أكيد وضع الطالب مختلف جدا( عندما يريد العودة)

[مريوم المصرية]

هاي..السلام عليكم ورحمة الله وبركاته :)

أعزائي أعضاء المنتدى الأفاضل،،طبعا كلنا قرأنا ف قسم المغتربين ده أكتر من 10 مواضيع حول ((حلم العودة))

واللي عايز يعمل مشروع واللي خايف يشتغل في الحكومة

لكن موضوعي ده مختلف..........

هو يشبه حلم العودة بس بالنسبة للطالب

أكيد انتو عارفين ان الدراسة غير الشغل تماما

دلوقتي بابا بيشتغل في السعودية وانا بدرس،،، ونفسي أرجع

بس بابا مش عايز يرجع وماما بتقولي أنا مع بابا ف أي مكان ومش هسيبه عشان آجي معاكي

الحقيقة أنا مخنوقة جدا هنا ونفسي أرجع أعيش ف مصر

مع اني مولودة ف المدينة،بس يمكن عشان نقلنا مكة فكل حاجة اتغيرت عليا وسبت صحابي المصريين

فحياتي بقت صعبة أوي.لسه على ما اتعود عليهم ويفهموني

غير ان الدراسة ف مصر على حد معلوماتي صعبة جدا جدا جدا،،،،وممكن ما افلحش :) وانا الصراحة معنديش أي استعداد آخد دروس ف كل المواد

والمجموع والثانوية و كل الحجات اللي انتو عارفينها دي

سؤالي إيييه الحل؟؟؟؟؟؟؟؟؟؟ ولو تعرفو حد كان ف وضعي وحل المشكلة عمل إيه؟؟؟حلها إزاي

دبروني الله يكرمكم :o

تم تعديل 24 مارس 2006 بواسطة مريوم المصرية

[Scorpion]

العزيزة مريوم ...

بصراحة انتي عرضتي الموقف من جهة مختلفة خالص ..و ما حدش عالجها قبل كده ...يمكن أنانيتنا بتخلينا نبص للموقف د من وجهة نظر واحدة ..يعني من وجهة نظر الأب او الأم .. لكن الأبناء نادرآ ما حد فينا ما بياخد رأيهم .. بالرغم من انهم السبب الرئيسي للغربة دي .. علشان 90% من قرار الغربة بيكون علشان توفير مستقبل افضل لأبنائنا ( و بالمرة تحسين اوضاع اجتماعية )

ثم موضوع العودة ده بيختلف من بلاد و أخري ... من أوضاع و أخري

مثلآ معظم اللي في دول اوربية نادر ما بيفكروا انهم يرجعوا لأن ( بجانب الجوانب السلبية المعروفة ) لكن كل شيء هناك مصنوع علي مقاس الأطفال و الشباب .. فعلشان كده مع شوية عادات و تقاليد محفوظة جوانا ممكن الواحد يركن شوية فكرة العودة ..

في الدول العربية الموقف بيتغير شوية ... و ده هنا فيه عاااااالم ممكن يحكولك علي تجاربهم .. و بالذات اللي كانوا زيك ... يعني دلوقتي صحيح كبااار .. لكن مراهقتهم و شبابهم قضوه مع اهاليهم في الغربة ... يعني مثلآ .. مثلآ ... لو شعنونة عدت علي الموضوع ده .. يا ريت تدلي بجردلها .. اكيد حينفع ...

لكن نرجع لحالتك انتي يا مريوم ... الرغبة في العودة دي اعتقد لأنك لسه ما تأقلمتيش علي المكان الجديد .. بمعني لو كنتي لسه في المدينة مع اصحابك المصريين ما كنتيش حتحسي بالوحدة اللي انتي فيها دي .. و لا حتي الرغبة القوية للودة الي مصر في اسرع وقت ...

و لا انا بتكلم كده و ببسطها علشان نسيت قد ايه الواحد بيكون في منتهي الحساسية في شبابه... و تفكيره بيتحدد اكتر عن طريق العواطف مش عن طريق العقل ...

مريوم ... سهل اني اقوللك حاولي تلاقي الجوانب الحلوة اللي في المكان الجديد و مع الموقف حيكون له شكل تاني ..لكن علي الأقل حاولي انك ما تحسسيش اهلك بالذنب ... كفاية شعورهم بالغربة هما كمان ... و تأكدي انها فترة و حتعدي ...

و اعتبرينا يا ستي اصحابك المؤقتين لغاية ما تلاقي اللي يملا الفراغ ده ...

تحياتي و امنياتي لكي بكل شيء جيد ...

[بنت شعنونة]

انا كنت زيك يا مريم

وانييييييييل كمان

انا اتولدت في السعودية وعشت هناك لحد الجامعه

و اول ماخلصت ثانوية اصريت بمنتهى الغبااااااااااااااء اللي في الدنيا ارجع مصر

عشان الحرية وسواقة العربية و الفسح و الحياة اللي مش موجودة في السعودية

دلوقتي بضرب نفسي الف الف جزمة انا واخواتي اللي فاكرنلي المصيبة دي ومش مسامحيني عليها

الدراسة هنا صعبة تعتمد على مجهودك الذاتي لا تقولي دروس ولا يحزنون كله فلوس او مجهود

معاكي ها تنجحي لو كنتي متخلفة ما معاكيش مش ها نتجحي لو عملتي ايه

في السعودية بيشربونا العلم بمعلقة

مهما قالولك الشهادة من مصر اقوى وبتاع

دا كله تخريف

انا عندي اخد شهادة من هنولولو وابقى فاهمة اللي بعمله

احسن ما اخد شهادة طب من مصر وانا مش فاهمه حاجا في الملوخية

صدقيني

اسالي اي حد كان زيي ها يقول نفسسسسسسسس كلامي بال ملي

توكلي على الله

[مريوم المصرية]

محدش بيرد!!!!!!!!!!!!

شكرا.

[عادل أبوزيد]

محدش بيرد!!!!!!!!!!!!

شكرا.

كيف هذا الم يكن تعقيب العم سكوربيون ردا ألم يكن فى تعقيبه الرد الوافى ؟ ألم يكن رد الفاضلة شعنونة يمثل ردا و هى مرت بنفس الظروف تقريبا.

ربما الرد الآخر هو ما سأورده لك الآن

ألم يخطر فى بالك الأعباء التى تريدين فرضها على أسرتك ؟ تلك الأعباء التى تتمثل فى تغيير كامر لمسار الحياة و الذى يتمثل فى قرار مصيرى يتخذه الأب لإنتقال الأسرة إلى القاهرة ؟

ألم تضعى نفسك فى موقف والدك و ما عساه هو فاعل بكم بكل الأسرة لمجرد أنك تشعرين بقدر من عدم الإرتياح لإفتقادك صويحباتك فى المدينة ؟

هل تتصورين إرسالك وحدك للقاهرة عند عم أو خال أو خالة بالأمر الهين على الأب ؟ الم تلاحظى كم مرة يمر الوالد عليكى فى نومك مطمأنا إلى أنك بخير؟

ألم يحدث أن أصابك كابوس اثناء النوم و جريت و ألقيت بنفسك فى أحضان الوالد أو الوالدة؟

ألا يتكرر أن تنامى مطمئنة على حجر الوالدة و تدعيها تعبث بشعرك و تغمضين عينيك فى نشوة و إطمئنان بأصابعها تدغدغ شعرك الجميل ؟

الفاضلة مريوم ...هذه مجرد كلمات ذكرتها لكى لعلها فى نظرك تمثل تعقيبا على موضوعك هذا

و أرجو ألا يخطر ببالك مجرد يخطر على بالك أننا هنا فى محاورات المصريين لا نأخذك بالجدية الكاملة

ملاحظة : عمك عادل أبوزيد كاتب هذه السطور يبلغ من العمر ثلاث و ستون عاما و أبنائى محمد عمره ثمان و عشون عاما مهندس ناجح و الآخر أحمد خمسة و عشرون عاما مهندس ناجح و مررنا بتجربة الإغتراب فى أوروبا و الخليج.

