ملحق حفل إستقبال الأعضاء الجدد

[الرافعي]

سي السيد: والآن المجتمعون في هذا الصيوان من سالف العصر والأوان، نعود بكم إلى الطرب الأصيل ... مع فنان المحاورات زهيري (تصفيق حاد) .... مفيش حد بيسقف ليه ؟؟

سكوب: الله يسامحك يا س.س .. ده اللي اتفقنا عليه برضه ... ما قلت لك شوف لنا أي حد إن شاء الله شعبولا .. مش فاكر آخر مرة زهيري غنا فيها في حمام بيتهم إيه اللي حصل ..

س.س: معلش يا سكوب .. ما كانش في وقت .. وشعبولا طلب شيء وشويات .. وانت عارف الأستاذ عادل ، (أي... مين اللي ضرب القفا ده ؟؟)

زهيري : ياااااااااااااااااااااااااااااااااااااااااااا ليل ....

زهيري: يااااااااااااااااااااااااااااااااااااااااااا ليل

زهيري: يااااااااااااااااااااااااااااااااااااااااااا ليل

لخبطة : إيه يا عم .. ما تغني ... انتوا جيايبين لنا مغني ولا حانوتي ...

زهيري : يغمز زهيري بطرف عينه إلى واحد من فتواته فيذهب ويزغد ماركيز فيقوم مذعوراً من الكرسي المجاور للخبطة، مغمغماً بكلمات غير مفهومة .. ميزنا منها (ديماجوجي ...)

زهيري: يااااااااااااااااااااااااااااااااااااااااااا ليل

يهب لخبطة واقفاً، غير عابئ بالفيل الجالس بجواره، وقد تأبط شراً ...

لخبطة: يا عم طفحتنا الشندوتش اللي كلناه ... مش كفاية إنه كان فاضي ...

هنا يغمز زهيري للبلطجي المؤجر ، غمزةً ذات معنى ..

(وفي لحظة واحدة كان لخبطة قد تلاشي من الحفل وانمحت آثاره) ..

وفي جانب هادئ من القاعة، حيث يجلس مجلس الحكماء ... يميل الأفوكاتو في وقاره المعهود على الأستاذ عادل أبو زيد

قائلاً : عفواً يا أستاذ عادل .. أنا عندي تعليمات طبية صارمة من المدام إني ما أتعرضش لأي ملوثات سمعية ..يعني لو سمحت لي .. انا مضطر للانسحاب ..

زهيري : يااااااااااااااااااااااااااااااااااااااااااا ليل

س.س: يا زهيري الله يهدك .. غير بقى

وهنا تقف سيارة كابريس موديل 2007 ، وعليها لوحة رقم (و ج د 090 السعودية ) وتنزل منها سيدة سعودية معها حارس أسمر البشرة شديد البنية ، عريض المنكعين .. شلولخ .. ويتوشح يحزامين من الرصاص ... يزيح لها الطريق ، وهنا ينبري الأستاذ عادل قائلاً ... إحنا بنتعرض لغزو ...

أنا نبهت فؤاد باشا الله يرحمه للموضوع ده، وضرورة وضع حد لظاهرة العنف المسلح، وذكرته بخطورة الموقف لما كان النحاس باشا ... وهنا يخطف س.س الميكروفون من المطرب زهيري .. بينما كان يردد (والله زمان زمان والله) للمرة العاشرة

وينقذ الموقف س.س: قائلاً .. اسمحوا لي يا سادة أن أقدم لكم .. الأخت العزيزة جي جي الشهيرة بمصرية الهوي ..

وإننا نحيي شعب المملكة الشقيق ،

زهيري لو سمحت .. من فضلك سمعنا : بعاد كنتم ولا ... ولا قريبين ... لمراد تبقوا دايم .. دايم سالمين

توجه جي جي تحية للحاضرين، قائلة لهم ... مساكم الله بالخير ... حيا الله الربع ....

