أرغب فى السفر برا من الرياض للقاهرة

[mashy]

الموضوع داخل دماغي و مش عاوز حد يقولي عيوبه و مصاعبه ان كل اللي عاوز اعرفه هتتكلف كام الرحلة بسيارتي الخاصه من الرياض الي القاهرة شاملة كا حاجه

يعني شحن السيارة

فرد علي العبارة

جمارك السيارة تريبتيك لمدة 3 شهور ..

بصراحة الموضوع ده داخل نافوخي و مش هيطلع بس عاوز اعرف تكاليفه كام و شكرا

تم تغيير العنوان ليعبر عن الموضوع

تم تعديل 30 مايو 2006 بواسطة عادل أبوزيد

[elhondos]

تعالى نحسبها شحن السيارة 275قرش ...فرد على العبارة قول ياسيدى 125 قرش...الجمارك بق وما ادراك ما الجمارك دى بق اللى هتسويك لو افترضنا مثلا ان العربية مثلا جايبها ب15 جنيه يبق عليها جمرك قول 5000يورو...ونصيحة منى لو العربية بتشتغل بالحجارة هاتلها حجرين القط الاسود وانت جاى معاك اصله شاحح من هنا اما لو كانت بالريموت كنترول فيبق احسن ...وبعدين انا مش عارف انت تاعب نفسك ليه تعالى يا عم مصر هنا محلات لعب كتيرة اشتري للعيال دستة عربيات من هنا وريح دماغك بدل التكاليف دى كلها اللى ع الفاضى

[هادي]

عزيزي الاستاذ mashy

تحية طيبة

ونرحب بك عضوا واخا كريما في المحاورات

ولو أذنت لي بعرض رأي شخصي .. أقول ..

الموضوع يصبح ذو جدوى لو حضرتك نازل اجازة ثلاث شهور على الاقل

وتحتاج السيارة احتياج حيوي في تنقلاتك

ومعك وزن كبير - من أمتعة و أدوات جديدة - ولا ترغب ان تدفع عليه وزن في الشحن الجوي

لكن غير ذلك .. فمشقة الطريق (خاصة في وجود اطفال)

وتهليب رجال الجمارك الاشداء

ثم احتمال تعرض السيارة لخبطات حتى وهي واقفة في الشارع تحت البيت

كل ده يجعلك تفكر الف مرة قبل اتخاذ هذا القرار

لاحظ:

مشقة المشوار هي ثلاث مراحل .. كل واحد أصعب من أخوه

المسافة من الرياض الى الحدود السعودية .. وهذه ستكون 1200 كيلو متر بالتقريب

ثم من الحدود السعودية الى المصرية

ثم المسافة من داخل مصر الى بيتك بسلامة الله

احسبها تاني و شاور نفسك

لي اصدقاء فعلوها من الرياض وندموا

لكن انا لم انفذها بنفسي أبدأ

ولهذا اعذرني على عدم ذكر ارقام او مبالغ محددة

تحياتي

قمت بتعديل مداخلتي لاضافة اسم الاخ الكريم mashy في البداية

تم تعديل 31 مايو 2006 بواسطة هادي

[احمد هادي]

تعالى نحسبها شحن السيارة 275قرش ...فرد على العبارة قول ياسيدى 125 قرش...الجمارك بق وما ادراك ما الجمارك دى بق اللى هتسويك لو افترضنا مثلا ان العربية مثلا جايبها ب15 جنيه يبق عليها جمرك قول 5000يورو...ونصيحة منى لو العربية بتشتغل بالحجارة هاتلها حجرين القط الاسود وانت جاى معاك اصله شاحح من هنا اما لو كانت بالريموت كنترول فيبق احسن ...وبعدين انا مش عارف انت تاعب نفسك ليه تعالى يا عم مصر هنا محلات لعب كتيرة اشتري للعيال دستة عربيات من هنا وريح دماغك بدل التكاليف دى كلها اللى ع الفاضى

عزيزي ..........

