ظاهرة العنوسة

[noureldonia]

السلام عليكم ورحمة الله وبركاتة

نتيجة الظروف المعيشة الصعبة وغلاء المعيشة اصبحت مشكلة العنوسة من أهم المشكلات التي تواجة المجتمع المصري فاصبح الشاب عاجز عن التقدم لفتاة وذلك لانة لا يملك إمكانيات وتكااليف الزواج من شراء الشقة والشبكة والأثاث وبالتالي تكون النتيجة عندما يتقدم شاب لخطبة فتاة بهذا الإمكانيات يقابل بالرفض من قبل اهل الفتاة ويترتب علي ذلك غزوف الشباب عن الزواج لقلة الإمكانيات وتصبح الفتاة هي الأخري ضحية ( العنوسة ) .

أما عن مشكلة العنوسة بالنسبة للفتاة لا تنحصر فقط في رفض الأهل للشاب الذي ليس لدية امكانيات للزواج وأنما هناك اسباب أخري تؤدي إلي تلك المشكلة فهناك الكثير من الفتيات الذين ينهمكون في التفكير والتخطيط والعمل لمستقبلهم العلمي والعملي وفي النهاية تتكتشف انها وصلت إلي نهاية العقد العشرين ولم تتزوج بعد وان كل من صديقتها لديها بيتها و اسرتها ، وأيضا إذا تتدرجت في المرتية الوظفية إلي ان اصبحت لها مكانة مرموقة أو حصلت علي الشهادات العلمية العليا فقد ازدادت المشكلة بالنسبة لها صعوبة وذلك لانها لا تود الإرتباط إلا بمن في نفس مستوها العلمي و العملي وإذا قبلت أن تتزوج من هو أقل منها كان الرفض من قبل الطرف الأخر لانة لا يرد أن يفقد رجولتة أمامها لان رجولتة تتمثل في ان يكون هو الاقوي منها في كل شيء ولا يرد ان يشعر بأنة زوج المديرة أو الدكتورة وما إلي ذلك .

يطلق علي الفتاة لفظ عانس عندما تبلغ سن 35 عاماً بدون زواج وقد بلغت نسبة العنوسة في مصر 9 مليون عانس شاب وفتاة وهذا الرقم يعد رقما كبيرا ينذر بالخطر ، الأمر الذ دعا البرلمان المصري إلي تحميل الحكومة المسؤلية عن ارتفاع نسبة العنوسة وطالبتها بالتدخل السريع للحد من تلك الظاهرة ومساعدة الشباب في تكاليف الزواج وتقديم تسهيلات لهم سواء بطرح الشقق السكنية بالمجتمعات العمرانية باسعار مخفضة أو من خلال توعية الأباء بضرورة تخفيض تكاليف الزواج أو تسهيل الزواج الجماعي لان ازدياد نسبة العنوسة تهدد استقرار الامن القومي المصري .

ام عن المشاكل التي خلفتها تلك الظاهرة هو انتشار جرائم الأغتصاب في المجتمع المصري بشكل كبير، أضافة إلي المشاكل النفسية و الضغوط التي يواجهها الشباب من ذكور وإناث نتيجة الشعور بالوحدة و عدم الأستقرار و بالنسبة للإناث تكون الضغوط بشكل اكبر نتيجة انها تشعر انها حمل ثقيل علي اهلها وغير مرغوب فيها أو نظرة الناس لها وعدم قدرتها علي اشباع غريزة الأمومة ،ومن اهم الأثار السلبية التي خافتها مشكلة العنوسة وصعوبة الزواج هو انتشار الزواج العرفي الأمر الذي ادي اتساع دائرة المشكلة لتصل بينا الي قضايا اثبات النسب فهناك اكثر من 150.000 دعوة اثبات نسب من زواج عرفي او زنا مطروحة في المحاكم المصرية ، زيادة مطردة في اعداد اللقطاء الذين يعثر عليهم امام مساجد او مساكن او صناديق القمامة ، وعودة ظاهرة قتل المواليد من السفاح .

سؤالي لكم شباب وفتيات ما هي الحلول في رايكم للحد من تفاقم تلك الظاهرة ، وما هو الضرر الذي سوف يعود عليك ايتها الفتاة اذا تزوجتي بشاب لا يملك إلا القليل وبدأتم الحياة معاً خطوة بخطوة .

[Hammer]

حلول مشكلة العنوسة ... هي نفسها حلول المشكله الإقتصادية في مصر .

فلا أعرف كيف يستطيع شاب أن يفتح بيت ب 700 جنيه في هذه الأيام , و أصلاً أقل شقه إيجار جديد تتطلب 500 جنيه !!

و ليست الأهالي مسئوله طول الوقت عن المغالاه في طلباتها ... ففي كثير من الأحيان , حتي المتطلبات الأدني يصعب تحقيقها .

بس أنا عندي حل تاني ...

الستات تكبر دماغها ... و تخلينا نتجوز تاني و تاني :blush:

[احمد هادي]

الموضوع مهم وجدير بالمناقشه

ولكن

قضايا اثبات النسب فهناك اكثر من 150.000 دعوة اثبات نسب من زواج عرفي او زنا مطروحة في المحاكم المصرية ، زيادة مطردة في اعداد اللقطاء الذين يعثر عليهم امام مساجد او مساكن او صناديق القمامة ، وعودة ظاهرة قتل المواليد من السفاح .

الرجاء توثيق هذا الرقم الخطير

( المصدر - التاريخ )

ولكي جزيل الشكر

[se_ Elsyed]

الستات تكبر دماغها ... و تخلينا نتجوز تاني و تاني :blush:

أخي العزيز Hammer

تسمح لي أبوس مخك المُفتكس ...

هاتسمح لي مش كده ..

يعني بالصلاتو عالنبي مصر مليانه رجاله ملو هدومهم .. ومستعدين نخدمو البلد بعنينا .. لإن كلنا أبو أحمدات وفييسه والقرش بيجري في أيدينا .. والراجل مننا ما يعيبوش غير جيبه .. .. يبقى فيها إيه لما كل واحد يتجوز تلاتة نقول أربعة قطعية واحده ... وبعون الله خلال شهر مش هايبقى في مشكلة نوهائي .. بس كده مبارك هايمسك الموتوروليوز بتاعه ويقشقشنا ويقول لنا " الله يخرب بيوتكم .. خربتوا البلد ... أجيب لكم منين .. أنا موظف على قد حالي "

[se_ Elsyed]

بس في نفس الوقت أنا مش هاتنازل عن حقي .. وأُطالب بالحجر على نور الدنيا هانم لتعديها على بنات أفكاري وسرقة فكرة الموضوع اللي بقى لي شهر عمال أفتكس فيه ...

لكن يالله زي بعضه .. خليها تتقوى شوية وتجيب مجموع وتزود رصيدها من المواضيع عشان السحب اللي هايتم قريب واللي هاتبقى فيه جوايز وبلالين وحاجات حلوه

--------

أولاً إسمحي لي أختلف معاكي في تعريفك لسن العنوسة ..

لإن ده بيختلف من بيئة لأخرى ...

