اتجوزت ؟....ليه ؟

[احمد هادي]

حبايبي الحلوين

زباين محاورات المصريين

خاصة المتزوجات منكم

والمتزوجين

عندي سؤال ليكم

بسأله لنفسي كتير اليومين دول

وكل يوم أطلع بإجابة شكل

حسب الظروف

وحسب حالتي النفسيه

لأني علي وش جواز

وانا بطبعي بحب تحليل الأمور

ومعرفة الاسباب

سؤالي هو

انت اتجوزت ليه ؟

عشان العلاقة الحميمة ؟

عشان حبيت ؟

عشان تخلف؟

ونس ؟

زهق ؟

تخليص حق ؟

ولا كل ده علي بعضه ؟

ولا ايه بالظبط ؟

[سهيلة]

واللة يا احمد رغم انى لسة ما اتجوزتش لكن ممكن اجاوبك على السوال دة

الجواز

دة حاجة كومبلكس كدة

يعنى اسباب متعددة منها الحلو اللى بية بنتغاضى بمزاجنا عن الوحش

يعنى الاسباب او المعانى الحلوة ف الجواز هية الاتى

الاستقرار اللى كل انسان بيدور علية

السكن والمودة اللى ربنا قال عليهم والراحة النفسية

بتلاقى انسان يشاركك كل حاجة الحلو والوحش انسان يسمعلك وتسمعلة ونس يعنى

بتلاقى حد يخاف عليك ويهتم بيك

وياريت لو تخلل دة كلة الحب بين الطرفين بيبقى بيتك هوة مملكتك اللى مش بترتاح غير فية

[سامح أبوبكر]

عزيزى هادى

السؤال عميق جدا

جدا

واعتقد انك يمكن أن تجد ملايين الأجابات عليه

لكن اسمح لى بأجابة شخصية

كوميدية

انا واحد من الناس

اتجوزت عشان

اطلق

:D

:P

[tmtm]

انا مااتجوزتش لسة بس اسمع دايما المتجوزين بينصحوني ويقولوا:

الجواز علاقة إجتماعية فاشلة.... mfb: !!!

على اعتبار ان كل واحد من الطرفين بيكون سعيد في بيت أهله وطلباته كلها مجابة وفي قمة السعادة

وبعدين لما يتجوزوا بيطالب كل واحد انه يتعود على طبع التاني وكل واحد عليه واجبات لازم يقوم بيها :D

وطبعا متطلبات البيت كتيير طبيخ وغسيل وتربية أطفال بعد كدة......الخ :sad:

يعني بإختصار بعد كدة الواحد بيسأل نفسه السؤال الي انت بتسأله يا أحمد (ليه انا اتجوزت...؟؟؟) :P

بس بصراحة الواحد بيجي عليه لحظة لما يقابل فيها النص التاني ويحس فعلا ان نفسه يعيش معاه وانه يشاركه حياته الي جاية بحلوها وبمرها :wub:

(القط يحب خناقه...) :D

[nancy]

شوف ياحمد انا كنت طول الوقت فاكراك كبير فابقلك يا استاذ بس عموما انا حنصحك نصيحة

لو عاوز تتجوز لازم تعرف ان الناس زى قطع البازل اكيد عارف اللعبة دى لازم الجزء الى يكمل التانى بيكون معشق فية

يعنى لازم لما تختار وحدة تتجوزها لازم تفكر انك حتتشارك معاها فى كل حاجة فى القراءة فى المناقشة فى الهوايات فى الاهداف يعنى بتكملها وتكملك انما اوعى تقول حتجوز علشان يكون عندى ولاد وست بيت وبس لا الى بين الاتنين لازم يكون اكبر من كدة لازم تحبها كل يوم لازم تحس بقيمتها كانسانة وتقدرها وهى كمان

اهم حاجة فى الجواز الحوار لو بتتكلموا كتير وبصراحة حتعيش فى سعادة وقت طويل جدا

لازم تختار واحدة عندها قلب كبير وعقل كبير وتتعلم تحتويها وتكبر دماغك لو هى صغرت دماغها مرة

اتمنى لك التوفيق

[عصفور طاير]

أقول لك الخلاصة يا حج أحمد.. رغم إني برضه لسه زغنن :blush:

لكن خد الخلاصة..

الزواج مشروع يقيمه الراجل لحساب الغير.. أما هوه فيتحول مع الوقت إلى شخص مكرس حياته من أجل العيال

وهو يبقى يعاني الملل بقية حياته.. لإن الأنثى الجميلة اللي بتشوفها قبل الزواج.. أعتقد بيسحبوها ويدوك واحدة تانية بعد الزواج

هذا رأيي وبالله التوفيق

تم تعديل 15 مارس 2006 بواسطة عصفور طاير

[سهيلة]

الزواج مشروع يقيمه الراجل لحساب الغير.. أما هوه فيتحول مع الوقت إلى شخص مكرس حياته من أجل العيال

وهو يبقى يعاني الملل بقية حياته.. لإن الأنثى الجميلة اللي بتشوفها قبل الزواج.. أعتقد بيسحبوها ويدوك واحدة تانية بعد الزواج

عصفور طاير مشاركة بتاريخ اليوم, 06:18 PM

لية بقى الغلط دة والانحياز لجنس الرجال

ما كمان الراجل بيتغير بعد الجواز

بعد ما كان شاب وسيم بجسمو رياضى وجميل وبعد اكل صوانى البطاطس باللحمة ووغيرو وغيرو

ينلاقى واحد تانى خالص بكرش بقى :wub: ومبهدل والدنيا اتبدلت بردو :blush:

وبعدين مش هوة لوحدو يا عصفور اللى مكرس حياتو من اجل العيال الست كمان بتبقى مكرسة حياتها للاتنين للبيت والزوج والعيال

اما بالنسبة لمظهر الست ف البيت فهية لو لقيت اهتمام من الزوج ومشاركة ولو بالكلمة الحلوة

بتعمل اقصى ما فى وسعها عشان تكون ف ابهى صورة

فين البنات اللى هنا يدافعوا عن الستااااااااااااااات

[MZohairy]

الزواج مشروع يقيمه الراجل لحساب الغير.. أما هوه فيتحول مع الوقت إلى شخص مكرس حياته من أجل العيال

وهو يبقى يعاني الملل بقية حياته.. لإن الأنثى الجميلة اللي بتشوفها قبل الزواج.. أعتقد بيسحبوها ويدوك واحدة تانية بعد الزواج

عصفور طاير مشاركة بتاريخ اليوم, 06:18 PM

فين البنات اللى هنا يدافعوا عن الستااااااااااااااات

والنبي ياختي معاكي حق :wub:

قطعوا الرجاله وسنينهم :blush:

[nancy]

ولهى عندك حق يا سهيلة كل راجل ميشوف غير ان مراتة اتغيرت انما هو مش بيشوف نفسة وبعدين ياعصفور طاير بكرة تيجى الى تقصقص ريشك وتبقى طائر تانى مختلف

عموما الرجل والست لازم يتعاونوا على ان الحياة متكونش مملة وان يفضل بنهم حب وعدم تعود واسال مجرب وبلاش تسال ناس مفكرتش حتى فى الجواز

[احمد هادي]

"شوف ياحمد انا كنت طول الوقت فاكراك كبير فابقلك يا استاذ بس عموما انا حنصحك نصيحة "

ايه يا نانسي ؟ :blush:

ياااا نانسي :wub:

انتي كنتي فاكراني في السبعينات زي واحد حبيبنا كلنا ولا ايه ؟ :P

ثم ............

30 سنه مش كبير ؟

وبعدين .....خلاص.. معدش فيه يا استاذ

يعني هتضيعي مني كل البريستيج اللي بنيته علي حسك ... :o

واقعد في المنتدي من غير برستيج ؟

وبكره الاقي اللي بيقولي ياد يا أحمد واللي يبقول ياوله يا احماااا..... :D :D

اتفضلي يا ستي

شوفي أول البشاير

"-أقول لك الخلاصة يا حج أحمد.. رغم إني برضه لسه زغنن -"

وانت يا عم عصفور .....

متخيل ليه انك زغنن ؟

يمكن عشان انت عصفور ؟

وعمرنا ما شفنا عصفور شايب واصلع وبكرش :wub:

ألا بالمناسبه ..............

أمال احنا هنكبر امتي يا أخ عصفور ؟

مع الألفيه الرابعة ؟ :P

ربنا يسامحك ياللي في بالي B)

تم تعديل 16 مارس 2006 بواسطة احمد هادي

[MZohairy]

"شوف ياحمد انا كنت طول الوقت فاكراك كبير فابقلك يا استاذ بس عموما انا حنصحك نصيحة "

انتي كنتي فاكراني في السبعينات زي واحد حبيبنا كلنا ولا ايه ؟ :wub:

ربنا يسامحك ياللي في بالي :wub:

مين ده يا ترى؟ :lol:

و هل هو هو بتاع السبعينات ولا مواطن آخر ؟ :P

[احمد هادي]

قول انتي بقي ........... :P :wub:

اهو انت راجل 193

وكاشف كل حاجة من فوق :lol:

[se_ Elsyed]

اللي يقدر يجاوب على السؤال ده هو شخص ( أو شخصة مش هاتفرق ) قعد مع نفسه وهو في ريعان شبابه ويتخيل منظره لما يبقى عنده40 سنة مثلاً . وبعد ما كانت ماما بتبخ له وتغسله هدومه .. وإخواته ماليين عليه البيت .. توفيت ماما وراح بابا .. والإخوات إتجوزوا وكل واحد بقى له حياته الخاصة ... وهو بقى يقعد زي قرد قطع لا حد يأنس وحدته .. ولا يطبخ له طبخته .. ولا يغسل له هدمته .. ولا يرتب فرشتة ..ولا يفتح الدولاب بالليل وهو نايم ويقلب بدلته وياخد ماليته ( بس للأمانة ساعات بيسيبوا شوية فكه ) .... :lol:

ويبقى بعد العشا وحيد في الظلام الدامس ... وعمال ياكل حاجات تيك آواي ويغني ظلموه .... ولو الفول حمي على قلبه وسد مراوح معدته وأتألم لا يجد من يواسية ويخفف عنه أو يعمل له كوباية كراوية .. او كوكتيل نعناع باللمون ... وكل ما يقول آه يقول له هو لأ ...

الجواز يا أحمد يابني ( وش عم عماد حمدي ) إستقرار ... وهدف تعيش له .. وأولاد يبقوا زي النبتة الصغيرة التي ترويها وتراعيها وتشاهدها تنمو وتترعرع أمامك كل يوم ( كلام كبير قوي .. وإوعى وشك ) وأول ما يتعملوا الكلام يشاوروا على باباهم ويقولوا ( بابا أهو ... بابا أهو ... العبيط أهو ... هو ... هو )

أما العزوبية الزايدة عن الحد فهي عيشة بلا هدف .. ووحدة قاتلة .. وحرمان ( شعري شعري .. اي يا شعري ... مقطع من فيلم الحرمان بتاع فيروز )

خدها نصيحة من أخوك سين سين ... قوم إتجوز يا أحمد يا هادي وإغزي الشيطان بدل ما القطر يفوتك ومش هاتلاقي إلا الحنطور ...وساعتها هاتقول ياريتني سمعت كلام آبيه سين سين وإتجوزت إن شالله لو تخليص حق ... وستندم حيث لا ينفع الندم ... وتبتدي تدور على حاجات خرج بيت أو واحده تتجوزها والسلام وأهي حاجة أحسن من ما فيش ......

[nancy]

احمد متزعلش برستيجك محفوظ انا حطاة بايدى فى الفريزر متقلقش

استاذ سين سين

انت كرهت الراجل فى الجواز وبعدين قلتلة روح اتجوز كانك بتقول لواحد شايف الحفرة دى انت حتقع فيها حلوة مش كدة

احمد ولهى الجواز مش وحش بس ممكن يكون فية تعود انت بايدك تقضى عليه لو حاولت تكون متجدد فى حياتك

وبالتوفيق .. الا معلش انت لاقيت عروسة ولا انت كل الكلام دة لسة بتفكر

[احمد هادي]

احمد متزعلش برستيجك محفوظ انا حطاة بايدى فى الفريزر متقلقش

استاذ سين سين

انت كرهت الراجل فى الجواز وبعدين قلتلة روح اتجوز كانك بتقول لواحد شايف الحفرة دى انت حتقع فيها حلوة مش كدة

احمد ولهى الجواز مش وحش بس ممكن يكون فية تعود انت بايدك تقضى عليه لو حاولت تكون متجدد فى حياتك

وبالتوفيق .. الا معلش انت لاقيت عروسة ولا انت كل الكلام دة لسة بتفكر

عزيزتي نانسي

انا برسيجي كده يتجمد يا ريت تطلعيه من الفريزر :wub:

ومن فضلك إحفظيه في مكان دافي وجاف وبعيد عن متناول الأطفال :wub:

أما بالنسبه للعرايس فهم -وسوري في اللفظ -سوري خالص مالص- علي قفا من يشيل يا ماما -_- :o

ومن جميع الجنسيات

وهنا في الإمارات 130 جنسيه ( إحصائيه رسميه )

بس هي فين النفس ؟؟ :lol: :P

تم تعديل 16 مارس 2006 بواسطة احمد هادي

[احمد هادي]

أحب اضيف حاجه :lol:

مجرد ملاحظه

رغم إن عنوان الموضوع واضح وصريح

وبيطلب من المشتركين الإجابه عن سؤال سبب جوازهم

إلا اني مخدتش إجابات علي قد ما خدت نصايح

وده شيئ يسعدني جدا

وبيبين مدي حب الأعضاء لبعضهم

بس كنت اتمني آخد وجهة نظركم فعلا

وتجربتكم مع الجواز بصراحة

لأن الموضوع فعلا مهم

وانا بستفيد من كل وجهة نظر

وأرجع تاني أقول للمتجوزين ............ اتجوزتم ليه ؟

واللي ناويين علي الجواز.......عايزين تتجوزوا ليه ؟

[nancy]

شوف ياحمد اولا بالنسبة لبرستيجك حشيلة من الفريزر وحاحطة فوق الدولاب .. بعيدا عن الاطفال

ثانيا لما هو مفيش نفس عندك مدوخنا معاك وبتلم اراء لية ياستاذ

ثالثا 120 جنسية اية هوانت ممكن تتجوز اى جنسية طيب معنى كدة انك معندكش اى محددات

رابعا الجواز مش مشكلتة ان البنات على قفا من يشيل لان تحليل الكلمة دى مش حيعجبك

الى حتتجوزها مش حتشلها دى حتحطها فى قلبك ودماغك يعنى واحدة تكون شخصيتها تركب على شخصيتك

وبالتالى التوافق دة مش على قفا من يشيل ممكن تشوف 1000 واحدة مفيهمش الى يخليك تعيش عمرك معاها

فاموضوع مش بالبساطة دى

[احمد هادي]

يا سيدتي الفضلي

صحيح أنا ماليش نفس حاليا..............

لكن ممكن نفسي تتفتح في أي لحظه وانتي عارفه ان الواحد مش بيتحكم في نفسه - بكسر النون - مش بفتحها

ألوص بقي ساعتها ولا أكون جاهز بأفكار محددة؟

اما عن الجواز بغير مصريه ...فدي كانت فكره مستبعده تماما قبل ما اعيش هنا

لكن بعد ما احتكيت بكل الجنسيات العربيه بشكل مباشر - قضيت فتره في مكان فيه كل الجنسيات العربيه - حتي الصوماليين كانوا معانا غير الامريكان والغربيين بصفه عامة إكتشفت ان الموضوع مش زي ما أنا كنت مستغربه

بل وكان في زميل فلسطيني متزوج من لبنانيه - رغم ان هو سني وهي شيعيه - ومن كتر إحترامي ليه - سألته إذا كان عنده بنت للجواز بجد.

كمان كان لنا زميل أمريكي متجوز يابانيه - رغم ان جدها وجده حاربوا بعض في الحرب العالمية التانيه- فعلا بجد وكان بيمدح فيها جدا

بل والمدير العام الامريكي كان متجوز يابانيه هو كمان

ولما اشتغلت مع ستات من جنسيات غير عربيه .....

عجبني فيهم حاجات مش موجوده في كتير العرب

لكن مش معني كده اني بدور علي واحده مش مصريه عشان اتجوزها

لكن التعامل بيوضح الصوره

ولاحظي ان الفتره اللي ممكن أقضيها في مصر كل سنه مش كفايه لعملية الاختيار والتعارف والقصه دي

واتفق معاكي بالنسبه لموضوع التوافق بنسبة 100%

كمان انا في انتظار تحليلك لجملة إن البنات علي قفا من يشيل

و انا مقلتش ان الموضوع بسيط

انا قلت انه فعلا مهم

شكرا لاهتمامك

وتحياتي

تم تعديل 16 مارس 2006 بواسطة احمد هادي

[سامح أبوبكر]

عزيزي أحمد

يا سيدى الفاضل لو المسالة مسألة نفس ممكن تعصر عليها لمونة

وانت راجل مريت بتجارب أقوى وأعنف من كده بكتير

ولا نسيت

ايام الجيش التالت

مع احترامى الشديد لبرستيجك المجمد في فريزر الأخت نانسى

[nancy]

طيب يلا تجيلك نفس بسرعة للجواز وتلاقى الشخصية المناسبة مع انى مقتنعة ان مصر فيها بنات ممكن تجمع بين كل حاجة غير الى من غير بلدك انما الموضوع دة قسمة ونصيب مينفعش انك تفترض حاجات لان نصيبك فية بيكون مستنيك

بالنسبة لحكاية قفا من يشيل انا مش باحب الكلمة دى لان معناها مش حلو اما حد بيشيل على قفاة او دابة بتشيل على قفاها مش لازم يعرفوا هما معاهم اية او شيلين لية فبالتالى لو اخدنا الجواز من الكلمة دى فمعنى كدة انة حيشيل او يتجوز من غير ما يفكر دى مناسبة لية او لا يعنى حد منغير دماغ شايل من غير ما يفهم

ومعتقدش انك كدة

وبعدين انت سالت انتم يالى اتجوزتم اتجوزتوا لية

انا اتجوزت علشان حبيت وحصل توافق فى حاجات كتير جدا وحسيت ان الجواز من غير الى بحبة هى قبر حدخلة وانا عايشة فحصلت مشاكل كتير جدا وبلاوى واصرار على انى حعنسلكوا لدرجة ان كل ما كنت اروح فرح حد من قرايبى كنت اسمع جدتى بتقول ونبى مش حرام كل الجمال دة وعاوزة تعنس (طبعا من منطلق ان القرد فعين امة غزال) وهو كمان كان بيحارب لحد ما نفزنا كلامنا ودلوقت والحمد لله ان طلع كفاحنا فى محلة ودلوقت انا حاسة انى لسة بحبة زى ايام الكلية واكتر .. بس التفاصيل اكتر من انها تتكتب فى موضوع بس اديك عرفت الملخص