بتفكر في ايه

[nancy]

بافكر انى مفكرش وحاولت استمتع بفلم اشوفة فشفت بابل لبراد بيت

رجعت افكر ان الدنيا كلها مربوطة ببعض وان الهم واحد والحزن واحد والمشاكل تتشابهة وكل حاجة مشبكة فى بعضها

قلت اقراء كتاب ظريف قريت شكاغوا التلت الاخير ملانى حزن على بلدى وناسها

مش عرفة اوقف انى افكر ازاى

طيب افكر فى حاجة هايفة وتجيب السعادة ازاى

حد عندة حل؟؟ :rolleyes:

[badroora]

بافكر امتى هستقر فى حياتى ؟ :P

[امانى]

بفكر فى بكرة واللى جايبه معاه

يا هل ترى فرح ولا جرح مش شيفاه

امانى

[mesryforever]

بأفكر لو نزلت وأستقريت في مصر هأعمل إيه

أتجوز الأول

ولا أعمل مشروع الأول

وهأكون فين بعد 10 سنين

[mffaswan]

بأفكر :blink: ..

وبعدين !!! ايه اللي هايحصل ..

كله نيلة .. تقرالك جورنال .. ترميه من القرف اللي مكتوب فيه .. نفاق و كدب و تزييف و هيصة و طبل على .. مافيش !!

تفتح التلفزيون .. أخبار منيلة .. و كوراث مهببة .. و الأدهى و الأعجب .. و من نفس البلد .. تلاقي محطة تانية مليانة ناس عريانة عمال تتقصع و تتمرقع .. مش عارف دول عايشيين في البلد دي ولا في بلد تاني !! ولا محطة تانية شغالة على الهطلة بتوع المسجات .. ولا محطة تانية شغالة على الهطلة بتوع المسابقات .. حاجة تخلي الواحد .. يطلع من هدومه !!!!!!!!!!!!!!

تخرج للشارع .. الناس بتاكل ف بعض .. و بيدوسو على بعض عشان شلن !!!!!!!!!!!!! .. و تلاقي الناس مهمومة مش طايقة هدومها .. كله بيشتكي .. و كله ناخخ .. كل تعبان .. و كله أخرس .. مواصلات هباب .. و سكن متنيل .. و اسعار غرقانة ف الزفت .. الناس خلاص .. بعد ما باعت نفسها ......... بتبيع عيالها !!!!!!!!!!!

خدمات مافيش .. طرق مكسرة .. مستشفيات مليانة بلاوي .. مدارس و مناهج .. حدث ولا حرج ... مدرسين و دكاترة جامعة .. جزارين و تجار سلع مش حملة مشاعل أبداً .. تدخل السوق .. تلاقي البياع يقولك .. من غير ما تمد ايديك يا بيه !!!! يلململك المفعص و البايظ .. عاجبك عاجبك .. مش عاجبك .. سف تراب !!!! .. و مهازل و حال ما يعلم بيه إلا ربنا !!!!

سبت لهم البلد و طفشت .. لقيت المصريين هنا .. ماشيين زي الألف .. صحيح بيضربوا بنط في بعضهم (مش كلهم) .. لكن الحكومة هنا ممشية الدنيا صح .. أقعد أفكر .. يا ترى لو جبنا الحكومة دي .. تحكم في مصر .. هايحصل ايه !!!! لما خمنت الأجابة .. لقتني هأفطس على روحي من الضحك .. . و البكا !!!!!!!!!!!!

و في النهاية ..

بأفكر أزاي اليوم يعدي .. و خلااااااااااااااص

[badroora]

بافكر

ليه الناس فى اول تعاملك معهم بيبقوا كويسين ويحسسونك انك كل شيء عندهم وبعد التعود عليك ويطمئنوا انهم خلاص اخدوه مكانه عندك يبداو فى التغير والتحول وتبقي مش عارف تعمل معاهم ايه

بفكر ازاى لما تبقي مخنوق من شيء ازاى تعبر عنه بدون ماتجرح اللى قدامك او يفهمك غلط

بفكر انى محتاجة اقعد مع نفسي اعيد حسابات كتير وحاجات كتير محتاج واقفة حاسمة

بفكر فى بنت اختى وحشتنى اوى اوى

كفاية كدا بقي لانى بفكر فى حاجات كتيرة وشكلى مش هاخلص النهاردة

يا ريت الواحد يبطل يفكر ويعيش اليوم بيومة بدون تفكير وزى ما تيجي تيجي :blink:

