اوبر مصر للأسوأ

[Grandma]

من حوالي اسبوع طلبت اوبر يوصلني انا و زوجي من سيتي سنتر الاسكندرية للبيت وسجلت عنوان البيت قبل ما أطلبه .. الحقيقة العربية وصلت بسرعة لكن بعد ما ركبنا .. السائق قالنا مش هقدر اوصلكم عفشة العربية مش سليمة والطريق بعيد .. جوزي قاله مع ان ما شاء الله عربيتك شكلها جديد و زي الفل واحنا حددنالك العنوان قبل ما نركب .. لكن هو اعتذر بان الطريق طويل وعفشة العربية مش مظبوطة وخايف ان العربية تعطل بينا في الطريق.. وقال انه هيلغي الرحلة على اننا نتصل بعربية تانية ... و أصر كرما منه اننا ننتظر العربية التانية داخل عربيته علشان الدنيا برد ... حاولت اتصل بعربية تانية الابليكيشن معلق ...كان لازم اكنسل الرحلة من عندي علشان يشتغل ومع ذلك فضل برضو متعلق مش عاوز يشتغل الا لما ادفع عشر جنيه غرامة قيمة الغاء الرحلة .. قولت للسواق على فكرة انت مالغيتش الرحلة من عندك ان اللي اضطريت الغيها علشان الابليكشن يشتغل .. قالي ازاي دا انا اللي لغيتها .. ناولته الموبايل بتاعي وقولتله طيب حاول تتصل انت كدا وريني هتتصل ازاي .. طبعا ما عرفش و الابليكيشن ما اشتغلش معاه .. قلت لجوزي طلع موبايلك نتصل من عندك .. للأسف موبايله طلع فاصل شحن .. ففوجئت بالسواق بيقولنا فجأة ...خلاص خليكم زي ما انتم انا هوصلكم .. قلتله ما انت بتقول العربية مش هتوصل .. قالنا ربنا يسهل وان شاء الله توصل .. طبعا كل دا كان لف ودوران علشان نلغي الرحلة وياخد هو أجرتها بالكامل منغير نسبة الشركة وكمان ما يشغلش العداد .. ولما وصلنا أخد أكتر من ضعف الأجرة اللي المفروض ياخدها و ظهر و كأنه عمل فينا معروف كمان .

للأسف أغلب السواقين في اوبر وكريم مش دوغري .. كل سواق بيحتال بطريقته .. اغلبهم بيردوا عالمكالمة بسرعة قبل ما يعرفوا انت واقف فين وتبعد عنهم قد ايه .. يقولك خمس دقايق واكون عندك ما يجيش الا بعد نص ساعة.. بيرد بسرعة علشان يلحق يخطف الرحلة من زميله .. او بعد ما تطلبه يقولك دا مش طريقي ياريت تلغي الرحلة وتطلب عربية تانية .. يعني زي التاكسي العادي بس الفرق انه بيبلغك في التليفون ... حتى التكييف اللي كان بيميز اوبر عن التاكسي العادي في الصيف.. اغلب السواقين دلوقتي يقولك مش شغال ... اتعلمت أتذاكى عالسواق قبل ما يتذاكى هو علي فبقوله لو مكيفك مش شغال ما تجيش .

للأسف اوبر وكريم ما بقوش ميزة زي اول ما اشتغلوا ... زهقت منهم ومن كدبهم ورجعت اركب التاكسي العادي تاني بعد ما السواقين اتأدبوا شوية .

نفسي في حاجة تبدأ كويسة وتستمر كدا على طول . 

[أبو محمد]

تجربة حضرتك مع أوبر تدعو للأسف 
ولكن يجب أن أشهد أننى لم أجد منهم أى إساءة 
اللهم إلا مرة واحدة تأخر فيها السائق وعندما اتصلت به أفاد بأنه دخل فى "شارع غلط"
وحيث إنه وصل بعيد عن مكانى فقد ألغيت الرحلة بدون أى مشاكل
حضرتك لو عملتى "التقدير" وكتبتى شكوى ، بيستبعدوه تماما
زى الطيار بتاع محمد رمضان 

[Grandma]

في ١٢‏/٢‏/٢٠٢٠ at 20:14, أبو محمد said:

تجربة حضرتك مع أوبر تدعو للأسف 
ولكن يجب أن أشهد أننى لم أجد منهم أى إساءة 
اللهم إلا مرة واحدة تأخر فيها السائق وعندما اتصلت به أفاد بأنه دخل فى "شارع غلط"
وحيث إنه وصل بعيد عن مكانى فقد ألغيت الرحلة بدون أى مشاكل
حضرتك لو عملتى "التقدير" وكتبتى شكوى ، بيستبعدوه تماما
زى الطيار بتاع محمد رمضان 

طيب وليه بس قطع الارزاق !!  ماحدش راضي على اللي حصل للطيار  دا .. ربنا ينصفه ان شاء الله .

اوبر كان الاول شغال زي الساعة .. دلوقتي كذا موقف حصل معايا ومع غيري خلاني اقول : " ليه بس ياربي الحاجة الحلوة مش بتستمر كويسة او تتحسن كمان !!  خسارة فينا يعني !! " 

 

 

[أبو محمد]

2 ساعات مضت, Grandma said:

اوبر كان الاول شغال زي الساعة .. دلوقتي كذا موقف حصل معايا ومع غيري خلاني اقول : " ليه بس ياربي الحاجة الحلوة مش بتستمر كويسة او تتحسن كمان !!  خسارة فينا يعني !! " 

سلو بلدنا يا افندم
لو ما حصلشى كده ، الواحد يبدأ يقلق 

[Grandma]

وآدي كمان مدحت العدل رفع على شركة اوبر قضية تعدي على حقوقه الفكرية لانها استخدمت اجزاء من فيلم ( صعيدي في الجامعة الامريكية)  و كلمات أغنية فيلم ( همام في امستردام ) في اعلانها .  الغريبة ان الشركة لم تنكر ولم تعتذر وانما قالت انها بتحترم تلك الحقوق .

كدا ممكن مدحت العدل يكسب القضية و ياخد منها تعويض ضخم ... تقوم الشركة ترجع تاخده مننا