ما رأيكم في هذا المشروع

[bogy]

السلام عليكم يا شباب

طيب بلاش مشروع الحضانة :P باين عليه مش عاجبكم!! مع إنه عاجبني جدا والله!!! طيب ايه رأيكم في مصنع ملابس جاهزة للأطفال؟ رجعنا للأطفال تاني :P

[se_ Elsyed]

أهم من المشروع يا بوجي هو دراسة تفصيلية لطُرق التسويق

يعني الإنتاج سهل .. وتدبير المكان والماكينات ممكن عن طريق القروض .. لكن التسويق بقى هو المشكلة الرئيسية اللي لو شفت لها حل فهايبقى كل شيء سهل .

[أسد]

من الوهلة الأولى ..

هذا المشروع ممتاز ... والسوق فيه مضمون ..

والأكيد أنه مربح ..

لكن الحقيقة أنا لي إستفسار في هذا الموضوع بالذات ..

ملابس الأطفال في مصر .. سعرها مرتفع جداً .. مقارنة بأي مكان آخر في العالم ..

لا أعلم ماهو السبب ..

إذا حاولت علاج تلك المعضلة .. وهو إنتاج ملابس أطفال ذات ذوق رفيع .. وسعر مناسب ..

تنافس بها الموجود بالسوق ذو السعر المرتفع جداً ..

فأبشرك بالنجاح .. بعد إتمام كافة الخطوات والدراسات الفنية والتسويقية اللازمة ..

ولا تحاول التوفير في التأسيس للمشروع وأنفق جيداً عليه ..

[kokowawa1979]

صناعة الملابس وخاصة ملابس الأطفال ستواجة بمنافسة شرسة من الصناعة الصينية وجنوب شرق آسيا عموما !!!

من الآخر المشروع الذي لا يخسر أبدا إن شاء الله هو فتح أي مطعم صغير للمأكولات الشعبية - هو المشروع الوحيد المضمون حتى لو كان بعربية يد على الناصية !!!!

ثم الأراضي الزراعية في المناطق المستصلحة بشرط وجود خميرة كويسة إن شاء الله استثمارها مضمون

تم تعديل 8 أبريل 2006 بواسطة kokowawa1979

[بنت شعنونة]

المنافسة فيه هاتكون قوية جدا

خلي بالك

الطبقة الصفوة بتشتري من ماركات ومحلات معينة في مصر وما بتغيرهاش

الطبقة اللي تحت بتستلف من بعض ويشحتوا لبعض الهدوم اللي بتصغر على بعض وفي العيد من وكالة البلح

الطبقة المتوسطة وهيا دي التارجت بتاعك..

دي عاوزة خامة كويسة وفلوس معقولة المشكلة هيا نسبة الشراء قد ايه

يعني تفتكر الواحد ها يشتري لأبنه هدوم جديدة كل قد ايه؟

كبييييييييييرة هدمة في الشهر

بس خلي بالك

فيه خيم في اماكن معروفة موجودة طوووووول السنة بتبيع حاجات صيني بسعر مستحيييييييل انت توصله

اذا انا اشتريت بيجامه شتوي من هناك ب 50 جنيه؟؟؟؟؟؟؟؟

صيني طبعا

ها تقدر تنافس دول؟

[bogy]

ربنا يخليكم كلكم والله أنا سعيد بردودكم الجميلة وكمان استمتعت بمغامرات شعنونة :) وردودكم الجميلة :) لأني جديد على الموقع بس عجبني جدا لأن دمكم خفيف جدا mfb:

بنت شعنونة

على حد علمي مش ممكن طبعا المنافسة مع المنتجات الصينية لأنها بتكون رخيصة جدا وجودتها عالية! إلا إذا كنا هانعمل إنتاج ضخم جدا!!

بس أنا أعرف إنهم مش بيسمحوا في مصر بالاستيراد من الصين لحد دلوقت إن اتفاقية التجارة العالمية مش مطبقة كاملة ولا ايه؟

وبعدين في حل كمان ممكن نخلي الناس ما تسلفش بعض الهدوم. ولا أقولك حرام بلاش لحسن نبقى من ضمن الإقطاعيين الجدد

بالنسبة للمنافسة في موضوع البيجامة الشتوي أنا ما عملتش دراسة على ملابس الكبار لأني حسيت إنها عاوزة منافسة شديدة وإنتاج ضخم جدا وإمكانيات كبيرة جدا. لكن فكرت في ملابس الأطفال ومش عاوز أبدأ بملابس الخروج لكن أبدأ بالبيجامات اللي بيلبسها الأطفال في البيوت ودي بتكون بسيطة في خاماتها وإنتاجها وتوزيعها. وكدراسة مبدأية اعتمدت على كلام بعض الإخوة اللي ليهم معرفة بأسعار القماش أنا عرفت إن البيجامة الجيل للأطفال بتتباع بحوالي عشرة جنيه في حين إن تكلفتها ممكن ما تتعداش خمسة جنيه فهي دي النوعية اللي ركزت عليها؟ ايه رأيك؟

kokowawa1979

يعني ايه خميرة؟ يعني قصدك فلوس يعني؟ ماشي ما هو الفلوس مش هي المشكلة بس المشكلة إن موضوع الفول والطعمية ده برضه طلع ولا نزل هايكون مشروع خدمي محدود لكن أنا عاوز مشروع إنتاجي يكبر ويتضخم ويتفحل بس يا رب ما أبقاش من الإقطاعيين إياهم يا رب. :o وبعدين مشروع الفول والطعمية لازم أنت تكون مشرف عليه بنفسك. مش عارف أنا حاسس إن ما ليش في الفول والطعمية رغم إني باحب آكلهم بس باحبهم يتعملوا في البيت بصراحة مش من المطعم (معلش مش لاقي رسمة تطليع اللسان)