[مريوم المصرية]

undefinedكيف هذا ألم يكن رد العم سكوربيون ردا ألم يكن في تعقيبه الرد الوافي؟ألم يكن رد الفاضلة شعنونة يمثل ردا وهي مرت بنفس الظروف تقريبا

أبدا والله حضرتك فهمتني غلط.

أنا مش قصدي أأقلل من جهدهم أو أنكر فضلهم بالرد عليا. :)

بس أنا عاوزة أشوف آراء عدد كبير عشان الاجماع ولو في حد عندو رأي آخر

شكرا لعمو سكوربيون :D

شكرا لآنتي شعنونة :D

شكرا لحضرك :)

تم تعديل 10 أبريل 2006 بواسطة مريوم المصرية

[Mohammad Abouzied]

صعبه جدا ان الابن او الابنة تحدد المكان التي تريد ان تعيش فيه متجاهله تماما ان الوالد يكافح ويكد ويعمل لاجل مستقبله او مستقبله

لي صديق عزيز علي اصر ابناءه كلهم ان ينزلو لمصر ويتركو السعودية وللأسف الام كانت معهم في نفس المركب واضطر يقبل بالامر الواقع وان يعيش لوحدة

ولكن النتيجة ان ابنة سقط عدة مرات في كلية الهندسة وابنه الثاني بدأ ينفلت حاله وابنته ضعف مستوها العلمي في المدرسة

وفجأة وبدون مقدمات قدم استقالته وترك السعودية وقام بمحاولة مستميته لنقل ابنة لكلية في الاسكندرية والحمد الله سمعت ان اموره مستقره تماما

وعن تجربة اكيدة العيشة في مصر خاصة للطلبه والابناء بدون الوالد تكاد تكون حكم باعدام مستقبل الابناء تماما

واذا كان الاب محتاج للعمل فعلا على الابناء ان يتحملوا الغربة بمساوئها حتى يأتي الفرج قريبا لان مفيش حل اخر الا المعاناه بمعناها المادي والمعنوي

وبصراحة لولا الغربة مكنتشي قدرت اعلم ابنتي تعليم راقي ولا كنت قدرت اجوزها جوازة محترمة لرجل محترم ذو مكانة علمية رفيعة ومركز ادبي مرموق في المجتمع

ولو خضعت لنداءاتها باني انزل واترك السعودية واترك عملي كانت الاحوال سوف تكون اسوء مما هي عليه الان

الصبر يا ابنتي سنة ولا اثنين لا يمثلو اي شئ في رحلة العمر الطويلة

[White heart]

مريوم المصرية كتبت:

سؤالي إيييه الحل؟؟؟؟؟؟؟؟؟؟ ولو تعرفو حد كان ف وضعي وحل المشكلة عمل إيه؟؟؟حلها إزاي

دبروني الله يكرمكم :)

بصراحة .. انا لم أمر بتجربتك ....

و على الرغم من ان الزملاء الأعزاء قد قالوا و وفوا ... الا اننى أتسأل اذا كان لديك انتِ إستعداد فعلى للإستقلال عن أسرتك الكريمة أم لا؟

أسمع ان هناك الكثير من الشباب الذى يسافر الى الغرب بغرض الدراسة و التعليم فهل فكرتِ فى هذا الحل؟ هل لديكم أقرباء ( محل ثقة ) بإحدى الدول الأوروبية مثلا؟

أتفهم تماما موقف اسرتك الكريمة ( إنقطاع عدة اعوام + مشاهدات و إحتكاكات أثناء الأجازات و الزيارات و ما تتركه من إنطباع سلبى و صعب فى كثير من الأحيان + قرار العمل أى البدء من الصفر فى إحدى المؤسسات أو الشركات مع فارق الراتب و المستوى الإجتماعى و المعيشى ... الخ .. الخ ) ، و فى نفس الوقت أتفهم تماما موقفك ( أحلى سنين العمر + علاقات الصداقة و الحاجة الماسة اليها + تبادل الخبرات و التجارب الحياتية الحقيقية فى وسط مرحلى قبل الخروج و الإحتكاك بالوسط الأكبر و الأصعب .. الخ .. الخ ... ) - و لهذا أرى ان الكرة فى ملعبك أنتِ أولا - أى كما ذكرت لكِ عل أنتِ مدركة و مستعدة نفسيا للإستقلال أو بمعنى أدق " الإنسلاخ " عن أسرتك الكريمة اليوم، و السفر و التغرب بغرض الدراسة فى مجتمع آخر؟ هل أسرتك الكريمة من حيث المبدأ ممكن أن توافق على أن تنتقلى بمفردك الى إحدى البلاد بغرض الدراسة الجامعية، و عدم ملاقاتهم الا فى إجازاتك السنوية؟

إجابتك اذا كانت بالإيجاب فأنصحك و بلا تردد أن تبدأى فورا بمراسلة ما أمكنك من جامعات أوروبية و السعى بجدية الى إتمام إجراءات السفر و الإنتقال و الدراسة .... اما اذا كانت الإجابة بالنفى .... فما مفر الا الإصرار على " التأقلم " و التعايش مع ظروفك الحالية مع صعوبتها، و هناك العشرات من الطرق التى يمكن أن تساعدك على هذا ... خاصة و انه منذ أول كلمات استهللتى بهم مداخلتك فى هذا الموضوع يخيل الى انك صاحبة شخصية لديها القدرة و الإستعداد على التأقلم و الإنفتاح على من حولها أى كانوا و إكتساب صداقتهم بسرعة - و هذا من وجهه نظرى عامل أولى نفسى هام.

مع تمنياتى بالتوفيق .

[كامل الجمل]

هو ايه اللي تسافر و تلتحق بجامعة في دولة اوربية يا وايت ... دي بنت مصرية .. يعني مش نفس المنطق اللي موجود عندنا هنا في الغرب ...

الموضوع اللي قدامنا مش بنت من فرنسا او المانيا .. و ممكن ( و ان كان مش في كل الأحوال ) ممكن ببساطة تروح تدرس في دولة اوربية تانية ...

