يوميات عائله ابن مصر

[إبن مصر]

انا يا اخوانى للذين لم أتشرف بمعرفتهم هنا من ابناء المحاورات...... ولظروف خارجه عن ارادتى لم اتمكن من التواجد كما اعتدت لفتره زادت عن ال 5 أشهر...

وبعد زوال بعض هذه الظروف أعود الى أحبائى واخوتى من جديد.....

تتكون عائلتى الصغيره منى .. انا .. ابن مصر وزوجتى وهى عضوه هنا أيضا بنت مصر .. وابنتى الصغيرتين اللتان رزقنى الله بهما وانا هنا ...

و فى عيد الام خرجت انا وابنتى وزوجتى كى نتنزه قليلا ونذهب الى جده البنات أمى الحبيبه ... وللذين لا يعلمون كان عندى سياره تعتبر عضوه هنا فى المحاورات الا وهى امتثال ...( رحمه الله على ايامها ) والتى فقدتها فى حادث اليم ... حولها من عروسه جميله الى بقايا وسجايا واطلال .... وقد كافأنى الله بصبرى على تلك الفاجعه ان استطعت ان امتلك ست ابوها ( سياره اخرى ) وبالصبر والاراده والصلاه تماثلت امتثال للشفاء واصبحت من عليه القوم امتلك سيارتين...

المهم كى لا أطيل عليكم وانا فى ست ابوها واسير الهوينه على طريق محور 26 يوليو حيث انى ولله الحمد والمنه من سكان مدينه 6 اكتوبر...

وبينما اسير مع عائلتى بدأت فى فتح حوار مع بناتى الكبرى خمس سنوات ونصف والصغرى 4 سنوات ودار بيننا الحديث التالى:

الكبرى: بابا بابا مكن سؤال....

انا : طبعا يا حبيبتى ... اتفضلى ..

الكبرى : هو ليه عمو حسنى مبارك ما بيطلعش فى التليفزيون ؟؟؟ وما بنشفهوش... هو زى الرسول عليه الصلاه والسلام صورته ما بتظهرش؟ وليه ما يحطوش بدل صورته نور ؟؟

( فرمله عنيفه كدت ان اصططدم بالسياره التى امامى )

انا : ايه ... اه لا يا حبيبتى بيطلع بس انتى بتبقى نايمه ,..

الصغرى : لا يا ستى انا شوفت صورته فى الشارع صوره كبييره هو و باباه..

انا : باباه مين يا حبيبتى؟؟؟؟؟

الصغرى : عمو .. باباه .. ابو شعر ابيض... الى لابس نظاره..

الكبرى : ايوه ايوه صحيح انا شوفت الصوره دى قبل كده...

انا : لا يا حبيبتى دا مش باباه .. ده ... ده.. رئيس الوزرا بتاعنا .

الكبرى : يعنى ايه رئيس وزرا ؟ و هو اكبر من عمو حسنى مبارك ؟ ولو هو أكبر منه ليه صورته مش عند الناظره فى المدرسه بدل صوره عمو حسنى مبارك ؟

الصغرى : يا بنتى انت مش فاهمه حاجه.... دا باباااااااه

أنا : لا يا حبيبتى ده مش باباه ده ...ده ... راجل بيساعده فى شغله ..

الكبرى : وهو عمو حسنى بيشتغل ايه يا بابا؟؟

الصغرى : وباباه ابو شعر ابيض برضه يا بابا بيشتغل ايه ؟

أنا : يا حبيبتى هو بيشتغل رئيس جمهوريه .. زى.. زى ... زى بابا كده يا حبيبتى .. مش انا طول اليوم فى الشغل عشان اجيبلك الى انت عوزاه واجيب اكل جميل ولبس حلو ولو حد فقير احتاج مننا حاجه يبقى معانا الى نديهوله ....هو بقى الى بياخد باله مننا كلنا ..

الكبرى : يعنى هو بابا بتاع مصر ؟؟

أنا : مش قوى بس يعنى زى كده ..

الصغرى : وباباه بيعمل معاه ايه فى الشغل ..

أنا : يا حبيبتى دا مش باباه دا بيساعده...

الكبرى: بيساعده ازاى يعنى بيعمل ايه ؟

أنا : بيختار الى يشتغل ويخلى باله مننا ..

الكبرى : يعنى ايه ؟

أنا : ممممممم... بصى يا ستى هو بيجيب ناس عشان تعلم ولادنا فى المدارس وناس عشان تعلمنا نزرع ازاى ونخلى بالنا من اكلنا وناس عشان تشيل فلوسنا وتخلى بالها مننا وناس عشان تبنى لينا بيوت ومدارس ناس عشان تعالجنا وتجيب لينا الدوا وناس عشان تمسك الحراميه وتقبض عليهم وناس عشان تدافع عننا لو حد حاول يحاربنا ...

الصغرى : ياااااااااااااه باباه بيعمل كد ده ..

الكبرى وهى تفكر تفكير عميق : بابا اذا كان فيه الناس دى كلها ... امال هو بيعمل ايه ؟؟؟؟؟؟؟؟؟؟

نظرت الى بنت مصر فى صمت ونظرت الى بناتى

انا : بيختارهم يا حبيبتى من الناس الكويسه الى تقدر تعمل كللللللللللل ده من غير ما تغلط

الكبرى : هو الى بيختارهم ؟

انا :ايوه

الصغرى : وهو مين اختاره ..؟

انا : احنا يا حبيبتى ( وشعرت بمراره الكذب فى حلقى )

الكبرى : ومين اختار ابو شعر ابيض ..

أنا : هو

الكبرى : وليه منختارش ابو شعر ابيض كمان ؟ وليه عمو علطول شعره اسود وليه ما بيكلمناش فى التليفزيون وليه ابو شعر ابيض ما بيكلمناش فى التليفزيون واذا كان كل الى بيعمله انه بيخلى باله اننا نبقى مبسوطين يبقى ليه ما بيتكلمش معانا زى ما انت بتعمل وليه ....

أنا : ايه رأيكوا تاكلوا أيس كريم ... اصلنا داخلين على لجنه ..

.هذا الحديث دار بشكل أخر بالفعل مع بناتى ربما سقته فى صوره مرتبه ولكن تناقشت معهم فى كل النقاط المذكوره..

ايه رايكم دام فضلكم

ابن مصر

[se_ Elsyed]

حمد الله عالسلامه يا اشكيف

وزغروطه لان امتثال رجعت لنا بالف سلامه

وسلماتي لست ابوها اللي كان لي الشرف اني اتعامل معاها

ده بالنسبة للشق الاجتماعي

---------------

بالنسبة للشق السياسي فأحب اعرفك يا سيد ابن مصر ان اللي بيكدب بيروح القسم

بس خلاص

[إبن مصر]

يكرمك ما يحرمك يا رب .....يكسيك ما يعريك

بس معلش يا ابو عمر .... الاطفال لازم ياخدو الاول ايجابيات اى شىء عشلن فى سن معين هايعرفوا سلبياته لوحدهم ولو سودتها فى وشهم ووش اهاليهم من الاول هاينتهى بيهم الحال ويبقوا ...

يبقوا .....

يبقوا...

زيى وزيك كده

وسلم لى على سلطه البابا غنوج بشرائح الليمون المسلوقهخ

ابن مصر

[se_ Elsyed]

سلطه البابا غنوج بشرائح الليمون المسلوقه

------------

قصدك مين بالبابا غنوج ؟

ومين شرائح اللمون المهروسة ؟

دي اسقاطات سياسية لا اقبلها ؟

فلا بابانا كلنا وتاج راسنا هو " بابا غنوج "

ولا الشعب المصري هو شرايح بطاطس مهروسة

اسحب كلامك

ده لو سمحت واشطبه من مضبطة الجلسة حالاً

[الأفوكاتو]

تحية للأخ أحمد محمود على فتح هذا الموضوع بعد طول غياب..

لقد فطن الأطفال الصغار إلى أمور تغاضى( و توقف ) عن التفكير فيها الكبار,

و لو استمر الآباء صُمّ خرس مع إسئلة أطفالهم, فسوف يصابوا بحالة الغيبان التى أصابتنا,

تحياتى لأطفال مصر و مستقبلها, و تحياتى لأطفال أخى أحمد محمود.

[Scorpion]

اخي الحبيب احمد ...

عودآ احمد و محمود نملا منه قلل و ازيار و نعبي لعابري السبيل .... -_-

نخش عالجد طوالي ...

ما فتكرش ان مناقشة بناتك حول النقطة دي او حتي محاولة شرحها بتبسيط حيغير اي حاجة في تكوينهم الفكري الحالي . احتمال تفضل كام كلمة جوا مخهم .. و بعد سنين ممكن تتبلور .. لكن الأكيد ان عالمهم البريء المثالي دلوقتي بعيد سنين ضؤية عن واقعنا الحقيقي .. و عن الاعيب السياسة ...

لكن بما انهم كمان كام سنة حيكونوا من ضمن اللي ممكن يغيروا حاجة .. اعتقد ان السياسة الحقيقية لازم نعيشها عمليآ كلنا مع اولادنا .. تعليمهم اسس الديموقراطية ... و الأصرار باي وسيلة علي اخذ حقهم .. هي دي المفروض اهم خطوة نقوم بيها في بيوتنا ..

فهل ( وش المحامي خَلف خٍلف خلاف ) تطبق الديموقراطية في بيتك و الا زي ما بتعمل الأكثرية استسهالآ "كلمتي هي اللي تمشي " و بس...

[عصام]

فهل ( وش المحامي خَلف خٍلف خلاف ) تطبق الديموقراطية في بيتك و الا زي ما بتعمل الأكثرية استسهالآ "كلمتي هي اللي تمشي " و بس...

إيييييييه دنيا ... :o

رحم الله من قال : "ديموقراطية الحوار وديكتاتورية القرار" .. -_-

مش عايز ضرب .. أنا باقول اهوه -_-

[SANAA]

سرد رائع يا أحمد والحقيقه جزاك الله خير اللي سترت الراجل وماقلتش كل اللي تعرفه للبنات

بس فيه سؤال لما حيسألوك عن بابا جمال وماما خديجه ياتري حترد عليهم وتقول ايه ؟؟؟؟؟؟

تم تعديل 25 مارس 2006 بواسطة se_ Elsyed

[إبن مصر]

استاذى الغالى واخى الحبيب أفوكاتو ..

مرورك الكريم بمكا كتبت أفرحنى..وأسعد قلبى.

اما ما يخص الحديث مع الاطفال هؤلاء الوحوش الصغار فلقد رأيت ان أفتح هذا الموضوع ربما استفاد البعض من الحديث أو أوحى الى البعض الاخر بالردود التى أعجز عنها.

ما دار بينى وبينهم أكثر من هذا بكثير .. وأعتقد أنه لابد من الاجابه على كل أسئلتهم كى يتسع افقهم كما فعلت أمى معى...

وسوف استمر فى عرض مناقشات عائله ابن مصر متمنيا مشاركنكم........

أخى الحبيب كامل.....

ايييييييييييييييييييييييييه دنيا .. على فكره انا الى جايبلى الصداع انى لازم اسمع كل حاجه .....وكما تفضل العزيز أسو ...أن مبدأ ديمقراطيه الحوار ودكتاتوريه القرار هو المتبع معى زاحمد الله انى مءسس هذا المبدأ .. يعتى لازم اسمع كللللللل حاجه وفى الاخر الى بيدفع هو الى يمشى كلامه..

وبلاش بذور الفتنه الى بتحاول تنشرها وسط طبقات المجتمع باثارتك مثل هذه الاسئله الجدليه التى ....

التى.....

وكده...

اخى الحبيب عصام ....

انت عمرك ما تستر ابدا....... بتسبق.... دا انت نفسيه!!!!!!!!!

الاخت الفاضله سناء..

أولا الحمد لله على السلامه ولو كنت عارف انك هاتكتبى فى موضوعى يمين بالله كنت كتبته قبل ما اكلمهم حتى..

اما بخصوص سؤالك.....

ربنا يكرمك انا عندى بنات عايز اربيها!!!!!!!!!!!!!!!!!!!!

سى السيد......

اطلعلى بره!!!!!!