تم تعديل 11 أغسطس 2007 بواسطة نجفة المغرورة

[badroora]

بفكر فى جدى وحشنى اوى

وخايفة يوحشنى على طول

ونفسي لو هيسافر يخدنى معاه

[autoscriptor]

اعتقد ان التفكير في حد ذاته تمرين جيد يجعلك دائمَا مرتبط بالواقع. إلا إذا كان تفكيرك منصب على الخيالات والأوهام. أهتم كثيرًا برسم مسارات وعواقب محتملة لكل قرار أتخذه. ولكن يصبح الموضوع مضنيًا إلى حد بعيد. غالبًا ما أثير غضب واستياء من يعيشون معي. ولكن بعد مرور الزمن غالبًا ما أكون قد فكرت فيه قد حدث بشكل أو بآخر ويغمرني من كان بالأمس غاضبًا من كثرة تدقيقي في الأمور بالكثير من كلمات الاطراء.

[aimen]

صباحكم عسل :)

بأفكر امتى اتغير وانظم حياتى ؟

بأفكر ...ممكن البس بدلة كاملة ؟

بأفكر ..العام القادم حيكون ازاى ؟ اول سنة شغل حر لى....كفيلى هو صاحبى ... ؟

بأفكر..... ربنا حيقدرنى واقدر امشى فى تعلم اليونكس واكمل الmcse ؟

بأفكر ...يا ترى ممكن تفكيرى يتغير ..وارجع افكر فى الجواز زى باقى البشر ؟

بأفكر ...هو انا حفضل دايما سايب الأمور كده ومش مخطط لها ؟

بأفكر ...اشمعنى انا ما بفكرش فى موضوع الفلوس ولا الرصيد فى البنك ؟

بأفكر ممكن خطيبتى السابقة تسامحنى على اللى عملته فيها ؟

بأفكر ...هو ليه انا ماعرفش اليوم تاريخه ايه لا هجرى ولا ميلادى ؟

بأفكر ...ليه انا مبفكرش ولا شاغل دماغى زى الناس ؟

بأفكر اقوم اشتغل شوية ؟

[badroora]

بفكر فى كذا حاجة

اهمهم الفراق ليه دائما الفراق يجيء فجاءة دون سابق انذار !!

الموت لماذا لا يدق ناقوس الموت لينبه الموتى واهليم بما سوف يجرى هل هذا رحمة من الله بنا ام عقاب ؟

هل فعلا لما تخاطب الموتى يشعرون بنا ويحسون حتى ونحن بعيدا عنهم ؟

لله ما اعطى ولله ما اخذ حقا ولكن كيف نستطيع تحمل ذلك الله اعطانا اشياء تسعدنا وتمليء علينا حياتنا ونعيش من اجلها وفجاءه ياخذها مننا هل هذا يعتبر عقاب ام اختبار ؟

استغفر الله العظيم من كل ذنب عظيم

[امانى]

بفكر فى كذا حاجة

اهمهم الفراق ليه دائما الفراق يجيء فجاءة دون سابق انذار !!

الموت لماذا لا يدق ناقوس الموت لينبه الموتى واهليم بما سوف يجرى هل هذا رحمة من الله بنا ام عقاب ؟

هل فعلا لما تخاطب الموتى يشعرون بنا ويحسون حتى ونحن بعيدا عنهم ؟

لله ما اعطى ولله ما اخذ حقا ولكن كيف نستطيع تحمل ذلك الله اعطانا اشياء تسعدنا وتمليء علينا حياتنا ونعيش من اجلها وفجاءه ياخذها مننا هل هذا يعتبر عقاب ام اختبار ؟

استغفر الله العظيم من كل ذنب عظيم

اختى الحبيبة نجفه

حقيقة ما افكر فيه الان هو انت وما اراه من حذن ومرارة فى كلامك

ربنا رحيم بنا يا نجفة علشان كدة بيخلى الفراق فجأة خصوصا فراق الموت لان ممكن الحياة تقف فى انتظاره

هو صحيح صعب على النفس وصعب جدا لكن الاصعب هو الانتظار لحدوثه

احنا صحيح بنخاطب الموتى لكن هل سيشعرون بنا او لا هذا شئ يعلمه الله رغم ما نسمعه من الاهل ان الاموات تحس

بالاحياء

اخرجى من حذنك يا نجفة ودعى الملك للمالك واعلمى ان الله لو اخذ منكى شيئا فهو لحكمة يعلمها وسيعوضها بشئ اخر