طب بذمتك .. منطقيآ كده .. حتلاقي فين في مصر كلها اي عيلة من اي مستوي اجتماعي او ثقافي ... حتوافق ان بنتها تتغرب لوحدها في سن المراهقة في دولة اوربية .. احنا بنتكلم عن افتراق جذري لفترة طويلة .. مش تقضية اجازة مع الكلية 4 ايام في الأقصر و اسوان .. الحل اللي قدمته .. ينطبق علي المجتمعات الغربية بدون مشاكل .. و لكنه خارج حتي نطاق المناقشة في مجتمعاتنا الشرقية ..اوعي تسمعي كلامه يا مريوم ....المرة دي وسعت منه :) ياللا ... خشوا عليه ..

الحل يكمن في البحث في النطاق المحيط بها .. من مجموعات جديرة بالثقة .. و زي ما كان عندك شلتك من المصريين في المدينة ... اكيد حتلاقي برضه مجموعة تشاركك الفترة دي في مكة ... المهم انك ما تخليش الفراغ و الزهق يعرفوا طريقهم ليكي ...

تحياتي ...

[مهيب]

أنا نصيحتى لك بالعودة طبعا .. ودون تردد .. هناك من تحدث عن أن مصر النجاح فيها بالفلوس و اشياء من هذا القبيل .. على العموم أنا قد تعلمت فى مصر و الحمدلله .. و لم أصطدم يوما ما بمسألة الفلوس تلك .. النجاح فى مصر ليس له أدنى علاقة بموضوع الفلوس هذا ...

وعلى جميع مراحل دراستى بلا استثناء واحد لم يكن الأوائل من الأثرياء الذين معهم فلوس .. وأنا لست عجوزا حتى يكون الحال قد تغير من أربع أو خمس سنوات ..

النقطة الأخرى أن الخوف من صعوبة الدراسة فى مصر هو خوف غريب ان شئتى الدقة .. فأنت قد طبقتى بقلقك هذا تجربة من يضيع منه شيء فى منطقة مظلمة فيذهب الى منطقة منيرة ليبحث عنه .. أنتى تقارنى الدراسة فى مصر بالدراسة فى السعودية فتصفينها بالصعوبة .. و هذا ليس صحيحا .. لم لا تكون الدراسة فى السعودية هى التى سهلة أكثر من اللازم ..

على العموم .. اذا أردتى أن تعملى بعد تخرجك فساعتها الدراسة فى مصر ضرورة .. لأن مستوى الخريجين من الجامعات المصرية مهما بلغ فسادها لا يقارن بمستوى الخريجين من باقى جامعات الدول العربية مهما بلغ تأنقها و تلك حقيقة .. ولهذا السبب ترين المصريين فى كثير من الدول و قد أثبتوا أنفسهم فى العمل .. و اذا أردتى الثقافة أيضا و التعليم فمصر طبعا ... لاحظى أن الدراسة فى مصر تجربة كاملة ستكسبك الكثير ...

أقولها لك صادقا و ليس دفاعا أخرقا عن كل ما هو مصرى .. تحدثى عن أى شيىء الا التعليم .. ليس التعليم عندنا جيدا .. أنا معك فى هذا لكن ان قارناه فقط بالتعليم فى الدول الغربية .. كما أن عادة جلد النفس و التهكم على الأوضاع قد أضحت مرضا عندنا .. فقد أصبح كل من يهز رأسه و يقول ان التعليم فاسد و انهم يتخرجون من الجامعات جهلة و.. و.. الى آخر هذا الكلام .. أصبح هذا هو قلب الحكمة و من لا يقول هذا يتهم بالسطحية ...

أقولها لك .. لقد تخرجت من كلية الهندسة الالكترونية .. و قد كنت ممن يهوون الحديث اياه على غرار "وهو ده تعليم ده .. " .. لكن بعد التخرج رأيت الكثير .. رأيت تحديات فى مجال عملى ربما كنت سأجتازها لو انتبهت قليلا فى محاضرة (measure) .. أو ربما كنت سأحل تلك المشكلة لو انتبهت فى أحد سكاشن الـ(micro processor) ... وكانت تلك هى المفاجئة لقد درسنا ما كان يجب أن ندرسه .. ربما الأسلوب به أخطاء .. لكن الموضوع غاية فى الاختلاف اذا ما قرانا الوضع عندك بمصر ...

لست أريدى أن تنساقى وراء شعارات جلد الذات التى أصبح المصريون مولعين بها على غرار .. مصر بلغ فيها الفساد مبلغه .. أو وهو ده تعليم ده اللى عندنا ... وهكذا فتكونى أنتى الخاسرة فى النهاية ... فى النهاية صدقينى .. هناك اختلاف شديد بين أن تكون شهادتك على الأقل لها قيمة و أن تكون شيئا يحاولون اثبات وجوده ..

أيضا اذا أردتى المقارنة الحقيقية قارنة بأمثلة ترى أنفسها ناجحة حتى لا تكونى قد شكلتى رأيك على الحالات الاستثنائية ...

أرجوكى لا تأخذى قرارك على شعارات .. واعلى جيدا فى النهاية أن حياتك المعزولة فى الخليج قد جعلت شيئا كبيرا ينقصك .. ربما العودة و الدراسة فى مصر قد يعوض عندك شيئا من آلاف الخبرات الحياتية التى لم تعلمى عنها شيئا .. فكرى جيدا فى الأمر .. و حاولى أن تتخليى ماذا تريدين لنفسك بعد التخرج .. و أية نوعية من الأشخاص تريدن معرفته .. سواء صديقات أو حتى زواج .. ساعتها ربما تستيطعى أن تضعى عيناك على ما تحتاجينه الآن ...

كل يوم تعيشينه فى الخليج تخسرى فيه الكثير من الخبرات و الثقافة و الأفكار بل و أحيانا الذكاء اذا عشتيه فى مصر .. لا لشيىء الا بسبب انعزال الحياة ... كلامى فقط على المغتربين فى الخليج و ليس على أهل البلدة أنفسهم بالطبع ... فقط أنا أتحدث عن المصريين المقيمين هناك ... أنا أحيا فى الرياض و أشعر بهذا بشكل كبير .. فاذا كانت أمامك فرصة للعودة و التعليم فى مصر .. فلا تتركيها لأى سبب أيا كان .. اعلمى فقط أنك ستفتقدين الكثير و الكثير جدا اذا ما تراجعتى عن العودة و التعليم هنا ..

مهيب

تم تعديل 8 أبريل 2006 بواسطة مهيب

[ATHENA]

أهلا يا مريوم

بصي يا ستي انا كنت زيك كده في يوم الأيام..بس أنا حالتي أسخم شوية لأني لا اتولدت في مصر و لا عشت فيها غير يجي سنتين في الطفوله البعيدة يعني من سن تلاته لحد خمسة بعد كده معرفتش عنها حاجه...

المهم بعد فترة جت عليا الفترة اللي إنتي فيها دي...

إني عايزة أروح بلدى و نفسي اعرفها :D

كنت حاسة بالنقمة إن اهلي مخلونيش اعيش في مصر زيي غيري و طلعت لا أنا مصرية بشكل كامل و لا انا مش مصرية....كنت فاكرة إن الموضوع بيدهم و إنهم بس إختاروا يكونوا هناك و جه على بالهم يسيبوا مصر فتاني يوم الصبح خدوا شنطهم و جم...مكنتش أعرف إزاي تعبوا على ما لقوا تاشيرة و إزاي جم هنا في حال صعبة و إستحملوا و كان والدي بيشتغل في وظيفتين كل أيام الأسبوع عشان بس يقدر يبني لنا حياة هنا..