عصفور طاير يقول لمتفاءل: أيوه هي دي ... فكرة نميسة بدل البهدلة في المؤسسات ، نتفق مع الزميلة جي جي شكلها من القصمان التقال .. تكفلنا ، ونعمل لنا نصبتين خضار في سوق الربوة ، ولا سعودة ولا دياوله ...

سكوب : س.س كفاية بقى الناس ودانها التهبت .. نزل زهيري ،و قدم أي حاجة تانية ..

س.س: نؤسف يا حضرات ...

الآن مع الكلمات العذبة والمشاعر الرقيقة والأحاسيس المرهفة ... مع الشاعرة الرقيقة بنت مصرية ...

تصفيق شاعري في القاعة ... (أصله ما ينفعش تصفيق حاد)

س.س يكز على أسنانه : واد يا فيولين ..

فيولين: أيوة يا أبيه ....

س.س: فين مصرية الله يهدك ...

فيولين : مش عارف يا أبيه .. هاروح أشوفها فرييرة .....

مصرية : مادا .. مادا ... روحت فين يا حبيبي ...

يا مادا ... كفاية بقى جننتني ...

وفي هذه الأثناء ..كان حمادة ... تحت إحدى الطاولات ... يلعب مع تويتي عصفور صفاء ويضحك معه في عذوبة وروعة

وفي هذه الأثناء ... تتوقف سيارة بودرة ... وينزل منها شخص سمين ... ذا كرش عظيم ، وصلعة جريئة ، ويرتدي بدلة مخططة أبيض في أسود ، مع كرافتة خضراء ... ، ويدخن سيجار كوبي ..

الحارس على الباب : ممنوع يا أخ ... انت رايح فين ..

الشخص: انت مين يا له ؟؟ مين اللي مشغلك .. انده لي الجدع ده اللي اسمه س.س ولا الخواجة التاني اللي اسمه سكوب ...

يجري سكوب ، ويرحب بالضيف بديبلوماسية معهودة ..أهلاً وسهلاً .. اتفضل .. أكسيكيوزاتا سينيوري .. ممكن بس تفكرني بالاسم ..

الشخص : ينظر إليه شزراً.... عدم المؤاخذة يا خواجة ... ما خدناش الكلمتين اللي رطمتهم في المدرسة ... إحيات أبوك كلمني عربي..

سكوب: يخبط هامته بيده ... أسف كنت باقول حضرتك بس تفكرني بالاسم الكريم ..

الشخص: آه ... اللي ما يعرفك يجهلك .... محسوبك المعلم حلاوة بيه العنتبلي ... على سن ورمح ... آه

مش انت برضه الخوجة المتسيط اللي اسمه سكوب ...

سكوب: مشدوها .... أهلاً أهلاً يا معلم ... نورت بيتك ومطرحك ... بس الله يخليك خف إيديك شوية ... عصرت إيدي..

حلاوة: لا مؤاخذة يا أخ ... أمال فين بقية الجماعة .. (يهب ناصر الملك والملكية ... جماعة .. اتفضل هنا يا معلم ..)

حلاوة : انت مين يا بني ... الله لا يسيئك .. تموين ماشي .. تزوير انتخابات ما يضرش ... فتونة وبلطجة مفيش مانع .. ضرورة .. وللضرورتي أحكامون، لكن تقول لي جماعة .. أهو ده اللي ما ينفعش معاه حاجة ...

ناصر: إسمع بس يا معلم ... أنا يا افندم .. ناصر الملك والملكية .. شوف يا معلم .. بقى الملك ده كان بصراحة ربنا حاجة حلوة خالص ..

يهب ماركيز : أنا قلت لكم ميت مرة طلعوا الرجعي ده بره ...

يضحك حلاوة : مين الجدع الحمقي ده ... انت أهلاوي يا بني .. لابس أحمر كده ليه، ده أنا افتكرتك ختم المدبح ....

لا مؤاخذة يا خواجه .. أنا هاقعد جنب الراجل الحمقي ده .. أصله عجبني ...

ماركيز : لو سمحت .. شوف لك حتى تانية .. مش ناقصين ...

