عن الأغاني... من تاني

[احمد هادي]

كان موضوع يللا نغني من أوائل الموضوعات اللي جذبتني لمتابعة المحاورات

وفضلت أتابعه لشهور طويله ومن خلال المتابعه لاحظت مدي التنوع في اذواق المتحاورين اللي ناتج عن إختلاف خلفياتهم وخبراتهم

حبيت أتكلم عن الاغاني تاني ... بس بشكل مختلف

احيانا أغنية معينه ترتبط معاك بزمان أو مكان او شخص أو حدث

ويتحول الإرتباط ده الي ارتباط شرطي بلغة علم النفس

يعني أول ما تسمع الاغنيه .....علي طول تفتكر الشي اللي ارتبطت بيه جواك سواء كان حلو أو وحش ...مبهج أو مؤلم

مثلا

يحيكيلي احد من عاشوا الحرب في لبنان أن صوت ورده يذكره بأيام سوداء ......ليه يا سيدي ؟ يقولي ان سائقي الحافلات التي كانت تقلهم من بيروت الي عمان هربا من اشتداد القصف كانت دائما مشغله ورده بينما القذائف المجنونة تنهمر من كل حدب وصوب لتضيء ظلام الليل الحالك من حولهم ::

هذه القصه جعلتني انا الآخر اتذكر اغاني وجعاني

خدو عندكو

انا بكره جدا اغنيه عبد الحليم ( الناجح يرفع ايده )-مع اقتناعي انها جميله جدا ومعبره - وبمجرد ما سمعها تجيلي حاله أشبه بالأرتكاريا والنكد الشديد عارفين ليه ؟ لأنها بتفكرني بخيبتي القويه في الثانويه العامة mfb:

كمان بكره لولاكي -فاكرينها ؟ لأنها بتفكرني بمجموعات التقويه اللي كنت باخدها غصب عني في الصيف استعدادا للإعداديه mfb:

بحب مقادير طلال مداح لانها بتفكرني بطفولتي البائسه في السعوديه :P

اما المريله كحلي لمنير فبتفكرني بأيام ثانوي والمراهقه ومدرسة البنات اللي كانت جنب مدرستنا :) :P

أغنيه مواعداني لمحمد فؤاد بتفكرني بامتحان الثانويه العامة لأنها كانت بتشتغل كل يوم - معرفش منين- بره اللجنه بصوت عالي جدا

بحب يا مسهرني لان واحدصاحبي وحبيبي قوي كنت باسهر اذاكر معاه قعد 3 سنين يفتتح بيها السهره وكمان شريط عدويه 91 اللي ارتبط معايا بنفس المرحله

بحب شريط سمراء النيل لماجده الرومي اللي مسمعتش غيره في رحله الاقصر واسوان

كمان اغنية منير انتي فرح اللي عاش .....قعدت 4 أيام علي البحر في العجمي من الصبح للمغرب ما اسمعش غيرها خصوصا جمله ( هنعيش الفرح تاني وهروقلك زماني ونعيش نفس الحنان - ليله ورا الف والف ليله ونغير في الزمان ) B)

اغنيه منير بتبعديني عن حياتك بالملل بتفكرني بامتحان الماجستير اللي سقطت فيه لاني لما سمعت جمله (وخليتيني أقول خلاص مفيش أمل ) طالعه من كافتيريا الكليه حسيت أنه فعلا ما فيش أمل وسيت الورقه وروحت وما عرفتش آخد الماجستير لحد دلوقتي .. :P

اغنيه ساح يابداح بتفكرني بالجيش وليالي الخدمه الطويله في نفق الشهد احمد حمدي خصوصا جمله ( صبح وزي الصبح التاني ...ليل ملضوم في الليل التاني ...وانا مش رايح انا مش جاي ...انا مش واقف حتي مكاني ...ايه اللي اتغير فص اللولي ولا المرمر طول العمر العسكر عسكر بس الناس.. الناس كت ناس وكان الحلم في قلبي براح ) : :lol:

اما اغنيه خد قلبي معاه لعمرو دياب فبتفكرني بذكري ضياع مرتبي لاني كنت بسمعها لما المرتب ضاع -ومن محاسن الصدف-أن الشخص اللي جه ينقذني بعد ما اتصلت بيه كان هو كمان مشغلها في عربيته :P

أغنية محمد فؤاد ( يا هلتري الايام هتعود وتشوف عيوني عيونه السود ) بتفكرني بأول ايام الغربه والبعد عن الاهل في مصر :D

وغيرهم كتيييييييييييير

حد هنا بيفتكر ايامه بالاغاني زي حالاتي ولا انا حاله خاصة ولا ايه ؟

تحياتي

[مصرية الهوى]

لا يا أحمد مش انت لوحدك بس :D ...

أغنية كاظم الساهر " كلك على بعضك حلو " وأغنية عمرو دياب " حبيبي يانور العين "

بتفكرني بذكريات الحب الاول والايام الجميلة mfb:

أغنية نانسي عجرم " آه ونص " واغنية عمرو دياب " ليلي نهاري"

بتفكرني بصيف 2004 والبحر والشاليه في الخبر ..

اغنية عبد المجيد عبد الله " رهيب" بتفكرني بخالي اللي بقالي 10 سنين مشفتوش :lol:

اغاني عبد الحليم "زي الهوى" و " اهواك " و" سواح "

بتفكرني ببيت تيته القديم .. لما نطلع فوق السطوح بالليل ..

اغنية مصطفى قمر " منايا "

بتفكرني بالشارع اللي كانت ساكنة فيه صاحبتي مصرية قبل ما تسافر مصر :P

اغنية فيروز " حبيتك بالصيف "

بتفكرني بماما :P

اغنية اصالة " تصور " واغنية يوري مرقدي " عربي انا "

بتفكرني بتانية كلية وخصوصا ايام الاكتئاب والامتحانات mfb:

احيانا فيه اغاني كل ما اسمعها بحس بحنين فظييييييييييع لايام جميلة حلوة ..

زي مثلا " بينا نعيش " لعامر منيب ...

اغاني اليسا " أحلى دنيا " و " جوايا ليك "

اغنية ملحم زين " عندك بحرية"

:P

[مـي]

بسم الله الرحمن الرحيم

فعلا يا أحمد

أغاني جميلة

و

زكريات أجمل

أنا برضة في أغاني أول ما بسمعها في التلفزيون بفتكر على طول شخص معين

زي ..............

أغنية ( كل مرة ل تامر حسني ) بتفكرني بالأجازة اللي فاتت وكمان لولو بنت خالي mfb:

و

أغنية ( سو يا سو ل محمد منير ) بتفكرني بخالو :D

و

كل أغاني فيروز بتفكرني ب ابن عمي :lol:

و

شريط محمد فؤاد ( حيران ) بيفكرني بخالتو دوحة mfb: اللي وحشتني موووووووووووت

و

أغنية (نانسي عجرم أنا مصري ) :P و

( هيثم شاكر ارمي حمولك عليا ) :P

بتفكرني طبعا ب(مصــــــــــــــــــر) أم الدنيا اللي عمري ما نسيتها

ميـــــــــــــــــــــــوي :P

[haivi]

أغنية عبد الحليم حافظ (مشيت على الأشواك وجيت لأحبابك ..لا عرفوا إيه وداك ولا عرفوا إيه جابك <بتفكرني بأيام المراهقه وحبي الأول لما كنا نتخاصم وأشغلها من تحت بلكونتها بعد نص الليل وأنا واقف مع أصحابي

********************************************************************************

***

شجر اللمون دبلان على أرضه لمحمد منير بتفكرني بالثانوي

وحمل مسطرة (T) قبل الآوان آل يعني الواد هيجذب الحلوات بالمسطره

********************************************************************************

***

على شط النسيان وأبعد منه كمان حفتكرك يا حبيبي (مش فاكر مين فيهن اللي كانت بتغنيها )

بتفكرني بأعز وأخلص حبيبه عراقيه فرقنا الزمان لما رجعت مصر وأقرأ أخبارها بالصدفه في الجرائد (أصلها كانت فريده فهمي بتاعة العراق ) رئيسة الفرقه العراقيه للفنون الشعبيه , الله يمسيها بالخير إن كانت عايشه .

********************************************************************************

***

فريد الأطرش بكل أغانيه بيفكرني بالرسم وزخرفة جدران المساجد كحصص العملي في الثانوي إحتمال لإنها كانت في فترة وفاته وبعد فيلمه نغم في حياتي وكان بيتسمع في كل حته

********************************************************************************

***

والعجيب واللي محيرني لغاية النهارده إن مجرد نطق إسم محمد الحلو بيفكرني بالمرحوم والدي مع إن أبويا توفي 79 وعمره ما كان سمع محمد الحلو , لكن إحساسي إني سمعت منه يمكن أغنيه زمان متوجهه للأب ؟ إحتمال كبير

********************************************************************************

***

ومفيش شك إن فايزه أحمد غنت مغنتش مجرد زكر إسمها بتنزل دموعي من وحشتي لأمي

والسبب أغنية ست الحبايب

ربنا يقرب البعيد ويجمع الحبايب

********************************************************************************

**

ده اللي حاضر في ذهني دلوقتي وأدي الميكروفون للي بعدي يواسينا ويشاركنا فرحنا وحزننا .

ممنون

[MZohairy]

أغنية كتاب حياتي يا عين لحسن الأسمر

بتفكرني لما البوليس بتاع جامعة القاهره حبسونا في عربيات الأمن المركزي لمدة يوم كامل في الشمس عقابا على مظاهرات الطلبه

وكان فيه واحد بيبيع ساندوتشات واقف جنب الجامعه بيبيع و مشغل شريط حسن الأسمر

و قعدنا نسمع الأغنيه واحنا حوالي 200 واحد محبوس في مكان ميستوعبش اكتر من 30 انسان بالعافيه

ايام جميله و ذكريات سعيده :wub:

الله يجازيك ياحمد

[عصفور طاير]

يا شلام عليكو يا ولاد.. فكرتوني بالجي مضى.. أيام ما كنت في مدرسة التجارة العليا في جامعة فؤاد الأول، وكنت باحب جارتنا في العباسية، جولفدان بنت حشمت باشا البندقدار.. وكنا متواعدين إننا نحضر سوا حفلة سي محمد أفندي عبد الوهاب على مرسح النابوليتانا في روض الفرج.. مش حاطول عليكو، لكن بينما كنا قاعدين وسي محمد منجلي ع الآخر وهو بيغني "عندما يأتي المساء"، سمعنا صرخة مدوية في البنوار اللي جنبنا، وإذا بسي عبدالوهاب يتوقف عن الغنا ونور المرسح يقيد والناس في هرج ومرج.. إيه اللي حصل يا جماعة؟ فيه إيه يا أفندية؟ قال إيه فادية هانم بنت لاظ أوغلو باشا تفكشي السرايا شافت فار في البنوار بتاعها.. طبعا الدنيا اتقلبت ودخلوا عساكر الدرك في قلب المرسح وسي عبده أخد على خاطره ولبس طربوشه ومشي وباظت الليلة.. ومن يومها وانا كل ما أسمع سي مصطفى قمر وهوه بيغني "ولا ولا يابو خد جميل" أفتكر الليلة دي على طول -_-

منه لله إللي كان السبب :wub:

تم تعديل 31 مارس 2006 بواسطة عصفور طاير

[احمد هادي]

و قعدنا نسمع الأغنيه واحنا حوالي 200 واحد محبوس في مكان ميستوعبش اكتر من 30 انسان بالعافيه

ايام جميله و ذكريات سعيده -_-

واضح يا زهيري انك مناضل قديم :wub:

وان البوكس بتاع الامن المركزي واحشك قوي وبتحن ليه :P

ألا بالمناسبة ....

انت نازل مصر امته ؟؟؟؟ :) :D :D

[سامح أبوبكر]

كالعادة يابوحميد

أطروحة رائعة

فدائما ما ترتبط الأغاني بذكريات في أذهاننا بذكريات مختلفة

خاصة الجلسات اللذيذة مع الأصدقاء في الأيام الحلوة

لن انسى شتاء 1996

فى اسوان

مع صديق عزيز جدا على قلبي

كنا نسمع اغنية لهشام عباس

قلبك خدنى لبحر حنانه واتمنيت مايرجعنيش

الأغنية ظلت بعد ذلك ذكري خالدة لنا لا ننساها

والله واحشني جدا

الله يسامح الغربة

[Sherief AbdelWahab]

أنا شخصياً عندي موضوع غريب جداً..

بافتكر الأماكن بأغاني سمعتها بعدها بفترة..أو ما سمعتهاش فيها..

مثلاً..

شارع المحطة في بورسعيد بيفكرني بأغنية عمرو دياب "وهي عاملة إيه دلوقت"..رغم اني ما سمعتهاش هناك..

زيارتي الأخيرة لبورسعيد في رمضان قبل الفطار فكرتني بأغنية من شريط عمرو الجديد "مستني إيه" تقريباً.. الشريط نزل بعد رمضان بشهرين اتنين!

ومش فاكر إن كنت سمعت أغنية الفنان الكبير الهارب من التجنيد تامر حسني "يا نووووووووووووور عيييييييينيييي" في رأس البر السنة اللي فاتت ، لكن المكان اللي كنت فيه هناك بيفكرني بيييييه..

خلص الكلام

[احمد هادي]

لا يا أحمد مش انت لوحدك بس :blink: ...

أغنية كاظم الساهر " كلك على بعضك حلو " وأغنية عمرو دياب " حبيبي يانور العين "

بتفكرني بذكريات الحب الاول والايام الجميلة -_-

ولامؤاخذه في السؤال يا جيجي

هم عندكو في الجصيم رأيهم ايه في الحب ؟

أحسن أنا من يوم ما سبتها من 23 سنه

وهم كانوا بيقولو السهر حرام

والتليفزيون حرام

وكشف الوجه حرام

ولبس البنطلون (للرجاله طبعا مش للحريم ) حرام - أكيد بالنسبه للحريم ممكن يطير فيها رقاب

وطبعا ...وحتما ولابد من كل بد يكون الحب حرام

يا تري ربع قرن غير تفكير الناس ؟؟

ولا لسه ؟

علي كل حال ........

ابقي خللي بالك من نفسك

تحياتي

تم تعديل 2 أبريل 2006 بواسطة احمد هادي

[nancy]

انا اغنية على شط النسيان وابعد منة كمان بتفكرنى بثانوى وكنت رسمت ولد وبنت مشين على البحر على لوحة 50×70 بالصاص والتظليل وعلقتها فى اوضتى وكتبت الجملة دى فى اسفل الرسم

وولد وبنت كل الجنينة ولد وبنت ومتفتكرش يا بنات ان الجواز راحة كل دة من ايام ثانوى

الجامعة كلها محمد منير فنون جميلة والقاعدة فى الشمس على عربيات الدكاترا واغانى محمد منير شجر اللمون دبلان على ارضة

ومحاضرات الرسم والواحد بيسمع الاغانى وهو بيشتغل

ولما حصلت مشاكل مع خطيبى الى هو جوزى دلوقت وكانت الدنيا شتا على البحر وانا باسمع على الحجار متغربيناش وتقولى قدر

وشريط على الحجار الى كان عملة مع عمر خيرت

واغنية وانا ويايا بعيش زى الملينورات بتفكرنى بصحبتى الانتيم فى عيد ميلادى بعد ماتخرجت ومحش فاكرة غيرها وهى سايقة عربيتها ومشغلهالى علشان تخرجنى من الاكتئب

واول ما تجوزت وجيت مسافرة وحسيب مصر سمعت اغنية واحنا فيتين على الحدود وفضلت اعيط لانى خيفة من الغربة

ولما سفرت بعد اسبوع سمعت انا مليت من الغربة لوردة وعليت الصوت لدرجة ان جوزى جة جرى من اول الشارع على صوت الكاست وانا كنت حتجنن من صمت ووحدت الغربة

بس كل ماكون زعلانة اوى افتكر اغنية ماجدة الومى ادى الى كان وادى القدر وادى المصير نودع الماضى بحلمة الكبير

واغنية فيلم ليلى علوى وممدوح عبد العليم (سمع هس) على ما تهل سنة 2000 حنكون فوق فوق فوق واطول واحد فيكوا حيجى تحت ركبنا كدة بشبرين

ودى كنت باسمعها كل يوم لانى كنت مسجلها اول ما اتجوزت والسبب

ان محدش كان مستبشر خير باختيارى فى الجواز وان حكاية الحب والاحلام الكبيرة دى تخريف

فكنت بفكر على ما تهل سنة 2000 حنكون فين وياترى عيلتى الى كانت شيفانى متمردة حتعترف انها كانت غلطانة ولا حاكون وديت نفسى فى دهية بجد

المهم دلوقت انا عرفت ان كان عندى بعد نظر وحققت كل الى حلمت بية

وفية كتير بس كدة حالف كتاب

[مصريه بالكويت]

الله الموضوع ده جميل قوى

فى البدايه انت اكيد نورت راس البر يا كابتن احمد هادى

وانا معايا برضه ف الاغانى حكايات

اولها طبعا اغنيه "عبد الحليم" الناجح يرفع ايده وكان ايامها المجموع مش اوك وجابلى

الشريط دا واحد قريبنا اللى اتجوزته ف الاخر الظريف انى كنت معرفش انه بيحبنى فمكنش ف بالى خالص كنت فاكره انه

جابلى الشريط علشان نجحت بس عرفت

بعدها ان ف نفس الشريط اغنية مغروووووووووووووووور

- اغانى" مياده الحناوى" سيبولى قلبى وارحلوا و الحب اللى كان و تلج ونار كل اغانيها

بتفكرنى بالثانويه العامه

- اغانى "كاظم " فى مدرسة الحب بتفكرنى ب 2 جامعه

- فيه اغنيه شبكت معايا انا وزوجى كانت لهشام عباس "بتحبنى" كانت دويتو كنا دايما نسمعها

عارفين كمان فيه موسيقة الدبكة

بتفكرنى بنفسى وانا عروسه اصل وانا طالعه ع الكوشه كان الدى جي مشغلها

- وطبعا من اهم الاغانى اللى بتفكرنى بفرحى الاغنيه القديره بتاعة الوزه والديك اللى بيحبها

-واخيرا اغنية كارول سماحه " انا قلبى ليه حاسس" مانت ف فيلم الصيف اللى فات اه اسمه

احلام عمرنا بتفكرنى بمصر الجميله اصله اخر فيلم دخلته السينما هناك