منقول ٠٠ ربما نتجنب النصب باسم العمل الخيري

[عادل أبوزيد]

منقول للتوعية فقط وعلي شان تعرفو فنون النصب وصلت الي مستوي احترافي صعب التكهن به
ولازم المتبرع يكون عارف فلوسه رايحه فين بالضبط
في رمضان 2017 كنت بصلي الظهر في المسجد ، بعد الصلاة لقيت راجل فلاح شكله مبهدل على الاخر ، جالي وهو بيعيط وماسك في ايده أوراق بتاعت محكمة !! 
قال لي يا شيخ أنا مديون وعليا قضايا والحكومة جات تاخدني ، وبقالي 3 أيام هربان من البيت ومش لاقي مكان أبات فيه ، وماشوفتش عيالي من أول رمضان !!
* طبعا أي حد اشتغل في الأعمال الخيرية في مصر وصل لحالة من اليقين إن 99% من الحالات اللي بتقابلها في الشارع دي بتبقى نصب !! والواحد ياما شاف !! 
فأنا عادة بعتذر للحالات دي وخلاص ! لكن للأسف في حاجة جوايا كدة - بسبب موقف حصل معايا زمان - بتخليني أخاف لحسن يطلع من الـ 1% الصادقين !! 
المهم .. قلتله اهدى كدة وبطل شحتفة ، وهات الورق اللي في ايدك ده ، وانا هابحث بنفسي ، لو طلعت صادق اعتبر المشكلة كلها اتحلت بإذن الله ! 
اخدت منه الورق ، وكلمت المحامي بتاعي قلتله عاوز أتأكد من القضايا دي !
وبالفعل خد مني الورق ، وكانت القاضايا كلها في طنطا تقريبا ، غطس وجابلي قراراها !! قالي الراجل ده فعلا مديون ومرفوع عليه وصولات أمانة كتير وعليه أحكام  !! قلتله تمام ، كدة أول خطوة عرفناها !! لازم بقا أعرف واخد الديون دي ليه ومن مين !!!
فضلت أتتبع الحالة ، عملت ميت مكالمة تليفون ، وكلمت كمية ناس لحد ما عرفت في الآخر أوصل للتجار اللي رافعين عليه القضايا !! فيه حاجة مش طبيعية خالص في الموضوع !! الراجل شاري من التاجر 5 تلاجات ، ومن تاجر تاني 10 موتوسيكلات ، وهكذا !! حاجة مريبة وجنونية !! 
الحركة دي معروفة لما يبقى واحد محتاج كاش كبير !! يروح لتاجر يشتري منه تلاجة مثلا ، ويقول له هاخدها منك بالقسط !! وبعدين في يدفع مقدم ، وفي نفس الوقت يقول له : خلاص هبيعهالك دلوقتي كاش ، وأبقى أسدد قسطها على مهلي !! فياخد الكاش ويسيب التلاجة زي ماهي !! حركة معروفة ومعاملة تجارية حرام شرعا !! بس بيعملوها لما يكونوا محتاجين كاش بشكل فوري !! 
فضلت وراه برضه عشان أفهم .. من تاني يوم رمضان لحد يوم 17 رمضان !!
نفسي أطنش ، بس خايف ليطلع صادق !!
في الآخر خالص فيه تاجر محترم ، من كتر ما كلمته وضغط عليه قال لي : يا شيخ بأمانة الله ، الفلوس دي زكاة مال ؟؟ 
قلتله أيوة !!
قال لي : يعني دي فلوس يتامى وأرامل وكدة ؟؟
قلتله : ايوة !!
قال لي : طيب بص يا شيخ ، انت شكلك راجل محترم ، واحنا في أيام مفترجة وربنا شاهد علينا !! صحيح أنا ليا فلوس عند الجدع ده ، بس حرام تديله من فلوس الزكاة !!
قلتله ليه ؟؟ قال لي : عشان بيلعب قمار !!!!!!!
تخيلوا ؟؟ لا حول ولا قوة إلا بالله !!
ده يا اخواننا مثال "بسيـــــــط" جدا للحالات اللي بيقابلها اي حد يشتغل في الخير في مصر !! 
احنا بنقابل سماسرة شغالين في الخير !! يجيب حالات (صحيحة على مضروبة) وياخد منهم نسبة !!
وشفنا حالات "مسجوووونة" وطلعت نصب برضه !! بيبقى متفق مع التاجر يكتب عليه وصولات أمانة وهمية ، ويرفع عليه قضية ويتسجن بالفعل ، وبعدين أهله يلجأوا للناس اللي شغالين في حالات الغارمين عشان يسددوا الفلوس للتجار ويخرجوه ، وفي الاخر يننص الفلوس مع التاجر !!! تخيلوا ؟؟؟
طيب انا بقول الكلام ده ليه دلوقتي واحنا في رمضان ؟؟؟؟
بقول كدة عشان الناس تاخد بالها من فلوسها !! صدقاتك وزكاتك مش مكانها الشارع !!!
فيه أفراد ومؤسسات شغلتها العمل الخيري !! عندهم وظيفة اسمها (باحث/باحثة) !! بيبقى متمرس في الكشف عن الحالات والتدقيق ومعرفة المستحق من غير المستحق !! 
ومش لازم يكون نصاب على فكرة !! فيه ستات غلابة - في الأرياف مثلا - بيجهزوا بناتهم جهاز ملوك !! أنا وانت مانقدرش عليه !!! وتتسجن ، ونيجي احنا نخرجها في الاخر !! 
طيب والعمل ؟ .. انا هرشحلكم الجمعيات اللي اتعاملت معاها وأحسبها إن شاء الله ثقة وبيبذلوا جهد كبير في موضوع التدقيق ده ، ((ومش بيعملوا إعلانات بفلوس الصدقة)) !!!
1- اللي حابب يحط فلوسه في باب علاج المرضى (العلمليات الجراحية لغير القادرين ، صرف الأدوية للمرضى المستحقين ، غسيل الكلى ، جلسات الكيماوري ...)
فأنا أرشح جميعة مؤسسة مرسال - Mersal Foundation ، مؤسستها Heba Rashed
2 - ولحالات الفقراء والمساكين والغارمين واليتامى والمساعدات الشهرية وبناء الأسقف وتوصيل المياه وغيرها من النشاطات المعروفة ، فأنا أرشح جمعية Merqah Foundation - مؤسسة مرقاة ، مؤسسها أخي Hisham Hafez
وجمعية Kollena Daleel El Kheir   كلنا دليل الخير صديقي Amr Ahmed Hussein
3 - واللي حابب يساهم في الجهد الدعوي بصدقة جاري ، وعلم ينتفع به ، بكفالة طلبة العلم الشرعي المغتربين وطلبة الأزهر الشريف اللي بيدرسوا هنا، وبعدين يرجعوا بلادهم في اسيا وافريقيا للدعوة إلى الله ونشر الإسلام وتعليم الدين، فأنا أرشح جميعة سفراء الهداية 
وده رقم استاذ خالد مسئول جمع التبرعات : 01024445670
انا عندي ترشيحات تانية وخصوصا في الافراد ، لكن انا متعمد اخلي البوست ده للمؤسسات بس لإن التعامل معاهم رسمي واحترافي وموثق لأقصى درجة !
ربنا يتقبل منا ومنكم ، ويعيننا نوصل للمستحق الغلبان المتعفف ، ونبعد عن المحتال النصاب المتمرس !!