اتجاه لفرض رسوم بسيطة على المصريين بالخارج

[م الغزالى]

الخبر :

أعلن السفير عبد القادر طنطاوي مساعد وزير الخارجية المصري يوم الثلاثاء أن هناك اتجاها تبحثه وزارة العدل المصرية حاليا لإصدار تشريع يسمح بفرض رسوم بسيطة على رواتب المصريين وجوازات السفر والتأشيرات.

وقال طنطاوي في إفادته أمام لجنة الشئون العربية بالبرلمان المصري إن الخارجية ترفض في الوقت نفسه إجبار الجاليات المصرية في الخارج على إنشاء صندوق للمساهمة في حل مشاكلهم المادية ، موضحا أن هذا يعد إجراءً غير دستورى.

التعليق :

- فرصة نفتح ملف الخارجية والسفارات المصرية من تانى

- أنا لا أدرى من هو العبقرى الذى يأتى بهذه الحلول العبقرية وكأن هؤلاء المصريين بالخارج يغرقون من مناجم الذهب ويملكون أبار البترول !!

- حكاية الرسوم على جوازات السفر والتأشيرات مفهومة ولكن لا أدرى كيف يحصل نسبة على المرتب ؟ وهل سيجبر المواطن على تقديم صورة أخر مرتب ؟

- فى الدول التى تحترم مواطنيها وتعتبرهم سند ودعم لها سواء من الناحية السياسية او المالية عن طريق تحويلاتهم و تشجيعهم على الإستثمار فى بلادهم فتقوم هذه البلاد بتمويل المدارس لأبناء الجالية و تعليمهم لغة وطنهم وكذلك ودور العبادة والنوادى والنشاطات المختلفة لكل جالبة و أخص هنا فى أوروبا على سبيل المثال تركيا و اليونان والبرتغال, ليس هذا فحسب ولكن تقوم بمجهودات كبيرة لحث مواطنيها على التواصل بشتى الطرق مع الوطن الأم وتقديم المميزات الإستثمارية والخدمات المجانية والأهم من هذا كله توفر المعلومات لكل من يحتاج اليها

- أتذكر فى عام 94 وحين إحتجت لتجديد الإقامة إكتشفت أن جواز السفر انتهى تاريخه وقد تم إستخراج أخر والحقيقة فى وقت قياسى من إحدى قنصلياتنا بألمانيا بمبلغ وقدره 420 مارك أى والله ب 420 مارك و لايمكنك أن تطالب بوصل او شئ يثبت ذلك وقس على هذا إجراءات الزواج أو أى ورقة رسمية بمعنى أخر أن الإقتراب من مثل هذه القنصليات و السفارات بمثابة مغامرة فى حد ذاتها

- ياسادة يامسئولين أتركوا المصريين بالخارج فى حالهم ويكفيهم مافيه من غربة و أرحموهم من إقتراحتكم يرحمكم الله

[زعلان]

المفروض يكون في روح وطنية اكثر من كده والناس المغتربة تدفع حق الوطن والخدمات الي بناخدها من السفارت ومحدش مغترب يقدر ينكر اد ايه السفارة المصرية بتوقف جمب ابنائها وتساندهم في اي محنة او مشكلة او مأزق و فرسوم بسيطة تفرض على المغتربين ولو عشرة في المية من المرتب فده شيء بسيط امام كم الخدمات في مختلف المجالات الي بتقوم بيها السفارة المصرية

[KANE]

المفروض يكون في روح وطنية اكثر من كده والناس المغتربة تدفع حق الوطن والخدمات الي بناخدها من السفارت ومحدش مغترب يقدر ينكر اد ايه السفارة المصرية بتوقف جمب ابنائها وتساندهم في اي محنة او مشكلة او مأزق و فرسوم بسيطة تفرض على المغتربين ولو عشرة في المية من المرتب فده شيء بسيط امام كم الخدمات في مختلف المجالات الي بتقوم بيها السفارة المصرية

والناس المغتربة تدفع حق الوطن والخدمات الي بناخدها من السفارت

وهي الخدمات دي بتتقدم بلاش ومجاني؟ :)

ومحدش مغترب يقدر ينكر اد ايه السفارة المصرية بتوقف جمب ابنائها وتساندهم في اي محنة او مشكلة او مأزق

يا راجل عيني ف عينك ، دي السفاره اول مكان بيخلع لما يكون عندك مشكله لأن سعادة السفير مشغول بحجات أهم

فرسوم بسيطة تفرض على المغتربين ولو عشرة في المية من المرتب فده شيء بسيط امام كم الخدمات في مختلف المجالات الي بتقوم بيها السفارة المصرية

10% يا مفترى دي الضرايب على الدخل أقل من كده

~~~~~~~~~~~~~~~~~~

والسؤال الأهم الفلوس دي هتروح فين إن شاء الله؟

وبعدين الإستهبال ده هيفضل لحد امتى؟

مش كفايه إن احنا راضيين بالبهدله في بلاد العالم :wub:

[أبو محمد]

زعلان كتب :

ومحدش مغترب يقدر ينكر اد ايه السفارة المصرية بتوقف جمب ابنائها وتساندهم في اي محنة او مشكلة او مأزق

وقال بيقولوا الشعب المصرى مكتئب وبطل ينكت :wub:

[لخبطه]

ياليت الأمر يقتصر على طلب الفلوس في كل مراجعه للسفارات

دا الامر بيوصل لبيروقراطيه وقله حياء ساعات لما تروح تراجع سفاره بره تلاقي الموظفين هما هما بنفس الغباء والكابه اللى في مجمع التحرير

كمان مين قال اننا مش بندفع رسوم دا كل اللى بتقابله بياخد منك فلوس دا غير تصريح سفر وتصريح عمل

[Tafshan]

لا و الله :P

طب اروح فين ..

سيبت لهم البلد و طفشت .. اعمل ايه تانى :P

غطيني و صوتى ياما

[ATHENA]

هما الناس دول عايزين ايه بجد

و إيه الخدمات اللي الواحد بيشوفها منهم هنا.

واضح انهم خلصوا من الناس في مصر و جايين يشطبوا على الناس الي بره...

زي ما نكون غرقانين في العز هنا...مش كفاية فعلا الواحد طفشان و سايب البلد و مغترب...كمان عايزين يمدوا إيدهم هنا ويحطوها في جيوبنا...طب الواحد يطلع المريخ أحسن؟ :P

دي مش لازم يسموها حكومة..

دي لازم تكون هيئة الجباية الدولية...

تم تعديل 8 أبريل 2006 بواسطة ATHENA

[Th!nk]

يا جماعة الناس دى معذورة

أنتوا لو بتحكموا البلد مكانهم مش حتعملوا أقل من اللى بيعملوه

متنسوش أن المليارات بتاعة القروض التى هرب أصحابها إلى الخارج وضاعت على البلد + المليارات التى تملأ بنوك سويسرا ممن يحكمون (تحسب لأى طارىء) ورغبتهم فى جنى المزيد لتحويله مباشرة إلى الخارج بسبب غلاء المعيشة وليس طمعا + موضوع الجهاز المركزى للمحاسبات الذى وضع تحت بند السهو والخطأ مبلغ 10 مليار جنية فاقد ضاع على البلد :D + المشاريع التى تكلفت المليارات بدون أى عائد يذكر من أمثلة توشكى وأبو طرطور(إسم على مسمى).. + ألخ

كل هذه المليارات يجب تعويضها بكل الطرق الممكنة لأنه بات من الواضح أنه ليس هناك فى البلد قانون يحاسب أو يحافظ على حقوق المواطن وإذا تضرر المواطن فعليه أخذ حقه بذراعه وعندها يقف الأمن المستتب وقفة حازمة معه على طريقة "عاملى فيها شمشون"! وطالما مصلحة الكبير وعمولاته مضمونة وبتخش جيبه بأنتظام فأمن البلد مستتب... الواضح أن مصر الغالية تدار حاليا للمصالح الشخصية على حساب مستقبل البلد والشعب.. وإذا لم يلجأ المتضرر لتغيير الوضع فسيبقى الوضع على ما هو عليه :blush:

من هنا يظهر جليا أن البلد بعد هذه المليارات التى طارت أصبحت فى وضع لا تحسد عليه ولأنه أصبح من المستحيل أن نحاسب أحد أو أن نجلب ما ضاع من أموال فينبغى أن يدفع المغترب أيضا نسبة بسيطة من راتبة (حوالى 10% :P ) لأن البلد ينبغى أن تفقد مليارات أخرى ينبغى توفيرها بكافة السبل! المليارات ضاعت خلاص والمسئولين اللى وظيفتهم حماية الناس تعودوا ألا يبكوا على اللبن المسكوب! ومهمتهم اليومين هى توفير قرشين ممن يعيشون خارج البلد علشان تتسرق وتخرج تانى من سعداء الحظ المحظوظين! :P

سيبوا الناس تسترزق ... الحياة بقت صعبة فى ظل القيادة الحكيمة!

[Abofady]

الناس دى معندهاش دم , سرقوا البلد وعاوزين يسرقونا كمان , وانا اسالهم ماذا عن تصريح السفر ؟ واذن العمل الذى ندفعة سنويا قبل خروجنا , هل يريدون هذه الاموال لمشروع توشكى الفاشل , او لابو طرطور, او لصاحب العبارات ,او لابراهيم نافع الحرامى , والله لو طلبتم جنيه واحد مانى دافع , حتى لو دخلت السجن . سرحوا الامن المركزى وامن الدولة , والجيش النائم هذا ماذا يفعل , يجب خصم ربع رواتب الجيش والداخليه , اما نحن فيكفى ما ندفعة

[زعلان]

الحمد لله ان الروح الوطنية العالية ده هي السائدة بين الشعب المصري الاصيل المتغرب ومش عارف لا يرجع مصر ولا يروح فين :)

الحمد لله اني لسه مطلعتش جواز سفر مصري :wub:

[eastsoul]

الموضوع كان متوقع من زمان ...ما احنا حقل التجارب :wub:

يا عيني علينا ... اخر مرة رحت فيها بلدنا... خلتني فعلا افكر في الهجرة :)

[عطر]

ماكفاهومش المليارات اللي طيروها في الهوا وهم ماشيين على المثل اللي يئول اللي معاه قرش محيره يعمل مشاريع تطيره هم بأة بيخترعوا مشاريع فاشلة لا فيها تخطيط ولا دراسات علشان بس يطيروا مليارات فيها

ما كفاهومش فلوس المعاشات اللي لهفوها في وزارة المالية ويئولوا احنا هنافظ لكم عليها

حسبي الله ونعم الوكيل في البلد دي وحسبي الله ونعم الوكيل في اللي ماسكينها

[hossam73omar]

يعنى احنا سافرنا بره مصر بمزجنا انا معايا ماجستير فى التسويقف ومرتبى بعد عشر سنين عمل فى الحكومة 170جنية.

وكمان عيزين لما ارجع بلدى بعد القرف اللى الواحد شيفة فى الغربة يدفع فلوس كمان

ومين اللى هيدفع ثمن غربتنا

وثمن البهدلة فى الخارج

إذا كان السفارات بتعتنا بتساند الاجانب ضدنا

وملهمش لزمة

وتجار عملة وسمسرة

كمان ندفع فلوس

فعلاً

اللى اختشو ماتو

داحنا طلعان عنا وعين اللى جبونا

[yasovinas]

طيب بالمناسبة ما دام كل اللي كتب هنا مغترب

انا لاحظت شيء غريب خلال اخر 4 سفريات لي الى مصر واخرها الاسبوع الماضي وعند الخروج ضابط الجوازات لا ينظر في تصريح العمل اطلاقا ؟؟؟؟؟

حد لاحظ الحكاية دي؟؟!! ؛؛؛؛؛ وحد سمع اي خبر عن الغاء الربط بين السفر بالخارج وتصريح السفر؟؟

بالمناسبة تجديد الجواز في السفارة في الامارات يتكلف حوالي 450 درهم يعني 720 جنيه مصري تقريبا بينما تجديده في مصر يتكلف 60 جنيه فقط ايه رايكم بقى ؟؟

ملاحظه اخرى عند خروجك من اي دوله في العالم وايضا عند دخولك الى مصر لا يُنظر الى صلاحية جواز السفر فقط عند الخروج من مصر او الدخول الى اي دوله اخرى يعني لو جوازك منتهي اصبر لغاية ما ترجع مصر وتجدده

تم تعديل 9 أبريل 2006 بواسطة yasovinas

[الاسكندرنى]

السلام عليكم

قرار نهائى لى انا مش راجع مصر تانى و الحمد لله انى مش مسجل نفسى فى السفارة

لانهم عند التسجيل طلبوا منى 100 يورو فرفض الدفع فالحمد لله انى مسجلتش

ولو على اهلى باذن الله ابعتلهم يجوا هنا عندى احسن

والله العظيم منا دافع مليم لمصر او لى حاجه من ريحة مصر غير لما تتغير الحكومه و النظام و احس ان النظام الجديد حيكون عادل و امين

تم تعديل 9 أبريل 2006 بواسطة الاسكندرنى

[KANE]

طيب بالمناسبة ما دام كل اللي كتب هنا مغترب

انا لاحظت شيء غريب خلال اخر 4 سفريات لي الى مصر واخرها الاسبوع الماضي وعند الخروج ضابط الجوازات لا ينظر في تصريح العمل اطلاقا ؟؟؟؟؟

حد لاحظ الحكاية دي؟؟!! ؛؛؛؛؛ وحد سمع اي خبر عن الغاء الربط بين السفر بالخارج وتصريح السفر؟؟

أظن إن البيانات بتتخزن في كمبيوتر الداخلية فلما بيدخل رقم الجواز بيعرف إن كنت عملت تصريح العمل أو لأ

[ATHENA]

و أحلى حاجه كلمة بسيطة في الرسوم..يعني و راها نية بيضااااااااااااااااااا :wub:

و بعدين هما ميعرفوناش غير وقت الرسوم و الدفع..طب ما انا لما كنت في الجامعة استبعدوني انا و الطلبة اللي جايين من بره من إننا ناخد منحة متعديش تمانين جنية ...

دلوقتي بقينا مواطنين مصريين لازم ندفع.. :P

[yasovinas]

كني كتب

أظن إن البيانات بتتخزن في كمبيوتر الداخلية فلما بيدخل رقم الجواز بيعرف إن كنت عملت تصريح العمل أو لأ

واضح جدا ان الكني ما سافرش برة مصر او ما دخلش مصر من زمااااان كمبيوتر ايه اللي بتحكي عنه يا صاحبي الحاجات دي من وجهة نظر الداخلية وقسم الجوازات بمطار النزهه بدعه وكل بدعه ضلاله وكل ضلاله في النار

ما فيش الكلام دا خالص فقط يتم الجوء الى الكمبيوتر عند دخولك الى مصر للبحث عما اذا كنت مطلوب القبض عليك ام لا بس

[maksoof]

والله العظيم منا دافع مليم لمصر او لى حاجه من ريحة مصر غير لما تتغير الحكومه و النظام و احس ان النظام الجديد حيكون عادل و امين

مين هما "عادل" و "أمين" دول؟؟

يعنى سعادتك مش عارف إن النظام الجديد حيكون "جمال" و "علاء"؟ :closedeyes:

[White heart]

Koenig der Loewen كتب:

أتذكر فى عام 94 وحين إحتجت لتجديد الإقامة إكتشفت أن جواز السفر انتهى تاريخه وقد تم إستخراج أخر والحقيقة فى وقت قياسى من إحدى قنصلياتنا بألمانيا بمبلغ وقدره 420 مارك أى والله ب 420 مارك و لايمكنك أن تطالب بوصل او شئ يثبت ذلك وقس على هذا إجراءات الزواج أو أى ورقة رسمية بمعنى أخر أن الإقتراب من مثل هذه القنصليات و السفارات بمثابة مغامرة فى حد ذاتها

بالفعل ... أذكر اننى مررت يوما ما بأمر مشابه ... و جلست أتخيل حجم الإيرادات المحصلة نظير خدماتها الإدارية للمغتربين او المهاجرين المصريين، و فى نفس الوقت تخيل حجم مصروفات مبنى القنصلية نفسه من أجور موظفين .. و إيجار ، و كهرباء، و ماء ، و خدمات بلدية، و صيانة، و أدوات مكتبية، و إتصالات .. الخ .. الخ ... و قمت حتى مع جهلى بوجود أم عدم وجود أى إمتيازات خاصة تمنحها الدولة الالمانية للقنصليات و السفارات، بإضافة هامش إضافى على سبيل النثريات، و إستبعدت تماما أى مشاركة مادية تحصل عليها القنصية أو السفارة من الميزانية المخصصة لوزارة الخارجية بالوطن الأم .. وخرجت ساعتها بنيجه مفادها ان القنصلية أو السفارة تستطيع و ببساطة ليس فقط الإستقلال التام بميزانيتها، بل و المساعدة على إرتفاع فائض ميزانية الوزارة نفسها !!! و لكننا اليوم بصدد سؤال جديد ... هل فى ظل الظروف الدولية المعاصرة و ما صحبتها من صعوبات و مشاكل بوجه عام، و تعقيدات خاصة بمنح تأشيرات دخول جديدة أو نسبة أعداد المغتربين أو الراغبين فى الهجرة و التجنس بوجه خاص .. هل فى مثل هذه الظروف تبقى المعادلة الحسابية على نفس هذا الشكل، أم سيطالها إنخفاض و تدنى و لو بصورة متدرجة؟ طبعا انا لا أحاول بأى شكل من الأشكال تبرير مثل هذا الإتجاه الذى وضعه لنا العزيز Koenig der Loewen فى بداية هذا الموضوع، و أرفضه تماما شكلا و موضوعا، بل لى من الملاحظات السلبية الكثير فى شكل و نوع و مستوى حتى الخدمات المدنية = العادية المقدمة من السفارة و القنصلية ... و لكن فقط أحاول تسليط الضؤ على بند أشار اليه صاحب الموضوع، و أراه يصب فى صلب ذات الموضوع .....

مع تحياتى.