خمس لغات للحب

[Guest قلبي حنين]

أختي عايشة في الكويت وأخويا في مصر وأنا في نيوزيلاندا

كل مرة بكلم فيها أختي دايما بتشتكيلي من أخويا لأنه مش بيكلمها ويسأل عنها، على عكس ما أنا وهي متعودين نكلم بعض تقريبا كل يوم.

سؤال: هل معنى إن أخويا مش بيكلم أختي في التليفون يبقى مش بيحبها؟ وهل بالضروري لأني بكلم أختي يوميا في التليفون إني بحبها أكتر من أخويا؟

على حسب كلام دكتور جاري تشابمان (Garry Chapman) مؤلف كتاب "لغات الحب الخمس" (The 5 Love Languages)، كل إنسان ليه لغة حب أساسية ولغات تانيه ثانوية، وبعد ٣٩ سنة اشتغلها كإستشاري علاقات زوجية حدد ٥ لغات أساسية للتعبير عن الحب:
لغة الحب الأولى: كلمات التشجيع والثناء Words of Affirmation
لغة الحب الثانية تكريس الوقت وقضاء الأوقات سويا Quality Time
لغة الحب الثالثة: تقديم الهدايا Receiving Gifts
لغة الحب الرابعة: الأعمال الخدمية Acts of Service
لغة الحب الخامسة: الإتصال الجسدي Physical Touch

أخويا يمكن مبيكلمنيش أنا كمان كتير، لكنه أول واحد باتصل بيه وقت ما بكون في مشكلة، ودايما بيكون أول واحد موجود معايا أو مع أصحابه وعمره ما اتأخر علينا بوقت أو مجهود مهما كانت ظروفه، أخويا هو المسؤول الدائم عن جنينة البيت اللي نادرا لما كنت بنزل أساعده فيها، وهو اللي بيصلح أي حاجة في البيت كهربا و نجارة و و و، وعربيتي لو حصلها حاجة هو بيكون أول واحد بيجي في بالي وعمره في يوم ما قالي لأ.

علشان كدا إجابة السؤال اللي فوق هي "لا".... أنا مش بحب أختي أكتر من أخويا، لكن لغة أخويا في التعبير عن حبه مختلفة عن لغتي أنا وأختى. أنا وأختي بنتكلم اللغة التانية ( Quality Time)، ولغة أخويا في التعبير عن حبه هي اللغة الرابعة (Acts of Service).

مش معنى إن أخويا مش بيكلمني كتير في التليفون إنه مش بيحبني، هو بس طريقته في تعبيره عن حبه للأخرين إنه يساعدهم وميبخلش عليهم بوقت أو مجهود، غير طريقتي في التعبير عن حبي بإني أقضي وقت كتير مع اللي بحبهم وأسأل عليهم من وقت للتاني.

أوقات كتير بنخسر ناس بنحبهم لأننا فاهمين إنهم مش بيبادلونا نفس الحب، والحقيقة إنهم مش بيبادلونا نفس "طريقة الحب".

قبل ما تحكم على حد إنه مش بيحبك، اتأكد الأول إنك فهمت طريقته في التعبير عن حبه ليك.
ــــــــــــــــــــــــــــــــــــــــــــــ

[tarek hassan]

احييك على هذا الموضوع فعلا كل واحد له لغته وله طريقته 

لما كنت جنب اخواتي كانت الامور عادية فيها من الود تارة والمشاكل تارة اخرى 

اما بعدت تقريبا مفيش مشاكل وفيه ود فقط 

الدنيا اتغيرت من تزاور لسؤال عبر وسائل الاتصال يكفي حتى الاتصال لا يكون عمال على بطال لان مفيش الروقان بتاع زمان 

بنكبر والحب بيتوزع على الام والاب والاخوة والزوجة والابناء واكيد مظاهره بتقل للمشاغل والدنيا 

فعلا الحب هو العطاء مش الكلام لو الحب كلام بس يبقى نصب

شكرا تاني على الموضوع