أسد

روح يا شيخ ربنا يطمن قلبك زي ما طمنت قلبي (مش لاقي رسمة بوسة) :P

فعلا أنا عرفت من بعض اللي ليهم في الكار والصنف إن من المشاكل اللي بتقابلهم موضوع التصميم لأن التصميمات في أغلبها غبي أوي. فممكن أخوك بشطارته يجيب شوية تصميمات من على الإنترنت وفعلا أنا جبت شوية حاجات رووووووووووووووعة (بس أوعو حد يفكر يلبس لبس أطفال من جمالها).

ارتفاع الأسعار بقى سببه زي أي سلعة في مصر ليها حياتنها وأسماك قرشها وكل أنواع البحريات المفترسة هههههههههههههه ياااااااااااااااااااااااامه :wub:

والسبب المعروف طبعا حماية الصناعة الوطنية وفرض الجمارك العالية جدا على الاستيراد فيكون النتيجة عدم الاستيراد من الصين رغم إن لو استوردنا هاتكون الأسعار زي في السعودية كده رخييييييييييييييصة ومنتجات جميلة جدا.

se_ Elsyed

حرام عليكم يا راجل ده أنت موتني من الضحك من تعليقاتك في هذا الموقع :P أول مرة أشوف سي سيد من الطراز ده :D

شوف يا سيدي العزيز الحمد لله مش محتاجين قروض وطلوع روووووووووح الله الغني.

فعلا الإنتاج سهل زي ما أنت قلت يعني مش محتاج تكنولوجيا عالية. وأهم حاجة التسويق.

فأنا فكرت في حاجتين يا إما الواحد يدي لتجار الجملة ودول فيهم بياخدوا كاش وفيهم بياخدوا آجل. وأنا طبعا ما باحبش الآجل ده أبداااااااااااااااااااااااااااا. سلم واستلم يا أستاذ سي السيد. ماشي؟ فالتجار دول ممكن تجبرهم إنهم يدفعولك كاش لما يشوفوا التصميمات الجميلة اللي أخوك جايبها من على الإنترنت. لأن واحد شغال في الموضوع ده مرة قالي إن القطعة اللي معمولة حلو بتتخطف خطف. فده معناه إنهم غصب عنهم هايدفعوا كاش للتصميم اللي هايبيعوه بسرعة. والله أعلم.

تاني حاجة فكرت فيها إني أشغل شباب صغير مندوبين يعني أعطي مثلا كل واحد فيهم خمسين قطعة كل يوم علشان يبيعهم لمحلات الملابس كاش. ويكون ليه مكسب في القطعة جنيه أو نصف جنيه مثلا. ويعطي مثلا للمحل خمس قطع أو في حدود ما يطلب المحل. وبالتالي نكون حلينا مشكلة التسويق.

ايه رأيكم إخوتي الكرام؟ والله أنا فرحان جدا بمشاركاتكم ربنا يخليكم كلكم.

[se_ Elsyed]

فأنا فكرت في حاجتين يا إما الواحد يدي لتجار الجملة ودول فيهم بياخدوا كاش وفيهم بياخدوا آجل. وأنا طبعا ما باحبش الآجل ده أبداااااااااااااااااااااااااااا. سلم واستلم يا أستاذ سي السيد. ماشي؟ فالتجار دول ممكن تجبرهم إنهم يدفعولك كاش لما يشوفوا التصميمات الجميلة اللي أخوك جايبها من على الإنترنت. لأن واحد شغال في الموضوع ده مرة قالي إن القطعة اللي معمولة حلو بتتخطف خطف. فده معناه إنهم غصب عنهم هايدفعوا كاش للتصميم اللي هايبيعوه بسرعة. والله أعلم.

في التجارة يا عزيزي بوجي ما فيش حاجة إسمها إنت بتحب إيه

ولكن في حاجة إسمها " السوق بيحب إيه "

يعني لو السوق ماشي كريديت يبقى لازم تسايرة وتأمن نفسك على قدر المُستطاع عن طريق معرفة الموقف المالي للعميل أو التاجر وعن طريق دُفعات مُقدمة عند التسليم .. إلخ

أما مسألة الكاش ... فإنسى يا عمرو

فلا إنت كمُصنع هاتشتغل كاش ... ولا هو كموزع هايشتغل بنفس النظام .

[bogy]

se_ Elsyed

أيوا صح كلامك سليم. وخصوصا إن الحالة في مصر ناشفة على الآخر :blink: بس في واحد شغال في الموضوع ده وقال إنه بيعرف تجار جملة بياخدوا كاش!! طيب سيبك يا عمرو (هو مين عمرو ده) ايه رأيك في موضوع المندوبين؟ :huh: بس طبعا هاكون مؤدب ومش هاخليهم يطلعوا البيوت عندكم :huh: زي بقية المندوبين. :huh:

[se_ Elsyed]

se_ Elsyed

أيوا صح كلامك سليم. وخصوصا إن الحالة في مصر ناشفة على الآخر :blink: بس في واحد شغال في الموضوع ده وقال إنه بيعرف تجار جملة بياخدوا كاش!! طيب سيبك يا عمرو (هو مين عمرو ده) ايه رأيك في موضوع المندوبين؟ :huh: بس طبعا هاكون مؤدب ومش هاخليهم يطلعوا البيوت عندكم :huh: زي بقية المندوبين. :huh:

موضوع التعامل الآجل ده في كل العالم مش في مصر بس .. حتى في أقوى الإقتصاديات العالمية .. لإن في مثل تجاري بيقولك إن التاجر المجنون هو اللي يغامر بفلوسه ..

