ليه المذيع بيستظرف؟

[Sherief AbdelWahab]

من بتوع مين كسر إيه دول .. لخالتي فرنسا سهير جودة .. لناس كتير في "كار" الإعلام.. اللي بقى بيورث زي حاجات كتير في المحروسة..

مذيعين بيجتروا كل مخزونك من النكت السمجة ، "مرة واحد قابل واحد بقوا اتنين .. مرة اتنين قابلوا اتنين... الخ" ، "قطعت حبل أفكاري" ، "واحد راح للبقال قال له عايز حلاوة بريال قال له معنديش وهو عنده جوة"..بيحسسوك إنهم ظرفا.. بالذوق .. بالعافية.. ويمكن بالدراع..

ليه المذيع أو المذيعاية بيستظرفوا ، حتى لو الوقت مش طالب "مرح"؟

خلص الكلام

[م.سلمى]

والله فعلا انا بتشل لما بشوف النماذج دي ومبعرفش انطق من هول الظرف B)

وسعات ضغطي بيرتفع وبقعد ادور علي نمره البرنامج عشان اتصل اهزا اي حد حيرد علي :P

بس كله كوم واذاعه الشباب والرياضه كوم تاني انا الحمد لله ربنا تاب علي منها بس لما بسمعها غصب عني بترجعلي الحاله واحس اني حتشل تاني -_-

ايه السبب في الاستظراف والتميع في الكلام وتلحين الكلمات والنكت السخيفه وعدم الاكتراث بالاحداث الموسفه الي بنعشها

حقللك :

1- احنا مشكلتنا عايشين في عصر الرياله الاعلاميه :huh:

ولسه مصدقين ان اعلامنا بيقود الاعلام العربي وبالتالي بنرفض التطوير والابداع وقفين في مكانا من سنين والعالم كله بيسبقنا وحاسين ان احنا محصلناش :lol:

2- المذعيين الي بهتموا بتميه ثقافتهم واطلاعهم ونطقهم السليم قله قليله لكن الاغلبيه بيهتموا بس بالبس والمكياج والاستظراف بس <_<

3- الانفصال الشبكي بين كل حاجه في حياتنا وبين اعلامنا وصوره المذعين تحس مبيعبروش عننا والدليل معندناش مذيعه محجبه وكان حرام الحجاب اصلا تبقي في مصيبه بتحصل في مصر وكل وكالات الانباء ناقله علي الحدث تحول علي مصر تلاقي فيلم ابيض واسود شغال والرقاصه بترقص ولا كان فيه اي حاجه ولما ربنا يهديهم ويفوقوا يقولولك شويه تصريحات بلهاء مرتبكه لان لسه الكلام الرسمي موصلهمش -_-

كفايه كده النهارده لان ضغطي علي فعلا

[Sherief AbdelWahab]

أحد الأسباب اللي المذيع بيستظرف علشانها بالتأكيد هو الرغبة العارمة في إنه يريد أن يبقى النجم الأوحد في المكان والمستأثر بلفت النظر ، ودة بيتطور عند نجوى إبراهيم وسناء منصور وساعات هالة سرحان لما أسميه "صراع الديك".. والذي يتعامل فيه المذيع أو المذيعة على إنه ديك البرابر والضيوف والمشاهدين شوية فراخ ما عليهم إلا التزام الأدب والقيام وقوفاً عند نية الكلام مع المذيع أو المذيعة..

المذيع الشاب لما بيستظرف فاكر بكدة إنه بيلفت أنظار البنات ، ويا سلااااااااام لما يصدق نفسه فعلاً ويفتكر إن البنات بيترموا حواليه إكوام إكوام (مع الاعتذار لمحمد صبحي في مسرحية الجوكر)

تخيلوا بقا لما يحصل الكلام دة من مذيع متصابي! :wub:

المذيعة المتصابية عايزة تحسس نفسها وتحسسنا معاها إنها لسة فيها الرمق كأنثى ، رغم عمليات الشد ونفخ الحواجب والعدسات الفوتوجراي .. أما الشابة فأنا شخصياً مش عارف هية بتستظرف ليه .. دلع ولا غباوة ولا مرض نفسي..

فيه فرق بين الظرافة والاستظراف ، ودة شيء يجب على البني آدم إنه يعيه بنفسه ، أو يكون عنده من الحساسة ، خصوصاً إذا كان بيدخل كل بيت ، إنه يعرفه كويس جداً..فيه ناس زي تامر أمين معندهمش فكرة عن اللي بقوله "نوووووووووووووهاااااااااااااائييييييي"... :huh:

خلص الكلام

[احمد هادي]

المذيعين تبعنا بيستظرفوا لاسباب عديده منها

1- محاولة تقليد غيرهم من الناجحين الظرفاء فعلا كجورج قرداحي وحمدي قنديل

2- الفراغ وضعف الثقافة بصفة عامة

3- سوء الاعداد أو غيابه اصلا وهنا يستخدم الاستظراف لملء المساحة الزمنيه

4- اعتماد بعض البرامج علي شخصيه المذيع . بمعني ان الفكره قد تكون ممتازة لو قدمها مذيع ظريف فعلا وهو مالا يحدث

5- اعتقاد بعض المذيعين انه ظريف ويبدو انه لم يسأل عن رأي الناس . في الغالب يعتمد علي رأي العائلة والاصدقاء وهو طبعا معروف

6-سياسه ماسبيرو التي تركز علي البرامج التافهة والساذجة مع غياب واضح وتعمد للبرامج الجاده المفيده. ومذيع من هذه النوعيه هو الانسب للهيافه طبعا

ملحوظه أخيره

ممكن يكونو هم ظراف ودمهم خفيف فعلا بس احنا مش واخدين بالنا :huh: :wub:

تحياتي

تم تعديل 22 مارس 2006 بواسطة احمد هادي