ولكنه هو اختبار لقوة الايمان

ارجعى نجفة القوية المملوءة حيوية وشعلة نشاط اللهم لا حسد فانت نجفة المحاورات

امانى

[badroora]

عزيزتى امانى

ميرسي جدا على كلماتك الرقيقة التى اثلجت صدرى ( حلوة اثلجت دى )

ورفعت معنوياتى حقا ولكن يا عزيزتى الحزن الفراق الموت اشياء ليس لنا يد فيها حقا ! مجهولة نعم ! ولذلك كل ماهو خارج نطاق معرفتى وتحكمى او مجهول بالنسبة لى هو اكثر شيء يخيفنى ويؤرقنى .

السعادة من سماتى بل ابحث عنها جاهدة انا لا احب البؤس والشقاء او الاستسلام لاى يشيء يعكر صفو سعادتى

ولكن حين تاتى اشياء اكبر منى تهزمنى بكل سهولة واصبح فريسة للحزن والالم ولكن ليس بكثير لان الله اراد لى شيء وبالدعاء خففة عنى

مرة اخرى شكرا لك عزيزتى واسفة اذا المتك كلماتى

عقلي الباطن (تري ببقي فيلسوفة لما باكون حزينه )

[badroora]

بافكر ويسلام لو يتحقق اللى بفكر فيه خلال 40 دقيقة هاكون بمنتهى السعادة

بافكر لو يجيلي تليفون من الشغل ويقولولى نامى النهاردة انتى اجازة متجيش ياسلااااااااااام هاكون فى منتهى السعادة

الشغل فى رمضان متعب اوى :closedeyes:

[Folana]

السلام عليكم ورحمة الله...

بأفكر ليه بدرية ( نجفة سايقا ) ما استكملتش مسابقة رمضان؟؟؟؟

وبأفكر ان ممكن تكون معذورة لانها كانت مشغولة فى تغيير الاسم واكيد دايخة ما بين البلدية والشهر العقارى وقيد المواليد لتغيير الاسم..

بس خلاص المشكل اتحل...ياترى ايه اللى مأخرها كده ؟؟؟ wst::

[badroora]

ايييييييييه والله انا دبست رمضان ونسيت !!

وبعد ما خلصت من الاسم دخلت فى تحدى ضد الرجال ونسيت

عموما حاضر انا عند وعدى وهاكلمها من عيونى ولا يكون عليكي امر

سامحينيى يالغالية wst::

[واحد تاني]

مفيش حد بيخسر كل حاجة ... ومفيش حد بيكسب كل حاجة

الحمد لله رب العالمين

[se_ Elsyed]

مفيش حد بيخسر كل حاجة ... ومفيش حد بيكسب كل حاجة

الحمد لله رب العالمين

لونك غامق ليه يابو كمال ؟

بس دعني اختلف معك يا واحد بك

ففريقي النادي الأخلي بيكسب كل حاجه وكل بطولة بيدخلها بيكسبها :D

في حين إن فريق زي الزمالك بيخسر كل حاجه حتى القضايا بتاعت النفقة على لعيبته ...

[سهيلة]

بفكر هوة لية الراجل قبل الجواز بيكون رومانسى وبعد الجواز لا

مع ان الشخصية واحدة اية اللى ممكن يغيرة كدة

يا ترى مسؤلية الزواج ام مادا؟؟؟؟ :D

[se_ Elsyed]

بفكر هوة لية الراجل قبل الجواز بيكون رومانسى وبعد الجواز لا

مع ان الشخصية واحدة اية اللى ممكن يغيرة كدة

يا ترى مسؤلية الزواج ام ماذا؟؟؟؟ :blush2:

هي بيني وبينك ... ماذا

بصي يا سهيلة يابنتي

أنا راجل متجوز واكبر منك بكتير وأقدر أفيدك في مثل هذه المواضيع

- كل مرحلة يا سُهيلة ولها أيدولوجيتها ... ومقوماتها وإرهاصاتها ...

وبالتالي مرحلة الخطوبة هي تعتبر مرحلة اللامسئولية ومرحلة الأحلام والعصافير وكاظم الساهر وعبحليم والكلام اللي إنتي عارفاه بقى

ندخل في الجد وتيجي مرحلة الجواز ... في أول الجواز بتلاقي لسه في شوية عصافير بايته من أيام الخطوبة على شريط منطور هنا ولا هنا لكاظم الساهر ....

يعدي كام شهر ... فجأة تطير العصافير ويغور كاظم وعينك ما تشوف الا النور .... فواتير تليفونات ... على إيجار بيت متكوم ... على مواصلات زحمه .. على المدام حامل وبتتوحم على حرنكش ... على مصاريف متابعة الحمل والسونار والحركات .. على جمعية النفر من دول بيدبقها عشان يقبضها الأول يشتري بها المغات والفراخ البلدي والشموع بتاعت السبوع ... هوووب المدام ولدت والولا لازم له عناية طبية ده كح ده بيسنن وإلخ إلخ إلخ ...

وبالتالي يبقى واهم وحالم وهارم اللي يفتكر إن في خضم كل تلك الإرهاصات إن الرومانسية تبقى على حالها وبنفس قوتها ....

الرومانسية مطلوبة ما قولناش حاجه وعلى عين وراسي ويعيش مولانا وبطيخ مولانا عشان ما حدش يضرب .. لكن مستحيل تُقارن برومانسية الترمس والدُرة المشوية بتاعت الخطوبة ....

وكثيراً ما تُترجم تلك الرومانسية من مجرد كلام وأشعار في فترة الخطوبة إلى خطوات عملية في فترة الجواز

يعني الراجل الرومانسي الحقيقي بتاع تقفيل بلده .. لا يعتمد على الكلام فقط ومن ثم يأكل مراته وعياله طوب ... لكنه يجب ان يكون متوازن ... يعني شوية كلام وحب على غزل روفيع ... ومن ناحية أخرى يجب أن يكون إنسان عملي ومحترم ويوفر لأسرته حياة كريمة .. لإن هاقولك حاجه يا بنتي حطيها حلقه في ودانك وإبقى قولي آبيه سين سين قالي كده في يوم الحادي عشر من أذار ... فإذا دخل الفقر من الباب ... هايهرب الحب وياخد في إيده الرومانسية ويطفشوا من الشباك ولما ييجي الراجل الرومانسي يسأل مراته : إنتي واخده شنطة هدومك ورايحه على فين ؟ .. إنتي نسيتي حُبنا ... وترمسنا ودرانا المشوي ..؟ ده إنتي واكله كمية دُره لو كنت زغطت به دكر بط كان زمانه بقى قد الخرتيت ؟ هاتقوله وهي بتلم اخر بطانية من عالسرير عشان تسيبة عالبلاطه : دُره ؟!!! دُره إيه يا عُممممممممممممر اللي بيأكلوا به الفراخ والبط ؟ أقعد إنت لوحدك عالبلاط وكل دره وفول وبرسيم حتى ..

كذلك الست برضوا مستحيل تلاقيها بعد الجواز هي نفسها البت السوفيفه اللي كانت بتتكسف من خيالها أيام الخطوبة وكانت عامله فيها ولا الممثلة الأمريكية باسكن روبنز في عز شبابها .... فبالتأكيد بتتحول إلى كائن أخر بعد الزواج ...

ومن غير ضرب .... عايز أقول إن كائن له أيدلوجيته ومقدراته وحلاوته برضوا ... فهي هي بتتحول إلي كائن بيمسح ويطبخ ويغسل وينشر الغسيل ويكوي - ولو إن اخر ست شوفتها بتكوي في بيتها ده كان في صيف سنة 1994 - وبالتالي برضوا مش عايزين نحملها أكتر من طاقتها ونطالبها تكون لبنى عبعزيز 24 ساعة في اليوم وتقعد تمثل فيلم المخده الخالية ... وإلا البيت هايبقى خرابة والمواعين هاتبقى للرُكب وهكذا وبالتالي جزء من الرومانسية الحالمه لابد ان تحوله إلى أفعال تُرضي زوجها وتخليه حاسس بالأمان والراحة في بيته

وتخيلي زوجه سوفيفه ومشاعرها رقيقة وطول اليوم عماله تسمع كاظم ، لكنها مهملة في بيتها وجوزها كل يوم يتغدا جبنه بالقوطه ... بذمتك مش هايزهق منها خلال يومين وإحتمال يرميها من البلكونة هي وكاظم والدباديب وأي أقفاص عصافير باقية عندهم ؟

[Folana]

السلام عليكم ورحمة الله.....

فهي هي بتتحول إلي كائن بيمسح ويطبخ ويغسل وينشر الغسيل ويكوي

:blush2:

قلبت علينا المواجع....

انا بقى بافكر فى.....نسيت :blush2: