عود إنسان

[Guest أشرف محمد]

(( عود إنسان  ))

ـــــــــــــــــــــــــــــــــــــــــــــــــــ

الرواى مشفش

كان حَد حكى له برضه مشفش

نقلاً عن حَد كبير العميان

نقلاً عن حَد كبير الطُرش

نقلاً عن حَد مكنش !

نقلاً عن حَد مهرتل لابسه الجِن ...

مش عارف لامؤاخذه من لامؤاخذه !

ومقضيها هلاوس وهَم وظن

وعنده ( زهايمر ) وكبير ف السِن

لـــذا ....

كُل كلام الرواى كائِن

***

وبرغم مصادره الباين باطل صحتها

ولا معروف إللى كتبها أو مذهبها أو ملِّتها

وبرغم الضعف العام إللى ف قوتها

وبرغم السُخف التام إللى فى حِجتها

وبرغم ... ورغم ... ورغم

فيه حَد معندوش دم

معتبر الراوى الحاوى الخاوى دليله

ومصدَّق ضعفه وسُخفه وزيفه وأباطيله

ويوماتى بنشوه وراه بيهز ف ديله

وليلاتى وراه بيغنى ياعينه ياليله

ويقول : قال إيه دا الحِلم اتفسر

وبيبكى ساعات قال إيه متأثر

قال إيه والدمع مبهدل مناديله

و وراه بغباوه يردد نفس نشاذ اللحن

مع إن .....

كُل كلام الرواى كائِن

***

ياهذا الـــ حَد ...

الراكن عقله هناك ع الرَف

ياهذ الــ حَد  ...إللى مصدَّق هذا السُخف

ياهذا الــ حَد  ...المستقوى بهذا الضعف

وإللى بيقرا ف تخارف الطالع والكَف

وإللى مبلبع ومقربع هذا المغشوش الصنف

والمتعاطى يوماتى هذا الهذيان

والواكل ... شارب ... قايم ... نايم ...

ف بحور الغبا غرقان

ياهذا الأهطل

والأهبل

والمتنيل على عينه وعَميان

امتى الجحش إللى مبرطع ف زريبة مُخك ...

امتى تحصل له حالة صحيان !؟

امتى يفوق من هذا الإدمان !؟

امتى يقول ندمان !؟

ويرفس برسيمه

ويعود لقديمه

ويقول لك : عود إنسان 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

شِعر / أشرف محمد