قصيدة (( طُظ ف كُل بنات سنه رابعه ))

[Ashraf Mohamed]

(( طظ ف كل بنات سنة رابعة ))

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

دا لا يقبل حــد يزيد تفاصيله

ولايقبل حــد يقول نقصـان

ولا يقبل حــد يزيــد تفاريحه

ولا يقبـل حــد يزيــح أحـزان

كده علي بعـضــه كأنه .....

بيت و بسقف وحيــد وحيطان

 وملوش غير سكة وحيدة توصَّــل ليــه

و بس يادوب عنوان

***

لكن وبرغم دا كـُلـِّه .....

كنت بــدورحواليه وبلـّـف

وف وقت ما كيـفي علــَّـي يهـِّـف ....

بضرب كف يادوب علي كف

ألقاني حــداه خَـشـِّـيت

وف كل أركان البيت لفيــّـــِت

واضحك وابكي واروح فـتـافـيـت

واتأكــد إني بجد أنا كنت حمار وعبيط

علي سَفِـة سـُـكـَّر سِرقة ....

كنت بطير م الفرحة وم التنطيط

لوشـُـفت القـطــر بيـزعـق ويقـول : تيت

لو كَلـت الفول بلمون غرقان ف الزيت

لو ( ســتـِّي ) حـكــت لي حكاية عن العـفــاريت

لو فاض بي الكيل

وكتبت ف يوم ع الحيط .....

 ( طظ ف كل بنات سنة رابعة ) ...

ياريتني ما كنت ف يوم حبيت

وأقول لو كانت ( ...... ) تعرف خطـّي ياريت

لو كانت تخبص للأستاذ ( منصـــور ) !

والأستاذ بغباوته ينـــده اسمي ف قلب طابور

وتشوفني ( ..... )  ساعتها وقلبي يشوف النور !!!

وأقف مش خايف م الخرزانة ف إيد الناظر

ويبقي النصـــر حليــفي ف بث مباشر !

ويبقي جبان قــُـــدَّامي أتخن عـفــريت

***

تسمح لي بنص سؤال يازمان

 لو بالإمكان 

لو تاخـد روحي حــداك

السكة سراب بــرَّاك

وأنا العطشان حفيان ف طريق أشواك !

 ف السكة مطر أحزان مليان بالخوف

وغيوم وهموم وطشاش الشوف

 لو كنت تأخدني.....

 تحطني تاني تحت حيطان

وتسبني هناك.....

و ف نفس البيت

وارجع من تاني حمار وعبيط

واكتب ع الحيط .....

 ( طظ ف كل بنات سنة رابعة ) !

ــــــــــــــــــــــــــــــــــــــــــــــــ

شِعـر / أشرف محمد شلقامى