موضوع المناديب بقى ممتاز خصوصاً لو كنت ضامن وعارف المندوب عشان ما ياخدش البضاعة ويخلع ... ويا سلام لو كانوا بنات تبقى العملية في الجون - ما تفهمنيش غلط يا بوجي يا شقي - أنا أقصد إن البنات غالباً مرتباتهم أقل .. ولقمة صغنونة تكفينا ... وفي مسألة ملابس الأطفال هايبقوا أجدر وأشطر إنهم يشرحوا للزبون مزايا البضاعة اللي معاهم ... لكن عيبهم إن حركتهم بطيئة غير الشاب اللي ممكن يتشعبط في التروماي ويجري ورا الأتوبيس ويسبقوا كمان ...

وأهم حاجة تشتغل معاهم بنظام عمولة واضح وغير مُبهم .. وما تحاولش تاكلها عليهم لو لقيتها وصلت مبالغ كبيرة .. لإن صاحب البيزنس لما بيتشطر .. فبيبقى من السهل يتسرق من الناحية التانية .

[بنت شعنونة]

عندي ليك مشروع هايل ومضمون اكتر

ومش محتاج تكاليف كتير

كل اللي محتاجه راس مال ابو 5 جنيه وغرفة

بص يا سيدي

ايام ما كنت بجهز نفسي عشان الجواز ودا من يجي 7 شهور كدا..

لقيت في كرافور ومحلات تانية مفارش سراير وفوط بيسموهم بتوع العرايس

عشان مطرزين والوانهم شيك جداااااا وحلوين

بس الفوطة الواحدا بتتباع بيجي 70 جنيه

و الملاية المطرزة يجي 100 دا ارخص نوع كمان

ولو طقم سرير على بعضه من اول 250 بقى وانت طالع

و كل ما الزوق يرقى كل ما السعر يزيد

اللي عرفته بقى ان المحلات دي مش مصانع

دول ناس بيعدوا عليهم يدوهم انتاجهم ولو عجبهم يشتروه ويبيعوه هما بسعرهم

انا بقى جبت فوط عادية من شركة الكتان كانت ب 5 جنيه باين الفوطة و فيه ب 7 و 10 و البشكير ب 15

وطرزتهم عند واحد معرفه ب يجي 10 جنبيه الفوطة وبعت الواحدا ام 5 ب 25 ج

واتباعت هوا

لو عاوز تفاصيل اكتر قولي :wub:

[bogy]

بنت شعنونة

أولا ألف مبروك على الجواز يا ستي وعقبال الأولاد. يلا بقى ابدأي جهزيلهم <_< وربنا يبارك ليكي في أسرتك الجديدة ويجعل حياتكم سعيدة دائما.

حسب معلوماتي الاقتصادية العبقرية يا دكتورة شعنونة إن ماكينة التطريز دي غالية جدا يعني مش أقل من 200 ألف أو 300 ألف. يعني أغلى شوية من الخمسة جنيه اللي سعادتكم اقترحتيها :o إلا بقى لو كان قصدك يعني على الخمسة جنيه دي إن كل جنيه بخمسين ألف ولا حاجة حسب اختلاف العملة اليومين دول :closedeyes:

اللي أعتقد إنك بتفكري فيه إني أجيب الفوط والملايات دي وأعملها عند واحد عنده ماكينة تطريز وبعدين أبيعها!! صح؟ طيب أنا ما عنديش مانع مبدأيا يعني!! ولو إني أحب أعمل كل أجزاء المشروع بمعرفتي مش عند حد تاني!! بس بصراحة فكرة حلوة فكرتك دي وطبعا عاوز تفاصيل أكتر :P

وواضح كده من تفكيرك بالطريقة دي الواحد هايستعين بالمندوبين كتير جدا لو الشغل نفع بالطريقة دي. يعني مندوبين يشتروا القطع ومندوبين يودوها للتطريز ويجيبوها ومندوبين للتسويق. والله باين عليكي بيزنس ومان فعلا. أفكارك عبقرية اقتصادية فذة فعلا.

في انتظار التفاصيل المملة لحد ما أزهق :blink:

كمان عاوز رأيك في موضوع الحضانة وربنا يسترها يا ستي والعيال يطلعوا ولاد حلال وما حدش يضرب التاني.

se_ Elsyed

الله يخليك على الملاحظات الجميلة دي. وأوعدك إني مش هاستغل أي مندوب أو مندوبة. والله ده أنا باكره الاستغلال ده كره العمى. وكمان باحس إني مبسوط لو ساعدت حد محتاج للعمل. ايه رأيك تبعتلي كام مليون بقى علشان أدخلك معايا تبقى رئيس المندوبين؟ :D

[kokowawa1979]

سي السيد كتب :

يعني لو السوق ماشي كريديت يبقى لازم تسايرة وتأمن نفسك على قدر المُستطاع عن طريق معرفة الموقف المالي للعميل أو التاجر وعن طريق دُفعات مُقدمة عند التسليم .. إلخ

السوق المصري غير مضمون بالمرة بالنسبة لموضوع الكريديت أو الإئتمان - لإنه بصراحة فجأة تلاقي عميل كبير أشهر إفلاسه وتلقي نقسك فجأة داخل في قسمة غرماء مع باقى الموردين الذين يقومون بالتوريد لنفس عميلك !!!

من هنا نقول أن المشروع الوحيد في مصر هو مشروع الأكل بصراحة لإنه الحاجة الوحيدة اللي الكاش فيها مضمون مليون في المائه علاوة على إن الرسك أو المخاطرة فيها شبه صفر في المائه !!!

طبعا البعض بيقول دلوقت كوكو واواو ده همه على بطنه :closedeyes: لكن الحقيقة الاستثمار المضمون بالفعل هو أي مشروع أكل في أي مكان بشرط تفرغ صاحبه له تماما كما قال الأخ بوجي وليس مشروع الأكل وحده بل أي مشروع آخر .

[أسد]

سي السيد كتب :

يعني لو السوق ماشي كريديت يبقى لازم تسايرة وتأمن نفسك على قدر المُستطاع عن طريق معرفة الموقف المالي للعميل أو التاجر وعن طريق دُفعات مُقدمة عند التسليم .. إلخ

السوق المصري غير مضمون بالمرة بالنسبة لموضوع الكريديت أو الإئتمان - لإنه بصراحة فجأة تلاقي عميل كبير أشهر إفلاسه وتلقي نقسك فجأة داخل في قسمة غرماء مع باقى الموردين الذين يقومون بالتوريد لنفس عميلك !!!

من هنا نقول أن المشروع الوحيد في مصر هو مشروع الأكل بصراحة لإنه الحاجة الوحيدة اللي الكاش فيها مضمون مليون في المائه علاوة على إن الرسك أو المخاطرة فيها شبه صفر في المائه !!!

طبعا البعض بيقول دلوقت كوكو واواو ده همه على بطنه :closedeyes: لكن الحقيقة الاستثمار المضمون بالفعل هو أي مشروع أكل في أي مكان بشرط تفرغ صاحبه له تماما كما قال الأخ بوجي وليس مشروع الأكل وحده بل أي مشروع آخر .

بخصوص أن السوق غير آمن ..

الإستثمار والبيزنس أو التجارة بشكل عام مبنية على المخاطرة ..

فلا يوجد في تاريخ الأعمال شئ إسمه إستثمار آمن 100% ..

هناك نسب للأمان مرتفعة أو منخفضة ونسب مرتفعة أو منخفظة للمخاطرة ..

ومبدأ إنشاء مشروع يكون إضافة قيمة للشخص ومجتمعه في نفس الوقت هو أمر شجاع يدفع المجتمع نحو التقدم ..

كلنا يقول وينادي بالإصلاح وكلنا ينادي ويقول بالمثل العليا .. والقيم الجميلة .. ونتحدث عن المجتمع ومانريده له وما نريد السلطان أن يفعله ..

وعندما يأتي لنا دور من الممكن أن نقوم به مهما كان صغيراً أو كبيراً .. أو محدوداً ..

نبدأ في البحث والتحري عن مدى إضافته المادية لي أنا شخصياً .. دون النظر إلى الفائدة المجتمعية ..

نبدأ في الكلام عن أن السوق خطر . وابحث عن المضمون ..

السؤال هنا ..

إذا كلنا فعلنا هذا ..

وبحثنا عن المضمون (وابلقطع هو إستهلاكي .. جداً)

فمن الذي سيقوم بمشروع يخدم المجتمع .. والوطن .. والأقارب والجيران ..

هل تعتقد أن مشروع فول وطعمية في حي شعبي يمثل أي قيمة مضافة للمجتمع أو للوطن ..

هل تعتقد بأن ذلك سيمثل أي قيمة لصاحب المشروع ذاته ..

سيتحول من مهندس أو محاسب إلى صاحب محل فول وطعمية ..

أي أنه سيقلل من مستواه الإجتماعي ..

إذا أنصفنا ..

والسؤال هنا ..

متى عندما نفكر في أنفسنا ومستقبلنا ..

نبحث عن الإضافة للمجتمع في مشروعاتنا .. ونفكر في من حولنا مثلما نفكر في أنفسنا ...

[kokowawa1979]

أسد كتب :

هل تعتقد أن مشروع فول وطعمية في حي شعبي يمثل أي قيمة مضافة للمجتمع أو للوطن ..

هل تعتقد بأن ذلك سيمثل أي قيمة لصاحب المشروع ذاته ..

سيتحول من مهندس أو محاسب إلى صاحب محل فول وطعمية ..

أي أنه سيقلل من مستواه الإجتماعي ..

أخي أسد أنا معك فيما قلته عدا أن مشروع الفول والطعميه يقلل من قيمة صاحبه إجتماعيا ( على فكرة أخوك كوكوواوا مش صاحب محل فول وطعمية ) -لأنه من المؤسف أصبح مجتمعنا يقدر الأشخاص بمالهم وليس بمراكزهم الاجتماعية لإن الشهادات أصبحت للأسف سبهللة !!! المشكلة هل لديك عمل تحصل منه على الرزق !!!

لقد وجدت في إحدى الدول العربية للأسف الشديد الكثير من خريجى كليات الاداب والتجارة والألسن يعملون كعامل تموين للسيارات بالوقود وقد كنت أشعر بالضجر والضيق في داخل نفسي لإن أهلهم لم يعلموهم لكي يصبحوا في النهاية عامل في محطة بنزين !!! يعني المستوى الاجتماعي أخي أسد لم يعد يقاس بالشهادة التي حصلت عليها للأسف أصبحت الفلوس هي شهادتك في المجتمع !!!

أنا ضربت مثل بمحل الفول والطعمية على أساس أنه مشروع رأس ماله ليس عاليا علاوة على أن مخاطرة المتاجرة فيه شبه منعدمة - البيع كاش - وهكذا !!!

وأنا معك أخي أسد لابد وأن تكون مشاريع الاستثمار تقدم تنمية للوطن - لكن ماهي المشاريع التي تصلح في وسط هذا المناخ الفاسد للاستثمار !!!!!

ولك خالص احترامي

[أسد]

ما ذكرته عن الشباب الذي يعمل عامل في محطة بنزين بالرغم من أنه حاصل على شهادة جامعية .. هذا لأنه قليل الحيلة ..

أما من لديه رأس مال ويبحث عن مشروع ليقوم به .. فالوضع هنا مختلف ..

أما عن ماهية المشروع ..

هناك الكثير من المشروعات التي يمكن أن تكون إضافة للمجتمع ، وبرأس مال قليل .. والمشروع الذي إقترحه بوجي .. هو مشروع جيد .. وبرأس مال ليس كبير .. ويمكن عمل أي شئ برأس مال صغير أو برأس مال كبير .. طبقاً لحجم إستثماراته ..

بالطبع هناك حد أدنى ... ولكن هناك الكثير من المشروعات ..

وإذا كان لديك رأس مال .. يمكنك الحصول على العديد من دراسات الجدوى لمشروعات إنتاجية صغيرة من صندوق التنمية الإجتماعي أو من مراكز الدراسات التابعة له ..

لا تأخذ منهم قرض .. ولكن خذ الأفكار .. وإجتهد .. وسوف تنجح ..

إنظر حولك .. وفكر أن تكون عنصراً منتجاً .. فاعلاً .. وستجد الكثيرمن المشروعات ..

أرى أن مشروع "التكتك" والذي قام به الشباب في القرى والمدن المصرية .. هو مشروع يخدم المجتمع أكثر من مطعم الفول والطعمية ...

تحياتي ..

[بنت شعنونة]

بص يا سيد بوجي..

ماكينة التطريز اللي بتكلم عليها دي الماركات العادية ب 7000 جنيه فيه اغلى من كدا و ماركات تانية بس دا اللي انا متاكدا منه :P

الموضوع وما فيه انك ها تشتري ماكينة زي دي ولو عندك شقة فاضية .. مخزن اي حاجا بس يفضل شقة عشان الضرايب ماتخدش خبر

وتجيب واحد صنايعي يكون بيعرف يطرز كويس وايده نضيف في الشغل و تديله الرسمة بتاعت التطريز انت و زوقك بقى وكل ما زوقك و الوانك تكون احلى كل ما يكون الدخل بتاعك اعلى

ومش ها تحتاج في البداية غير مندوب واحد بس

يعني انا من انصار ابتدي صغير واكبر بدل ما تدفع الاف الجنيهات وتلاقيك نزلت على فاشوش

يعني تخسر 7 او 10 الاف احسن ما تخسر 50 او 60 الف!!!!

وتديله انتاجك وتحسب تكلفتك وتظبط حاللك مع السوق

شهر اتنين

مشي حالك استقل بنفسك واعمل لنفسك منفذ بيع

بس بعد ما تكون الناس سمعت عنك وعن اسم منتجك...

والا ايه رايك؟ :blink:

موضوع التك تك

دا هايل ومربح جدا

لكن عاوز رشاوي بالعبييييييييييييط و كوسة جامدة لآنه ممنوع في القاهرة الا........... اذا..........

!!!!!!!!!!!!!!!!!!!!!

دا اللي وصلني من معلومات لما سالت عليه

التك تك الواحد تمنه 26 الف جنيه وممكن يتقسط

لو عرفت تدخل بيه المعادي

او المدن الجديدة او فيصل

يبقى اتفتحتلك طاقة القدر :blink:

موضوع الحضانة...

برضه كنت عاوزة اعمله " ما سبتتتتتتتتتتتش حاجا في نفسي"

ولكن شروطة كالتالي ودي مصاعبة

لازم يكون حاجا دور ارضي وليها ساحة او جنينه او حتى بلكونة كبيييييييييرة عشان العيال تلعب فيها...

الأهالي بيخافوا من الحضانات اللي في دور اول فما فوق ولو عملت احصائية هتلاقي كلامي صح

النظافة ودي بتكون في المربيات او الدادات الموجودين عندك عشان كدا لازم تخحتارهم بعناية فاااااااااائقة لآن اي تقصير ها ينزل على دماغك

بمعنى

لو عيل عيي عندك او اتعور عندك او وقع ع الأرض او اتخبط من المرجيحة او اييييييييي مصيبة

لازم تحاول تتفادي نسبة حدوث المصيبة دا نمرة 1

نمرة 2

يكون عندك طبيب عشان يبقى هوا المسؤوول ولو حصلت كارثا يشيل معاك المسؤولية حبة

بدل ما تلبس اسود :blink:

اعرف شقة تنفع حضانة كويسة جدا في مدينة جديدة جنب المعادي و ايجار الشقة 800 ج قابلة للتفاوض وشالشقة سوبر لوكس في التشطيب

