يا ... أستاذ .... طلقني (من بريدي)

[عادل أبوزيد]

ي أستاذ 
- يانعم
... أنا عايزة أتطلق
- حاضر
- إيه بقى حاضر دي إن شاء الله !!
- حاضر يعني حاضر هاطلقك ... إيه اللي مش مفهوم ف كلامي ؟
- مش عايز تعرف عايزة أتطلق ليه ؟!
- كنتي قلتيلي قبل كده كذا حاجة وأكيد عندك أسبابك المنطقية اللي تخليكي تطلبي الطلاق ... إنتي مش صغيرة وعارفة مصلحتك .
- يعني إيه بقي مش صغيرة دي ، لأ يا حبيبي أنا لسه صغيرة ونص ولو كنت إنت ...
- خلاص ... إنتي صغيرة وعارفة مصلحتك
- صغيرة في السن بس عقلي كبير وفاهمة
- أكيد أكيد
- هتطلقني إمتى بقى ؟!
- بعد ما أرجع من الشغل
- وهتعمل إيه ف الولاد ؟
- زي ما إنتي عايزة

- مش زي ما أنا عايزة يا بابا ، زي قانون الأسرة الجديد ما بيقول .. العيال هيفضلوا معايا لحد ما يتموا ١٨ سنة
- ماشي ... ولو عايزاهم على طول براحتك

- *طبعاً عايز تخلص منهم عشان تتصرمح وتروح تتجوز وأنا اللي أفضل حياتي واقفة عشان أربيهم !

- خلاص هاخدهم أنا أربيهم واتصرمحي إنتي واتجوزي

- لااااااا يا حبيبي ، الصرمحة ليها ناسها .. ومش هتلوي دراعي بالعيال وهاخدهم غصب عنك
- حاضر

- وهآخد الشقة زي ما القانون بيقول
- ماشي

- طبعاً ، ما إنت هتسيبهالي خرابة وتروح تجيبلك شقة نضيفة ... أصل أنا وعيالك مش مهمين عندك
- مهمين طبعاً 

- والنفقة هاخدها من عينك 
- من عينيا حاضر

- وهأنقل الولاد ف مدارس إنترناشيونال وهتدفع مصاريفها
- أحسن برضو

- والعربية
- تحت أمرك

- تقدر تقولي هتقعد فين بقي بعد الطلاق ؟ 
- هاتصرف ... ماتشغليش بالك

- وأشغل بالي ليه ! ما إنت هتسيبني معكوكة مع عيالك وتروح إنت تروق دماغك في أي حته
- ربنا يسهل 

- طب إيه رأيك بقي إننا هنتطلق وهتقعد معانا هنا ... ما أنا مش هاشيل الطين كله لوحدي 
- حاضر

- قايم رايح فين ؟ 

- الحمام
- إعمل حسابك لو قطعت شرايينك بالموس زي كل مرة هانكد عليك عيشتك ... أنا مش مستعدة أبقى أرملة وكل من هب ودب يجيب في سيرتي

- أنتحر وأسيب الكيكة الذيذة اللي ف المطبخ دي لمين بس ! 

- بجد عجبتك !! 
- دي تحفة ... شيء خرافي

- بس حاساها هبطانة وناشفة وسكرها كتير ومش عاجباك

- إوعي تقولي كده ، دي أحلى كيكة دقتها في حياتي ... خشي هاتيلي حتة منها

- صحة وعافية ... ماشي ياحبيبي وهعملك جنبها فنجان قهوة يعدل مزاجك
- ربنا يخليك 

وتستمر الحياة
وماتسألش عن سبب الخناقة ؟؟؟؟؟

[tarek hassan]

عاجبني هذا الزوج الهادي اللي عمل بالمثل ... ميل للشر يعديك .... 

لا هو أبدى انزعاج ولا غضب خد الأمور عادي وتحمل الحوار لحد ما خد فرصة للوصول للجملة اللي كسرت حد الغضب نهائيا نتيجة لاطرائه على الكيكة وبالتالي الوصول لقلب زوجته وعدل مزاجها 

لكن تحس ان الزوجة اصلا دمها خفيف وان محبة في الاصل وقريبة جدا وكلامها يشبه المداعبة وليس لجر الشكل 

ولذلك القصة القصيرة دي مش زي كل القصص 

فقصص زيها كتير بتنتهي مش بنفس النهاية السعيدة دي ربما لأن الناس تختلف وخاصة إذا كانت الزوجة نكدية والرجل عصبي

أو أحدهما كاره 

اخيرا الحكمة مطلوبة والتريث واجب 

[Grandma]

انا فكرت الأول ان الزوج ما صدق و هيطلقها اتاريه عارف مفاتيح زوجته وعارف الحوار هينتهي على إيه .. ربنا يرزق كل الزوجات بزوج هادي و صبور و جنتلمان زي دا