الموضوع موجود في باب المغتربين المصريين لصديق يرغب في الحصول علي معلومات

وليس في باب الابتسامات

لذلك............

اعتقد ان التوفيق لم يحالفك في اختيار التعليق المناسب

مازلنا ننتظر مشاركاتك الباسمة ............ في مكانها المناسب

ولك مني كل الحب والتقدير

تحياتي

[أسد]

شوف ياسيدي ..

أول حاجة تعملها .. تعمل دفتر تربتك للعربية ..

ده تكلفته 550 ريال .. ومدة صلاحيته سنة ..

أماكن إصداره كل مكاتب السفر والسياحة وحجز التذاكر ..

أيضاً .. مكاتب النادي السعودي للسيارات في شارع العليا العام بعد مجمع الموسى ..

ثانياً .. تحجز لك وللعربية ولعائلتك أماكن على العبارة ..

أماكن الحجز الشهيرة في منطقة البطحاء . مكان النقل العام القديم . أو في عمارة سميراميس فيه مكتبين تحت العمارة بيعملوا الحجوزات دي ..

الأسعار للأسف مش متأكد منها لأنها أعتقد السنة دي حتكون مختلفة بعد حادثة غرق العبارة ..

يمكنك السفر عن طريق ميناء ضبا في السعودية .. وده الأفضل .. توصل في مصر إما في سفاجا أو الغردقة ..

ويمكنك السفر عن طريق نويبع .. وأنا لا أرجح هذا ..

السفر من الرياض إلى ضبا :

أولاًَ .. السفر براً .. يعني تقود سيارتك من الرياض إلى القصيم 330 كم ثم إلى حائل 350 كم ثم من حائل إلى تبوك حوالي 700 كم ومن تبوك إلى ضبا 180 كم

الطريق في مجمله كويس عدا الوصلة من تبوك إلى ضبا .. فتمر بعقبة نازلة من أعلى .. والقيادة فيها صعبة إلى حد ما ..

عند إختيارك هذا الأسلوب .. يجب أن تكون سيارتك كويسة . يعني مضمون إنها إن شاء الله لا تتعطل بك في الطريق .. الكاوتش جديد .. الحرارة مضبوطة ..

ثانياً تكون أنت واخد ومتعود على القيادة لمسافات طويلة ..

هذا الحل هو الأقل كلفة إذا كان عدد الأسرة كبير أو غير قليل .. ولكنه أكثر مشقة وخطورة ..

الحل الثاني .. أنه تشحن سيارتك من الرياض إلى ضبا . في حدود 350 أو 400 ريال .. وتركب اتوبيس النقل الجماعي من الرياض إلى ضبا ..

وهذا الحل مريح نسبياً .. لأنك لن تقود السيارة في السعودية مطلقاً..

الحل الثالث .. وهو الأقل مجهوداً والأعلى كلفة ..

تشحن السيارة إلى تبوك .. وتركب الطائرة من لارياض إلى تبوك .. ومن هناك تستلم العربية من مكتب الشحن وتسوق إلى ضبا 180 كم فقط .. وتوصل ضبا لتبدأ رحلة العبارة ..

[أسد]

يجب أن تكون في ضبا في الصباح الباكر من يوم سفرك إللي إنت حاجز العبارة عليه ..

ده مهم .. علشان تلاقي مكان في العبارة .. فكونك حاجز ولديك حجز على العبارة . لا يضمن مكانك .. فالساعة 12 ظهراً يبدأون في تسجيل ركاب من قوائم الإنتظار .. وإذا لم تكن موجوداً في هذا لاوقت سيلغى حجزك ..

سيتم تحديد موعد ذهابك إلى الميناء .. وهناك ستقوم بإنهاء إجراءات التربتك في السعودية وختم الجواز ودفتر التربتك وإنهاء إجراءات تصدير السيارة..

وده بيتم في شباكين أو ثلاثة .. وبدون رسوم .. المهم يكون معك استمارة السيارة سارية المفعول .. ودفتر التربتك وجواز السفر ..

