .. قامت ومسكت ابنها ونزلت فيه ضرب .. اول مرة اشوف حد يضرب ابنه بالشكل ده .. والواد بيعيط جامد .. قمت مسكتها : حرام عليكي يا ستي .. مش معقول اللي بتعمليه ده .. ده ابنك !! ..

سابته و دخلوا جوا .. ورجعت عشان تكمل الشرح لبنت خالتي .. بعد ما خرجنا نزلت جري على السلم .. وانا بقول لبنت خالتي الله يخرب بيتك على بيت الاشباح اللي جيباني ليه .. قالتلي : شفتي مش قلتلك .. قلتلها : طب تعالي ووصلتها عند باب الشقة اللي كانت صاحبتي ساكنه فيها في نفس العمارة .. قلتلها الشقة دي انا دخلتها مليون مرة .. 180 درجة عن شقة الست اللي فوق دي..

صاحبتي دي هي أول بنت مصرية تعرفت عليها وهي اللي خلتني احب المصريين وبقت صاحبتي الانتيم .. كانت نموذج مشرف جدا جدا .. بعدها قابلت نماذج سيئة .. بس خلاص الانطباع الاول اللي تكون عندي كان جميل .. فالصورة اكتملت عندي .. وبقيت لما اقابل مصريين وحشين باتغاظ اكتر منكم .. بأقول حرام عليكم بلاش تشوهوا صورة مصر والمصريين بتصرفاتكم دي ..

فعلا الواحد بتصرفاته واخلاقه ومظهره .. مش بيمثل نفسه بس .. بيمثل بلده كمان ..

ومش المصريين بس .. حتى السعوديين اللي بيعشوا برا السعودية بيقابلوا نماذج من السعوديين .. نفسي اسحب منهم الباسبور السعودي واقطعه .. بيبقوا نماذج سيئة فعلا ..سواء جوا البلد او برا ..

ولا يزالون مختلفين ..

[المدهش]

واللبنانيين أساتذة في الحكاية دي ..يعني ما فيش تقريبا لبناني في الخليج بياخد مرتب قليل ، رغم إن كفاءتهم ليست في مستوى كفاءة المصريين ، لكن همه شاطرين جدا في العلاقات العامة ومظهرهم كويس، وولاد دنيا..لكن يا جماعة ..انتوا صحيح أكدتوا كلامي ..لكن ما حدش فسر الظاهرة..ليه احنا بنعمل في نفسنا كده..يعني احنا مش وش نعمة ، ولا هيه سيكولوجية الفقر اللي بتخلي الواحد يخاف يصرف ..لا بعدين القرشين يضيعوا ويرجع للفقر تاني؟!..

[nancy]

مش بس اللبنانى حتى السورين تدخل بيوتهم ديما بتكون شيك وولادهم لابسهم شيك لان السورى داخل من منطلق انة حيعيش هنا

ودى حاجة بتعجبنى فيهم بس السورى مش فى شطارة اللبنانى الى يضحك فى وش الكل على اساس متخصرش حد يمكن ينفعك على المدى البعيد وحبوبين جدا فى تعاملهم

المصرى لية بيعمل كدة

اقولك ... لانة اولا كتير جدا من المصرين بيخرج من مصر بعد ما يكون صبرة نفذ وكل السكك اتسدت وبيكون الخلاص فى الغربة سواء من مشاكل مادية او عائلية او عاطفية او حتى وظيفية انة حاسس مش واخد حقة بيطلع بروح مقفولة وحزينة فلما بيبداء يجيلة دخل بيحس انة عاوز يقهر الدنيا الى القهرتة ويورى الى ظلموه هو بقى اية وبيبتدى القصيدة بانة حيرجع بعد تلات او اربع سنين فبيمسك على نفسة لتحقيق الهدف طبعا الى جانب مقارنة الاسعار مبين مصر وهنا وعموا المصرى متعود على شد الحزام من ايام الاستعمار ولسة لحد النهاردة مظهرش فى مصر عصر الرخاء دة

فبيلاقى ان المدة الى قررها محققتش امالة او طمع فى ان طول المدة حيخلية احسن فيدور العجلة اكتر واسرع ويمسك على نفسة اكتر وايامة تجرى والايام تجر بعض وراها السنين وينسى هو كان جاى لية اصلا

ديما هدفة انة حيبقى يستريح ويجرى وراء سراب الراحة فى صحراء الغربة لحد الغربة ماتسحلة

[se_ Elsyed]

أنا بأختلف معاكو في الموضوع ده إختلاف كُلي وجزئي

فاللي معفن في بلده معفن برضوا بره بلده .. يعني البخيل المقرطم على نفسه ما بيصحاش بين يوم وليلة يبقى فنجري ..

وما حدش يقولي أصل اللي بقى له 16 سنة ومش هاين عليه يتشري كيلو لحمه لما يرجع مصر هايشتري عجل ويربطه في البلكونة وكل يوم يقطع منه وياكل ؟

وهانروح بعيد ليه .. هل الزملاء الأفاضل الموجودين دلوقت في المنتدى واللي عايشين خارج مصر هم عينة عشوائية من الشعب المصري .. أم هم طبقة مصطفاة بعناية وتجمعت في مكان واحد ؟

طبعاً الإختيار الأول هو الأصح .. طب كام واحد منكم عايش عيشة المعيز اللي بتحكوا عنها دي ؟

إذا كانت نسبة كبيرة .. يبقى أحنا فعلاً كمصريين كده ..

وإذا كانت نسبة لا تُذكر يبقى دول بعض الناس مُصابة بمرض خطير إسمه البُخل ودول موجودين في كل العالم .. وأظن إن إحنا شوفنا هنا خبراء أجانب - اللي أساساً معظمهم جاي من على قهوة السواقين ف بلده بس هي عقدة الخواجة - وأكاد أقسم إن الواحد فيهم ما بيغيرش القميص اللي عليه وكإنه بقى جزء من جسمه ...

وعلى العكس تماماً . ولله يا جماعة لي زملاء عمل وأصدقاء مصريين كثيرين .. ممن نسميهم خروبيين .. يعني بيخربها وبيصرف باليمين والشمال على حياته هنا ويقولك يا عم إحييني النهاردة وموتني بكره ... وساكن في أحس مسكن وبيركب أحدث عربية ... ولا شك إن شفت فئة قليلة جداً عايشين عيشة معفنه ومقرطمين على نفسهم تحت شعار " لما أنزل مصر هافتح على الرابع " لكن ده لو لحق يتمتع أساساً وإن مامتش قبلها .

[مصرى00]

أنا بأختلف معاكو في الموضوع ده إختلاف كُلي وجزئي

فاللي معفن في بلده معفن برضوا بره بلده .. يعني البخيل المقرطم على نفسه ما بيصحاش بين يوم وليلة يبقى فنجري ..

وما حدش يقولي أصل اللي بقى له 16 سنة ومش هاين عليه يتشري كيلو لحمه لما يرجع مصر هايشتري عجل ويربطه في البلكونة وكل يوم يقطع منه وياكل ؟

-------------------------

انا معاك

لو الكلام على الإطلاق كنا من زمان روحنا

ولكن فيه ناس هنا عايشة هنا وناسية مصر بمعنى انهم لايوفرون شيئ من دخلهم كلة اكل وشرب ولبس

رغم الدخل العالي

ولكن ............. من شب على شيئ شاب عليه

و لايمكن التعميم