مصرى يريد الانضمام لمحاورات المصريين

[محمد عبدالعزيز]

السلام عليكم ورحمة الله وبركاته

أنا اسمى محمد عبدالعزيز مهندس كمبيوتر من اسكندرية عمرى 29 سنة إلا 3 شهور تقريباً

طبعاً أنا اتأخرت شوية فى التعريف بنفسى بس عذرى إن مواضيع المغتربين وفكرة الاستقرار فى مصر والمشاركة فى اﻹصلاح وغيرها غيرها مما يغرينى من مواضيع جعلنى أنسى أن أعرف نفسى

بصراحة كانت لى مشاركة فى منتدى شهير جداً ولكنى توقفت منذ فترة عن المشاركة فى أى منتديات بسبب ممارسات لم تعجبنى فى أول تجربة لى, ولكن المواضيع فى محاورات المصريين شجعتنى إنى أشترك تانى

أتمنى أن لا تتكرر التجربة مرة أخرى :lol: هنا ﻷنى بصراحة حبيتكم جداً

تحياتى لكم جميعاً

[م الغزالى]

أهلا بك ياباشمهندس ده بيتك ومطرحك

ومنور المكان كمان

وبعدين جاى بعد 13 مداخلة تقول أنا عضو جديد

عموما لازم برضه نقوم بواجب الترحيب

الحقيقة انا متابع مدخلاتك من أول مداخلة و أحيى فيك روح الإيجابية فأنا أحب بالفعل الشباب إلإيجابى يعنى قولا وفعلا

تحية طيبة لك منى رغم أننى أيضا عضو جديد من 4 شهور لا أكثر

تقيل تحياتى

[محمد عبدالعزيز]

أهلا بك ياباشمهندس ده بيتك ومطرحك

ومنور المكان كمان

وبعدين جاى بعد 13 مداخلة تقول أنا عضو جديد

عموما لازم برضه نقوم بواجب الترحيب

الحقيقة انا متابع مدخلاتك من أول مداخلة و أحيى فيك روح الإيجابية فأنا أحب بالفعل الشباب إلإيجابى يعنى قولا وفعلا

تحية طيبة لك منى رغم أننى أيضا عضو جديد من 4 شهور لا أكثر

تقيل تحياتى

الله يكرمك يا أخى العزيز, هى دى شهامة وأخلاق أولاد البلد الجدعان.

والله أنا فعلاً كنت متحمس جداً أقول رأيى عشان كده اتأخرت فى التعريف بنفسى أو تقدر تقول ماخدتش بالى.

عموماً يعنى ملحوقة دول كلهم 13 مداخلة زى ماقلت.

جزاك الله خيراً على ترحيبك ومتابعتك لمداخلاتى المتواضعة

[tarek_almeghallawy]

مرحباً بك يا باشمهندس محمد

وإن شاء الله تدوم إقامتك في المحاورات

وتكون عضو فعال وأخ عزيز

أهلا وسهلا بيك

[الأفوكاتو]

مر حبا بالأخ المهندس/محمد عبد العزيز,

و أتمنى لك السعادة و الهناء فى بيتنا , بيت كل المصريين.

[yasovinas]

العزيز محمد عبد العزيز عز علينا انك تكون في وسطينا وما نرحبش بيك فقلنا لازم نيجي ونرحب بيك

نورتنا وشرفتنا وعززتنا يا محمد يا ابن عبد العزيز

منين بقى من اسكندرية يا بِلد :unsure:

عقلي الباطن والله وهتصدق نبؤة كليو العدو اللدود ونقلبه قريبا محاورات الاسكندرانيه هِللْو هِللْو

[ATHENA]

أهلا بيك في بيتك....

[محمد عبدالعزيز]

شكراً لكم جميعاً tarek_almeghallawy , الأفوكاتو, yasovinas, ATHENA

على هذا الترحيب الدافئ وأتمنى أن أكون عضواً فعالاً كما قلت ويارب ماتزهقوش منى.

أما بالنسبة لسؤال yasovinas فأنا ورديانجى أصيل, من الورديان يعنى, أعتقد إنها مشهورة دلوقتى واللى مايعرفهاش هى منطقة بين المكس والقبارى واللى مايعرفش المكس والقبارى ماليش دعوة بقى مش هاعرف أوصف أكتر من كده

نورتونى ياجماعة والله لولا بس الوقت متأخر كنت عزمت عليكم تتعشوا معايا.

إلى اللقاء فى عشوة قصدى مداخلة أخرى إن شاء الله