بعد كده حتدخل السيارة إلى العبارة بنفسك ,, وتركنها بداخل العبارة بناء على إرشادات مجموعة من البحارة ..

لازم يكون معاك فلوس فكة . يعني 10 ريال أو 10 جنيه علشات تديهالهم ..

حافترض إنك راكب العبارة السريعة .. ودي حتاخد المسافة من ضبا إلى الغردقة في 3 ساعات أو 3 ساعات ونصف حسب حالة البحر ..

العبارة جيدة .. وكراسيها مريحة .. تقدر تنام شوية في العبارة على الكرسي ..

لكن الدوشة وحرصك على متابعة أطفالك قد تمنعك من النوم ..

بعحياخدوا جوازاتكم على العبارة .. وإنت داخل .. وبعدين يختموها ويسلموها لكم قبل وصول العبارة ..

إذا كنت مجدد جوازك في السعودية ولم تكمل 40 سنة ..لن يسلموك الجواز .. وستقابل ضابط أمن الدولة في ميناء الغردقة .. حيسألك كام سؤال ملهومش لازمة وبعدين يعطيك الجواز وخلاص .. في إجراء ملوش معني قد يعطلك على الأقل نصف ساعة أو 4 ساعات حسب ظروفك ..

المهم ..

حمد لله على السلامة وصلت إلى ميناء الغردقة ..

تم تعديل 31 مايو 2006 بواسطة أسد

[أسد]

في ميناء الغردقة ..

مايغركش الإسم ..

الميناء تعبانة وفقيرة إلى أقصى درجة .. هذا بالإضافة إلى أنها صغيرة جداً .. ومستوى النظافة فيها (مفيش خالص)..

حتاخد العربية بتاعتك .. وتنقي لك عامل شيال يساعدك في الميناء .. ماتفكرش تستغنى عنه .. مهم جداً ..

حينزل الشنط والحاجات إللى معاك كلها من العربية ..

ويعديها على جهاز الفحص .. (السير) ..

حيجيلك بتاع الدفاع المدني (المطافي) يسألك عن الطفاية .. لازم تكون معاك طفاية جديدة وصالحة .. أو إنك ستضطر لشراء واحدة بافاريا من عندهم ..

وإنت تطلع العربية على حفرة مرتفعة جداً علشان بتوع المتفجرات يكشفوا عليها ..

حيجيلك كام واحد ماسكين مفكات وزرادية في إيديهم .. بنمنتهى لاهدوء توريهم العشرين جنيه (على الأقل) .. وهو حيمد إيده ياخدها .. ماتمدش إنت إيدك بيها .. هو إللي حيتصرف .. طبعاً ده أمين شرطة .. مش ظابط .. إوعى تعمل الحركة دي مع أي ظابط ..

تنزل العربية من على الحفرة وتقف في ساحة ضيقة .. إتبع التعليمات الموجهة لك ..

عينك بصورة متقطعة على حاجتك ..

في تلك المنطقة حتعمل مجموعة من الإجراءات .. في الحقيقة أنا مش عارف الترتيب بالضبط .. لأني في كل مرة بيكون معايا حد واسطة بيخلص لي كل الحاجات دي بسرعة ..

طبعاً ياسعدك ياهناك لو لك واسطة هناك ..

التربتك ..

لو سيارتك أقل من 1300 سي سي حتدفع 250 جنيه

لو أكثر ولكن أقل من 2000 سي سي حتدفع 500 جنيه

لو أكثر من كده حتدفع 1000 جنيه ..

المدة المسموح بها هي 3 شهور ..

تجدد بمبلغ مماثل ...

حتعمل بوليصة تأمين على العربية .. حوالي 60 أو 70 جنيه ..

حتحتاج تصور الجواز وبعض الأوراق وتشتري منهم دوسيه ..

الحاجات لازم تعملها هناك .. مفيش فايدة إنك تصور الجواز قبل ماتسافر .. لأنه لازم تصور تأشيرة الدخول ..

فيه فحص فني للسيارة .. حتدفع حوالي 30 جنيه ..