يعني الريف غير الحضر .. وحتى الحضر نفسه جواه مناطق شعبية .. وفيه مناطق أُخرى تُسمى بالراقية وهكذا

على سبيل المثال .. أنا من أصول ريفية زي كثير من المصريين ومن حين لأخر أذهب إلى الريف لأتواصل مع من تبقى من أقاربي هناك اللي مازالوا يعيشون في الريف ولم يهاجروا إلى المدينة ... وبالتالي لو البنت في الريف وصلت 25 سنة وما أتجوزتش .. دي تتحدف بالطوب على طول lol

في المدينة بقى وفي الأحياء الشعبية اللي الناس فيها متلاحمه ولازقه في بعض .. بتبقى فرصة الزواج أكثر واسرع على أساس أم فلان تعرف أم فلانة وبيقعدوا كل يوم في الفسحه مع بعض .. وفي أثناء إحدى جلسات النميمة تروح أم فلان قايلة لأم فلانه : إيه رأيك يا أم فلانه عايزين نجوز هشام لرشا واهو يبقى زيتنا في دقيقنا والواد إبنكم والبت بنتنا وهانحطها في رموش عنينا .. وهوب إتسلقت الجوازة وتلاقي رشا إتجوزت وهي عندها 18 سنة أول ما خلصت البدلون أو 21 سنة أول ما تاخد البكابوريوس .

تيجي للأحياء الراقية أو اللي بيغلب عليها طابع الإنعزال .. يعني كل جار في حاله .. تلاقي نسبة العنوسة عاليه لإن ما حدش يعرف بعض .. وفعلاً ممكن البنت تعدي التلاتين وما يكونش أهلها عندهم علاقات عائلية أو إجتماعية كافية تخليهم يستلقطوا عريس كويس لبنتهم .... وفي نفس الوقت بيبقى في تخوف من الشباب العدمان اللي عنده 25 سنة ولسه مخلص الجيش وحالته كرب واللي بيقول لنفسه : يا واد إنت مش لاقي تاكل .. والبت نورهان حلوه وبيضا .. وأنا عايز أدخل البيت من بابه .. لكن بحالتي دي لو قربت ناحيت بابهم أبوها هايروح راميني من شباكهم وأُصاب بكسر في الحوض ومانفعش بعد كده لا طبله ولا طار ... مع إن ممكن يكون أهلها ناس مهاودين وكويسين ومستعدين يريحوا الواد وما يحملهوش أكثر من طاقته . لكن المستوى الإجتماعي بتاع البنت نفسها بيخوف أي حد يتقدم إلا لو كان من مستواها وهايقدر يعيشها في حياه ليست أقل من اللي عايشاها .. والبنات اللي غالباً بيبقوا من المستوى ده بيبقوا صعب يبدأوا مع الشاب الحياة من بدايتها ويتحمل المصاعب التي تواجه كل الشباب في البداية ..

أنا عن نفسي في منتصف التسعينات كده أتعرفت على بنت سكرتيرة في فرعنا بالشركة في مصر ... وأنا هنا في السعودية وبصراحة إستلطفتها وماعرفش هي حست بيه ولا لأ .. مش مهم ... المهم كان في زميل لي دائم السفر بين فرع الشركة بالرياض والقاهرة .. المهم لقيته في مره فاتحني في الموضوع اللي أنا مدكن عليه وقالي : إيه رأيك في فلانه ؟ قلت له : ونعم الأخلاق الحميده .. قالي طب إيه رأيك في شخصيتها ؟ قلت له : ونعم السجايا القويمة .. فقالي أنا مستخسرها في أي حد غيرك ومستعد أول نزلة أكلمها عنك طالما أنت بتدور على عروسة .. وعشان يشجعني راح قايل لي : على فكرة ده والدها شاري لها شقة تمليك بإسمها .. ومعاها عربية أخر موديل كمان وبتاخد مرتب - أنا كنت عارفه لإن المرتبات بتتعمل من عندنا في الرياض - محترم وخريجة الجامعة الأمريكانية كمان يعني معاها قرشين حلوين كمان ... ولسه ما كملش روحت قايل له .. ما أعطلكش .. مش أنا يا حبيبي اللي أسكن في شقة مراتي .. وأنزل الصبح أطوق عربية مراتي بالميه والصابون .. أنا لسه في بداية حياتي ومحتاج واحده تبدأ معايا .. أي نعم عندي شقة جاهزة وتماما التمام .. إنما صعب عليه أرتبط بواحده في بيني وبينها فروق إجتماعية حتى لو بسيطة الفروق دي لصالحها طبعاً ...

يبقى الخُلاصة هي إن التباعد الإجتماعي اللي أصاب المجتمع على فترات أثر على زيادة نسبة العنوسة ...

يعني مصر زمان ماكانتش كده .. وماكانش الواحد يبقى ساكن في عمارة وما يعرفش مين جاره اللي الباب لازق في الباب .. أو ماكنتش تمسع جُملة " صباح الخير يا جاري إنت في حالك وأنا في حالي " أو " الباب اللي يجيلك منه الريح سدُه وأستريح "

[se_ Elsyed]

طبعاً إحنا قبل ما ندخل على الحلول لازم نناقش أسباب المشكلة :

ومن أهم أسباب مشكلة العنوسة هي الأسباب الإقتصادية والمتعلقة بالحالة المادية للشاب ..

فعلاً يا جماعة الشباب معذور ومطحون ... فلو إفترضنا إن الشاب من دول خلص جامعة وبعدين قضى الجيش وبقى عنده 24 سنة ... وعشان هو واد لهلوبه فلقى شغل بـ 1000 ج ...... في الشهر ؟!! - ماحدش يضرب .. أنا بأقول تعالوا نتخيل - فحتى لو مسك ورقة وقلم وقعد يمسك هو محتاج وقت قد إيه عشان يقدر يتجوز ويفتح بيت .. ففي نهاية القاعدة هايروح خالع البيجاما اللي لابسها ونازل الشارع وهو بيغني " الملاحة .. والملاحة .. وحبيبتي ملو الطُراحه " وهاياخدوه طبعاً على العباسية .. وهناك سيقضي ما تبقى من عمره

فلما نعرف إن جرام الدهب وصل دلوقت 80 ج بالضرايب والعمولة وخلافه ... يبقى الشاب عشان يجيب شبكة مُحترمه أو نقول متوسطة محتاج له 10 آلاف جنيه ...... وهو أساساً بياخد كام ؟ عليكو نور 1000 جنيه .. يبقى لازم يحرم نفسه من ملذات الحياة عشان يقعد سنة بحالها يجيب فيها شبكة بس وما يعملش فرح كمان ويمشيها عائلي .

خلصنا من الشبكة .

ندخل على الشقة ... لو قلنا تمليك يبقى كده هايرمي نفسه من فوق برج القاهرة بعد ما يقطع تذكرة من أم 10 ج ... ولو قلنا مُقدم يبقى اقل مقدم دلوقت 40 ألف لو شقة متوسطة وفي حي متوسط .. يبقى هايرمي نفسه من فوق العمارة الست أدوار بتاعتهم ... على الأقل يقع بسرعة ويموت قوام قوام ... يبقى ربنا يخلي لنا الإيجار الجديد ... طب أقل إيجار لشقة محترمة متوسطة ومعقولة كام دلوقت ؟

400 ج .... يبقى نص المرتب طار من قبل ما ياخد مفتاح الشقة ...

ماشي نقول أبو العروسة راجل لارج وقِبل إن بنته تتجوز في شقة ترانزيت إيجار جديد لمدة مُعينة ..

ندخل على العفش ..... وإوعى وشك من الكراسي الطايرة .. والحلل عابرة القارات

الحمد لله في مصر دوناً عن الدول العربية في نسبة كبيرة من أهالي البنات بيشيلوا شوية عفش مع الولد .. يعني يجيبوا أوضة سُفرة ... لوازم المطبخ .. غسالة توماتيكي توماتيكي .. أهي حاجات بتهون الشيلة والسلام ..

يعني الولد بيتكلم دلوقت في مش أقل من 30 ألف جنية عشان يشتري عفش معقول ...

ونقول مصاريف فرح وفسطان - باللبناني - وحلاق لتوضيب شعر العروسة في ليلة العمر .. وبدلة للعريس ... وشانودتشات لانشون وجبنه رومي وقزازاة بيبس لكل معزوم من المعازيم .... يعني بنتكلم في 10 بواكي على الأقل ..

يعني الواد يمين شمال هاياخد أول أتوبيس نهري ويروح يرمي نفسه من فوق البرج .. أو يستنى قد 20 سنة لحد ما يحوش القرشين دول وساعتها هايتجوز ويسكن في بيت من بيوت المُسنين ...

لكن الأمور ليست بهذا السواد الحالك ... فربنا بيمشيها وبيبارك في القليل لما الواحد يمشي في طريق الحلال ... ومافيش مانع نينة الحاجة تبيع قيراطين أرض من اللي ورثتهم في سوهاج .. أو الأب يستبدل معاشه وينفح الولا قرشين تحت بند مصروفات زواج وخلافه ...

يبقى بعد ده كله .. وعايزين البنات ما تعنسش ؟

... ياخي ..... ديهدا ...

[سقراط المصري]

الستات تكبر دماغها ... و تخلينا نتجوز تاني و تاني :blush:

انا عارف انك بتهزر

المهم هذا الحل هيحل نص المشكله وهي مشكلة الفتايات وبس

طيب والرجاله نعمل فيهم ايه نستورد لهم حريم من الصين

-_- :P :P

[noureldonia]

السلام عليكم ورحمة الله وبركاتة :

أحمد شكراً علي الملاحظة الهامة لان الرقم الذي ذكرتة بخصوص قضايا أثبات النسب 150الف قد سمعتة أكثر من مرة إضافة إلي اني قبل ان اكتب عن هذا الموضوع وقمت بالبحث للتأكد من الأرقام الخاصة بنسبة العنوسة في مصر وتحديد سن العنوسة و عدد قضايا اثبات النسب قرأت هذا الرقم .ولكن بعد تعليقك قمت بل بحث في أكثر من موقع علي هذا الرقم لقضايا اثبات النسب وجدت أنها في المعظم تتراوح ما بين 12الف إلي 14الف لا اعرف اذا كان رقم 150الف هو اخر احصاء لقضايا اثبات النسب ام لا ...... ولكن معظم نتيجة البحث كانت تتراوح بين هذين الرقمين .

أيها الطلاب انتبهوا‎! ‎

‎ %17.2 ‎من طلبة‎ ‎الجامعة تزوجوا عرفياً‎! ‎

مجهولوا النسب أخطر توابعه‎

جلسة‎ .... ‎فإتفاق .... فزواج ..... والمشكلات تأتي‎! ‎

‎ 3 ‎ملايين حالة زواج عرفي في مصر‎ ‎تبحث عن الاستقرار! 12 ألف دعوى لإثبات النسب مازالت تتداول ‏بالمحاكم ! 13 مليون‏‎ ‎شاب وفتاة في سن الزواج بعضهم يفضله عرفياً ! 9 ملايين وصلوا إلى سن 35 سنة ‏ولم‎ ‎يلتحقوا بقطار الزواج حتى الآن! من وقت ليس بكثير فتحت قضية هند الحناوي وأحمد‎ ‎الفيشاوى باب ‏الجدل على مصراعيه في شأن الزواج العرفي! وإذا كانت الأرقام تشير إلى‎ ‎وجود 3 ملايين حالة زواج عرفي ‏في مصر فإن من نتائجها الخطيرة وجود 12 ألف دعوى‏‎ ‎لإثبات النسب مازالت منظورة أمام المحاكم! وهذه ‏التحقيقات تفتح ملف الزواج العرفي‎ ‎في مصر من باب "مجهولي النسب" خاصة أن هناك 13 مليون شاب ‏وفتاة في سن الزواج ولا‎ ‎يملكون الاقتراب منه، الأمر الذي يفتح سبلاً غير قانونية للتحايل على الشرع بعد أن‎ ‎تبين وجود 9 ملايين شاب وفتاة وصلوا إلى سن الـ35 ولم يلتحقوا بقطار الزواج مما‏‎ ‎دفعهم للحاق به عرفياً!! ‏

من موقع الأخبار السارة

www.akhbarsarra.com

أم بالنسبة للأخ سي السيد اللي فعلاً اسعدني بمداخلتوا -_- ، فا تعرفي لسن العنوسة ليس تعريف شخصي وإنما تعريف الجهاز المركزي للتعبئة و الأحصاء واكيد اساس احصائهم قائم علي متوسط اعمار الواصلين إلي سن العنوسة سواء كان في الريف او الحضر يعني علي مستوي مصر .

[سهيلة]

اقتباس(Hammer @ Apr 1 2006, 12:56 PM)

الستات تكبر دماغها ... و تخلينا نتجوز تاني و تاني

عزيزى hummer

هل تصدق ان فكرتك دى فعلا بتتنفذ ف مصر هنا وتم فعلا انشا ء جمعية تحت شعار

زوجة واحدة لاتكفى

انا استعجبت جدا لما قريت المقال دة

جمعية زواج العوانس

و تحاورنا مع الكاتبة الصحفية هيام دربك رئيس مجلس إدارة وكالة عرب برس للصحافة و النشر.. و هى السيدة التى تبنت

فكرة إنشاء جمعية لزواج الفتيات العانسات اللاتى سبقهن القطار..

بدأت الكاتبة هيام كلامها قائلة:

انها فكرت فى إنشاء هذه الجمعية نظرا لتزايد أعداد العوانس بشكل مخيف..حيث أن الدراسات و التقارير كانت سيئة و

الصورة قاتمة.. لذا فكرت فى إنشاء هذه الجمعيةو تقدمت بطلب لإشهار هذه الجمعية و أنتظر قرارا بالموافقة..

تحت شعار "زوجة واحدة لا تكفى".

.تواصل الكاتبة هيام كلامها قائلة:"إن الهدف من الجمعية هو تزويج السيدات و الشباب ممن فاتهم قطار الزواج.

.الغريب أن بعض السيدات إنتقدننى بحجة أننى أدعو لزواج الرجل بأكثر من سيدة.

.لكن الهدف الأسمى من وجهة نظرى هو

محاربة الفساد و الإنحرافات الأخلاقية تحت مسميات كثيرة مثل الشعور بالوحدة او الفراغ أو الخيانة الزوجية أو إشباع الرغبات.

.و محاربة الزواج السرى

.. فأيهما أفضل للزوجة ؟؟؟؟

أن يتزوج زوجها بغيرها بعلمها أم أن يخونها و يهمل واجباتها..

أيضا أود أن أحارب هجرة الشباب للخارج للزواج من أجنبيات للحصول على جنسية أجنبية أو لرخص تكاليف الزواج.

فالدراسات الإجتماعية المصرية أكدت أن ثلث عدد الفتيات فى الدول العربية بلغن سن الثلاثين دون زواج..

كما أن العنوسة أوجدت مشكلة مكاتب الزواج و الكثير من هذه المكاتب يكون ستارا لجرائم أخلاقية باسم البحث عن زوج أو

زوجة و نظرا لخطورة هذه الظاهرة فقد نظمت وزارتا الثقافة و الإعلام و المجلس القومى للمرأة بمصر حملة لمواجهة

تأخر سن الزواج تحت شعار "تأخر الزواج ليس نهاية العالم".

نقلا عن جريدة الأسرار

انا بصراحة مش مصدقة ازاى ممكن ست ف مصر تقول لجوزها انا موافقة يا حبيبى انك تتجوز علية

عشان خاطر الوطن وحل مشكلة العنوسة

[Hammer]

انا بصراحة مش مصدقة ازاى ممكن ست ف مصر تقول لجوزها انا موافقة يا حبيبى انك تتجوز علية

عشان خاطر الوطن وحل مشكلة العنوسة

يعني إحنا يا سهيله نضحي بأرواحنا من أجل الوطن ... و نستخسر حتة جوز لا راح و لا جه ؟؟!! :blink:

الوطن يا عزيزتي علي قمه الأولويات

بس ممكن يعني لو فيها سئالة , أعرف عنوان الجمعية دي علشان أقدم للمدام فيها -_-

[noureldonia]

يعني بصراحة مش عارفة اقول اية علي اصحاب هذا الفكرة الجبارة حل مشكلة العنوسة عندهم بتمثل في أن الراجل يتجوز اكتر من واحدة المشكلة مش قلة رجالة ما هو قدام كل ست عانس راجل عانس بردة ، المشكلة قلة امكانيات وظروف معيشية ، لنفرد ان الكلام دة مظبوط والحل هو ان الراجل يتجوز اكتر من واحدة طيب هيصرف عليهم منين والا الجمعية هتتكفل بمصريفة هو والاربعة . انا بجد بتخنق من اصحاب هذة النوعية من الجمعيات وافكارهم الغريبة ، يعني بدل ميعملوا جمعيات تساعد الشباب في عمل مشاريع يكون لهم دخل منها يسعدهم علي تجهيز تكاليف الزواج لا هيسعدهم علي انو كل راجل يتجوز اكتر من واحدة علشان تتحل المشكلة . -_-

[زيزو]

وعد الحر دين يا نور الدنيا، ووالله الموضوع جميل، وكالعادة الرد بتاعي متأخر. انا فعلاُ اسف بس الموضوع كبير قوي والرد عليه مش سهل والأخوة قالوا كلام كتير كله صحيح (ما عدا تعدد الزوجات ده)

تسمحي لي أبدأ بموضوع تعدد الزوجات كحل علشان ده ممكن الواحد يخلص منه قوام قوام؟

يعني بصراحة مش عارفة اقول اية علي اصحاب هذا الفكرة الجبارة حل مشكلة العنوسة عندهم بتمثل في أن الراجل يتجوز اكتر من واحدة المشكلة مش قلة رجالة ما هو قدام كل ست عانس راجل عانس بردة ، المشكلة قلة امكانيات وظروف معيشية ،:

لسه فيه موضوع جديد مفتوح عن تعدد الزوجات وانا رديت عليه رد سريع كده على الماشي ويبدوا إن فيه كتير بيقترحوا الإقتراح العبقري ده. لو فاضية ممكن تبصي على الموضوع ده القديم قوي بس كان من أيام مسلسل الحاج متولي: (تعدد الزوجات) وبرده حتيت لينك ليه في ردي على موضوع الأخ وائل. الحقيقة يبدوا إن التعدد ده في نظر البعض حل سحري.

نعمل سيناريو سريع كده للحل السحري ده؟

نقول مثلاً أغنى 5% من الرجال حيتجوزوا 4، يعني 20% من الستات

الـ10% اللي وراهم يتجوزوا 3، يعني 30% كمان يوصلونا لـ50% على أغنى 15% من الرجالة.

و20% كمان يتجوزوا 2 (40%). يعني 35% من الرجالة معاهم 90% من البنات.

وعندنا بقى 65% من الرجالة يدورولهم على واحدة من العشرة في الماية الفاضلين. يعني 55% من الرجالة يقعدوا يتفرجوا على أصحاب الحرملك اللي فيه زوجتين أوتلاتة أو أربعة وهما مش لاقيين. فيه ثلاثة حلول بقى قدامهم:

1-يتعرف على واحدة من اللي متجوزين ويقيم معاها علاقة غير شرعية

2-زيادة الإغتصاب

3-إستيراد بنات من الخارج (الصين، روسيا، إسرائيل)

4-الرجالة بقى حيتصاحبوا على بعض زي ما بيحصل في الأماكن اللي مافهاش ستات وتزيد نسبة الشذوذ.

حل هايل وفعلاً عبقري... وسأكتفي بهذا القدر.

نرجع بقى للموضوع الأصلي:

السلام عليكم ورحمة الله وبركاتة

نتيجة الظروف المعيشة الصعبة وغلاء المعيشة اصبحت مشكلة العنوسة من أهم المشكلات التي تواجة المجتمع المصري فاصبح الشاب عاجز عن التقدم لفتاة وذلك لانة لا يملك إمكانيات وتكااليف الزواج من شراء الشقة والشبكة والأثاث وبالتالي تكون النتيجة عندما يتقدم شاب لخطبة فتاة بهذا الإمكانيات يقابل بالرفض من قبل اهل الفتاة ويترتب علي ذلك غزوف الشباب عن الزواج لقلة الإمكانيات وتصبح الفتاة هي الأخري ضحية ( العنوسة ) .

طيب بصي يا نور، انا بقعد أحسبها كتير قوي، وبوصل كل مرة عند رقم ظريف كدة بالنسبة لتكاليف الجواز. يعني لو شقة صغيرة في مدينة جديدة (التجمع الخامس) أو منطقة نظيفة في 6 أكتوبر مثلاً، حتلاقي المتر بـ1100 جنية، وطبعًا لو قلنا 120 متر كدة حتبقى صغيرة وممكن البنت ماتقبلش أصلاً حنبقى عند 132 الف... وبعدين المناطق الجديدة محتاجة عربية، وبعدين فيه مهر وشبكة، وبعد كدة تكاليف فرح وشهر عسل، وبعدين تجهيز الشقة... المهم لو قلنا ربع مليون يبقى يدوبك...

وطبعًا المبلغ ده مش معايا ولا أهلي يقدروا عليه. طبعًا المبلغ المطلوب بيختلف من طبقة لآخرى بس في كل الأحوال الطلبات مبالغ فيها. الأخ هامر بيتكلم عن مرتب 700 جنيه ويفتح بيت إزاي بالمبلغ ده:

حلول مشكلة العنوسة ... هي نفسها حلول المشكله الإقتصادية في مصر .

فلا أعرف كيف يستطيع شاب أن يفتح بيت ب 700 جنيه في هذه الأيام , و أصلاً أقل شقه إيجار جديد تتطلب 500 جنيه !!

و ليست الأهالي مسئوله طول الوقت عن المغالاه في طلباتها ... ففي كثير من الأحيان , حتي المتطلبات الأدني يصعب تحقيقها .

تعليقي: وحياتك وبأضعاف هذا المبلغ حيكون لسه المشوار طويل.

بس الموضوع برده نسبي يعني مش حنقارن تكاليف الزواج في الأحياء الشعبية وفي الأحياء الراقية والدنيا بتبقى مختلفة تمامًا. يعني فيه فئات من الشعب مقبول عندها الزواج في حجرة في منزل الأهل مثلاً. والوضع مختلف إختلاف كلي في الطبقات الراقية.

أما عن مشكلة العنوسة بالنسبة للفتاة لا تنحصر فقط في رفض الأهل للشاب الذي ليس لدية امكانيات للزواج وأنما هناك اسباب أخري تؤدي إلي تلك المشكلة فهناك الكثير من الفتيات الذين ينهمكون في التفكير والتخطيط والعمل لمستقبلهم العلمي والعملي وفي النهاية تتكتشف انها وصلت إلي نهاية العقد العشرين ولم تتزوج بعد وان كل من صديقتها لديها بيتها و اسرتها ، وأيضا إذا تتدرجت في المرتية الوظفية إلي ان اصبحت لها مكانة مرموقة أو حصلت علي الشهادات العلمية العليا فقد ازدادت المشكلة بالنسبة لها صعوبة وذلك لانها لا تود الإرتباط إلا بمن في نفس مستوها العلمي و العملي وإذا قبلت أن تتزوج من هو أقل منها كان الرفض من قبل الطرف الأخر لانة لا يرد أن يفقد رجولتة أمامها لان رجولتة تتمثل في ان يكون هو الاقوي منها في كل شيء ولا يرد ان يشعر بأنة زوج المديرة أو الدكتورة وما إلي ذلك .

طبعًا الكلام ده مضبوط، بس برده النجاح له أوجه كثيرة، ودائمًا أقول أن نجاح شخص آخر لا يقلل من نجاحنا أو يجعلنا فاشلين. قد تكوني أنت إتجهتي للمجال العلمي وحصلت على شهادة دكتوراه بينما انا إتجهت للحياة العملية وأصبحت مدير. فأنتي أعلى مني في الدرجة العلمية وانا أعلى منك في الدرجة الوظيفية. أو ممكن أفتح شركة وتنجح الشركة. مش معنى كدة إن الدكتوراة دي "مالهاش لازمة" أو الواحد يقلل من شأنها علشان يحس بنجاحه. النجاح لما يكون من الطرفين بيبقى جميل بشرط إن كل طرف يقدر الآخر وما يتعالاش على الآخر، بالذات البنت علشان الرجالة فعلاً حساسين من الناحية دي شوية.

يطلق علي الفتاة لفظ عانس عندما تبلغ سن 35 عاماً بدون زواج وقد بلغت نسبة العنوسة في مصر 9 مليون عانس شاب وفتاة وهذا الرقم يعد رقما كبيرا ينذر بالخطر ، الأمر الذ دعا البرلمان المصري إلي تحميل الحكومة المسؤلية عن ارتفاع نسبة العنوسة وطالبتها بالتدخل السريع للحد من تلك الظاهرة ومساعدة الشباب في تكاليف الزواج وتقديم تسهيلات لهم سواء بطرح الشقق السكنية بالمجتمعات العمرانية باسعار مخفضة أو من خلال توعية الأباء بضرورة تخفيض تكاليف الزواج أو تسهيل الزواج الجماعي لان ازدياد نسبة العنوسة تهدد استقرار الامن القومي المصري .

موضوع إن الحكومة توعي دي نكته حلوة :wub:

لما الشاب يكون مستقبله كويس ومرتبه كويس بس أهله صرفوا معظم دخلهم على تعليم أولادهم ومش محاوشينله تحويشة محترمة (ربع أرنب مثلاً :o ) الدنيا والله ممكن تمشي. يعني مقدم شقة على شوية تنازلات في الجهاز (والعفش أصلاً مش بيدوم والحاجات لازم حتتغير وممكن تيجي بالراحة) مع تكبير دماغ في مواضيع الشبكة والمهر والدنيا حتمشي.

إنتي عارفة في الخارج بيبقوا جايبين إيه وعايشين إزاي؟ ممكن في حجرة واحدة وبيكونوا مبسوطين. انا عشت في الخارج وعارف ده كويس. بس إحنا عندنا هنا في مصر ما حدش عاوز يعيش في الواقع والكل بيدور على إنه يأمن نفسه والكلام ده. هو فيه آمان الا بأمر الله؟ ياما الغني بيفتقر وياما الفقير بيتغني. وكما قلت من قبل في موضوع الحياة الزوجية، هي إختيارات إحنا بنعملها وكل واحد لازم يشوف إيه اللي يهمه أكتر. والله كل واحد بيبقى مرتاح في بيت أهله أكتر، ولا مسئولية ولا مصاريف وكل طلباته مجابه ومفيش وجع دماغ. لو عاوز يبدأحياة جديدة لازم يبقى عارف إنه إستحاله يبدأ من حيث إنتهى إليه أهله ولازم يتنازل. وعلى فكرة اللي أهلهم بيجيبولهم كل حاجة كتير قوي جوازاتهم بتفشل لإنهم ما تعبوش في حاجة ومش بيعرفوا يتحملوا المسئولية. على فكرة كان لي زميلة في المدرسة كانت عايشة مع أهلها في شقة 300م في مصر الجديدة وتزوجت ممن تحب في شقة 85م، وعايشين مبسوطين والحمد لله وماندمتش أبدًا وبما إنه شاب كويس الحمد لله ربنا موفقه في عمله. النماذج دي موجودة وممكن الحياة تمشي. بس كله خايف من المسئولية وهي في الحقيقة كبيرة وصعبة. بس من يتوكل على الله يجعل له مخرجاً والحياة مافهاش حاجة مضمونة.

ام عن المشاكل التي خلفتها تلك الظاهرة هو انتشار جرائم الأغتصاب في المجتمع المصري بشكل كبير، أضافة إلي المشاكل النفسية و الضغوط التي يواجهها الشباب من ذكور وإناث نتيجة الشعور بالوحدة و عدم الأستقرار و بالنسبة للإناث تكون الضغوط بشكل اكبر نتيجة انها تشعر انها حمل ثقيل علي اهلها وغير مرغوب فيها أو نظرة الناس لها وعدم قدرتها علي اشباع غريزة الأمومة ،ومن اهم الأثار السلبية التي خافتها مشكلة العنوسة وصعوبة الزواج هو انتشار الزواج العرفي الأمر الذي ادي اتساع دائرة المشكلة لتصل بينا الي قضايا اثبات النسب فهناك اكثر من 150.000 دعوة اثبات نسب من زواج عرفي او زنا مطروحة في المحاكم المصرية ، زيادة مطردة في اعداد اللقطاء الذين يعثر عليهم امام مساجد او مساكن او صناديق القمامة ، وعودة ظاهرة قتل المواليد من السفاح .

مفتكرش إن فيه أي بنت حتكون حمل ثقيل على أهلها. بس أكيد بيكون نفسهم يشوفوها سعيدة ومتزوجة ومشفقين عليها من الوحدة :ph34r: لكن فعلاً الظواهر غير الأخلاقية لصعوبة الزواج بدأت تكثر وهناك زيادة في الإغتصاب والزنا والزواج العرفي نظرًا لأن الباب الشرعي مغلق. والشباب القادر على الزواج أصبح لا يثق في البنات نظرًا لكثرة الإنحلال فيعزف عن الزواج هو الآخر. ولذلك تلجأ الفتيات الآن للحجاب بكثرة وذلك حتى تجد العريس الذي قد ينظر الى المحجبة على أنها أكثر عفة من غير المحجبة (رغم إن الحقيقة إن مفيش أي علاقة إطلاقًا بين الحجاب والعفة ودي نقرة ودي نقرة آخرى)

سؤالي لكم شباب وفتيات ما هي الحلول في رايكم للحد من تفاقم تلك الظاهرة ، وما هو الضرر الذي سوف يعود عليك ايتها الفتاة اذا تزوجتي بشاب لا يملك إلا القليل وبدأتم الحياة معاً خطوة بخطوة .

بصي بقى الحلول في منها اللي بيد الحكومة ورجال الأعمال والإقتصاد، ودي تتمثل في أشياء كثيرة منها العمل على تقوية الإقتصاد المصري فكلما كان الإقتصاد المصري قويًا كلما قلت هذه المشاكل تلقائيًا. مواد البناء نفسها أسعارها مرتفعة، كذلك أراضي البناء غالية حتى وهي في الصحراء. الحكومة ليست جهة تهدف الى الربح وعليها أن تراجع نفسها في الأسعار التي تبيع بها الأراضي. الشقة في العادي 50% من المشكلة ولو تم بيع الشقق بسعر قريب من سعر التكلفة حتحل مشاكل كثيرة جدًا.

ثانيًا فيه دور على المجتمع. فكان هناك مقال قرأته يقول أن عدد الشقق المغلقة يفوق إحتياجات الشباب ولكنها مغلقة من أصحابها إما لكي يتزوج فيها الأبناء (ولو كانوا مازالوا أطفالاً) أو للإستثمار. والحقيقة الإيجار الجديد ساعد في فتح جزء كبير من هذه الشقق المغلقة ولكنه غالي وإختيار الشقة التمليك ما زال الإختيار الأفضل.

أما عن اللي في إيدنا إحنا وده الأهم، فبصي يا نور، والله انا شفت خارج مصر نماذج فعلاً عايشين سعداء بإمكانيتهم القليلة، ولسه بيبدأوا حياتهم، وما حدش بيدور على الأشياء بتاعة المنظرة بتاعتنا. طبعًا هما بيكونوا في الغالب متصاحبين مش متجوزين، بس ده العادي عندهم.

لو نظرنا للقرآن فيه حلول لهذه المشاكل ولكن للآسف نحن لا نتبعها، والبنت نفسها مش بس أهلها بيكونوا عاوزين بأمنوا مستقبل البنت، رغم إن الأرزاق دي بيد الله. ويقول الله تعالى: إِن يَكُونُوا فُقَرَاء يُغْنِهِمُ اللَّهُ مِن فَضْلِهِ وَاللَّهُ وَاسِعٌ عَلِيمٌ.

نيجي بقى للحاجات اللي مالهاش أي لازمة: أوضة السفرة والصالون (الحمد لله أصلاً الشقق اللي ممكن البني آدم يشتريها صغرت ومفهاش مكان للكلام ده من أساسه :wub:

مش لازم العفش كله يكون جاهز من الأول، وممكن الحاجات اللي ناقصة ومش ضرورية قوي تتجاب بعدين.

الشقة ممكن تكون صغيرة في البداية تكفي لأول فترة في الزواج وأول طفل وبعد كدة لو ربنا فتحها على الزوجين ممكن ينقلوا لشقة أكبر وعادة بعد 5 أو 6 سنوات معظم العفش اللي إتجاب بالشئ الفلاني بيبقى محتاج تجديد أو تصليح، ولو الرزق على القد يعيشوا بطفل واحد وحيكونوا سعداء برضه في شقتهم اللي على قدهم، وأساسًا لو في مدينة جديدة ممكن إشتراك في نادي والخضرة الموجودة تخلي الشقة دي مجرد محطة للنوم ليس أكثر. وده الفرق بيننا وبين الخارج فوجود المساحات الخضراء والأماكن العامة يجعل الشقة فعلاً لا تحتاج لأن تكون كبيرة، ولو الواحد حب يعزم العيلة يعزمهم برة البيت يشموا هوا نظيف على الأقل.

الفرح مش لازم يعني يتكلف تكلفة مبالغ فيها. آه يكون محترم وفي مكان يليق بالعروسين بس كله بالمعقول والأماكن النظيفة في منها بأسعار مختلفة جدًا.

شهر العسل اللي بقى أسبوعين بالكتير كدة كدة ماحدش بيهتم هوا فين ولا بيبقى داريان بعيشته :wub: المهم مكان ظريف ومريح، حسب كل واحد ظروفه إيه ومتعود على إيه. دائمًا خير الأمور الوسظ.

الشبكة والله دي هدية والمفروض تكون حسب رغبة العريس وتقديره لزوجته وقدراته.

المهر.... ربع جنية B)

بلاش دعوات المرة دي يا نور الدنيا أحسن أنا حاسس إن حيدعي عليه المرة دي :unsure:

[noureldonia]

زيزو شكراً علي المداخلة ، اسعدتني والله بس حاولت افهم الحل السحري بتاعك بس انا مش شاطرة في الحساب كل محاول افهم مفهمش :unsure: ، كمان كنت عاوزة اعرف رايك في الرجل الي بييلقي واحدة تصبر وتكافح معاه وترضي باقل شيء ولا مهر ولا شبكة ولا بيت كامل الأثاث ولما اهلها يطلوبوا علشان يأمنوا مستقبلها تعارض أهلها علشان عارفة انوا ما باليد حيلة و انوا لا يملك ........وأول ما ربنا يديله امكانيات يدور علي غيرها لانوا حاسس انوا عمرة راح في العمل و الكفاح و الرتابة وعاوز يعيش حياتة إلي راحت مع انوا لو كان شايف انوا حياتة راحت في الكفاح و التعب فا مش لوحدة هي كمان شبابها راح معاه في الصبر و الكفاح و المعانة ولم تكن عبء علية بل سند لية والنهاية هي الخسرانة . اعتقد هو دة السبب الرئيسي في انوا الأهل بيبلغوا في المهور لضمان مستقبل البنت من انوا تمر بظروف حياتية صعبة بالشكل دة اولها معاناة و ألام واخرها معانها وألام وحسرة علي العمر إلي راح بلا فائدة. و متقوليش دة حالات قليلة لانها اصبحت حالات كثيرة جداً .

[زيزو]

زيزو شكراً علي المداخلة ، اسعدتني والله بس حاولت افهم الحل السحري بتاعك بس انا مش شاطرة في الحساب كل محاول افهم مفهمش :wub:

هو فيه حل سحري يا نور وانا مش واخد بالي؟ :ph34r:

للآسف مفيش حلول سجرية، بس ممكن بعض التنازل يمشي الدنيا شوية ويحل بعض المشاكل.

، كمان كنت عاوزة اعرف رايك في الرجل الي بييلقي واحدة تصبر وتكافح معاه وترضي باقل شيء ولا مهر ولا شبكة ولا بيت كامل الأثاث ولما اهلها يطلوبوا علشان يأمنوا مستقبلها تعارض أهلها علشان عارفة انوا ما باليد حيلة و انوا لا يملك ........وأول ما ربنا يديله امكانيات يدور علي غيرها

طيب ده بني آدم مش مضبوط أصلاً... وده لو كان عنده إمكانيات من الأول أول ما كان ربنا فتحها عليه أكتر كان حيتجوز عليها برده لأي سبب.

لانوا حاسس انوا عمرة راح في العمل و الكفاح و الرتابة وعاوز يعيش حياتة إلي راحت مع انوا لو كان شايف انوا حياتة راحت في الكفاح و التعب فا مش لوحدة هي كمان شبابها راح معاه في الصبر و الكفاح و المعانة

إنتي قلبتيها رتابة ليه بس يا بنتي؟ :o هو حد إتكلم عن إنهم يخلوها حياة رتيبة مملة مقرفة مليانة معاناه؟ حد قال كدة بس؟؟؟ طيب معاكي إن النماذج دي موجودة بس هو معنى إن الإمكانيات معقولة إنهم ما يعيشوش مبسوطين؟ مش حيقدر يجيب لها وردة أو يجيب لها هدية؟ ما يقدروش يخرجوا مع بعض أو يسافروا يومين، ما يقدروش يهزروا مع بعض ولا دي كمان محتاجة إمكانيات وفلوس؟ مش لازم تكون حياة رتيبة. وبعدين انا قلت يكون شاب كويس ومستقبله كويس يعني حيكون مرتبه معقول يعني بس الإمكانيات الموجودة الآن مش كبيرة قوي. انا ما قلتش ياكلوها بدقة أو الكلام ده، انا قلت يتنازلوا شوية وبعدين لما تكونوا لسه بتبدأوا حياتكم حتعملوا إيه أصلاً بأربع أوض؟ سفرة وصالون والله ما لهمش أي لازمة وعدم وجودهم مش حيسبب أي رتابة.

شهر العسل ممكن تعملوه في شرم الشيخ وفيه عروض في منتهى الجمال، أو ممكن nile cruise ظريفة بين الأقصر وأسوان، وممكن تروحوا إسطنبول أسعارها معقولة جدًا. انا ما قلتش تحرموا نفسكم خالص من كل حاجة. وممكن المدة تكون أقل شوية علشان توفير التكاليف.

فين مهندسة الديكور بتاعتنا تقولنا إزاي الواحد ممكن يجهز شقة صغيرة بشكل عملي وتكون شيك من غير ما تتكلف كتير؟ انا عارف حنيوظلها الشغل بالمنظر ده بس ده حيفضل سر بيننا ومش حنطلعه لبره :unsure:

ولم تكن عبء علية بل سند لية والنهاية هي الخسرانة.

صدقيني والله لو هو إنسان كويس وبيحبها عمر ما ده ما حيحصل. بس للآسف الناس الكويسة قليلة، وفيه ناس ممكن يتجوزوا البنت اللي ترضى بإمكانياته علشان هي اللي رضيت بيه بس هو يرغب في غيرها اللي ما رضيتش بإمكانياته، ووقتها فعلاً مش حيقدر أي حاجة وأول ما حيكون معاه إمكانيات حيدور على واحدة تانية. يا نور لو متمسك بيكي وعاوزك لشخصك وإنتي الإنسانة اللي عاوز يرتبط بيها بغض النظر عن إنك حترضي بإمكانياته ولا لأ وقتها صدقيني عمره ما حينسى وقوفك جنبه. مش كل بني آدم زي التاني.

اعتقد هو دة السبب الرئيسي في انوا الأهل بيبلغوا في المهور لضمان مستقبل البنت من انوا تمر بظروف حياتية صعبة بالشكل دة اولها معاناة و ألام واخرها معانها وألام وحسرة علي العمر إلي راح بلا فائدة. و متقوليش دة حالات قليلة لانها اصبحت حالات كثيرة جداً .

صح يا نور هي حالات كتيرة جدًا بس فعلاً الموضوع ده يرجع للإنسان نفسه. ولو هو إنسان مش كويس برده الإمكانيات مش حتجيبلهم السعادة.

ولا إنتي إيه رأيك؟

[noureldonia]

زيزو كلامك مظبوط بس في مقولة بتقول الفلوس بتغير النفوس اعتقد انك عرفها وعارف مدي صحتها اكيد ....... هو انسان لو عندوا اصل وعارف انها صبرت معاه ميعملش كدة بس كام واحد بيطبق المفروض ؟؟؟؟؟ <_<

[عادل أبوزيد]

يجب ألا ننسى أن عرض المشكلة هنا - فى محاورات المصريين - و مناقشتها هنا أيضا إنما يتم من خلال طبقة وسطى مرتفعة ذات تطلعات ليست هى الطبيعية.

ما سبق كان إستهلالا لابد منه

الطبقة الوسطى لاتعبر عن المجتمع و تطلعاتها تتأثر كثيرا بقراءاتها و مشاهداتها و أحلامها و ليس بحقيقة الأمر.

ليت أحدكم يستعرض في ذهنه الزيجات كل الزيجات الحديثة التى سمع عنها أقول سمع عهنها و ليس بالضرورة أصدقائه أو أصدقائها ، ستستغرب لأن كثير من الزيجات عامة تتم بمعطيات أقل كثيرا من تلك التى نتفلسف هنا و نتكلم عنها.

شقة 120 متر هذه التى تتكلمون أنها حد أدنى لم تظهر إلا بعد وجود المدن الجديدة و مدينة نصر أما قبل ذلك فمن العادى أن تجد وكيل وزارة محترم و عنده خمسة من الأبناء و يسكن فى شقة فى عمارة فخمة فى المنيل إيجارها ثمان جنيهات و مساحتها تسعون مترا و مكونة من أربع حجرات و صالة.

فكرة التمليك نفسها فكرة جديدة على مصر كان السائد حتى الثمانينات أن تكون الشقة بالإيجار و كان الراجح وقتها أن يلتهم الإيجار أربعون فى المائة من دخل الزوج ، بمعنى أن المرتب فى حدود عشرون جنيها شهريا و الإيجار ثمان جنيهات .......

قم بتحويل هذه الأرقام نسبة و تناسب تجد أن 400 إيجار رقم معقول جدا لمن مرتبه 1000 شهريا أين المشكلة إذا ؟

أتصور أن رقم العنوسة هذا ليس إلا رقما لشريحة سنية معينة لم تتزوج ليس عجزا و لكن تطلعا.

شاهدت قريبا زيجات بين خريجات علوم و رجال حاصلون على دبلوم صنايع و شهدت شابة متفوقة فى إحدى كليات الطب و أمها ترفض كل العرسان لأنهم لا يليقون بالمقام السامى لإبنتها و بقيت الفتاة - صحيح تخرجت و أصبحت أستاذة جامعية - حت سن الثلاث و الأربعون و تزوجت رجل مطلق و عنده بنتان فى العشرينات من عمرهما صحيح تزوجت و لكن بعد أن فقدت أى فرصة فى الإنجاب.

[محمد حافظ]

العنوسة .. التعليم .. البطالة .. الفقر ..جميعها حلقات في سلسلة اللعنة التي تجذب هذه البلد للقاع .. لا يمكن علاج أي حلقة بشكل منفرد . بل لابد أن تعالج جميعها من خلال فك الخيط الرابط لكل تلك الحلقات .. خيط اللعنة .. المتمثل في عقل البلد الخربان القابع منذ 25 عاما بقصر القبة والمكبل البلد بقانون الطوارئ طيلة كل هذه الفترة لضمان بقاء عقل جاهل خربان بقمة الهرم السياسي للدولة .. البلد مشلولة منذ 25 عام .. الإنسان المصري لا ينال أدني حق إنساني في أي مجال .. حتى الهواء الذي يتنفسه صار ملوثا .

من الممكن تقبل هذا الوضع لو كنا في الصومال التي ينهكها الحروب طيلة العشرون عاما الماضية .. إنما أن يعيش الإنسان المصري في هذا الكدر الدائم طيلة كل هذه المدة .. فهذه لعنة .. قد نكون نحن أنفسنا سببا فيها .. يوما ضاع الحق بيننا .. وخوفنا على لقمة العيش قبل خوفنا على مساندة الحق ..

[زيزو]

زيزو كلامك مظبوط بس في مقولة بتقول الفلوس بتغير النفوس اعتقد انك عرفها وعارف مدي صحتها اكيد ....... هو انسان لو عندوا اصل وعارف انها صبرت معاه ميعملش كدة بس كام واحد بيطبق المفروض ؟؟؟؟؟ <_<

مانا قلتلك إنهم قليلين...

يجب ألا ننسى أن عرض المشكلة هنا - فى محاورات المصريين - و مناقشتها هنا أيضا إنما يتم من خلال طبقة وسطى مرتفعة ذات تطلعات ليست هى الطبيعية.

ما سبق كان إستهلالا لابد منه

الأستاذ عادل، طبعًا كلامك مضبوط جدًا، بس كل إنسان بيقارن المستوى اللي عايش فيه وبينظر على قدر التنازل الذي سيقوم به.

وطبعًا 120متر مش الحد الأدنى ولا حاجة، بس حضرتك عارف البنات اليومين دول بقوا مفتريين إزائ؟ :sad:

ومعظم الطبقات التطلعات بتاعتها بتبقى مبالغ فيها بالنسبة لطبقتها بالذات لو ربنا أنعم عليها بشوية جمال أو علم. انا بس قلت أحط مثال بسيط يعني. انا أعرف ناس إتجوزوا بـ10 الأف جنيه والفرح في الشارع والدنيا بتمشي برضه. بس حضرتك تفتكر إن ده منطقي أقوله كحل هنا في المحاورات؟

الطبقة الوسطى لاتعبر عن المجتمع و تطلعاتها تتأثر كثيرا بقراءاتها و مشاهداتها و أحلامها و ليس بحقيقة الأمر.

يا ريت البنات يفهموا كدة.

ليت أحدكم يستعرض في ذهنه الزيجات كل الزيجات الحديثة التى سمع عنها أقول سمع عهنها و ليس بالضرورة أصدقائه أو أصدقائها ، ستستغرب لأن كثير من الزيجات عامة تتم بمعطيات أقل كثيرا من تلك التى نتفلسف هنا و نتكلم عنها.

طبعًا يا أستاذ عادل. بس كل واحد بيرتبط بشخص من مستوى متقارب من مستواه، وكما قال الأستاذ سي السيد في مداخلاته إمكانيات البنت نفسها ممكن تجعل الشاب يهرب نظرًا لعدم وجود تكافؤأ حتى لو المستوى العلمي والإجتماعي قريب.

ووالله حضرتك عارف إن تفكيري مش طبقي إطلاقًا بس فيه ببساطة ناس لا يصلحون للإرتباط بهم نظرًا للفوارق الكبيرة في الشخصيات والخلفية الإجتماعية عامة.

شقة 120 متر هذه التى تتكلمون أنها حد أدنى لم تظهر إلا بعد وجود المدن الجديدة و مدينة نصر أما قبل ذلك فمن العادى أن تجد وكيل وزارة محترم و عنده خمسة من الأبناء و يسكن فى شقة فى عمارة فخمة فى المنيل إيجارها ثمان جنيهات و مساحتها تسعون مترا و مكونة من أربع حجرات و صالة.

ده كان أيام القناعة، وبرضه وقتها كان ينفع يربي أولاده الخمسة أحسن تربية بس حضرتك دلوقتي عارف مصاريف أي مدرسة معقولة بكام في السنة؟ المعطيات كلها إتغيرت تمامًا والحقيقة كل إنسان ما يرضاش إن إبنه يتعلم تعليم مستواه أقل من اللي هو إتعلمه أو يحرم من اللي كان عنده هو من أشياء ضرورية. أظن إن ده كلام منطقي جدًا ومش متأثرة بأحلام وبعيدة عن الواقع. بصراحة أعتبر إن عدم إستطاعة تحقيق ذلك كحد أدنى هو فشل في تحمل المسئولية.

فكرة التمليك نفسها فكرة جديدة على مصر كان السائد حتى الثمانينات أن تكون الشقة بالإيجار و كان الراجح وقتها أن يلتهم الإيجار أربعون فى المائة من دخل الزوج ، بمعنى أن المرتب فى حدود عشرون جنيها شهريا و الإيجار ثمان جنيهات .......

قم بتحويل هذه الأرقام نسبة و تناسب تجد أن 400 إيجار رقم معقول جدا لمن مرتبه 1000 شهريا أين المشكلة إذا ؟

حيفضل 600 جنية، هل الـ600 جنية حيكفوا كما كانت تكفي الـ12 جنية وقتها؟

أتصور أن رقم العنوسة هذا ليس إلا رقما لشريحة سنية معينة لم تتزوج ليس عجزا و لكن تطلعا.

أتفق معك إن نسبة كبيرة من هذا حقيقي، لكن أيضًا هناك من لا يستطيعون الزواج بطريقة كريمة. وعدم الزواج وقتها يكون في رأيي الأفضل.

شاهدت قريبا زيجات بين خريجات علوم و رجال حاصلون على دبلوم صنايع و شهدت شابة متفوقة فى إحدى كليات الطب و أمها ترفض كل العرسان لأنهم لا يليقون بالمقام السامى لإبنتها و بقيت الفتاة - صحيح تخرجت و أصبحت أستاذة جامعية - حت سن الثلاث و الأربعون و تزوجت رجل مطلق و عنده بنتان فى العشرينات من عمرهما صحيح تزوجت و لكن بعد أن فقدت أى فرصة فى الإنجاب.

يا أستاذ عادل الا تتفق معي أن خير الأمور الوسط؟