يعني ايه وطن؟ محاولة لرؤية " المواطنة " و "الغربة" و" الهجرة" بوعي أعلى

[عبير يونس]

كواحدة قضت معظم حياتها مغتربة
مع الوالدين ثم مع زوج وابناء
دايما كنت بأدور على الوطن الغائب عني
كل حد اتغرب وحس يعني ايه غربة بيدور على كيان ينتمي له
حتى لو كان كيان افتراضي في فضاء الانترنت
المحاورات هنا كانت الكيان ده

على مدى سنوات تجاوزت العشرة بقليل
المكان هنا غير كتير في مفهومي للعديد من القيم
قيمة الوطن مصاحبة لشعور الانتماء
الجذر أو القبيلة
الانتماء لأشباهك
ماتحسش وسطهم انك غريب

يمكن كنت محظوظة ان تواجدي في السعودية ماكانش اغتراب كبير للتشابه إلى حد كبير ما بين إقليم الحجاز وبين عندنا في مصر

وكتير منهم كانوا ولا زالوا يعتبروني واحدة منهم
لكن برضه كان في دايما غصة أنني لا انتمي...
لما دخلت هنا اخترت يكون اسمي "مصرية متغربة"
وبعد فترة ونس ودفا  قررت اظهر باسمي الحقيقي لأني حسيت اني في مكاني وبيتي

كتير وأنا منهم أطلقنا على المكان ده " بيت العيلة "
وهو الوطن ايه غير عيلة كبيرة أنا  وانت وانتي أفراد فيها

وده أول خيط

الانتماء حق قبل ما يترتب عليه واجبات

في أي مجتمع صغير بوسعك عيش تجربة المواطنة

مواطن في أسرتك

مواطن في عيلتك
 

مواطن في العمارة اللي ساكن فيها

مواطن في الشارع اللي فيه عمارتك

مواطن في الحي اللي يتبعه الشارع بتاعك

مواطن في المدينة اللي انت فيها

مواطن في المحافظة اللي فيها مدينتك

ومواطن في الدولة اللي انت عايش فيها

مواطن في عملك كمهنة يعني لو كنت مدرس فانت مواطن في مهنة التدريس

ولو بتشتغل في مدرسة فانت مواطن في المدرسة دي

ولو طبيب فانت مواطن في مهنة الطب

ومواطن في المستشفى أو العيادة أو المركز الطبي اللي بتشتغل فيه
وهكذا..
 

الفعل يستوطن يعني يبحث عن وطن ليعيش فيه..
المرض يستوطن الجسد
ودي لها قصة تانية

أعضاء الجسد مواطنين داخله من أكبر عضو لأصغر خلية

حتى الغرزة داخل نسيج ، وجودها بداخله يعتبر شكل من أشكال المواطنة

الفكرة انتماء لمجموعة داخل مكان

لما بيزرعوا قلب أو كلية أو أسنان ،لازم العضو ينسجم في الوطن الجديد والا لا تنجح الزراعة
الانسجام في مكان داخل مجموعة قد يصل لانتماء
 

الانتماء أيضا ضروري للعلاقات الإنسانية طويلة المدى...

وللحديث بقية

[Guest محاور]

ازيك يا عبير

انتى قلعتى الحجاب امتى؟

تصدقى زعلت؟ خسارة والله

[عبير يونس]

16 ساعات مضت, Guest محاور said:

ازيك يا عبير

انتى قلعتى الحجاب امتى؟

تصدقى زعلت؟ خسارة والله

ازيك انت يا ابو عمر
انت لسه مع الجماعة اياهم؟
ربنا يتوب عليك وتفوق ان شاء الله من التطرف
في أمل ان شاء الله
كتير كانوا زيك كده وربنا نور طريقهم الحمد لله
قول لي بقى
انت هنا في الموضوع ده عشان الوطن والا الغربة والا الهجرة؟

[عبير يونس]

الغربة

كلمة مطاطة اوي وتحوي الكثير من الشجون
وخلينا نسأل الاول يعني ايه غربة؟
وهل هي مكانية و الا زمانية و الا في العلاقات بالناس؟
الشعور بالاغتراب قد يكون كل ما سبق
 لما تروح بيت جديد
لما تشتغل في مكان جديد
لما تغير مجال شغلك وتعمل career shift
لما تغير حتى مكان مكتبك وانت في نفس الشغل
الاغتراب مرتبط بالتغيير
ترك المعتاد والمألوف لحاجة غير معتادة و غير مألوفة
بعد تجارب عديدة عرفت ان الشعور بالاغتراب علامة قوية على بداية رحلة التغيير
وانه شعور صحي جدا بيرشدنا ان احنا غادرنا منطقة الأمان  the comfort zone

الشعور المعاكس للاغتراب هو الحنين
في حالة اسمها Homesickness
بتخللي الناس يحزنوا لما يبعدوا عن الوطن
والوطن هنا بمعنى البيئة المعتادة والمألوفة
ويعتبروا البيئة الجديدة "غربة"

يعني" الوطن" مكان وزمان وناس مع بعض بنرتاح معاهم وفي وجودهم وبنحزن لما بنسيبهم؟
والبيئة اللي ينقصها عنصر من العناصر دي تبقى "غربة"؟
اذن
تغيير البيئة = اغتراب

طيب الهجرة هنا وضعها ايه؟
امتى بناخد قرار بالهجرة؟

وامتى تبقى قرار وامتى تبقى اضطرار؟

وللحديث بقية ...

[Guest محاور]

أبو عمر مين؟ لأ انا مش أبو عمر خالص ههههههههه

انا أحمد

كنت مشترك هنا بإسم mysusername و بعدين اشتركت بإسم محاور بعدها بكذا سنة

و اول مرة دخلت المنتدى كانت فى اكتوبر 2009 علشان الهجرة لكندا.... أظن كده انا مش مع الجماعة اياهم نوهائى يا بيرو.

[عبير يونس]

12 ساعات مضت, Guest محاور said:

أبو عمر مين؟ لأ انا مش أبو عمر خالص ههههههههه

انا أحمد

كنت مشترك هنا بإسم mysusername و بعدين اشتركت بإسم محاور بعدها بكذا سنة

و اول مرة دخلت المنتدى كانت فى اكتوبر 2009 علشان الهجرة لكندا.... أظن كده انا مش مع الجماعة اياهم نوهائى يا بيرو.

مع اعتراضي ان حضرتك تناديني "بيرو"  وانا لا اعرف حضرتك شخصيا 
اعتقدت ان حضرتك ابو عمر لأنه هو الوحيد اللي تجرأ يقول لي يا عبير بدون لقب مدام أو أستاذة، على سبيل الاستخفاف وعدم إبداء احترام
عموما يا أستاذ احمد
توقيعات حضرتك في المنتدى بالعضويتين اللي ذكرتهم:
myusername
و محاور
فيهم كل الميل للجماعة إياهم
و عموما بالنسبة لخلع الحجاب،  اللي هو بالمناسبة مالكش انك تتكلم فيه معايا  بشكل شخصي ، انتظر موضوع عنه بمشيئة الله و حابقى انتظر مشاركات حضرتك فيه بإذن الله

ونرجع لما يخص الموضوع هنا
حضرتك بقى تحب تقول ايه عن الوطن والغربة والهجرة

[tarek hassan]

في ٢١‏/١٠‏/٢٠١٩ at 15:19, Guest محاور said:

ازيك يا عبير

انتى قلعتى الحجاب امتى؟

تصدقى زعلت؟ خسارة والله

ازيك يا محاور 

ليه يا راجل داخل كزائر مش لك حساب برضه في المنتدى تقدر تشارك بيه على ما اذكر

عموما دا متاح لك كعضو أو زائر

بعكس قناعاتي القديمة والمتخلفة اقدر اقولك ان ظهور العضو ( رجلا كان أو سيدة ) باسمه الحقيقي شجاعة يحسد عليها وتحمل للمسؤولية بلا أدنى خوف

وكمان اعتبر أنه ليس لي ان أتدخل ولست مأمور بان اعلق على مظهر أحد او على الشكليات .... انا فقط مأمور  اغض بصري فيما اعتقد انه حرم علي النظر اليه.... كما عبر القرآن قل للمؤمنين يغضوا من ابصارهم 

قناعات الناس بتختلف هناك من يعتقد بالنقاب

وهناك من يعتقد بالخمار

وهناك من يعتقد بعدم فرضية هذا ولا ذاك ... وانا منهم 

وطبعا الحرية كل الحرية للشخص نفسه ولا وصاية عليه من أحد 

طبعا انت متعرفش الخيرية فين والافضلية لمين عند ربنا

طبعا احنا خرجنا عن الموضوع الأصلي اللي هو يعني ايه وطن 

بس هقول لو مكان يعيش فيه كل واحد في أمن وسلامة يبقى وطن مثالي

اتمنى الوطن اللي اعيش فيه المسيحي يعيش فيه بحرية دينية والمرأة تعيش بدون تدخلات أو وصايات أو سفالات

ربنا يهدينا للحق  

 

 

[Guest خميس ابو هاشم]

الوطن كما قال كبير الشعراء هو حضن