فيه واحد حييجي ياخد بصمة الموتور .. ده لازم تدفع له 20 جنيه وإلا حيخليك للآخر ..

بعد كده حتعمل رخصة السير المؤقة .. وتاخد لوحات جمارك مصرية ..

حتدفع لك في الحاجات دي حوالي 300 أو 400 جنيه كله على بعضه غير التربتك ..

حيجيلك بتاع الجماركوإنت مكانك .. يفتش .. وتدفع إذا كان معاك حاجة ..

كل ده والشيال إللي إنت أجرته .. بيكون معاك .. بيخلي باله من الحاجة .. طول الوقت حيقعد يديك في نصايح .. مشي معاه .. واسمع .. بعضها مفيد .. وبعضها كلام فارغ .. إسمع من هنا وفوت من هنا ,,,

بعد ماتخلص .. حيحملك الحاجات بتاعتك في العربية .. تمم عليها كويس ... وتأكد من أنها مربوطة تمام وكاملة ..

تاخد عربيتك وتتجه خارج الميناء .. حتلاقي واحد أو إثنين على البوابة حيطلب منك الجواز .. تديهوله ..وتعامله كويس .. حياخد الجواز .. ويتنح ويقولك حمد لله على السلامه ..

برضه .. وريه العشرة جنيه في إيدك .. هو حيمد إيده يديك الجواز وياخد الفلوس .. ويقولك مع ألف سلامة .. العساكر حتفتح لد باب الميناء .. وتخرج من الميناء ..

حتلاقي الغردقة حاجة تانية خالص غير إللي بتسوفه في التليفزيون أو بتسمع عنه .. ما علينا .. خلينا في موضوعنا ..

إذا كنت متجه إلى القاهرة ..

فالطريق من الغردقة إلى القاهرة ممتاز .. مزدوج .. السرعة محدودة كالمعتاد 100 كم / ساعة .. ولكن هناك منطقة حوالي 70 كيلو بين الزعفرانة والعين السخنة .. الطريق فيها فردي .. وفيه لفات كتير مفيش فيه مرتفعات أو منخفضات .... تخلي بالك من السواقة في المنطقة دي ..

إذا متجه للقاهرة .. تاخد طريق العين السخنة القطامية الجديد .. الطريق ده هايل .. حارات كتير والسرعة فيه 120 كم / ساعة .. سعر المرور 5 جنيهات .. طريق دولي .. زي الطرق الكبيرة إللي في السعودية ..

توصل بألف سلامة ..

إذا كان لديك سؤال محدد سأجيبك عليه طبعاً ..

تحياتي ..

تم تعديل 31 مايو 2006 بواسطة أسد

[هادي]

حبيت بس اسلم على اخي الكريم الاستاذ (أسد)

واشكره على كل حرف في مداخلته

بصراحه

انا باحب الناس اللي بالشكل ده

باحس ان كلمة ( جدعنة ) ليها معنى و كمان ليها وجود في دنيا اليوم

الف شكر

[أسد]

حبيت بس اسلم على اخي الكريم الاستاذ (أسد)

واشكره على كل حرف في مداخلته

بصراحه

انا باحب الناس اللي بالشكل ده

باحس ان كلمة ( جدعنة ) ليها معنى و كمان ليها وجود في دنيا اليوم

الف شكر

أسرتني أخي هادي بكلماتك الرقيقة ..

بل أنت أيضاً رائع .. بل أروع بكثير ..

لك مني كل التحية ..

[فولان بن علان]

أشكرك أستاذ أسد شكراً جزيلاً على هذا التفصيل

الذي لم يترك صغيرة

أود فقط أن أشير إلى حكاية العشرة والعشرين جنيه إياهم

ممكن الواحد عشان ما يأزمش نفسه ينوي إن دي مساعدة مش رشوة والعياذ بالله

لكن فعلا استفدت من كلامك إن السفر برا بالسيارة بلاش منه أحسن

لو تأجر سيارة بعض أيام الأجازة أو حتى تاخد تاكس في كل مشوار

أو يعني لو عندك عزيز عليك ممكن يسلفك سيارته

ممكن يكون أرحم وف بعض الأحيان يكون أوفر

[أسد]

أشكرك أستاذ أسد شكراً جزيلاً على هذا التفصيل

الذي لم يترك صغيرة

أود فقط أن أشير إلى حكاية العشرة والعشرين جنيه إياهم

ممكن الواحد عشان ما يأزمش نفسه ينوي إن دي مساعدة مش رشوة والعياذ بالله

لكن فعلا استفدت من كلامك إن السفر برا بالسيارة بلاش منه أحسن

لو تأجر سيارة بعض أيام الأجازة أو حتى تاخد تاكس في كل مشوار

أو يعني لو عندك عزيز عليك ممكن يسلفك سيارته

ممكن يكون أرحم وف بعض الأحيان يكون أوفر

والله أنا معاك ..

أنا شخصياً أكره دفع مثل تلك الأموال بتلك الصيغة ..

لكن إذا كنت مضطر .. فلا مفر ..

للأسف الشديد ..

أعتذر عن إدراج مثل تلك المعلومات في مداخلتي .. ولكنها حقيقة مرة موجودة بالفعل لا يمكن إنكارها ..

أما موضوع إستئجار سيارة في مصر .. هذا أمر آخر ..

وكل أدرى بظروفه وإمكاناته ..

وأنا شخصياً .. سافرت مرات عديدة بسيارتي ..

ومرات عديدة أيضاً إستأجرت سيارة في مصر ..

تختلف معايير تقييم هذا الأمر .. من شخص لآخر .. حسب ظروفه ومكان إقامته .. ومدى إحتياجه الحقيقي للسيارة ..

فمثلاً .. شخص يمتلك سيارة فاخرة ..

يصعب إستبدالها بسيارة مستأجرة صغيرة في مصر ..

تحياتي

[أسد]

معلومات جديدة ..

لا ينصح بالسفر بالسيارة براً هذا العام .. نظراً لوجود مشاكل في العبارات حالياً ..

لا أحد يعرف أي حاجة في أي حاجة ..

العبارات قليلة جداً ومحدودة ..

الناس تنتظر في ضبا أيام ليجدوا مكان على العبارة الوحيدة ..

الناس تنتظر أيام وليال في ميناء العقبة ليجدوا أي مكان ..

إصرفوا نظر هذا العام حتى تتضح الرؤية

تحياتي

[deemuck]

السلام عليكم ورحمة الله وبركاته ،،

الموضوع مفصل جدا، بس اخر شيء السنة دي كان دفتر التربتك من السعودية ب حوال 900 ريال.

[أبو زياد]

السلام عليكم و رحمة الله و بركاته ..

تحية طيبة لجميع الإخوة الأفاضل ..

بادىء ذى بدء أتوجه بالشكر لكل من إخوتنا هادى و الأسد : أسد

وقد فوجئت برده المفصل المخلص و لا يسعنى إلا أن أقول له : الدنيا لسة بخير حتى لو وجد غير ذلك .. و أكثر الله من أمثالك ..

أيضا أخى الفاضل هادى .. لقد جئت لتفدنا بمعلوماتك رغم وجودك فى كندا و لكن رغبتك فى العطاء المعهودة بك تغلبت فشكرا لك ..

أخى العزيز ديماك .. هذه المعلومة عن سعر دفتر التربتك جديدة على فارجو منك التأكد بشأنها ..

أنا كنت أفكر جديا أيضا فى السفر بسيارتى و لكن هذا اللقاء و المعلومات القيمة قد تعيد بى النظر فى الأمر ..

معلوماتى أن التكلفة الكلية للرحلة هى 2700 ريال كإجمالى للرسوم و ذلك عن طريق الأردن الذى أصبح يفضله الكثيرين لتفادى مشاكل العبارات حيث المسافة صغيرة و تقاطر العبارات أفضل ..

