مطلوب .. ومهما كان الثمن .. ندفع !!

[حفيد إخناتون]

مطلوب ضمير حى .. شفاف.. طبيعى.. ومش مدهون

رعرع فى أرض مصروارتوى من نيلها وبيحبها بجنون

بدل اللى مات عندنا من زمان مخنوق

م الكذب .. والرشوة .. والنفاق ..أس الفساد فى الكون

---------------------------

وعشان تلاقى واحد عنده ضمير .. فى بلدنا مصــــــــر

لازم تسافر بلاد بعيدة , وقريبة .. من الضحى للعصـــــر

أو تبص معانا فى عشش الغلابا .. فى القرى والنجوع

أوفى مياه النيل تلاقيه بيصارع امواج النفاق ومش لاقى بر

------------------------

كان الضمير عندنا .. سعيد .. شبعان من خير مياه النيل

إنقرض من يوم بناء السد وجر معاه.. جيل وراءه جيل

وأسألوا سمير رجب وابراهيم نافع وابراهيم سعده

مين قتل ضمير الخلايق وعمل للنفاق الف سبيل !! ؟

------------------------

ألف سبيل .. فى كل شارع وحارة ..حتى فى كل إدارة

ماتشوفش غير السحالى بتسرق مال اليتامى ياألف مليون خسارة

حتى النجاح فى الصناعة او التجارة سرقوا فرحته .. من كل ناحج

وقالوا عليه .. دا مختلس وحرامى وناهب فى مصر التجارة ؟؟

-------------------------

صبغوا شعورهم .. بلون قلوبهم .. بلا حياء ولا خجل ..

ومدوا إيديهم فى جيوب ولادهم ..شوف الهبل

آل إيه .. ما كفاهمش العرق والدم خمسين عام

جابوا غراب الكترونى .. يورينا كيف ندفن جنب ضميرهم كل الأمل

-------------------------

حفر الغراب .. على ضفاف النيــل قبور كثيرة لآمالنـــا

وفسر كساد التجارة .. ووقف الحال بانه السعد بعد غياب جالنا

أنا قلت إذا كان السعد فى شحاته المعونات م الغير وتزيف الحقائق

يبقى يلعن أبو دا سعد .. وخلينا كده ننزف ونبقى عبرة لآجيالنا

------------------------

قولوا لغراب الكمبيوتر .. كفاية كذب .. وتصريحات وردية

دا الفقر أقوى بيان ..سامع آهات التجارة ويا الصنايعية ؟

كل السلع ولعت .. حتى أسعار الجرائد .. أبواق النفاق

ولا عاد نافع تجارة .. أو معاش .. ولا ميراث أو ماهية ..؟

-----------------------

وعليكى العوض يامصر

تم تعديل 9 أبريل 2006 بواسطة حفيد إخناتون

[eastsoul]

جميلة اوي يا حفيد إخناتون و احساسها عالي خصوصا في المقطع ده :

مطلوب ضمير حى .. شفاف.. طبيعى.. ومش مدهون

رعرع فى أرض مصروارتوى من نيلها وبيحبها بجنون

بدل اللى مات عندنا من زمان مخنوق

م الكذب .. والرشوة .. والنفاق ..أس الفساد فى الكون