يا ترى دخلت الجيش .. ولا شفته فيديو ؟

[se_ Elsyed]

موضوع الجيش والبلاوي اللي بتحصل للناس فيه من الموضوعات النادرة التي يُمكن أن تقرأ عنها في جرايد أو منتديات ..

وكأنها قُدس الأقداس .. أو كإن الكلام اللي الواحد هايقوله هايمس الأمن القومي للبلد .. مع إن جوجل إيرث ما خلاش حاجة إلا أما فضحها وبقت كل بلد عارفه إيه الأسلحة اللي عند البلد التانية وأين تتمركز قواتها ..

وأنا هنا ما بتكلمش عن أسلحة أو توزيع وحدات أو تدريبات .. لكن أنا بأتكلم عن المُعاملة الإنسانية أثناء فترة التجنيد ...

وسبحان الله ما تكلمش واحد قدامك عن فترة تجنيدة إلا وتلاقي وشه جاب ألوان وتحس إنك بتعذبه وهو يجتر الذكريات المريرة التي عاشها في فترة تجنيدة..

أنا عن نفسي ما دخلتش الجيش ولكن شفته فيديو .. :P

بس عيشته مع إخواتي الإثنين .. واحد أكبر مني ودخل سلاح الصاعقة .. وأتظبط تظبيط ماحدش إتظبطة ..

والصغير دخل مُشاة وأنطحن عظمة .. لدرجة والله العظيم ملامحه أتغيرت وما كنتش بأعرفه من كثر الناموس ما أكل وشه .. الكلام ده جد

ومع إننا مش من بيئة فرافيري وعيال مرفهة زيادة عن اللزوم .. ولكن عايشين عيشه عادية زي ناس كثير وبالتالي ممكن تستحمل أي مصاعب ..

لكن تتحمل الأهوال ..... لأ ..ما أظنش

على سبيل المثال أخويا الكبير كان إنف قوي في أكله .. لدرجة إن في أكلات مُعينة لو دخل البيت بس وعرف إنها عندنا ممكن يرجع وتبقى حالته حاله ... ولكن سبحان مُغير الأحوال .. في فترة الجيش وما بعدها .. كان ممكن يأكل إخواتة ... ناهيك بقى عن البهدلة اللي كنت بأشوفه عليها .. أنا شفت بعيني ما حدش قال لي جلد كعب رجله مفصول عن جسمة وتشوف رجلة حتتين من كثر التدريبات والجري في ملاحات إسكندرية .وأكل الاطعمة المنتهية الصلاحية .. دي حقيقة ... ده لو لقى الأكل أساساً

الواد الثاني بقى اللي كان صعبان عليه والله .. وكان كل أجازة - ده لو أخد أجازات أساساً - يعيط و يحلف 100 يمين إنه ماهواش راجع تاني واللي تعملوه أعملوه .. من كثر الإهانة اللي بيشوفها .

والسؤال الذي يطرح نفسه هنا : لا شك إحنا مع التدريبات القوية والشاقة وزي ما بيقولوا إن الجيش هو " مصنع الرجال " ... لكن مين قال إن الجدية والإلتزام معناها الإهانة وأنتهاك أدمية البني أدميين وتعقيدهم في الحياة ؟

وده بالظبط اللي بيحصل عندنا من ناس مُعقدين نفسياً يجدون لديهم بشر لا حول لهم ولا قوة .. ولا يوجد من يشتكوا إليه غير الله وتلاقيهم يطلعوا كلاكيعهم وأحقادهم ونفسيتهم السودا عليهم .. وخصوصاً الفئة اللي بيسموهم المخلة أو المتطوعين وأترقوا لحد ما وصلوا رُتب مش عالية ولكن على الأقل بيبقوا قاةدة لوحدات أو فصايل ..

في الحياة العامة أنا شفت رجال قوات مُسلحة كثير جداً سواء من معارفنا أو قرايبنا .. والحق يُقال إن نفسيتهم ما بتبقاش مظبوطة ... والملاحظة الغريبة إن غالبيتهم بيبقوا بخلاء وبيموتوا على القرش على أساس إنهم واخدين على أبو بلاش في الجيش ..لدرجة إن في صديق لي معايا من إبتدائي كذا مرة لا يوفق في خطوباتة وعمل رقم قياسي عشان بخله لدرجة في أجازة من الأجازات بيقولي شفت الناس الأندال اللي كنت خاطب بنتهم رموا لي الدبلة في وشي . مع إني والله يا سين سين لسة كنت عازمهم عندي في الشقة وصرفت على العزومة دي ( 17 جنية ) .. أنا كتمت غيظي وقلت له قوم يالا من قدامي بدل ما أديك بضهر إيدي أخلي وشك بقى في قفاك .. يا معفن ده انت لو جبت لهم فول وطعمية يبقى الطُرشي هايقصر معاك وممكن ما تلاقيش تشتري عيش كمان .. يابو 17 جنية .... :o

والنقطة التي أعود وأركز عليها هي الأهانات المباشرة والغير مباشرة التي يتعرض لها المجندون وأوقات كثيرة بتبقى من غير أي أسباب .. ولكن من يقوم بالإهانة بيتذرع إن ده نوع من الإرهاب أو من الأول كده لازم ياخدهم وش .. طب ليه يا عم ؟ يقولك أصل إنت لو ريحت العسكري .. يتعبك ... فلازم تبهدله عشان تخليه دايماً يلف حوالين نفسه ..

وعلى فكرة .. ده نفس تفكير وعقلية الحكام الذين حكموا مصر من عهد الثورة فكلهم كانوا عسكر وكلهم فشلة إدارياً وكلهم كبيرهم قوي يروح يبقى قائد وحدة أو كتيبة أو سلاح ...

لإن من وجهة نظري إن العسكري هو أفشل شخص ممكن يبقى إداري في الحياة العامة لإنه تعود على الطاعة ممن تحته أو أقل منه ، أو السمع والتنفيذ بدون نقاش ممن هم اعلى رتبة منه ويأمرونه... وهو شخص ديكتاتوري بطبعه .. لإن الجيش ما فيهوش نقاش .... نفذ الأمر يا عسكري حتى لو خطأ وإلا تلاقي رصاصة رشقت في نفوخك والتهمة هي " عدم تنفيذ الأوامر "

وعلى فكرة القائد أبو دماغ عسكرية لا يُخطيء .. أبداً .. فهو دائماً على صواب

وأقرب دليل على ذلك .. مبارك ... ما شاء الله 25 سنة حكم .. ومئات القرارات اللي ودت البلد في داهية ومع ذلك لا يُمكن أن يعترف بالخطأ أو حتى حد من اللي حواليه يقوله إنت غلطت .. بل بالعكس ماشيين معاه بمبدأ " عاش الملك ... مات الملك " مما يجعله حتى لا يتراجع من سكات عن الخطا .. بل يتمادى فيه ..

يعني

لو أخد قرار أمبارح بمنع اكل الملوخية ... هاتلاقي الجوقة وحاشية السوء اللي حواليه يهتفوا له " يا سلام يا ريس .. إيه الحلاوة دي ... إيه الطعامة دي .. فعلاً يا ريس أثبتت الدراسات المطبخية اليابانية إن الملوخية بتمشي البطن وبتجيب إسهال ولا تحتوي على أي مواد مفيدة للجسم "

هو هو الشخص .. وهو هو السلام والتحية

يجي مبارك بعد الغدا وفي قعدة صفا مع الأولد يروح مطلع قرار ديكتاتوري رقم 310 لسنة 2025 بإباحة أكل الملوخية

هما هما نفس الهتيفة يقولوا : الله الله .. إديها طشة يا ريس .. يا تقليتك يا مصر ... أيوه كدة .. أنتصرت إرادة الشعب .. وعبر السيد الرئيس القائد عن إجماع الجماهير المطالبة بإباحة الملوخية .. لما فيها من فوائد جمه للجسم فقد أثبتت الدراسات اليابانية - برضوا - غن الملوخية دي كنز غذائي ... عشت زخراً لنا يابو طشة جنان "

هذا هو المخ العسكري يا سادة الذي لا نريدة أن يخرج من ثكناته العسكرية ليحكم ويتحكم فينا ...

ومازلنا نطالب بتحسين أوضاع المُجندين ومعاملتهم بشكل محترم .. على الأقل لكي لا نقتل فيهم شعور الإنتماء للبلد ولكي لا تجعل منهم أشخاص غير أسوياء نفسياً ..

ج م س س

( جُندي مجند سين سين )

[shahd]

وسبحان الله ما تكلمش واحد قدامك عن فترة تجنيدة إلا وتلاقي وشه جاب ألوان وتحس إنك بتعذبه وهو يجتر الذكريات المريرة التي عاشها في فترة تجنيدة..

ج م س س

( جُندي مجند سين سين )

ده ايه الجيش المرعب ده :huh:

اخويا قبل ما يدخل الجيش كان متعاون ونشيط وزي الفل واحلى حاجة فيه انه كان بيكويلي هدومي :o علما بأنه اكبر مني ب7 سنين

دخل الجيش كنا بنبعتله مكرونه , وشغلوه في مستشفى نظرا لأنه كان سريع في الطباعه وكان بيرجع كل يوم عادي كأنه في وظيفة حكوميه

قلت له يا ابني بقى ده يقولوا عليه تجنيد :P

وبمجرد ما طلع بقى كسلان كسل :huh:

جيش ايه ده الي بيبوظ العيال

تم تعديل 19 مارس 2006 بواسطة شهد

[الأفوكاتو]

أهنئ أخى سى سى على هذا الموضوع, الذى لخص كيف تحكم مصر الآن, و فى الماضى القريب, و البعيد.

و هذا لا يسرى فقط على الجيش, بل أن هذه هى الفلسفة ألتى أفرزت ضباط الشرطة, الذين فى فترة تدريبهم, تمرمطوا, و و أقسموا أن ينتقموا من الشعب المصرى كله, لما أصابهم فى فترة التدريب.

جميع دول العالم لديها وسائل تدريب المقاتل و المحارب, و تحاول لأن تثقفه لكى يدرك أهمية تعليمه النظام,

و لكننا تفوقنا فى التلذذ بإستعمال القوة الغاشمة, كوسيلة للتحكم فى من هم تحت سيطرتنا.و تجاهل كل الأصول الإنسانية فى التعامل مع التابع, الذى لا خيار له فى كونه تحت سيطرة المتبوع.

تحية لأبو السيد.

[أسد]

أهلاً .. وسهلاً ...

إحنا زدنا شرف بالزيارة دي ..

والله يافندم دي زيارة تستاهل ندبحلك فيها إثنين عساكر ..

هكذا إستقبل قائد الوحدة التي كنت أخدم فيها ذات يوم أحد أصدقاؤه ...

وكان الجميع يضحكون على خفة دم المضروب ..

حتى العساكر إللي كانوا واقفين خدمة على باب مكتبه ..

مع العلم أنهم قد يكونوا أول من يذبحوا في حالة أن الراجل صمم على رأيه ..

[Alshiekh]

الجيش أو العسكرية فى العالم عموما وليس فى مصر على وجه الخصوص يقوم على مبدأ الإنضباط والطاعة وعدم مخالفة الأوامر.

وحتى يتسنى تحقيق ذلك وإرغام افراد أعمارهم تجاوزت العشرون عاما ، فالأسلوب المستخدم لايعتمد على الإقناع بل الضغط والإرهاب النفسى والمعنوى.

المطلوب هو ان يخلقون أفرادا لتأدية واجب برنامج تم وضعه مسبقا عن لتحقيق خطط على مستوى القيادة ، ولذلك فهم لايريدون من الفرد ان يستخدم عقله الا فى الحدود المسموح بها ، أما على المستوى العام ، فالمطلوب أن يكون الفرد مجرد ترس فى آلة ، أو زر يؤدى الوظيفة المطلوبة منه ، ولن يتأتى ذلك إلا بإخضاع ذلك الفرد تماما لأوامر رئيسه حتى ولو كان مجرد أقدم منه بأيام.

كثيرون يتفهمون هذه النقطة ويخضعون لها بكامل ارادتهم ثم تنتهى بمجرد انتهاء خدمتهم العسكرية ، والبعض الآخر لايتقبلها وتظل نقطة أو محطة غير سارة فى حياته ، ولكن الأغلبية هى من يعود لطبيعته بمجرد انتهاء خدمته العسكرية.

