ما رأيكم في هذا المشروع

[بنت شعنونة]

بص يا استاذ بوجي

موضوع البنزينة دا ما اقدرش افتي فيه

لكن الأرض اللي شفتها داخل القاهرة وكانت معمولة بنزينة اصلا وصاحبها عارض الأرض للبيع

ف معنى كدا انك مش ها تحتاج تحفر تنكات تحت الأرض

موجودة جاهزة

سعرها اكيد غااااااااااالي جدا بس دا بقى تظبطه مع صاحبها

دي كل معلوماتي

موضوع الحضانة المفتخرة دا ما اقدرش افيدك لأني اعتقد ان المدارس الأجنبية ها تاكل الجو منك والله اعلم لآنها كلها فيها حضانات جاهزة وبنفس سعرك تقريبا

لازم تنزل تعمل دراسة على الموضوع دا فعلا

لآنه لحد هنا واحس ان معلوماتي ممكن تكون غلط :angry: ف مش عاوزة البخ

لكن بما ان حضرتك راجع مصر نهائي

النصيحة

اوعىىىىىىىىىىىىىىىى تحط فلوسك كلها في المشروع

قسمها 4

قسم في البنك وانساه

وقسم صناديق استثمار في البورصة

وقسم مشروع

وقسم عيش منه لحد ما المشروع يجيب عائد

غير كدا ف انت هالك يا ولدي

خصوصا لو عندك عيلة

لو فرداني

قسمها 2 بس ;)

لو عاوز تعرف موضوع الحضانة دا ها ينفع والا لا

اعمل اعلان عنه في الوسيط وسيب نمرت تلفونك

وشوف ردود الفعل عاملة ازاي

ولف على الحضانات برضه وشوف ايه النظام واسال قرايبك اللي ليهم اطفال وكدا يعني

[bogy]

بنت شعنونة

ربنا يخليكي يا دكتورة ويساعدك زي ما بتساعدي الغلابة والمساكين والعيانين. :blink:

فعلا الموضوع عاوز دراسة ميدانية. بس موضوع الإعلان في الجريدة ده مش هايكون مفيد لأن أنت لما تعملي حضانة هاتركزي على سكان المنطقة وتعملي دعاية في المنطقة بس مش في الجريدة. كمان دي هاتكون ميزة نسبية للحضانة لأنها قريبة من الناس فهايوفروا فلوس المواصلات.

على العموم أنا شاكر ليكي جدا مساعدتك وربنا يقدرك على مساعدة الغير دائما ويفتح ليكي أبواب الخير دائما. وما تنسيش تجيبي عيالك عندي في الحضانة ولو عملت مصنع ملابس تجيبي ليهم الملابس برضه من عندي. :blush:

[ابن بلد]

اخى العزيز بوجى

مش عارف ليه عاوز تبدا مشروع كبير ومكلف من البدايه.....( السوق المصرى عاوز اللى يحسس عليه)

من خلال تجربه ضئيله زمنيا فى مصر لاتتعدى الخمس سنوات فى مجال التجاره ارشح لك ان تفكر فى المناطق السياحيه مثل شرم الشيخ مثلا وتحصل على محل هناك بالايجار فى البدايه وقد يكون الايجار مكلف شويه وتفكر فى تقديم مشروع خدمى مثل المطاعم مثلا او الكافيه او السيبر ( خدمات انترنت ) من خلال زيارتى لتلك الاماكن وجدت تلك المشروعات مربحه جدا

من الممكن لو تشعر ان تلك المشاريع ليست ذات قيمه اجتماعيه لك ان تفكر فى المشروعات التجاريه مثل بيع ملابس واحذيه شرقيه التى تتميز بها شعوب الوطن العربى فالسياح يميلون لارتداء تلك الملابس اثناء وجودهم فى مصر اثناء السياحه وهى من ناحيه التسويق سهله جدا ورخيصه جدا ومستوى الربح منها قد تجده عالى جدا

كفايه كده المره دى بس المشاريع تلك محتاجه زياره للمناطق تلك فى البدايه لتحديد طبيعه المشروع الغير متوفر هناك ودراسه السوق عن قرب وارشح لك شرم الشيخ لان السياحه فيها الان طول العام فى مصر

[magdy]

مشروع بالعامريه بالأسكندريه :-

به احواض اسمنتيه لتفريخ اسماك البلطي وتربيه الذكور علي المياه الجوفيه العزبه بطريقه الانتاج المكثف نرحب بمن يرغب بالعمل بنظام العموله وحوافز الانتاج ونسبه من صافي الربح قمن يجد في نفسه الكفائه والرغبه يتقدم بعنوانه ومؤهلاته - الاولويه للمؤهلين انتاج حيواني تخصص اسماك ولديهم الخبره -الاتصال صباحا -ت 3634520 012 او ت 0103541149- المشروع يؤمن السكن بالموفع

[واحد تاني]

دا اعلان دا يا مرسي ؟ :angry:

[Tafshan]

انا كان ليا شوية تجارب في مجال العمل الحر انا و مجموعة من اصدقائى و للأسف كانت غير مربحة بالقدر الكافى و ذلك لأن البداية كانت متواضعة و بالتالى كان المكسب ايضاً متواضع .. بدايةً ابدأ بموضوع الملابس - حيث انك قد ابديت اهتمامك به - قام به زميل اثناء و بعد التخرج مباشرةً ثم اصابه قطار الجيش 3 سنوات و بالتالى تم القضاء على المشروع ..

اولاً : العمل الحر صغير رأس المال في مصر يجب - للأسف - ان يبتعد عن سكة التراخيص و الا ستكون نهايته مروعة ..

ثانياً : مجال صناعة الملابس الجاهزة يعتبر مجال جيد و له ظروف و قواعد محددة في السوق يجب اتباعها و هى

1- اغلب السوق يقوم بعمل فاتورة دائرة بمعنى انك ستعرض الملابس لديه و تقوم بتحصيل ثمن المباع منها كل اسبوع و بالتالى يجب ان تقوم بذلك بنفسك لضغط التكاليف .. اذا كان انتاجك جيد سيحافظ عليك صاحب المعرض و بالتالى فموضوع التحصيل مضمون الى حد كبير

2- يجب ان تكون متميز في عنصر القماش بمعنى عند شرائك اقمشة للمصنع احرص على ان تشترى كل ما لدى التاجر من نفس الصنف و بذلك يكون لديك منتج منافس و مميز .. الكمية لدى التاجر غالباً تكون معقولة و ليست ضخمة مما يسهل الامر .. و اغلب هؤلاء التجار في وكالة البلح

3- العمالة المطلوبة

- بترونيست (عامل بترون) و ممكن الاتفاق معه على العمل بالقطعة للتوفير

- مقصدار : (عامل قص )

- سنجر : (عامل تقفيل )

4- المكينات :

- مكنة اوفر

- مكنة سنجر

- مكوى

5- المطبوعات :

- اكياس

- تكت قماش

- تكت ورق

- تكت مقاس

و ربنا يوفق ..