موسوعة الأمثال الشعبية

[Reham]

بجد ياجدو ابو الفصاد

الف مبروووك للتثبيت ..حقيقي الموضوع لذيذ جدا ورائع ويستاهل التثبيت

خد عندك بقي ;)

طول مابن آدم حي رزقه جاي

اللي يسعدها زمانها تجيب بناتها قبل صبيانها

حبيبك يمضغ لك الزلط وعدوك يتمنالك الغلط

لا تعايرني ولاأعايرك دا الهم طايلني وطايلك

قد النمله ويعمل عمله

حبيت بس أمسي :wub:

والبقيه تأتي ان شاء الله

[وليد صفوت]

حبيبك يمضغ لك الزلط وعدوك يتمنالك الغلط

<{POST_SNAPBACK}>

بتهيألى يا مدام ريهام المثل ده ليه علاقة بالمثل ده :

إمشى عدل يحتار عدوك فيك :D

[Reham]

حلوة مودام ريهام دي اوي

خد عندك الشويه دول من طنطك المودام

يادي الشيله يادي الحطة روحت علي جمل جيت علي قطة

الحب في القلب زي عضة الكلب

خنفسة شافت ولادها عاحيط قالت دا لولي ملضوم في خيط

هنا وهناك ياسعدك ياهناك

بره وجوه فرشتلك وانت مايل وايه يعدلك

[abofasad]

"مودام" ريهام

الست ام فصاد حرمنا بتقولك البرنيطة بتاعتك حلوة

شرياها منين؟

وخدي عندك"

تكون في ايدك وتقسم لغيرك

تجري جري الوحوش غير رزقك ما تحوش

تدبل الوردة وريحتها فيها

تعرف فلان .. ايوه .. عاشرته.. لا .. يبقى ما تعرفوش

الحزن يعلم البكا .. والفرح يعلم الزغاريط

[mo_gho]

معلش يا جماعة انا فاشل في موضوع الامثال دة بس عاجبني قوي بصراحة :D

وبالمناسبة دي خدوا المثل دة

الناس خيبتها السبت والحد وانا خيبتي ما وردت على حد.

[Reham]

هو مفيش غيري هنا ولا ايه :blink:

خلاص قربوا يخلصوا الشويه الي عندي

ايه ياجدو ماتساعدني حبتين

شفتوا دي بقي

دخانك عماني وطعامك ماجاني

امشي عدل يحتار عدوك فيك وامشي عوج يحتار صديقك فيك

خد الاصيلة ولو كانت عالحصيرة

قال له نام لماأدبحك قاله دا شيء يطير النوم

ياواكل قوتي ياناوي علي موتي

وبسسسسسسسس خلاص

وسلامي للفصايده الصغننين ومامتهم :D

[abofasad]

أساعدك ما عنديش مانع يا ست ريهام

كل سيء دواه الصبر إلا قلة الصبر ما لوش دوا

ما شفت المعروف ينقص صاحبه إلا يزيده على الكمال كمال

خدي ده كمان

المال اللي ما تتعب فيه اليد ما يحزن عليه القلب

مال لحمتك مشغتة قال أصلها من عند جزار معرفة

ما لقيوش في الورد عيب قالوا يا أحمر الخدين

كفاية كده لغاية ما افتكر شوية كمان

[abofasad]

يحلفلي أصدقه اشوف اموره استعجب

يخلق من الشبه اربعين

يدي الحلق للي بلا ودان

[bidawy]

بسم الله الرحمن الرحيم

خد ديه وادعيلي

روح وتعالي احسن مما تروح ماتجيش

ديل الكلب عمره مايتعدل لو علقت فيه قالب

المنحوس منحوس لو حطه في راسه فانوس

اكفي الحله علي فمها تطلع البنت لامها

يا فرعون اسش فرعنك ماليقتش حد يصدني

اللي تحسبه موسي طلع فرعون

اللي يخاف من بنت عمه مايجبش منها عيال

اللي يخاف من العفريت يطلعله

ما عفريت الا بني ادم

[Reham]

عوده مره أخري لمواصلة الارسال

بيقولك...

ماشتمك الا اللي بلغك

لاتذم ولا تشكر الا بعد سنه وست اشهر

يخاف من الخنفسه ويلعب بالتعبان

كل الجمال تعارك الا جملنا بارك

بيت النحل مايخلي من السكر :D

اروح بقي اشوف لكوا شويه معتبرين :D

وراجعه تاني

تم تعديل 6 فبراير 2006 بواسطة Reham

[Reham]

انتوا نمتوا ولا ايه ياشباب

جدوا ياشاطر ياشطاره

مفيش حاجه جديده

[abofasad]

جدو الشاطر معاكي على الخط يا ريهام

"تخانقني في زفة وتصالحني في حارة"

"تدبل الوردو وريحتها فيها"

"زي المش دوده منه فيه"

"طباخ السم لازم يدوقه"

هذا المثل لا يمت بصلة لما يوصفه الشيف بودا من وصفات

"طلع من المولد بلا حمص"

"عاوز الحق والا ابن عمه"

أظن كفاية كده يت ريهام

[الاسكندرنى]

ياساتر بعد كل الوقت ده اخيرا لقيت مثل والله اعلم ان كان صحيح ولا لا لقيت مثل مش مكتوب هنا ايه ده يا جدو بس ده موسوعه

المهم بقه

ابنى على كتفى و اروح ادور عليه

[الاسكندرنى]

هههههههه مش عارف حتقبل المثل ده ولا لا اصله حديث شويه و مستخدم فى الشارع بس انا بضحك عليه اوى

ان لقيت العبيط و ماسطعبتهوش ربنا يحاسبك ( مطبق على الحكومه المصريه)

شكرا لقبوله و ضمه اللى المجموعه

تم تعديل 12 فبراير 2006 بواسطة الاسكندرنى

[abofasad]

قال يا جحا عد غنمك قال واحدة نايمة وواحدة قايمة

من رضي بقليله عاش مبسوط

من دق الباب سمع الجواب

اصحوا معايا شوية .. وصباح الخير

[الاسكندرنى]

عيش ندل تموت مستور

واحد بخيل صاحب هذا المثل

تم تعديل 14 فبراير 2006 بواسطة الاسكندرنى

[MZohairy]

ياجدع!

مسطور ايه بس؟

مسطور دي يعني تم دبحه بالساطور

اسمها تموت مستور

من الستر يعني

مش مسطور :)

[الاسكندرنى]

احم احم احم

بتقول ايه مش سامع

طيب بوص كويس كده شفها مكتوبه ازى

[MZohairy]

عيش ندل  تموت مستور

واحد بخيل صاحب هذا المثل

<{POST_SNAPBACK}>

الا من تاب وآمن و عمل عملا صالحا

:blink:

ماشي حعمل مش واخد بالي من التصليح

ومش حقول لحد mfb:

[الاسكندرنى]

احم احم

شكرا و اخجلتم تواضعنا

بس يا دوق زهيرى

لا لا خلاص شكرا