كنت زيك كده روح الشباب ملياني و عايزة انزل أعيش الحرية و الحاجات اللي بشوفها في الأفلام و ادرس في الجامعة و حتى احس بطعم مشاكل هناك..

و حصل يا ست الكل... :blink:

نزلت ايجبتو للمرة التانية في حياتي و رفضت أكمل دراستي هنا بغلاسة رغم إني كنت كملت سنة كلية لكن لما لقيت فرصة نزول رميت كل حاجة ورايا و نزلت...

الاول كنت مبسوطة اوي لاني عايشة الحلم بحذافيره....دخلت الجامعة مبسوطة و طلعت زي ما بابا قالي بدري عشان ادفع المصارييف..طلعت يا مريم سبعة الصبح و وقفت في الطابور اللي لقيته جاي من بدريييييي mfb:

كان مكاني اول واحدة..فضلت واقفة ساعتيين يا ست الكل عشان ادفع المصارييف..لقيت الموظفيين قدامي بياكلوا فول و تلميين اوييييييي..أعدت أستنى لحد ما اغمى عليا من الهبوط و الوقفة اول ما فتحوا الشباك :P

و كانت اول تجربة ليا للإختلاط بالحياة الحكومية المصرية.. :P

عشت الحلم بحذافيره يا مريوم :blush: ...و الحلم غير الواقع صدقيني...مش بحاول أخليكي تبصي للسلبيات بس بجد الموضوع مش مجرد حماسة و لما تيجي مصر تتصدمي بالواقع..

لحد ما إضطريت أرجع تاني بعد ما جربت كمان سنة و نص في مصر بس المرة دي و أنا شابة كبيرة...

عارفة دلوقتي رغم إني لسه من جوايا بتمنى اعيش في مصر تاني و أفضل فيها رغم كل سلبياتها..لكن عرفت سبب الغربة اللي إختارها اهلي و سبب التعب و التضحية بفراق الأهل و الوطن...عشان يوفروا لينا عيشة كريمة بجد من وجهة نظرهم لأنهم شافوا اكتر مننا..

دلوقتي انا هنا في الإمارات بحاول أواسي نفسي في الغربة ..لما احس انا اد إيه محظوظة و احس بطعم النعمة بجد بحس براحة و بقول الواحد مكنش يعرف هيبقى وضعه ازاي لو كان اتولد في مصر مثلا و عاش فيها..ممكن مكنش يكون بنفس وضعه هنا.

بعدين بجد كل حاجه لها ضريبتها..مصر اه و حلاوتها بس تعب متعودناش عليه..و الغربة راحه بغربة

كله بتمنه.

[مهيب]

صعب انى أفهم ان شخص يتخلى بارادته عن قيمة الشهادة اللى يحملها ... لمجرد انه ميقفش فى طوابير و يروح يجيب ورقة دمغة و يحتك بالروتين .. (طبعا فى فارق شاسع بين دكتور مثلا خريج كلية طب عين شمس و دكتور خريج طب أبو ظبى)

على العموم هى فى الأول و فى الآخر وجهات نظر .. بس الرجاء تكون السلبيات المطروحة على مستوى ثقل القرار ...

مهيب

[ATHENA]

الأغرب فعلا إننا نبص لحاجة صغيرة على إن الشكوى منها مش منطقية و نتجاهل باقي السلبيات الكبيرة جدا و المؤسفة والمخجلة لحجة إننا كده بنكون بنجلد نفسنا و بنبص للسلبيات فقط..

أعتقد إنه من الأفضل إننا نوجه جهدنا ده و حبنا لمصر للتغير بدل لوم المغتربيين اللي فعلا بيضرهم زيهم زي المصريين على إنتقادهم اللي اكيد مش هيكون جاي من فراغ و لا من دلع...أكيد حبنا الكبير ده لو إتوجه لتغيير الفساد اللي في مصر بشكل جماعي كان هيبقى وضعنا افضل بكتير و مكنش حد هيسيب بلده عشان طابور دمغة بيقف فيه تلت ساعات في الشمس..و لا كنا اساسا إدينا لحد فرصة إنه ينتقد بلدنا..

بعد الدمغة الشخص يدخل محاضرة عدد طلاب المجموعة الواحده فيها ميقلش عن تلت تلاف مكدسيين فوق بعض و تلت تربعهم مش بيحضر..و بيشتري ملازم اخر السنه و بيتخرج ياخد دورات محاسبة مع إنه متخرج من كلية تجارة...بس عشان مستفدش أي حاجه..

نكون واقعيين احسن في الحكم..أنا دفعتي في التمريض هنا لا تتجاوز الخمسين طالبة بالكتير و يتم تدريسنا أحسن المناهج العالمية عشان بس هنشتغل في الدولة دي و عشان هنبقى مسؤوليين عن أرواح مواطنيها..و الواقع اللي إحنا مش مدركينه لحد دلوقتي إن الكليات هنا بقت تضاهي كليات مصر و بعضها أصبح أفضل..

بيقدروا مواطنيهم قوي ..

بالمناسبة و للأسف..

الدكاترة و الأطباء و الممرضين المتخرجيين من مصر لازم يمروا بإمتحان هنا عشان بس يتم قبولهم للعمل في الدولة بعد تدني مستوى التعليم في مصر..ده الواقع الي بيحصل فعلا هنا..إحنا مش زي زمان..

أعتقد محبتنا لمصر بجد تبان بالواقعية و التغيير و مواجة الواقع المؤسف لان اكيد كل الناس دي مش هتشتكي من بلاش..ما إحنا هنغيير إزاي لو مأدركناش حجم المشكلة..

هي مجرد وجهة نظر برضه تطمح للتغير لدولة أحبها و مازلت أنتقدها من زعلي منها و عليها..

تحياتي

تم تعديل 8 أبريل 2006 بواسطة ATHENA

[مهيب]

المشكلة أن من يتحدث عما يمر به من تجارب فى دول الخليج بالتحديد .. يتحدث عنها كأهلها .. سيدتى الفاضلة ... العبرة بالواقع .. و أنا لا أتحدث عن محاولات تغيير و لا (حبنا لمصر) .. ولا أطالب أحدا بأن يدرس فى مصر من باب حبه لها أو وطنيته ..

