ثورجى هلفوت

[Tafshan]

ثورجى هلفوت في الخيط معقود

تسمعوا و تقول : قدها و قدود

و تلاقى طريقه دائماً مسدود

على شان بيغنى نغمه نشاز

عن ناس تستاهل الحرق بجاز

ثورجى شبّيح .. و كلامه قبيح

بيزعّل اه .. اكمِنه صريح

بينط السور من غير تصريح

يرجع مخبوط زنبوق مزبوط

و يلاقى البيت في تابوت محطوط

ثورجى بُرمجى ...

لا كان عفيجى و لا كان بلطجى

بينقل في كلام زي البسطجى

لكن دكهمه عايزينه بصمجى

يبصم بالعشره على خير البيه

و على حمده و شكره يعمل ابونيه

و يبوس في الحال ايديه و رجليه

يأمه ينوبه على طول شلوت

ثورجى هلفوت في الخيط معقود

[Guest النسر المصري]

عروستي!!!!!

[homer]

ثورجى هلفوت ولا حد يموت

يصرخ بالكلمة وبالنبوت

والذمة ما تسأل عنها يا بيه

من قشة لفيل بالراحة يفوت

ثورجى فى السيما وفى البوتيكات

بيعيد ويزيد فى الفضائيات

ما يفوت أى مناسبة عليه

غير لما يكون عامل ألوفات

ثورجى للى بيدفع أكتر

يشجب ويحاور وينظر

وان يوم سيده زغر له بعنيه

يصبح هتيف الله أكبر

ثورجى فاكر مااحناش داريين

بايع فى الكار الناس والدين

وان مات برضك هنصلى عليه

طبعنا غلاب ما احناش قاسيين

[عصفور طاير]

ثورجي مظبوط..

ولا عمره يموت..

لإنه ما يقبل غلطة تفوت ولا يرضى حرام

***

ثورجي صنديد

في الحق عنيد

واقف قدام الظلم حديد ولا يخشى ملام

***

ثورجي مغوار..

حارس زنهار

واقف على باب الحق منار ولا عينه تنام

***

ثورجي دا أصيل

فارس ونبيل

نادر في زمان فيه التغفيل بقى إسمه سلام

والنبي دا كلام؟

ثورجي مقدام