وهنا جن جنون المعلم ... فقام وأمسك الرفيق ماركيز من كوفيته الحمراء ... صارخاً بصوت أجش أشبه بصوت بوق الباخرة نورماندي ... بتقول إيه يااااد ...انت عارف أنا مين .... أنا مين يااااد..

أبو حلاوة معلقاً بالفرنسية: أووو مون ديوووووو ... الجدع الهمجي بتاع الإكصدام والرفرف والحاجات البلدي تاني ... يا ساتر

الأستاذ عادل : يا س فيه إيه يا بني عندك .... إيه الدوشة دي ، الحفلة هاتبوظ ...(ما سبق كان استهلالة لا بد منها)

أنا ناديت وهافضل أنادي باحترام الآخر، وعدم التمييز بين البشر على أي أساس ....

اتفضل هنا يا معلم ... تعالى .. أقدم لك الفاضل الأفوكاتو ...

حلاوة: أهلاااااااااااااااااااااااااااااااااً ...إزيك يا أستاذ..... وقبل أن يستلم حلاوة الأفوكاتو معانقاً .. يطير سكوب في حركة فدائية شجاعة حاجزاً بين الأستاذ والمعلم .... موشوشاً المعلم .... لا يا معلم .. بالراحة بقى على الراجل ده .. ده انت كسرت لي إيدي بره ...

حلاوة :: آه ... لا مؤاخذة ... تشرفنا يا أستاذ.

في الحقيقة ... كنت محتاج سعادتك في اشتشارة كده .. وأنا تحت أمرك ... المحفظة مليانة والحمد لله ..

الأفوكاتو: محفظة إيه يا معلم ... أنا أتأخر أبداً عن أبناء بلدي .. مرحباً بك في بيتك وبيت الجميع ...

الأفوكاتو يميل على الأستاذ عادل قائلاً: سبحان الله ... هو ده المعلم حلاوة العنتبلي ... ما كنتش متخيله كده خالص ....

ترد مدام سلوى في وقارها المعتاد .... سبحان الله ويخلق ما لا تعلمون ...

الأفوكاتو: هو في الحقيقة فكرني بإحدى سفراتي إلى باريس ... دخلنا مطعم أنا وزوجتي وعديلي العزيز السير كلارك ... (على فكرة أنا بافكر أضمه للمحاورات) وشوفت طباخ له شارب ضخم وكرش عظيم يشبه المعلم صورة طبق الأصل ( نو داوت !!!)

(يغمغم ماركيز مرة أخرى ... برجوازي مت ..) ..

يهم المعلم بالفتك به ... درجوازي مين يااااااااد ... أنا معف ..... (تووووت ... مقص الرقيب)

وهنا يأتي الأستاذ خضر حاملاً جريدة الوقائع المصرية تحت إبطه، والمنشة في يديه اليسرى .. قائلاً ... لا لا يا معلم مش كده يا راجل ...

الإسكندرني: يلتفت إلى زوجته ... قائلاً سيلفو يلييه شيريي تروا مينييت . أسلم على شقيقي حلاوة العنتبلي ...

الإسكندرني: لا مؤاخذة يا خضر أفندي ... أهلالالالالالالالالالالالالالالالالالالا يا معلم .. فينك يا راجل ... استنيتك في قدورة أول امبارح ... بس انت حلقت لي ... كده برضه يا معلمي ... داحنا كنا عايزين نعملوا معاك أحلى واجب ...

فاصل قصير ..... ونعود ..

تم تعديل 12 مارس 2006 بواسطة حلاوة العنتبلي

[وليد صفوت]

ها و قد انضم الى عصابة حساس العالمية و التى حيرت المافيا و آل كابونى فى حوارى إيطاليا . و حيرت المباحث فى مصر المحروسة فى حوارى القلعة ....

انضم الى عصابة حساس المعلم الكبير ملك سوق اللحمة و الخضار و قريباً سوق السمك ......... المعلم حلاوة العنتبلىىىىىىىىىىى ....

تصفيقون حاد :rolleyes:

[مصرية الهوى]

حجزتوا لي الطربيزة اللي قلتلكم عليها ..!!؟؟

عاوزاها قدام المسرح على طول .. المفرش النبيتي والذهبي ..

والشمعدان الذهبي المرصع بالالماظ ..

والفازة اللي فيها الورد الأحمروالابيض اللي لسا واصل من هولندا :P

بعدين ايه يا عم حلاوة كابريس دي .. دي بيئة اوي :lol:

أنا عربيتي maybach :P

بس اللوحة خطيرررررررة :D

ربنا يكرمك يا وليد هات لنا 460علبة بيبسي

من ثلاجة البيبسي اللي انت واقف جنبها :P

[الأفوكاتو]

إقتباس من مذكرات المعلم " حلاوة"

الأفوكاتو: هو في الحقيقة فكرني بإحدى سفراتي إلى باريس ... دخلنا مطعم أنا وزوجتي وعديلي العزيز السير كلارك ... (على فكرة أنا بافكر أضمه للمحاورات) وشوفت طباخ له شارب ضخم وكرش عظيم يشبه المعلم صورة طبق الأصل ( نو داوت !!!)

عزيزى المعلم حلاوة,

كيف علمت أن عديلى قد منحته الملكة لقب" سير" رغم أن هذا كان سرا بينها و بينه؟

يبدو أن توريدك اللحوم للقصور الملكية البريطانية قد جعلك صاحب عزوة لدى العرش الإنجليزى, لذا, سوف أناديك من الآن( ورايح) بلقب" السير المعلم حلاوة".

( لا تنسى تفويت كام كيلو سكوتش فيليت على عنوانى أثناء زيارتك المقبلة للملكة)

[لخبطه]

كد ابقا عندنا طقم كبير من الناس اللى بتقدر تعمل حوارات خيالية عالية وبكدا انضم لهم المعلم حلاوه العنتبلي

ايه ياعم حلاوة الحلاوة دي انا عايز حد ياخد المشاهد الكوميدية الجميله دي ويعمل بيها مسلسل وهو يعمل مسلسل شديد

انا مبسوط انا عايز ابلغهم في الكفر حدانا أن أنا بقت بأذكرفي قصص المنتدي يعني اسمى بقاله شنه ورنه دول لو عرفوا حدانا في الكفر ممكن يمسكوني العمودية وأبقا العمدي والفضل لعمل حلاوه وللمحاورات

[الرافعي]

أعزائي الكرام (بترتيب المداخلات)

أخي فيولين ... مش عارف من غيرك كنا هانلاقي مادا إزاي ....

ربنا يخليك ..

أستاذنا الأفوكاتو ....

في مثل بيقول أطعم الفم تستحي العين ... يعني 3 كيلو موزة مشفي مع حتتين حلويات ، مع شوية ريش علشان الباربكيووووط ..لكبير الخدم في قصر باكنج... (ما اقدرش أكمل علشان دول سرهم باتع ومتابعين حتى حلاوة العنتبلي لو كتب عنهم ..) :P نعرف مين اللي سير واللي ما سيرشي :P

أختنا العزيزة جي جي ... قصرنا معكم .. أصبري شوي وتجيتس العلوم الزينة :P

لخبطة .. ما كنت تصبر على فن زهيري أحسن ... على الأقل هو مننا وعلينا تحياتي لك ولكل أهل الهنادوة نفر نفرررررر

سنكمل بعد قليل ..

وتحياتي لكل محبي الفن الهادف :lol:

[الأفوكاتو]

أستاذنا الأفوكاتو ....

في مثل بيقول أطعم الفم تستحي العين ... يعني 3 كيلو موزة مشفي مع حتتين حلويات ، مع شوية ريش علشان الباربكيووووط ..لكبير الخدم في قصر باكنج... (ما اقدرش أكمل علشان دول سرهم باتع ومتابعين حتى حلاوة العنتبلي لو كتب عنهم ..) نعرف مين اللي سير واللي ما سيرشي

أين الموزة و الريش يا معلم؟ و اللى بس كلام؟ :blush:

[se_ Elsyed]

إيه الحلاوة دي يا تابلي ؟

بس ليه مطلعني أنا بلطجي وكلكو طالعين بتتكلموا فرنساوي وكإنكم من سلالة " لويس سانك " ؟

[الرافعي]

إيه الحلاوة دي يا تابلي ؟

بس ليه مطلعني أنا بلطجي وكلكو طالعين بتتكلموا فرنساوي وكإنكم من سلالة " لويس سانك " ؟

يا شقيق ... إرجع لشخصية المعلم ... هاتفتكر عماشة في الأدغال على طول .. -_- لا بيتكلم فرنساوي ولا حاجة ...

اللي اتكلموا فرنساوي هما اتنين ... الأول الدكتور أبو حلاوة لأنه قرفان مني من مدة في موضوع المقاطعة إرجع لرده عليّ (ما هاقدر أجاريك في لغة السمكرة بتاعتك دي) اللي كدت على إثرها أن أنسحب من المحاورات إثر حادث أليم -_-

تعرف فكرني بفؤاد المهندس لما كان في حارة بعضشي ... وشم ريحة البرميل بتاع عم لالووو بتاع الطرشي .. (فاكره ) :o

الثاني اللي اتكلم فرنش ... هو الإسكندراني .. لأن عقبال أملتك .. هايخد الباسبور الفرنساوي قريباً ... ومتزوج فرنسية ... وبياكل مانجة فرنساوي، وبيتحمى حمام فرنساوي وبيركب فيل فرنساوي ... mfb:

أما الباقي ... خضر ... أفندي ، وماسك منشة .. وطربوش أنيق، وجريدة الوقائع المصرية لأنه محب للأصالة ومتحسر على أيامها ..

الأفوكاتو وأستاذ عادل والاستهلالة .. والباقين زي ما انت عارفهم .. كل واحد بثوبه ومظهره اللي اتخيلناه

المعلم معلم وابن البلد ابن بلد ...

وسكوب ... دون كاميلو .. كان بيتكلم طلياني على عربي .. وده بقى له تركيز شوية هو وس.س في الحلقة القادمة ...

بس إديني فرصة أقعد مع ملهمي الريس ستاموني على قهوة المخمخة (قصدي الإبداع) أصل الصنف الملهم شاحح شوية اليومين دول .. B)

[الأفوكاتو]

أصل الصنف الملهم شاحح شوية اليومين دول

..

اللى ما يفهمش, يفتكره " عدس"

[الاسكندرنى]

إيه الحلاوة دي يا تابلي ؟

بس ليه مطلعني أنا بلطجي وكلكو طالعين بتتكلموا فرنساوي وكإنكم من سلالة " لويس سانك " ؟

D

الثاني اللي اتكلم فرنش ... هو الإسكندراني .. لأن عقبال أملتك .. هايخد الباسبور الفرنساوي قريباً ... ومتزوج فرنسية ... وبياكل مانجة فرنساوي، وبيتحمى حمام فرنساوي وبيركب فيل فرنساوي ... :D

خير اللهم اجعله خير هو نظام حسد ولا ايه والله انا مش فاهم حاجه اشرح مع التعليل :wub:

اولا ايه المانجه الفرنسوى ديه اصلى مشفتهاش قبل كده ولا حتى فى مصر

حمام فرنسوى يعنى ايه

بيركب فيل فرنسوى ده انا فهمها ( العلبه ده جواها ايه) :P بيجو 706

أصل الصنف الملهم شاحح شوية اليومين دول

..

اللى ما يفهمش, يفتكره " عدس"

ما هو عدس يا ابيه افوكاتو امال انت فكره ايه :P

[MZohairy]

حلاوه......................................

انت مطلعني في دور فريد شوقي في بدايه و نهايه؟

يا خسارة الفن و السميعه

الفن رخص يا جدعاااان

ارجوك غيرلي الدور و خليني عبدالحليم حافظ و هو قاعد مع مريم فخر الدين على البحر و بيغنيلها بتلوموني ليه

[الرافعي]

حلاوه......................................

انت مطلعني في دور فريد شوقي في بدايه و نهايه؟

يا خسارة الفن و السميعه

الفن رخص يا جدعاااان

ارجوك غيرلي الدور و خليني عبدالحليم حافظ و هو قاعد مع مريم فخر الدين على البحر و بيغنيلها بتلوموني ليه

عم زهيري .. أو حسن أبو الروس

طب أيهما أخف دماً ... أبو الروس ... ولا عبد الحليم المسبلاتي ؟؟

[waves]

اهلا بالاعضاء هنا :P

هوه انا تهت فى المنتدى ولا إيه ؟؟؟؟؟؟ :P

اصلهم بعتونى هنا علشان انا مستجدة فى المنتدى فقلوللى اللى هناك انى آجى هنا ..فجيت هنا ومالقتش اللى كانوا هناك ولا حتى حفلات ولا حاجة للمستجدين :wub:

على العموم انا عضوة جديدة مستجدة وماعرفش لسه شوارع المنتدى ولسه بتوه فيها :wub:

طب مافيش حاجة ساقعة على الاقل وامشى على طول ؟؟؟ :P

تم تعديل 26 مارس 2006 بواسطة waves

[وليد صفوت]

بتقولك حاجة ساقعة يا س س و تمشى على طول !! :wub: :wub:

ايه يا س س هتطفش الزباين مننا و لا ايه ؟

ده احنا ماصدقنا لقينا مستجدين :P ...... قصدى ده لينا الشرف يعنى و لو ان المنتدى مليان على آخره اعضاء :P

واحد بيسبى من الثلاجة طازة اهو عشان خاطرك يا فندم :

الف مرحب بيكى :P

[الاسكندرنى]

احمدى ربك يابنتى ده انا مشفتهاش من يوم مادخلت

فى بدايه الحفله جاه سين سين بيبعلى السندوتش بجوز لحليح وانتى ايه ياستى جايلك على البحرى و مجانا الله يسهل لعبيده (وش واحد حسود )

اه نسيت انتى اللى جايه بالكارت طيب طيب

تم تعديل 27 مارس 2006 بواسطة الاسكندرنى

[waves]

اشكرك يا Violinking على الساقع ربنا يخليك ويجعله عامر كدة على طول :wub:

وبلاش الحسد يا اسكندرانى مانت هنا من زمان ماطلبتش ليه وكانوا جابولك الساقع والسخن والسندويتشات :P

وصحيح خليك فاكر انا اللى جاية بكارت التوصيه :wub:

ياناس كفاية أر لحسن حزوَر وانا بشرب الساقع اللى جاى من تلاجة المنتدى :P

تم تعديل 27 مارس 2006 بواسطة waves

[على عينه]

بعد اذن السادة

لى مكان فى الحفلة ولا لا اخدها من قصيرة وامشى عايز مكان قريب من من المسرح علشان العتب على النظر وبعدين عايز حقى فى الجاتوة والحاجة الساقعة لو سمحتوا....

احيى الاستاذة الافاضل

الاخ الكبير الافوكاتو وربنا يديله الصحة والعافية وتحياتى الى الاخ الفاضل عادل ابو زيد واخونا العزيز سى السيد على هذا الحفل وهو حفل تعارف بين الاخوة الاعضاء ويارب يجعله عامر على طول....

[الاسكندرنى]

شفت يا عم الفنان اهو خاليت الناس دخلين علينا بالطمع

من قالك تفتح التلاجه و توزع براحتك منها والله لحروح اقول لاستاذ عادل انت عملت ايه و التبزير ده :unsure:

على عينى يا على عينه طلبتك اوامر حتشرب و تاكل و كل حاجه بس والله العظيم لو طلعت عضو كده ولا كده من اللى مش بيشركوا و يتكلموا والله العظيم لخليك تدفع حساب اللى اكلته و شربته ماشى ولا مش ماشى

[mickey_egp73]

السلام عليكم و رحمة الله و بركاته

انا عضو جديد في محاورات المصريين

بس بصراحة مش عارف ابداء بايه و منين...

بس

حاولت اوضح حالة الموقف اللاموقف دي و شكرا..