على العكس أنا أرى أنه لو أتيحت لأحد فرصة أن يدرس بالخارج فلينتهزها دون تردد .. على أن يكون هذا الـ(خارج) يستحق .. يعنى لا يترك فرصة للدراسة فى أمريكا أو أوروبا أو اليابان مثلا ليدرس فى مصر .. لكنى لن أقتنع أن مهندس متخرج من كلية فى ليبيا أو الامارات أو الكويت سيكون أفضل حالا لأن الدفعات قليلة العدد و الكراسى مريحة و فخمة ... لو كان أبناء هذه الدول يتخرجون بالكفاءة المطلوبة لما كانت تلك الدول هى الدول الوحيدة فى العالم التى يزيد فيها اعداد العمالة الوافدة على عدد المواطنين ولما كان هناك عندهم بطالة فى خريجيهم و محاولات دؤوبة لتعيين المواطنين بقوة القانون فى ظل عدم احتياج سوق العمل لهم ... لأنه ببساطة لو كانت كفاءة المواطن عندهم جيدة اذا ما الداعى للحض على تشغيله بدلا من الأجنبى؟؟

أما مسألة مرور الاطباء باختبارات و أشياء من هذا القبيل ,... انها السياسة يا سيدتى .. السياسة التى تجعل هناك أشياء كهذه من باب انظروا ... نحن لا نثق فيكم .. أنتم لستم بأفضل حال منا .. يجب أن تمروا باختبارات ما .. حتى نتأكد من أنكم الأفضل لمواطنينا .. و سياسة كهذه سيحكمها طبعا معدلات العرض و الطلب و القبول .. وهى سياسة معروفة و مطبقة بخبث شديد ..

المستشفى القريب من الحى الذى أسكن فيه فى الرياض .. ليس فيه اخصائى أو استشارى واحد من مواطنى الدولة .. كما أنه ليس فيه استشارى واحد غير مصرى ... حين تردد كلاما فى المحافل السياسية أيام عمرو موسى عن احتمالية صدور قرار يمنع الأطباء الاستشاريين من العمل بدول الخليج ردا على مشكلة اثيرت من احد الدول ... تلقت مصر طلبات رجاء لألا يحدث هذا ... ماذا يعنى كل هذا ؟؟؟ وما تفسيره فى ضوء كلامك؟

سيدتى ثقى أنهم لا يدربون الأطباء فى مصر على قتل مرضاهم ... كما أن أعداد النوابغ المصريين (ممن تلقى حتى تعلميه الجامعى فى مصر) تشهد بهذا .. واذا كان التعليم الجامعى فى مصر لا يصلح .. و الفساد فى مستشفياتنا قد بلغ مبلغه مثلا فلم يأت الآلاف من الدول العربية للعلاج فى مصر ؟؟؟ لو كانت الحقيقة هى ما قلتى أنت لما وجدنا الكثير من الظواهر التى تؤكد العكس .. أما عن مسألة الأعداد فى الجامعات .. فدعينى أخبرك بشىء ... ازاى تقارنى بلد عدد سكانها حوالى مليون .. على مليون عمالة وافدة يعنى قولى 2 مليون ببلد عدد سكانها 70 مليون ؟؟؟ والا يبقى التعليم فى الامارات ولا فى الكويت ولا فى السعودية أفضل من الهند و من الصين طالما الموضوع موضوع أعداد ... أما عن مسألة الدول اللى بتحترم مواطنيها و الى آخره .. معلش .. واسمحيلى دى نفس نغمة جلد الذات اياها .. المصرى مالوش تمن لا فى بلده و لا فى أى حتة ... المصرى مالوش لازمة ... المصرى مش عارف ايه .. على العموم كون الدولة بتحترم مواطنيها أو لأ .. فدى قضية أخرى ... ولو اتكلمنا فى احترام الدول اللى انت تقصديها لمواطنيهم فالحقايق بجد هتصدمك لما تعرفى مكانتهم عن حكوماتهم ...

هذا فقط عن مجال واحد ... أما فى باقى المجالات العلمية كالهندسة بفروعها أو الصيدلة ... أو حتى المجالات الشديدة التخصص كاللغات أو علم النفس أو .. أو .. فحدثى بلا حرج ...

واذا كانت هناك ثمة انعدام ثقة من هذه الدول فى مستوى التعليم (المتدنى) فى مصر ... واذا كان التعليم فى مصر كله سلبيات كما أوضحتم .. لماذا اذن يرسلون المئات من طلبتهم كل عام فى صورة منح ليتعلموا فى الجامعات المصرية .. أنا نفسى قد كان لى الكثير من الزملاء العرب فى الكلية حصلوا على منح فى بلدانهم ليدرسوا معنا ... ويكفى أن تلقى نظرة على جامعات مصر الحكومية و الخاصة لتتأكدى مما أقول .. لماذا طالما أنهم يرون التعليم عندهم أفضل حالا ؟؟

كما قلت أنا لا أدافع عن مصر ... لكننى أنصح بشكل أردت أن يكون صادقا قدر امكانى .. ولو تحدثت مريوم من البداية عن أنها محتارة بين الدراسة فى ألمانيا مثلا و مصر ... لتغير كلامى ... لست أدافع عن مصر دفاعا أحمقا ... ولا أهاجم غيرى ... لكنى لا أريد أن يجرفنا تيار جلد الذات لأن يؤثر تأثيرا مباشرا على قراراتنا ... حسنا الكلام عن أن الخليج قد أصبح رائعا و دبى بها أعلى مبنى فى العالم فائدته أن يقال حتى يقال فقط ... لكن حين نأتى للقرارت المصيرية يجب أن نفكر بشكل خال من جلد الذات ... ان عيوب التعليم فى مصر كثيرة و متعددة ... لكن هذا لا يعنى أن أتفاخر بأننى خريج كلية الهندسة بجامعة مقديشيو لا لشىء الا لأن أعداد الدفعات كانت قليلة ... اذا أردتى هذا فحسن ... لكن لا تفن بقية حياتك العملية فيم بعد لاثبات جودة و أهمية الشهادة التى تحملينها و تعيبين على الناس أنهم لا يفهمون ...

أنا لا أدافع عن مصر و لا أهاجم غيرها .. فقط أنا استشعرت أهمية القرار من كلام مريوم ... لذا لا أريدها أن تنساق وراء الكلام الذى يعدد السلبيات فقط على سبيل الحكمة و العلم ببواطن الأمور .. لو كان موضوعا عاما لتقبلت هذا .. لكن ليس مع شيء مصيرى كهذا

اذا أردت أن ترحمى نفسك من الطوابير و الزحمة و القاعات الغير مكيفة .. فلا غضاضة هنالك .. لكن لا تلومى من لا يعترف بشهادتك لو أردتى العودة يوما الى مصر ... لا تلومى من يطلب منك شهادة معادلة اذا ما أردت الحصول على دراسات عليا ... و لا تلومى صاحب العمل الذى يفضل عليكى خريج جامعة مصرية ... اذا أردتى أن ترحمى نفسك من روتين مصر و أعداد مصر الضخمة فلا تثريب عليكى ... لكن اعلمى أن هناك شيء على حساب شيء .. ولا تخبرينى عن أن الجامعات هناك رائعة لمجرد أنك قد اتخذت قرارك بالدراسة فيها وبالتالى فمسألة يكون قرارا خاطئا مسألة مستبعدة

مهيب

تم تعديل 8 أبريل 2006 بواسطة مهيب

[مهيب]

بالمناسبة .. ليس هجوما والله ... و لكن انقاذا لصحة قرار فتاة أرادت رأيا فى مسألة تتعلق بالدراسة ..

العزيزة أثينا قالت فى مشاركة لها فى موضوع سابق (اضغط هنا لرؤية الموضوع)

أروح مصر السنة دي و لا مرحش؟

أروح و لا مرحش؟

أروح و لا مرحش؟

المشكلة إني مبقتش واخدة عليها و السنة و نص اللي شفتها فيها كانت زي تجربة غريبة في حياتي...دلوقتي حاسة إني لازم أحسم التشتت اللي أنا فيه ناحيتها و أحدد موقفي منها...يعني بحبها و عاملة فيها مصرية و أنا معرفش عنها حاجه و لا رحتها غير مرتين في حياتي..و أنا في الحقيقة حتى مش أعرف أتعامل مع المصريين و بلاقي نفسيتهم و طبعهم غير طبعي....و رغم كده عماله أناقر و عاملة أم العريف المصرية

دلوقتي الاجازة قربت بعد تلت تشهر و أسرتي في مصر بيخططوا معايا انزل السنة دي مصر..الأول كنت عاملة إن الظروف مش سامحة و إني نفسي انزل..

دلوقتي لما بيت قدام الامر الواقع عماله أحاول أخترع حجة جوه نفسي عشان أأجل الموضوع ده كمان حبة..خصوصا مع اللي بسمعه عن اللي بيحصل دلوقتي التدهور و الحالة الإقتصادية و إن أخلاق المصريين مبقتش زي الأول و إنهم بقوا ماديين و كلام كتير من المصريين نفسهم للأسف...

بحبها آه ، بس مش عارفة ليه المرة دي حاساها غريبة و بعيدة جدا و متخصنيش.....

أعتقد أنك بهذا الكلام تنهى دفاعك عن قرار قد اتخذتيه ليس له أية علاقة بمستوى التعليم فى مصر و بسوئه أو جودته ... هناك الاعتياد.. و هناك الألفة المفقودة ... و هناك عدم معرفة كيفية التعامل مع المصريين ... أعنى أن هناك عوامل كثيرة جدا تدخلت فى القرار .. والتى ليس بالضرورة أن تكون متوفرة عند مريوم

مهيب

تم تعديل 8 أبريل 2006 بواسطة مهيب

[مصرية الهوى]

صحيح يا مهيب زي ماقلت العيشة في بلدك وبين أهلك وناسك أفضل بكتير ..

بس حط في بالك مريوم في تالته اعدادي .. يعني لسا بنوتة

انا هاتكلملك من وجهة نظر الامهات ...

عندنا دكتورة دايما بتحكيلي عن بناتها اتنين عايشين في مصر .. وهي هنا في السعودية .. بتقول بأكلمهم يوميا نص ساعة .. عشان اطمن عليهم وأشوف اخبارهم ايه .. وبتقول ببقى قلقانة عليهم جدا .. ونفسي يعيشوا في حضني بس الظروف حكمت عليا بكده ..

فيعني مش سهل بالنسبة للأم والأب إن عيالهم يبعدوا عنهم ..

وبرضه يا مريوم يا حبيبتي .. انتي لو نزلتي مصر من غير أهلك هتحسي بغربة تانية غير الغربة اللي انتي عايشها في السعودية .. صحيح هتببقى في بلدك وبين صاحباتك وقرايبك ومبسوطة .. بس وجود الاهل غير .. وجود الام والاب غير ..

لو عييتي لو تعبتي .. لو اتضايقتي .. لو جرالك حاجه لا سمح الله .. هتبقى محتاجه ماما وبابا اوي .. ولما تشوفي اللي حواليكي عايشين في حضن ماما وبابا هتحسي بالفرق بينك وبينهم .. وهتحسي انه فيه حاجه ناقصة جواكي .. وبعدين يا بنتي لاحقة انك تسيبي ماما وبابا .. اتهني بيهم قبل ما تسيبيهم ....

وبرضه ماما وبابا هيبقوا قلقانيين جدا عليكي ..

يا ترى نامت يا ترى أكلت يا ترى ذاكرت ..

وبرضه كمان لو فكرتي تنزلي هتعيشي فين .. مع خالتك .. مع عمك .. أكيد أهلك هيبقوا محرجين شويا وهما بيحطوا بنتهم عند حد .. ده غير المصاريف اللي هتحتجيها وكده يعني ..

وكمان حطي في بالك ان كلها تلات سنين وهتنزلي لمصر ان شاء الله ..

فلازم تفكري كمان مرة قبل ما تطلبي من بابا وماما قرار زي ده ..

انتي بس لو تيجي القصيم .. او انا اجي عندك مكة ..

ده انتي هتتمني تعيشي طول عمرك في السعودية :P .. :P

[ATHENA]

على العكس أنا أرى أنه لو أتيحت لأحد فرصة أن يدرس بالخارج فلينتهزها دون تردد .. على أن يكون هذا الـ(خارج) يستحق .. يعنى لا يترك فرصة للدراسة فى أمريكا أو أوروبا أو اليابان مثلا ليدرس فى مصر .. لكنى لن أقتنع أن مهندس متخرج من كلية فى ليبيا أو الامارات أو الكويت سيكون أفضل حالا لأن الدفعات قليلة العدد و الكراسى مريحة و فخمة ... لو كان أبناء هذه الدول يتخرجون بالكفاءة المطلوبة لما كانت تلك الدول هى الدول الوحيدة فى العالم التى يزيد فيها اعداد العمالة الوافدة على عدد المواطنين ولما كان هناك عندهم بطالة فى خريجيهم و محاولات دؤوبة لتعيين المواطنين بقوة القانون فى ظل عدم احتياج سوق العمل لهم ... لأنه ببساطة لو كانت كفاءة المواطن عندهم جيدة اذا ما الداعى للحض على تشغيله بدلا من الأجنبى؟؟

هو إحنا ليه بنصمم برضه إن مواطنين الدول دي أقل مننا و أقل من عقلنا..ما ده برضه حكم مش موضوعي يا سيد مهيب..

لما الدول دي يكون فيها مدرسيين من مختلف دول العالم على درجة عالية جدا من الكفائة..و مناهج و كتب تدرس بكفائة .. المشكلة فين و هما برضه خريجينهم لا يوازوا خريجين الجامعات المصرييية لييييييييه؟

أقل مننا عقليا مثلا..أكيد لأ لأن دي كانت نظرة قديمة و مش عادلة و مع مرور الوقت أثبتوا إنهم عقلهم زي أي حد و أحسن كمان في بعض المجالات..مثال على كده دبي و تحويل المدينة الي متجيش نص مساحة شارع كبير في مصر لمقصد عالمي...إحنا عرفنا نعمل كده فين؟

لو على طلبهم للأطباء و المهن المختلفة فدي اكيد مشكلة كبيرة عندهم من زمان بسبب نقص الكثافة السكانية و برضه بيحلوها بشكل ممتاز و بتقدم يحسدوا عليه في مسألة حل المشاكل المتعلقة بالسكان و النظرة للمهن المتخلفة ..ده على الأقل عندي في الإمارات هنا..هنا مشتفش بصراحة تعيين بقوة القانون للمواطنين. :P

أما مسألة مرور الاطباء باختبارات و أشياء من هذا القبيل ,... انها السياسة يا سيدتى .. السياسة التى تجعل هناك أشياء كهذه من باب انظروا ... نحن لا نثق فيكم .. أنتم لستم بأفضل حال منا .. يجب أن تمروا باختبارات ما .. حتى نتأكد من أنكم الأفضل لمواطنينا .. و سياسة كهذه سيحكمها طبعا معدلات العرض و الطلب و القبول .. وهى سياسة معروفة و مطبقة بخبث شديد ..

و لو كان فيها سياسة برضه في سبب معروف جدا م نقدرش ننكره و هو تدني مستوى الأطباء و التعليم في مصر بشكل غير مسبوق..

دي بقه مش هنقدر ننكرها خالص :D و لما تتعمل حجة عندهم لهدف سياسي فده يبقى عيبنا إحنا..يعني دي حقيقة و ده المهم...

و ده الي لازم يتناقش إزاي يتحل مش المهم هو النفي و بس.

سيدتى ثقى أنهم لا يدربون الأطباء فى مصر على قتل مرضاهم ... كما أن أعداد النوابغ المصريين (ممن تلقى حتى تعلميه الجامعى فى مصر) تشهد بهذا .. واذا كان التعليم الجامعى فى مصر لا يصلح .. و الفساد فى مستشفياتنا قد بلغ مبلغه مثلا فلم يأت الآلاف من الدول العربية للعلاج فى مصر ؟؟؟ لو كانت الحقيقة هى ما قلتى أنت لما وجدنا الكثير من الظواهر التى تؤكد العكس .. أما عن مسألة الأعداد فى الجامعات .. فدعينى أخبرك بشىء ... ازاى تقارنى بلد عدد سكانها حوالى مليون .. على مليون عمالة وافدة يعنى قولى 2 مليون ببلد عدد سكانها 70 مليون ؟؟؟ والا يبقى التعليم فى الامارات ولا فى الكويت ولا فى السعودية أفضل من الهند و من الصين طالما الموضوع موضوع أعداد ...

معلش يا سيد مهيب فرنسا عدد سكانها مقارب لعدد سكان مصر..ما في كثافة سكانية في معظم دول العالم..و اللي أعرفه إن أي حكومة في الدنيا دي موجودة عشان تحل المسألة دي و تنظم التنمية بشكل مستمر عشام زيادة عدد السكان المتوقع..مشفتش حكومة بتشتكي من الناس و بتقول إنتم كتير اوي خفوا بقه عشان الكراسي مش مكفية..

و برضه مفيش تكدس رهيب بالشكل ده..يعني فين التنمية من سنوات عشان الأعداد دي...هي حجة عدد السكان عشان نكدس تلت تلاف طالب فوق بعض في مدرج مفيهوش نسمة هوا و نقول ده عشان عدد السكان..ما انا عارفه طبعا إنه عشان عدد السكان أمال كل الأعداد دي جت منين..

و بعدين إحنا لازم نجيب دول معروفة بتاخرها إقتصاديا و نقارن نفسها بيها..ما اكيد هنكون كلنا في سلة واحدة..مع إن الهند إخترعت سلاح نووي و جيشها مش زي جيشنا مثلا

يا سيد مهيب ما ده اللي بنتكلم عليه..مفيش تنمية مفيش تطور مفيش إستغلال للموارد = أكتر من تلت تلاف طالب في المدرج و تعليم مفيش..

أصلي بيني و بينك كنت في الكلية دي و شفت ازاي ممكن اوي منحضرش محاضرة واحده و نشتري ملزمة آخر السنة و ننجح..قيس بقه إن ده بيحصل بس في دفعتي اللي هي تتجاوز العشرة آلاف طالب و شوف ازاي ضيعنا مستقبل معظم العدد ده و طلع مش متعلم حاجه و محسوب جامعي.. :blush:

هذا فقط عن مجال واحد ... أما فى باقى المجالات العلمية كالهندسة بفروعها أو الصيدلة ... أو حتى المجالات الشديدة التخصص كاللغات أو علم النفس أو .. أو .. فحدثى بلا حرج ...

لا يا فندم مفيش حرج و لا حاجة لأني برضه من معايشتي للواقع شايفة جدا ناس من مواطني الدول دي متفوقيين جدا في المجالات دي زيهم زي أي دولة تانية زي ما في خايبين و زي ما في ناجحيين..

اذا أردت أن ترحمى نفسك من الطوابير و الزحمة و القاعات الغير مكيفة .. فلا غضاضة هنالك .. لكن لا تلومى من لا يعترف بشهادتك لو أردتى العودة يوما الى مصر ... لا تلومى من يطلب منك شهادة معادلة اذا ما أردت الحصول على دراسات عليا ... و لا تلومى صاحب العمل الذى يفضل عليكى خريج جامعة مصرية ... اذا أردتى أن ترحمى نفسك من روتين مصر و أعداد مصر الضخمة فلا تثريب عليكى ... لكن اعلمى أن هناك شيء على حساب شيء .. ولا تخبرينى عن أن الجامعات هناك رائعة لمجرد أنك قد اتخذت قرارك بالدراسة فيها وبالتالى فمسألة يكون قرارا خاطئا مسألة مستبعدة

مهيب

لا حضرتك أكيد مش واخد بالك من نقطة..صاحب العمل بالأصح مبقاش دلوقتي يفضل خالص المصري.. و ده الواقع يا فندم..

الموضوع مش موضوع طوابير زي ما حضرتك بتصوره مع إنها برضه حاجه تزعل...برضه مش عارفة موضوع الطابور مدايقك ليه...أصلها برضه غريبة و حاجه مش حضارية خالص و كل المصريين بيشتكوا منها..مش عارفة غريبة ليه دلوقتي بالنسبة ليك...ما زي بنبين الإيجابيات لمريوم لازم نبين السلبيات..و لا إيه؟

الموضوع إننا لازم نفوق شوية من نغمة إحنا الي بنينا الأهراماات إحنا مفيش زينا و كل العالم بيتقدم لو كنا عايزين نتقدم فعلا..

لما كل حاجه تمام و فل و خريجين مصر مطولبيين في كل دول الدنيا و التعليم عندنا مفيش زيه و بخير و زي الفل..و الدفعة بتاعتي بس في كلية تجارة جامعة القاهرة هي اللي طالعة فاشلة ..هنصلح إيه و لا أي تغيير هنبصله..

العالم كله بيتغير و بيتقدم و إحنا واقفيين مكانا و بنقول مفيش حاجه إحنا زي الفل لمجرد النفي و بأرقام أيام زمان بتاعة الآلاف و المئات و البعثات اللي بدأت تقل حاليا بشكل كبير.يبقى هنغيير إيه و ليه ؟

و الحمدلله مقدرش أغير حقيقة إن الدراسة هنا رائعة لمجرد إنها مش في مصر..لكن أنا جربت الدراسة في مصر و هنا و عندي القدرة الكامله للحكم من منطلق تجربتي بشكل موضوعي مش من منطلق إني عايزة أبين إني تمام و دراستي حلوة و تعالوا إدرسوا معايا زي ما حضرتك بتصورني..مش غلطي أنا إن الدراسة في مصر بقت متأخرة..و لا لازم أعيب في الناس اللي هنا عشان أبين وطنيتي او أرفع من شأن مصر..

:P ..

تم تعديل 8 أبريل 2006 بواسطة ATHENA

[ATHENA]

بالمناسبة .. ليس هجوما والله ... و لكن انقاذا لصحة قرار فتاة أرادت رأيا فى مسألة تتعلق بالدراسة ..

العزيزة أثينا قالت فى مشاركة لها فى موضوع سابق (اضغط هنا لرؤية الموضوع)

أروح مصر السنة دي و لا مرحش؟

أروح و لا مرحش؟

أروح و لا مرحش؟

المشكلة إني مبقتش واخدة عليها و السنة و نص اللي شفتها فيها كانت زي تجربة غريبة في حياتي...دلوقتي حاسة إني لازم أحسم التشتت اللي أنا فيه ناحيتها و أحدد موق%D

بالمناسبة .. ليس هجوما والله ... و لكن انقاذا لصحة قرار فتاة أرادت رأيا فى مسألة تتعلق بالدراسة ..

العزيزة أثينا قالت فى مشاركة لها فى موضوع سابق (اضغط هنا لرؤية الموضوع)

أروح مصر السنة دي و لا مرحش؟

أروح و لا مرحش؟

أروح و لا مرحش؟

المشكلة إني مبقتش واخدة عليها و السنة و نص اللي شفتها فيها كانت زي تجربة غريبة في حياتي...دلوقتي حاسة إني لازم أحسم التشتت اللي أنا فيه ناحيتها و أحدد موقفي منها...يعني بحبها و عاملة فيها مصرية و أنا معرفش عنها حاجه و لا رحتها غير مرتين في حياتي..و أنا في الحقيقة حتى مش أعرف أتعامل مع المصريين و بلاقي نفسيتهم و طبعهم غير طبعي....و رغم كده عماله أناقر و عاملة أم العريف المصرية

دلوقتي الاجازة قربت بعد تلت تشهر و أسرتي في مصر بيخططوا معايا انزل السنة دي مصر..الأول كنت عاملة إن الظروف مش سامحة و إني نفسي انزل..

دلوقتي لما بيت قدام الامر الواقع عماله أحاول أخترع حجة جوه نفسي عشان أأجل الموضوع ده كمان حبة..خصوصا مع اللي بسمعه عن اللي بيحصل دلوقتي التدهور و الحالة الإقتصادية و إن أخلاق المصريين مبقتش زي الأول و إنهم بقوا ماديين و كلام كتير من المصريين نفسهم للأسف...

بحبها آه ، بس مش عارفة ليه المرة دي حاساها غريبة و بعيدة جدا و متخصنيش.....

أعتقد أنك بهذا الكلام تنهى دفاعك عن قرار قد اتخذتيه ليس له أية علاقة بمستوى التعليم فى مصر و بسوئه أو جودته ... هناك الاعتياد.. و هناك الألفة المفقودة ... و هناك عدم معرفة كيفية التعامل مع المصريين ... أعنى أن هناك عوامل كثيرة جدا تدخلت فى القرار .. والتى ليس بالضرورة أن تكون متوفرة عند مريوم

مهيب

فكرتني بمشاركة أي كلام..غريبة أوي إنها لفتت نظرك دلوقتي ..

هعتبره مش هجوم لكن حقيقي مستغربة إنت منفعل كده ليه..

شوف يا سيد مهيب ...

يا فندم مش موضوعي خالص تجيبلي مداخلة في موضوع تاني وتتحشر المداخلة دي في نص موضوع تاني و مختلف بهدف الله أعلم به عشان تنهي الكلام و يبقى في غالب و مغلوب.. :closedeyes:

لو كنت سألتني من غير ما تتطوع و تجاوب بالنيابة عني و كمان تنهي كلامي الي سميته دفاع كان ممكن بقة في حوار..و فايدة من الحوار ده على الأقل..

نبدأ بمسألة إنقاذ قرار البنت..هو في اييه؟

اللي يشوف اللي بيحصل يقول إني بدلها على الهلاك و الفساد و ماسكة إيدها و مودياها تدرس معايا..

ما زي ما حضرتك قلت رأيك في الموضوع و إحترمته لأنه رأي شخصي أعتقد ن رأيي لازم يعامل بنفس المبدأ حتى لو كان مش عاجب حضرتك...هو الموضوع مش مفتوح عشان كل واحد يقول وجهة نظره؟و ده المتوقع؟ :huh:

اما مسألة رأيي في مستوى التعليم اللي أسميته أنت دفاع فأنا وضحته في المداخلة سابقة و مسألة علاقتي بمصر و قراري بالدراسة هنا او هناك ده شيئ يخصني جدا مش مضطرة أوضحه نهائي..و بالمناسبة تحليلاتك التي تبرعت و وضعتها في ما يخص قرار الدراسة بالنسبة لي غير صحيحة .. و أنا في حل عن ذكر أسبابي الخاصة..

بالمناسبة..أنا نازلة مصر السنة دي فعلا..فلا تعتمد كتيرا على مداخلة الفضفضة الوقتية بتاعة آخر كلام

شكرا

تم تعديل 8 أبريل 2006 بواسطة ATHENA

[Mohammad Abouzied]

كان مكاني اول واحدة..فضلت واقفة ساعتيين يا ست الكل عشان ادفع المصارييف..لقيت الموظفيين قدامي بياكلوا فول و تلميين اوييييييي..أعدت أستنى لحد ما اغمى عليا من الهبوط و الوقفة اول ما فتحوا الشباك :P

و كانت اول تجربة ليا للإختلاط بالحياة الحكومية المصرية.. :P

.

طيب انا ذهبت علشان ارخص سيارة زوجتى في الاسكندرية وانا واقف في الطابور والموظفين متجاهلاني تماما اكثر من ساعة ونصف وجدتهم بيتناقشوا على تعقيدات مصلحة المجاري الى مش عاوزين يطلعو تصريح بتوصيل المجاري لعمارتهم العامرة الا بالواسطة والرشوة وكل واحد بيسئل زميله اذا كان يعرف حد في مصلحة المجاري علشان يخلصو الشغلانه وتطوعت انا لهم وقلت اعرف بس خلصوني من ترخيص الرخصة وبالتالي اتعزمت على شايوبعد ما خلصوا لي شغلي اتفقت معاهم انهم يقابلوني على باب المصلحة بكرة الصبح وادي وش الضيف

[ATHENA]

طيب انا ذهبت علشان ارخص سيارة زوجتى في الاسكندرية وانا واقف في الطابور والموظفين متجاهلاني تماما اكثر من ساعة ونصف وجدتهم بيتناقشوا على تعقيدات مصلحة المجاري الى مش عاوزين يطلعو تصريح بتوصيل المجاري لعمارتهم العامرة الا بالواسطة والرشوة وكل واحد بيسئل زميله اذا كان يعرف حد في مصلحة المجاري علشان يخلصو الشغلانه وتطوعت انا لهم وقلت اعرف بس خلصوني من ترخيص الرخصة وبالتالي اتعزمت على شايوبعد ما خلصوا لي شغلي اتفقت معاهم انهم يقابلوني على باب المصلحة بكرة الصبح وادي وش الضيف

أهلا يا أستاذي محمد :P

بس يا بختك عرفت تتصرف و كمان إتعزمت على شاي :P :D

ناس حظووووووووووظ :blush: :blink: