ما هي نظرتك للوظائف المختلفة ؟؟!!

[مصرية الهوى]

أحيانا الواحد بيتكون عنده انطباع معين عن شغلانة معينة .. فلما بيقولوا له فلان بيشتغل كده .. يجي في باله الانطباع اللي كونه عن الناس اللي بتشتغل الشغلانة دي ..

أقولكو انطباعاتي انا ايه .. طبعا تكونت عندي من ناس قابلتهم او من الافلام والمسلسلات .. وهي مجرد انطباعات يعني مش صحيحة .. بس حاجه جوايا كده .. :)

الفيزيائيين : مجرد ما يقولوا ده بيدرس فيزياء .. أو ده أستاذ في الفيزياء .. بحسهم ناس هاي كلاس .. ملامحهم برئية تحسسك بالبلاهة والغباء بس هم عباقرة وفي منتهى الذكاء .. بس محدش يفهمهم.. دايما دماغهم بتشتغل وبيفكروا بطريقة غريبة ومعقدة شويا .. بتحس ان حواليهم مجال مغناطيسي يجذبك غصب عنك .. حنونيين ومستعدين للتضحية عشان خاطر اللي بيحبوهم .. :wub:

المحاميين ( احم احم B) ) : حاسه انهم ناس راقين جدا .. عندهم ذوق وبيفهموا اوي في الاتيكيت .. لبسهم شيك جدا .. شخصياتهم مبهرة .. لما بتقابلهم بتحسهم ناس جاديين طول الوقت ومعندهمش وقت للعواطف .. بس من جوا كأنهم قزاز بيتكسر .. دايما شاطرين وفاهمين كل حاجه .. الصورة اللي بتيجي في بالي لما بيقولوا محامي.. واحد لابس بدلة لونها رمادي فاتح وكرافته بمبي ..

اخر شخصية رسخت النظرة في بالي .. شخصية بكر الشلتوني ( هشام سليم) في مسلسل أماكن في القلب .. شخصيته كانت هايلة جدا..

موظفين الحكومة : أنا حاسه انه أي حد بيشتغل في المكاتب والدوائر الحكومية .. مفيش في دماغه حاجه غير قهوة الصباح وجرايد الصباح وفوت علينا بكرى .. صورة واحد دايما نايم على المكتب في الشغل :P ..

المبرمجين : الصورة اللي بتجي في بالي صورة الشاب الامريكي الوسيم اللي لابس نظارة دائرية اطارها فضي.. قالع الجاكته وشايلها في ايد والايد التانية شايل لاب توب :D .. بحسهم دماغ وعبقرية تمشي على الارض .. كلامهم قليل جدا .. ودايما مشغولين .. بس فيهم حاجه .. وفعلا لاحظتها كتير جدا في الناس اللي بتفهم في البرمجة .. اخطائهم الاملائية فظيعة .. ومعندهومش حس فني .. يعني بتلاقي برنامج عبقري ومعمول بطريقة تدلك على ذكاء المبرمج .. بس تعال شوف الالوان ازرق اخضر احمر بني .. مبيفهموش في تناسق الالوان ..

الأطباء : جادين عاقلين .. دايما بيذاكروا .. اغلبهم مبيفهموش اوي في اختيار الملابس .. مبهدلين شويا عشان معندهومش وقت .. الا جراحين القلب .. احسهم ناس يعشقون المغامرة وحساسين جدا ورومانسيين .. يمكن عشان حياتهم بين القلوب ..

المهندسين: وخاصة مهندسين الكمبيوتر والاتصالات .. ليهم عالمهم الخاص .. يحبوا الهدوء والصمت .. دايما بيبحلقوا في اللامرئيات .. يمكن الحياة مع الكمبيوتر خلتهم منعزلين كده .. لما بيقولوا مهندس كمبيوتر يجي في بالي صورة فيها اصفار ووحايد تمشي بسرعة وصوت زي اصوات الاشارات ..

المدرسين : 99% منهم تقليدين .. وعاديين .. ولا جديد تحت الشمس .. حياتهم روتينية ..

النظرة دي تكونت عندي لأني فين وفين لما تقابلني معلمة عبقرية تفهمني دور المعلم الحقيقي .. وانه هو اساس كل شيء .. انما بقية المدرسين رووووووووووووووتين ممل ..

(ربنا يستر mfb: )

الضباط : تحسهم صلبين ، جامدين ، دمهم تقيل ، بس من جوه رقيقين وشفافين وعلاقاتهم الخاصة ناجحة .. على فكرة أنا بيعجبني اوي شكل الواحد في البدلة العسكرية .. بحسه راجل بصحيح .. يعني بني آدم بيعتمد عليه وقد المسئولية ..

:closedeyes:

ايه رايكم في تخاريفي :huh:

[زيزو]

المهندسين: وخاصة مهندسين الكمبيوتر والاتصالات .. ليهم عالمهم الخاص .. يحبوا الهدوء والصمت .. دايما بيبحلقوا في اللامرئيات .. يمكن الحياة مع الكمبيوتر خلتهم منعزلين كده .. لما بيقولوا مهندس كمبيوتر يجي في بالي صورة فيها اصفار ووحايد تمشي بسرعة وصوت زي اصوات الاشارات ..

يا جيجي تسمحيلي أعترض شوية؟ عارفة المهندسين دول أكتر ناس مهتمين بمصالح الناس. ويا سلام بقى لما تطلع قماش..... طلعت قماش طلعت قماش!!!! mfb:

(رأي محايد وصفتي مهندس لا تؤثر إطلاقًا على حيادي :closedeyes: )

الضباط : تحسهم صلبين ، جامدين ، دمهم تقيل ، بس من جوه رقيقين وشفافين وعلاقاتهم الخاصة ناجحة .. على فكرة أنا بيعجبني اوي شكل الواحد في البدلة العسكرية .. بحسه راجل بصحيح .. يعني بني آدم بيعتمد عليه وقد المسئولية ..

:huh:

ايه رايكم في تخاريفي :P

مش عارف يا جيجي أقولك إيه... بس الحقيقة انا ما شفتش ضابط الا وكان عنده عقدة ما، وكله قوم وعلاقتهم الخاصة ناجحة دي قوم. بس جايز يا بنتي جايز :wub:

[NoorJehan]

الفيزيائيين : مجرد ما يقولوا ده بيدرس فيزياء .. أو ده أستاذ في الفيزياء .. بحسهم ناس هاي كلاس .. ملامحهم برئية تحسسك بالبلاهة والغباء بس هم عباقرة وفي منتهى الذكاء .. بس محدش يفهمهم.. دايما دماغهم بتشتغل وبيفكروا بطريقة غريبة ومعقدة شويا .. بتحس ان حواليهم مجال مغناطيسي يجذبك غصب عنك .. حنونيين ومستعدين للتضحية عشان خاطر اللي بيحبوهم .

الفيزيائيين...حنونين!!

فين ده (وش واحد بيدور فى الدرج) :closedeyes:

بالعكس، بحس أن ذهنهم كله حسابات ونظريات وأفكار..ولا مجال للقلب إطلاقا إضافه الى فقدان عنصرالإجتماعيه..(شخصيه فيلم "beautiful mind" )

مع إستثناء لفيزيائين المحاورات طبعا اللى أكيد زى الفل :P

الأطباء : جادين عاقلين .. دايما بيذاكروا .. اغلبهم مبيفهموش اوي في اختيار الملابس .. مبهدلين شويا عشان معندهومش وقت .. الا جراحين القلب .. احسهم ناس يعشقون المغامرة وحساسين جدا ورومانسيين .. يمكن عشان حياتهم بين القلوب ..

مش شرط :huh:

فلقد علمتنى الحياه إن ليس من يعمل بمهنه رحيمه يتصف بالرحمه أو من يعمل بمهنه بها تعامل مع الناس لبق وإجتماعى....فالبعض منا فقط يجيد أصول مهنته ولا تطبع عليه سماتها...شئ أحزننى معرفته...

موضوع شيق،، للحديث بقيه إن شاءالله..

[nancy]

شوفى ياجيجي

الوظايف دى مش ديما بتنطبق على الاشخاص بس فية ديما انطباع عام

زى الظباط الشرطة بالذات شخصيات جافة وسادية وبتعبد السلطة ودماغ فاضية ولو وقع تحت ايدة دكتور جامعة ولا واحد مثقف يبقى وقعتة سودا

الدكاترة انواع الدكتور الجراح هو اكبرهم دماغ باحس انة لازم يكون متابع للابحاث الجديدة والمؤتمرات الطبية

وفية دكاترة استرزاق بيبقوا مبهدلين وتحسيهم مكانيكية

وفية دكتور محترم عارف اية العلة من اول كلمة تقوليها

المهندسين بيكونوا عمليين وشغلة بيحتل مساحة كبيرة من دماغة

مهندسين الديكور باة ودة تخصصى انا لما اتكلم مع واحدة مهندسة ديكور مش عرفة لية بترفع صوتها كان مهندسة الديكور دى لازم تبقى رقيقة اوى وناعمة (دى النوعية الى قبلتها فى مجالى يمكن مش كلة كدة)

مبرمجين الكمبيوتر طبعا لازم يكونوا اذكياء اى حاجة بتحتاج ان الى يكون بيشتغلها يكون على دراية بالحدث دائما دة فى راى الاذكى

انما فيى شغلانات انا باحترمها واحبها اوى

زى مرمى الاثار والمؤلف الموسيقى و المراسل الصحفى والمصور المحترف للاحداث العامة ومصمم الملابس والمنقب عن الاثاروالكاتب الجيد

فية كمان عازف الهارب ومغنى الاوبرا دول مواهب نادرة العالم لا يحتوى الا على افراد بعدد اصابع اليد

بشكل عام المبدع و المخترع هما فى راس الوظائف الجيدة جدا

بس اهم حاجة ان اى واحد فى مجالة لازم يكون مبدع متجدد ومميز حتى لو بيبيع فول