الفرق بين الجيش المصرى والجيوش الأخرى فى الدول المتقدمة هو أن غالبية أفراد الجيش المصرى يؤدى الخدمة العسكرية اجباريا وبدون مقابل ويرى معظمهم انها شيئ غير ضرورى، بعكس الدول المتقدمة التى يلتحق افراد جيوشها بالخدمة العسكرية كمهنة أو حرفة ، فالفرد فيها مستعد من البداية أو على الأقل مهيأ نفسيا لما هو مقبل عليه ، حيث ان الكثير منهم قد يترك العمل المدنى ليلتحق بالمجال العسكرى ليتخذه مهنة.

أنا هنا تكلمت عن الشق النفسى ، أما عن الشق الآخر وهو الخاص بالإمكانيات ، فلا أعتقد أنه يمكن عمل اى مقارنة ، فإمكانيات مصر عموما متواضعة.

[مسافر زاده الخيال]

السلام عليكم................

اولا الحمدلله لا يوجد عندنا تجنيد اجباري

ثانيا عملية الاهانة في الجيش اعتقد انها في كل العالم وهناك فلم اميركي اسمه رأس الجرة يظهر كيف تتم برمجة المجندين بتفريغ رؤوسهم حتى تصبح كجرة فارغة بالسب والشتم وكافة انواع الاذلال.........

سلام

[se_ Elsyed]

عندك حق يا مسافر ياخويا ...

بس إيه حكاية المقطع بتاع أُغنية عبد الوهاب ده

مسافر زاده الخيال *** والسحر والعطر والضلال

ضلال إيه يا عم ؟ ربنا يهدينا جميعاً

بيتهيألي هي ظِلال ..... إعدل الضاد

[لخبطه]

اظن القواعد الرئيسيه في الجيش مش بتقول كدا -لاني بردو شفته فيديو - لكن القاده اللى فوق

هما اللى بيخلقوا قواعد عرفيه بالقذارة دي تخلى العسكري مرمطون أو مسخر لخدمتهم لدرجه

انه ممكن يدبح عسكري لضيف ..

لكن ما من شك أنه بردو الجو المرهب دا خلق رجاله من ناس مايعه وكسر نفس بلطجيه وعلمهم الادب يعني لا يخلو الأمر من فائدة لكن مقابل دا ناس كتر نفسيتها تعبت وخرجوا كراهين البلد بسبب الجيش

[tarek_almeghallawy]

أنا دخلت الجيش وشفته أبيض وأسود وألوان

قضيت جيشي ضابط احتياط في سرية طبية بأحد الوحدات

هناك خيط رفيع بين الأهانة والظلم والافتراء وبين الضبط والربط والانضباط

وكلاهما موجودين

لا ننسى أن الجيش أسلحة وذخيرة وتدريبات وتمثيل جو المعركة وحراسة ومسئولية

بعض المجندين عنده من الاستهتار والانفلات الكثير

مثلا ماذا تفعل مع عسكري يترك سلاحه معرض للسرقة ويذهب ليشاهد فيلم فيديو في البوفيه

عسكري يترك الوحدة ويزوغ أو يكت يومين لبيتهم ويسيبني في حيص بيص راح فين ولا أتقتل ولا اتخطف

عسكري يرفض تنفيذ مهمة عشان كده تناحة يعني

أنا نفسي اتعرضت لقهر في الكثير من المواقف

ولكن في كثير من الأحيان المجندين العساكر عايزين العين الحمرا

الجيش في كتير من الأحيان تعديل للسلوك المستهتر وتدريب على حسن التصرف

عندما ترى شخص بيغرق في شبر مية ما ذا تقول له ؟؟

أكيد أنت ما رحتش الجيش

[Scorpion]

اوافق بالطبع علي ان الشدة التي تصل الي القسوة احيانآ مطلوبة لتكوين جيش نظامي جاهز للحركة في اي وقت ... و لكن احيانآ تلك الشدة او القسوة يتم استخدامها اسوأ استخدام من اشخاص مريضين نفسيآ او مصابين بنقص في تركيبتهم النفسية .. فيأتي عريف او نقيب يكاد بالكاد ان يفك الخط و يجد تحت يده مجموعة من حاملي الشهادات العليا .. و هنا تنفجر في داخله الرغبة في اذلالهم بالفعل .. و ليست للقواعد العسكرية في هذا التصرف اي علاقة ...

اتكلم عن تجربة شخصية دامت لحسن الحظ لمدة شهر واحد .. فبعده تم توزيعنا علي وحداتنا .... و لكن هذا الشهر لا يمت للآدمية او حتي للحيوانية بصلة ...

[مسافر زاده الخيال]

سلام لسي السيد ............

ضلال ايه ياباش مهندس؟؟؟؟؟؟ انت حتتبللى علينا ولا ايه؟؟؟؟؟؟؟؟؟؟؟

(ميرسي على التنبيه ...... والعتب على لوحة مفاتيح اللاب توب )

[se_ Elsyed]

ولكن في كثير من الأحيان المجندين العساكر عايزين العين الحمرا

يا طقطق أنا معاك في العين الحمرا والمناخير الفوشيا والودن الفُحلقي ..

لكن برضوا السؤال تاني : إيه علاقة الجدية وتعليم الإلتزام بالشتيمة بالأم والأب والتكدير والأكل الغير أدمي ..

يا مؤمن قعدنا في مرة نستنى أخويا ينزل أجازة من الجيش وماما كانت طابخة فضلة خيرك ربع كيلو لحمة وانا عيني هاتطلع على الحلة ونفسي أستولى عليها لوحدي .. المهم الولد أتاخر زيادة عن اللزوم .. فقمت بالواجب وضربت اللحمة لوحدي - ونعم الأخوة -

بعدها بكام يوم جه من أسكندرية وعرفنا إن الوحدة بتاعتهم كلها جالها تسمم وأتنقلوا للمستشفى كلهم ... تعرف ليه ؟

كان بقى لهم فترة مافيش عندهم ميه .. فلا شرب ولا أستحمام ..

المهم جالهم تنك كبير مليان ميه .. فعيال منهم راحت في الخباثة نازلين في التنك نفسه وأستحموا وتلايقهم غنوا كمان لعبد الوهاب وكإن الواحد قاعد في البانيو بيبلبط ... جم الأخرين وبكل عفوية وبقوا يملوا ويشربوا بنهم - شفت فيلم شيء من الخوف ساعة شادية لما فتحت الهويس ؟ - وطبعاً شربوا منين ؟

عليك نور من الميه المبروكة بتاعت الحُما ... وعيش يا ريس مع التسمم

وغيرها وغيرها من معاملة أقرب ما تكون للمساجين ...

هايقولك ممكن تشتكي للقيادة العُليا .. اللي فعلاً بييجوا يحققوا في بعض الأحيان

إسمحلي أضحك ... هأو أو أو

لكن بعد ما تمشي لجنة التحقيق ... ايه اللي هايفضل ؟

المحبة طبعاً

وستتحول حياة العساكر اللي أشتكوا واللي ما أشتكوش واللي كان نفسهم يشتكوا وما أشتكوش .. أو اللي ما أشتكاش بس عارف اللي أشتكوا ... والكل كليلة هايتنفخ على 45 ..

وزي ما بتقول القوانين العسكرية المعفنة " الحسنة تخُص والسيئة تعُم "

وكأنهم بيضربوا بالأيات القرانية عُرض الحائط ، ألم يقل الله تعالى " ولا تزر وازرة وزر أخرى " ؟

يعني واحد عمل جريمة وشخص قليل الأدب ... مال أهل العشرات بل المئات من الجنود الباقيين عشان يتعاقبوا ؟

[tarek_almeghallawy]

لو قعدنا نحكي عن حواديت الجيش مش ها نخلص

خد عندك الحدوتة دي

واحنا كنا طابة في كلية ضباط الاحتياط في فايد

استلمنا صف ضابط في طابور الزحف

في العادة الزحف بيكون كده وكده لكن الراجل الصف

كان عنده غل غريب علينا وزحفنا طول الطابور تحت موسيقى تصويرية من الشتائم

الزحف ميري ما نقدرش نقول حاجة لكن الشتيمة

عزمنا على تقديم شكوى ضده ..لما عرف جاء إلينا في قاعة المحاضرات واعتذر وعيط

وبعت لنا زمايله وقلولنا دا غلبان وبيصرف على أمه وأبوه وأخواته وانتم كده ها تضروه

طبعا احنا قعدنا نعيط وفكرنا نلمله قرشين

بعد ما علقنا الضبابير كل واحد فينا كان عنده نية هباب ياخد بتاره من الصف ضباط

فوجئت بصف ضابط في السرية شرقاوي بلديات س س كان طيب جداً وكل العساكر بتحبه

تغيرت كثير من المفاهيم عندي عنهم ..بالنسبة لنا كأطباء علاقتنا كانت كويسة مع كل الصف ضباط في الوحدة

حتى الذين يتجاوزون مع العساكر بالشتيمة وأحياناً بالضرب لهم تبريرهم غير المقبول ولكن هذا مفهومهم للرحمة

يقولك لما أهينه أحسن ما أتسبب له في محاكمة عسكرية وادخله السجن واضيع مستقبله

قبل ما ينتهي جيشي كنت أدعي ربنا أخلص على خير بدون محاكمة

اييييييييه كانت أيام

[maksoof]

الحقيقة أنا كنت فى أول دفعة ضابط إحتياط بعد هزيمة 67 و يمكن كنت "محظوظ" لأن دفعتى قضت التدريب الأساسى فى الكلية الحربية. المعاملة كانت كويسة - يمكن عشان الزعيم الملهم عبد الناصر أيقن إن الجيش المهان بيكون مهزوم من قبل ما يدخل الحرب.

عموما دفعتنا بصراحة ما شافتش إهانات و لا شتائم (بس علمونا وقتها إن أهم حاجة فى الكون هى "الثبات بعد أداء الحركة"). :wub:

أما بالنسبة للأكل فكان معقول - يعنى مافيهوش حاجة غريبة إلا الحاجة الخضرة اللى بيسموها "أخضر باريس" (باريس هى واحة مصرية مش عاصمة فرنسا) و لو إن فى الأيام اللى كانوا بيقدموها لنا كنت بالاحظ إن النجيل اللى فى أرض الكلية كان بينقص :huh:

المهم - اللى عايز أقوله إن الإهانات موجودة فى كل جيوش العالم- و من كام سنة كشفت وسائل الإعلام الكندية عن اللى كان بيحصل فى فوج القوات المحمولة جوا - فكانوا بيغصبوا المتطوعين الجدد على أكل حاجات لا تخطر على بال - يعنى أنا مش عايز أدخل فى تفاصيل لأنها فعلا فظيعة بس ممكن أشير لحاجة واحدة: أكل القئ. و ده يعتبر حاجة نظيفة بالنسبة للحاجة التانية اللى كانوا بياكلوها - بس حاسيبها لخيالك.

و لو عايز تقرأ تفاصيل أكتر ممكن تعمل بحث فى جوجل عن كل الكلمات الآتية:

"hazing" و "military"

و بالنسبة للموضوع الكندى ممكن تزود:

"airborne regiment" , "canada"

عموما بعد ما إتفضحوا قررت الحكومة حل الفوج و تسريح ضباطه و جنوده.

تم تعديل 23 مارس 2006 بواسطة maksoof

[se_ Elsyed]

أنا عارف طبعاً إن الزملاء اللي بيقولوا إن الإهانات موجودة في كل جيوش العالم بس طبعاً كلاً حسب ثقافته يعني ممكن مثلاً في جيش من الجيوش لو ما أكلوش شيكولاته بالبندق كل يوم فدي تعتبر إهانة .. وجيش تاني لو ظابط قال لعسكري يا توتو فدي ممكن تبقى إهانة .. لكن في جيشنا المصري الإهانات معروفة وعلى عينك يا تاجر .. وبالتالي لا أعتقد إن زملائي الأفاضل الذين إشتركوا بمداخلات في هذا الموضوع بيبرروا الإهانة اللي موجوده عندنا ..

فحتى لو في إهانات في كل العالم .. فهل ده سبب لإستمرار وزيادة الإهانة عندنا ؟

لا اعتقد

[tarek_almeghallawy]

ايه الصدف دي يا س س

ولا انت مكشوف عنك الحجاب ومن أهل الخطوة

المشاركة بتاعتك عن الإهانة في الجيش

رقمها 67..67 يعني مش نكسة واحدة لكن نكستين

يعني انت عاقلك الباطن بيقول إن الإهانة في الجيش تؤدي للإنكسار

والإنكسار يؤدي للنكسات والهزائم

ماشي ياعم مشاركة 67..67 عقبال المشاركة 73..73