أما إجمالى تكلفة الرحلة فيمكنك أن تضيف على هذا المبلغ من 1000 إلى 1500 ريال كمصروفات نثرية - تشمل البنزين و الإستراحات و زاد الرحلة ثم .... النقط التى أفادنا بها الفاضل أسد و هى بالفعل لا مفر منها و لكن للأسف غير منظمة و غير محسوبة ..

سوف أعيد التفكير لأن المصاريف هكذا أصبحت قريبة من تكلفة الطيران بالنسبة لأسرتى و قد تختلف عند الآخرين ..

أما بالنسبة للحاجة إلى سيارة فى الأجازة فهذا أيضا خاضع للتغيرات و لكن يجب إدراك سلبياته كعدم التعود على طبيعة القيادة و استهلاك البنزين و الصيانة .. و المشاكل غير المتوقعة كما تفضل

الإخوة و خصوصا أن سيارتك جمرك و ما أدراك ما الجمرك ...

فى النهاية أتمنى للجميع أجازة سعيدة و أن تدعو لى بمراجعة التفكير ليس فى السيارة فقط بل فى فكرة الأجازة فى حد ذاتها .. ما هى الظروف فى مصر ..وهل يمكن للإنسان أن يغيب أكثر من سنتين ..؟

شكرا لكم و دعواتى مرة أخرى .

[قديم]

مشكور يا اسد وفيت وكفيت

معلومه عامه.. انا سافرت الطريق هذا من الرياض الي ضبا الي القاهره ..

لن اتحدث بما تحدث به الاسد .. فقد شرح تفصيلا جميلا

ولكنني اضيف ان الرحله تكلف حوالي اربعه الاف ريال ذهاب وعوده . ((شامله البنزين وهدايا بعثات الحكومه ))

ايضا هناك راي اخر ...وهو شحن السياره الى السويس وهذا يكلف حسب معلوماتي ( قبل سنتين ) لا اعلم هل تغير او لا زال 2600 ريال . شحن ذهاب وعوده فقط .. الاستلام في ميناء السويس ونت تخلص العربيــه وكل المصريف الاخري ..

عموما الرحله لمن ليست ممله او مزعجه .. كما قد نتصورها ففي المره الاولي فقط جميله جدا وتعتبر رحله مشوقه لانك راح تشوف اشياء لم تكن تتوقع ان تشوفها .

الرحله عموما ممتعه الى حد ما .. سواء في الاراضي السعوديه الطريق وفي الاراضي المصريه العقبه الوحيده .والمزعجــه هــو

((من طابور حجز المركب في ضبا الي بوابه الخروج من جمرك الغردقه ))) قد يستغرق ضعف وقت الرحله حوالي اربع وعشرين ساعــه .

انا انصح بالمركب البطي لانه يعطيك وقت كاف للاسترخاء (غر ف خاصه مكيفه 2 سرير او 4 سرير بدوره مياه )

حوالي 14 ساعه بالمركب كافيه تغير ملابسك

_الرحله 8 ساعات من اول ما تتحرك الي ان تقف في الغردقه

..احسب 3ساعات قبل ما يتحرك المركب و3 ساعات بعد ما يتوقف

واحسب اجراءات الجمارك في الغردقه .. لن تكون اقل من خمس ساعات

وطابور المركب والحجز كمان ساعتين امام ميناء ضبا و اساعتين في مكتب الشركه بضبا

الطريق في مصر جميل جدا وامن مروريا وبشريا والطريق غير مزدحم بالسيارات . اعتبرها رحله ونزهه ..

هناك طريق اخر من الزعفرانه باتجاه الغرب..بني سويف اوالمنيا اعتقد وبعدين تكمل بماخذات النيل تقريبا

باتجاه القاهره ( الطيق هذا بعيد يزيد حوالي 150 كلم متر )

تم تعديل 13 مارس 2007 بواسطة قديم

[deemuck]

السلام عليكم ورحمة الله وبركاته،،،

لي زميل بالعمل سافر العام الماضي بسيارته وكان دفتر التربتك ب 700 ريال. من 5 سنوات كان ب 120 ريال!

ديم مق

[car]

السلام عليكم

على فكرة انا جربت السفر من البحرين الى مصر

وكانت رحلة جميلة جدا

ومخدتش وقت

وعملنة عمرة في الطريق

البحرين - الدمام الرياض مكة جدة

وركبنا من جدة للسويس العبارة وكانت ممتعة 43 ساعة

ومن السويس للقاهرة

المسافة من البحرين للقاهرة سواقة حوالي 1750 كيلو فقط

طبعا فيه مشكلتين

الولى التكلفة

الثانية جمرك السويس حرامية ومفيش مكان تستريح فيه

شكرا

[مسمار]

ارجوك متسافرش بالعربية

لاني انا مريت بالتجربة دي في صيف عام 2006 في شهر اغسطس

وكانت تجربة تعيسة جدا جدا , فقد بقينا في ميناء الغردقة من الساعة 7 الصبح لحد الساعة 4 العصر

وكانوا كل شوية يدونا ورقة .... ! ورق للفحص وورقة للمتفجرات وورقة للطفاية ( رغم ان عندنا طفايتين لكن اجبرونا نشتري منهم طفاية بتمانين جنية ) دول حتى عملوا فيش وتشبية للعربية وجه واحد بالشاكوش والازميل وقعد يخبط في العربية عشان ينقش ليها الفيش والتشبية ؟؟؟؟؟؟

تجربة قاسية جدا ,, وكنا مش قادرين نخرج من المكان اللي وضعونا فيه عشر ساعات بدون اكل ولا شرب

وكل شوية يجيبوا لينا ورقة جديدة واحنا قاعدين ندفع ( دي طلعت الحكاية يجي خمسة الاف يا راجل مع البخشيش طبعا !!!

ارجوك متسافرش بالعربية لان بتوع الغردقة هيعذبوك عذاب القبر

[ohamed]

الى الاخ المستفسر على نزوله بالسياره اولا اقول لكم جميعا السلام عليكم ورحمة اله وبركاته احب ان اذكر لك اننى منذ 9 شهور انتقلت من جده الى الرياض وبعد ثلاث شهور ساسافر الى القاهره ايضا بالسياره وعلى فكره انا بمشيئة الله تعالى سوف اسافر بالسياره عموما وعذرا على الأطاله انا وجدت ان افضل حل ان انا احجز عن طريق الشركه اوالشركات الجديده (الطيران )لى واشحن السياره من الرياض الى جده قبل موعد السفر بثلاث ايام واذهب عن طريق جده الى السويس واعتقد ان التكاليف لن تزيد عن اى مره تزلت فيها بالسياره يعنى شحن الشياره من الرياض الى جده حوالى 500 ذهاب وعوده دى الحاجه اللى مش متأكد منها اوى ولكن مش هتزيد او هتقل كثيرا والتربتيك حوالى 450- 500 ريال

3- شحن السياره الى السويس 1100 ريال + 150 للمكتب اللى هيشحن السياره + طبعا التذكره الخاصه بك وهى حوالى 500 الى 600 ريال ذهاب فقط وطبعا من مصر هتقطع عوده لك بس السياره ملهاش عوده من مصر بس مجرد رسوم للمكتب حوالى 100 - 150 جنيه

واخير اتمنى لك سفرا سعيدا

والسلام عليكم ورحمة الله وبركاته

[essamalshaaer]

الأخ .... معلم من يومك .....سؤال

طيب لو انا نازل بعربية الشغل .....يعني سمحت لي الشركة آخذ عربيتها وانزل

هل ده ينفع ,,,,...؟؟؟؟؟ .... مع العلم الزملاء في الأردن معانا فيهم ناس بتنزل بيها

هل مصر نفس الشيء ...؟؟؟

وألف شكر مرة تانية لكل الزملاء وليك انت بشكل خاص جدا

أخــــــــوك/ أبـــوعــــلـــــي من الرياض