وقعت عليها لما كنت بدور على شقة لأخويا :blink:

العائد بتاعها كويس جدااااااا جداااااا

المهم انك تعرف ها تاخد اطفال من سن كام سنة والا كام شهر

انصحك بلاش شهور

عشان دا وجع دماغ بجد

بس فيه كذا حاجا تنجح المشروع

اهمها المكان

وما يكونش حد جنبك حضانة

وانك تكون عارف اهل الحي او تعرفهم انك ها تفتح .. تستطلع اراء بدل ما تفتح ع الفاضي

دي وجهة نظري الشخصية :)

[bogy]

بنت شعنونة

ربنا يخليكي على مساهماتك الاقتصادية في تقوية المشروعات الصغيرة وازدهار الاقتصاد المصري اللي رايح في داهية

طيب والله كويس إن في ماكينة تطريز بسبع آلاف جنيه. أنا ما كنتش متصور كده خالص! الرسومات والمكان والفلوس والكلام ده مش مشكلة ده أنت ممكن تجيبي أجدع رسمة من على الإنترنت.

بس هل الواحد يبعت المندوب لمحلات الملابس مباشرة كده ولا ايه؟ يعني مش واضح أدامي وسائل تسويق المفارش والفوط والملايات والحاجات اللي عاوزة تسويق دي!! ولا ايه رأيك نعدي على الستات في الشارع ونقولهم اللي بتجهز بنتها عندنا حاجات ايه روعة :) فياريت بخبراتك الاقتصادية تقولي لي على الموضوع ده.

موضوع التك تك ده أنا ما أشجعوش خالص لأن منظره متخلف بيفكرني بالهند وبنجلاديش اللي هايموتوا من الجوع والمصريين هايحصلوهم قريب ده إذا كانوا ما حصلوهمش فعلا!! :blink: وبعدين ما ليش أنا في التسليكات الغريبة دي!!

بالنسبة للحضانة

أنا باشجعها جدا لأنها مربحة جدا وممكن الواحد يعمل عليها كونترول إلى حد ما وكمان أرباحها ممتازة يعني مثلا لو طلع ليكي من الحضانة 10 آلاف مثلا في الشهر وعملتيلك حضانتين تلاتة إن شاء الله حتى عشرة تخيلي بقى ده أنت ممكن تسيبي الدكترة وتتفرغي ليها تماما

الدور الأول مش مشكلة لأن في ملايين الشقق في مصر بس الناس ما عندهاش فلوس فملايين الناس عايشين في المقابر في مصر (شوية عكننة) :P

لكن أنا في نقطة برضه عاوزك تساعديني فيها وهي أنسب المناطق اللي ممكن الواحد ياخد فيها شقة بالإيجار!! يعني هل الواحد يختار المناطق الهاي أوي ولا دي بيكون ساكنها ناس كبار وما عندهومش عيال صغيرة؟ ولا المناطق الجديدة؟ ودي بيكون فيها شباب بس في بداية حياته وممكن ما يقدروش يدفعوا المصاريف!! يا ريت تفيديني في النقطة دي وتحددي التوزيع الجغرافي وخطوط الطول والعرض كمان لو أمكن

وبعدين أنا ناوي أجيب من على الإنترنت مواقع حضانات أجنبية علشان نشوف الإدارة بتاعتها بتكون إزاي والوسائل التربوية والحاجات الخاصة بيها وكده.

وطبعا اختيار الاستف اللي هايشتغل هايكون على أعلى مستوى إن شاء الله. وممكن أجيب ليهم كمبيوتر وأفلام كرتون على سي ديهات تعلم الأطفال السلوكيات بجانب المواد العلمية اللي هاياخدوها. ويكون في تواصل مع الأباء. وممكن يتعمل بروشور يتوزع على سكان المنطقة وعلى العربيات والمحلات.

وموضوع الإصابات ده ممكن نتغلب عليه بإننا نجيب المراجيح اللي يكون ليها حزام وتكون الأرضية خشب أو موكيت عالي علشان العيل اللي يقع ما يتعورش أوي ولا ايه؟ وبعدين موضوع الدكتور يعني أنا مش مستوعبه لأن ممكن الدكتور يطلب راتب شوية آلافات ولا ايه؟ (أنا عارف الدكاترة دول فاكرين نفسهم ايه؟) :blink: ما عدا أنت يا دكتورة شعنونة طبعا.

برضه في موضوع تالت عاوز أسأل عليه هل بتوع الضرايب برضه بيجوا ولازم نعمل ترخيص وكده وأوراق بقى وشغلانة ولا ايه!!

شكرا لكم جميعا على مساعدتكم وربنا يخليلك ولادك اللي لسه ما جوش يا دكتورة شعنونة

تم تعديل 12 أبريل 2006 بواسطة bogy

[بنت شعنونة]

حضرتك اكييييييييييييييد مش عايش في مصر!!!!!!!!!

كلامك خرافي بالنسبة لمشروع مصري...!! :P

بس خليني اخد واحدا واحدا...

بص يا سيدي

المندوب ها يعمل زي ما انا عملت يروح يلف على المحلات اللي بتبيع ملاية مطرزة ويقول سعره وهوا و نصيبه لو عاوز يشتري ها يفاصل معاك في السعر ولو عجبة ها ياخد

لو محل عنده مصنع ها يقولك ربنا يسهلك من اول ما تخطي المحل

لو واحد عاجبه الشغل لكن ما عندوش فايض دلوقتي ها يقولك تعلالي كمان كام يوم

وكدا يعني..

في نفس الوقت في خيمة بيع بتقام في المواسم وفيه منها دائم

دي بقى ماتفوتهاااااااااااش ابدا

في نادي بقى

او في الصيف في المعمورة

او بتاعت فيصل وشارع العشرين

او نادي الأهلي

كل دوووول ما تفوتهمش

صحيح البارتشن غالي حبة بس ها يعملك سمعة وبيع هاااااااااايل

يعني ما تعملش انك ها تكسب مية في المية لكن ها تسوق لنفسك كويس اوي في الموضوع دا

ومنه ممكن تعملك منفذ بيع الناس تيجي تسأل عليك مخصوص

خلي بالك في الصيف الافراح بتكتر جداااااااا

شوف كام عروسة بتجهز بقى وكام ام بتلف عشان تجيب ملايات العروسة :) وكام عيلة عاوزة تهادي بطقم حلو.. دي الخطة يعني..

موضوع الحضانة

على طريقة كلامك دي انت ناوي تعملها حاجا مفتخرة

يعني ها تاخد كام ع الطفل؟؟

ولو حاجا غالية هل الناس المقتدرة دي ماعندهاش دادا تخلي بالها من العيل بدل الحضانة و وجع الدماغ؟

الأولى الناس متوسطين الدخل

اخويا وديته كذا حضاة مرة حضانة اي كلام كانت ب 150 ورجع بعد اسبوع رفض تمااااااما انه يرجع لها عشان كانت الدادات معفنة و بياكلوا اكله وبهدله

ورحنا واحدا تانية ب 300 كانت كويسة نوعا ما بس بعيدة ف بطلنا نكمل معاهم بعد كدا عشان ما فيش حد يوديه ويجيبه..

لازم تكون منطقة سكنية مزدحمممممممة كمان " دي وجهة نظري الشخصية وما تعتبرنيش خبيرة" انا بقولك على اللي حصل معايا..

ليه بقى

لآنه لو منطقة فاضية مين ها يضربلك مشوار؟ ها تقولي ها تعمل باصات يبقى رجعنا نتكلم عن الناس عالية الدخل مش المتوسطة

عامل حسابك ها تاخد كام

الأطفال بيبوظوا كلللللللللللل حاجا يعني ها تخسر كتير.. و لو شغلت عندك مصريين بدون مؤهلات انيل و انيل

لازم تكون متواجد دااااااااائما

البونص بقى ايه

انك تعمل فترة ليلية كمان

يا عييييييييييينيييييي عليك

وممكن دي تبقى تسعيرتها باليوم او الساعا

ناس رايحين مشورا او بتاع

فلللللللة

في واحد اجر دور في مول جديد في اسكندرية وعمله مكان العاب امن للأطفال كله بلالالالالالالاستيك ومطعم كله كراسي ازعة وهمبورجر اطفال و فيديو جيم وكان بالساعة في اي وقت من 10 الصبح ل 12 بالليل

الراجل دا فكرته كانت تحففففففففففة

عيبه المكان

المول ما اشتغالش كويس

بس احنا كنا نروح نحط اخويا هناك لحد ما نخلص لف وشرا حاجات ونرجعله ساعتين تلاتا كدا

واللي كان مخلينا مرتاحين انه موظف بنات محترمات وانجليزي وبتاع..

موضوع الدكتور

لا خالص

انت مش ها تجيب اخصائي

هات اي حد عادي

300 جنيه في الشهر او 500 و يبوس ايدك وش وضهر كمان

" كاتنا الهم"

انا ما قلتش الحضانة دور اول

انا بقول تبقى دور ارضضضضضضضضي

عشان الناس عمالة تسمع عن العيال اللي بتقع من البلكونات " انا بتكلم هنا من وجهة نظر ام "

اعتقد المناطق الجديدة كمان كويسة

بس ها تاخد وقت على ما تعمل لنفسك اسم

سنة او اتنين مثلا

بس انت جبت موضوع ال 10 الاف دا منين؟؟؟؟؟؟؟

دا حتى بالورقة و القلم مستحيل تدخل ربح كدا؟

اكبر حضانة دخلتها كان فيها يجي 50 طفل مثلا؟؟

وكنت رايحا اعملهم حفلة هناك

50 في 300= 15000

شيل منها مرتبات مثلا 5 افراد

400 في 5=2000

بقينا 13000

شيل منها كهربا وحفلات شهرية ولوازم نضافة وملايات والعاب وهالك... يجي 2000 مثلا

يبقى 11000

همم

تصدق ممكن فعلا

بس لا

انا ما اصدقش انه حضانة جديدة ها تجيب العدد دا؟

مش عارفا

انا اتبرجلت حبة

دا غير انه ها يعدي عليك بتاع الطب ويعدي عليك بتاع المطافي دا اللي يديك طفايات والضريبة بتاعتها

السطر الأخير دا مش متاكدا منه...:blink:

[بنت شعنونة]

بص

لو معاك سيولة عندي ليك مشروعين اقووووووووووى من بعض

بس ليا العمولة :P

بنزييييييييييييييييينة

مشروع مضمون الف في المية ولا وجع راس ولا يحزنون

كل اللي ها تعمله ها تشتري الأرض و الشركة بتيجي تعملك التانكات و المعدات وبتدفع كل شهر المعلوم وخلاص

لو حد عاوز المشروع دا

عندي حتة ارض في موقع هايل وهيا كانت بنزينة اصلا

يعني مش ها تتعب في حاجا :)

المشروع التاني...

معمول في دبي وما اتعملش هنا

برضه حتة ارض وتعملها ترااااااااااااااااااك عربيات

زي السبقى اللي كان اسمه حاجا موتورز دا

كل اللي ها تحتاجه كام كوتش عربية قديم يجي 300 كدا تعمل بيهم التراك

وموافقة اتحاد السواقين باين والا معرفش اسمه ايه حاجا كدا مخصوص للسبق بتاع العربيات

وامضاء من كل مشترك انه على مسؤوليته الخاصة

و كشك بيبسي وساندوتشات

ودي جي عالي ومزيكة صاخبة

و السبق ب 20 جنيه مدتة 5 دقايق او اقل

يا بلالالالالالالالالالالالالالالالالالالالاش

يعني كل سبق ب 40 جنيه مثلا

ودخل المتفرج ب 5 جنيه عشان نشجع السياحة

يا عيني على افكاري

والله انا داهية بس محدش مقدرننننننننني :blink:

[bogy]

بنت شعنونة

روحي ربنا يخليكي ويوقفلك ولاد الحلال :angry2:

شوفي بقى يا ستي موضوع البنزينة ده شكله جميل أوي وممكن يكون مربح برضه بس بصراحة أنا ما عنديش أيها فكرة عن الموضوع ده يا ريت سيادتك تنوريني أكتر. يعني حاسس إني مش هاعرف أختار الأرض يعني لو داخل القاهرة ممكن تبقى غالية جدا جدا ولو على الطرق السريعة هاتبقى رخيصة بل هل ها يجي زباين؟!!!!!! والله ما عنديش فكرة خالص!! طيب والمساحة المفروضة؟ يعني هل ممكن خمسمائة متر يقضوا والسلام ولا لازم تكون كبيرة ؟ نورييييييييييييييييينا يا أستاذة أقصد يا دكتورة وإن شاء الله يا رب تاخدي الدكتوراه وتبقي دكتورة بحق وحقيق :o وما تخافيش على موضوع العمولة!! مش هاكل حقك خالص. أول ما يجيلي عشرة مليون بس هاديلك 1 على مليون في المية

مشروع السبق ده مش عارف أنا شايف إنه مش مناسب لي مش عارف ليه!!

طيب ليه بتقولي إني مش عايش في مصر؟ هل علشان كلامي مش واقعي وفاكر إن المشروع هايجيب فلوس كتيرة؟ ولا علشان عاوز أعمل حضانة مفتخرة؟ أنا فعلا بقالي ست سنين برة مصر ومتنيل راجعلها بعد شهرين تلاتة وعاوز أعمل مشروع. ربنا يستر والله ما عارف هاعرف أعيش فيها تاني ازاي. ده أنت كلمتك دي قلقتني جدا ربنا يستر.

خلاص موضوع المندوبين ده فهمتوا وأنا ناوي إن شاء الله يكون ليهم نسبة من المبيعات يعني ما فيش راتب لكن في نسبة مبيعات علشان كل ما يشتغلوا أكتر يجي ليهم دخل أكبر. ده حتى مصر من ضمن جمالها أعتقد إنها البلد الوحيد في الدنيا اللي المندوبين بيطلعوا للبيوت فيها!!!!!!!!!

بالنسبة للحضانة فعلا أنا عاوز أعملها حاجة مفتخرة جدا جدا يعني عاوز أجيب مدرسات يكونوا خريجات لغات وعلم نفس علشان يكونوا فاهمين هم بيعملوا ايه. والدادة طبعا هاتكون برضه متعلمة. ويكون فيها سراير علشان لو الأولاد ناموا ويكون فيها كمبيوتر وألعاب وأنشطة للأطفال. باختصار تنمية المهارات المختلفة للطفل وإكسابه الثقة بنفسه والتعامل مع الآخرين وتنشئته تنشئة نفسية سليمة. بصراحة الحضانات والمدارس كلها في مصر تستاهل تتحط معلش في صفيحة زبالة ويتقفل عليها علشان شكلها وحش أوي، حتى المدارس الغالية والفاخرة باحس إنها مجرد منظر والناس مش فاهمة بتعمل ايه!! والتعليم كله بايظ.

المهم يا ستي ناوي مصروفاتها تكون في حدود 400 أو 500 جنيه (بس) وبعدين الدادة مش هاتعلم الطفل حاجة لكن في الحضانة هايتعلم كمبيوتر وسلوك وقرآن وانجليزي وعربي وحساب وهايختلط بالأطفال وحاجات كتيرة تانية!! وبعدين أنا بافكر أعمل بروشور يكون وش عربي ووش انجليزي يشرح الإمكانيات اللي في الحضانة علشان يجذب الناس تجيب عيالها بس أنت بس ابقي هاتي عيالك عندي ماشي؟ وبالنسبة للسن ممكن من سنتين إلى ست سنوات. ماشي كده؟

بس عفارم عليكي على موضوع البنزينة ده. أنا ممكن أعملها في طريق مصر الإسماعيلية وتبقي تيجي تفولي من عندي.

أنا لو كنت في مصر كنت طلبت منك تفاصيل الشقة اللي شوفتيها لأخوكي بس بعد شهرين تلاتة إن شاء الله أكون في مصر.

في انتظار أرائك القيمة وإجاباتك على أسئلتي الرذلة وروحي ربنا يفتح في وشك الأبواب المقفولة mfb: