يا كذاب

[المعلم هاري بوتر]

يا كذاب …… كلمة صغيرة مسموعة إعتادتها آذننا كثيرا في ايامنا هذه.

تري من منا كذاب؟ ، أو معتاد للكذب؟ أو كذوب؟

هات ورقة و قلم و مراية….. ليه مراية؟ سؤال قد يطرأعلى ذهن أي بني آدم ممكن يقرأ الكلام ده….

و إجابته بسيطة … عشان تشوف فيها نفسك و تعرف إذا كنت كذاب و لا كذوب و لا كذبنجي معتق

الكذب هو إخبار الشئ علي غير الحقيقة او على خلاف ماهيته سواء كان ذلك عمدا أم خطأ.

كويس كلام حلو

في الإسلام هناك آية في القرآن:( إنما يفترى الكذب الذين لا يؤمنون بأيات الله و اولئك هم الكاذبون) النحل 105

في المسيحية ... الله المنزة عن الكذب تيطس 1 : 2

و قد نهى عن الكذب باتا فقال : لا تكذبوا بعضكم على بعض كولوسى 3 : 9

كما قال : اطرحوا عنكم الكذب افسس 4 : 25

وفى الوصايا العشر لا تشهد بالزور

يعني أن الإفتراء هو الكذب بعينه و أيا كانت الكذبة بيضه حمره خضره هي كذبة هي كذبة و الكذاب لا يبحث ولا يتحري إلا عن التلفيق و الغيبة و النميمة و يسعي دائما للخوض في اعراض الآخرين و هو حسود بطبعه يريد الخراب لغيره لينزلوا لحضيض مستواه و لا يرغب في الغبطة لأنها تستدعي يقظة و همة و عمل و هو ما يفقده.

في الاسلام أيضا حديث فيما جاء فيه: (إن الكذب يهدي للفجور و إن الفجور يهدي إلي النار، و أن الرجل ما يزال يكذب حتي يكتب عند الله كذابا)

يعني الكذاب مش حاقد بس ولا مفتري بس ....لا ده فاجر يا ساتر.... تخيل نفسك كده واقف قدام المراية و تلاقي ختم كده مطبوع علي قورتك مكتوب عليه - فاجر- يالهوي....دي فضيحة الواحد ازاي هيمشي وسط الناس في الشارع!!! دي هتبقي فرجه...

إذا عرف الكذاب بالكذب لم يزل --- لدي الناس كذابا و إن كان صادقا

فيه اقوال جميلة و صادقة في الكذب.... طبعا ممكن حد يستغرب ايه الجمال في الكذب ده هو الكذب جميل ولا ايه يا خويا الصدق اللي في الكذب ده معادلة كيميائية لتحويل التراب لذهب ولا ايه؟؟

لا دي أقوال جميلة و صادقة في البعد عن الكذب و التحذير منه..

لأن يضعني الصدق أحب ألي من ان يرفعني الكذب ....يعني الصادق الصدوق لا مشكله لديه إن تاخر في حياته او عجز عن الحصول علي فرص التقدم و الترقي بسبب بعده عن الكذب اللي بيسهل الطرق و بيمهدها و يخليها مزحلقة لزوم الوصول السريع.... بس ده معناه ايه؟؟؟ معناه ان الصدق و الصراحة و الوضوح ممكن تدي صورة قاتمه عن بني آدم معين و تخلي الناس تحط عليه علامات استفهام ...تعجب... ممنوع اللف و الدوران... اشارة حمرا ..اي حاجة بس المعني الاهم ان الراجل ده صاحب مبدأ... و هم فين دلوقت اصحاب المبادئ اللي يقدروا يعرفوها و يمشوا عليها .

لا يكذب المرء إلا من مهانته --- أو عادة السؤ و قلة الأدب

و الشخص ممكن ميا يكونش كذاب ... لكن ممكن ماشي مع واحد كذاب ... و دي مصيبة زيها بالظبط... لأن:

الكذاب كالسراب يقرب إليك البعيد و يبعد عنك القريب يعني مش كفاية الهرتلة لا.. دا مستشار أعمي و اطرش و هيوديك في داهية لو سمعت كلامه...

و الكذاب إحساسه متلبد و ضميره ميت... يبقي لا يوجد فرق بين كذاب و ميت فكلاهما فاقد لفضيلة النطق بالحق

طب سبب الكذب ده ايه... ناس بتقول انه مرض إجتماعي و ناس بتقول انه ظاهرة و ناس بتقول انه موضه و ناس تانية بتقول انه مرض نفسي... لأن الكذب منبعه النفس المريضة الفاسدة التي يسري منها فيروس الكذب لينطلق في رحلة التسميم ليصل للسان فيفسده ثم يسري للجوارح فيفسد عملها فيعمم الكذب في الاقوال و الافعال و الاحوال فيستحكم عليه الفساد و يتامي داؤه إلي الهلكة.

و اضحك كده معاي لما تقرأ جملة من إعترافات كاذب سجلت في محضر جلسة صفاء و صراحه و شفافية بين إثنين جمعهما الكذب في مصيبة أحدهما صادق اوقعه فيها إبلاء الاخر الكاذب....

و تم سؤال الكاذب لماذا تكذب: قال أما إنك لو تغرغرت بالكذب مره فلن تنسي حلاوته بالمرة....يا حلاوه!!!

دع الكذوب ولا يكن لك صاحبا --- إن الكذوب لبئس خلا يصحب

كتبه: المعلم هاري بوتر ساحر الكلمة و عاشق البيان

تم تعديل 20 أبريل 2006 بواسطة المعلم هاري بوتر

[المعلم هاري بوتر]

أتكلمت عن الكذب في المشاركة الاولي...... ماشي

طبعا الدنيا اسودت في وش معظم اللي قرأوه لأنهم احسوا بتعاسة و بؤس الكذاب و خسارته لنفسه قبل خسارة الآخرين و منهم اللي قام فرش ملاية السرير علي المراية و اللي قلب وشها للحيطة...مهو مكسوف من نفسه و من عمايله........ طيب نعمل ايه؟ .....نتصرف ازي.... انت جيت عتمت علينا الدنيا و سبتنا....!!!

لأ ..... لأ...... انا مش زي مدمني المنتديات اللي غاويين يسودوا الدنيا و يقلبوها مناحة و ولطم و صراخ و آهات ظلم و جور ....أنا طبعي مختلف.... أنا اشارة المرور .... لما تحمر توقفك... ولو موقفتش هتعمل حادثة و ممكن يكون فيها أما خسارة حياتك أو خسارة ثروتك... ولما أديك النور الأخضر.... تمشي علي طول.... في سكة السلامة اللي مفهاش كلمة ندامة..

طيب خلصنا بقي انت عمال تلك و تعجن ليه؟؟؟ يا سيدي حلمك عليا أنا طبعي كده... شغلي كده... أحب انزل و اتعمق و أتوغل لغاية لما المعلومة توصل لأغبي غبي عشان ما يجيش و يتحجج و يقولك الحظ دايما من نصيب الأذكياء... لا يا خوي.... الحظ متاح للجميع و لو عايز نزغطهولك او نرضعهولك قول و احنا تحت أمرك...

طب ممكن تخلصنا...

حاضر...

أتكلمنا علي الكذب و قلنا ان مافييش حاجة اسمها كذبة بيضة ولا فرخة ولا ديالوا.... طب ليه بيقولوا ان الديانات اباحت الكذب.... لا طبعا ده كلام مش صحيح ... الصحيح ان هناك حسن للتصرف في موقف معين قد يستبيح معه المحرمات في ضرورات... و اللي هيتلاعب علي الضرورة علشان تحللله كل غلطه دي مشكلته مش مشكلة الديانة و اللي هيسئ تفسير الديانة عشان بتدي مساحة اوسع للأنسان انه يصحح أو يستغل موقف ما .. ده هيكون مجرم و سئ الظن و مالهاش تفسير تاني و اللي هيفتح بقه هتتفتحله نار جهنم.

طب امتي الديانات السماوية ممكن تبيح انواع من الكذب.... في الحقيقة انا قريت موضوع لذيذ جدا و هو جمع بين النقيضين الاسلام و المسيحية و عمل مقارنة بينهم في موضوع ترك مساحة ضيقة محدود للكذب:

يعني بطرس حسب ماجاء في (متي) :

26: 35 قال له بطرس و لو اضطررت أن أموت معك لا أنكرك هكذا قال أيضا جميع التلاميذ

ولكن بطرس كذب و انكر و حنث بقوله!!!

و أيضا مما جاء في (مرقس)

14: 71 فابتدا يلعن و يحلف اني لا اعرف هذا الرجل الذي تقولون عنه ( مرقس )

كفارة لخيانة الرب والحلف بالكذب

سفر لاويين الأَصْحَاحُ السَّادِسُ

1وَقَالَ الرَّبُّ لِمُوسَى: 2«إِذَا أَخْطَأَ أَحَدٌ وَخَانَ خِيَانَةً بِالرَّبِّ وَجَحَدَ صَاحِبَهُ وَدِيعَةً أَوْ أَمَانَةً أَوْ مَسْلُوباً أَوِ اغْتَصَبَ مِنْ صَاحِبِهِ 3أَوْ وَجَدَ لُقَطَةً وَجَحَدَهَا وَحَلَفَ كَاذِباً عَلَى شَيْءٍ مِنْ كُلِّ مَا يَفْعَلُهُ الْإِنْسَانُ مُخْطِئاً بِهِ - 4فَإِذَا أَخْطَأَ وَأَذْنَبَ يَرُدُّ الْمَسْلُوبَ الَّذِي سَلَبَهُ أَوِ الْمُغْتَصَبَ الَّذِي اغْتَصَبَهُ أَوِ الْوَدِيعَةَ الَّتِي أُودِعَتْ عِنْدَهُ أَوِ اللُّقَطَةَ الَّتِي وَجَدَهَا 5أَوْ كُلَّ مَا حَلَفَ عَلَيْهِ كَاذِباً. يُعَوِّضُهُ بِرَأْسِهِ وَيَزِيدُ عَلَيْهِ خُمْسَهُ. إِلَى الَّذِي هُوَ لَهُ يَدْفَعُهُ يَوْمَ ذَبِيحَةِ إِثْمِهِ. 6وَيَأْتِي إِلَى الرَّبِّ بِذَبِيحَةٍ لإِثْمِهِ كَبْشاً صَحِيحاً مِنَ الْغَنَمِ بِتَقْوِيمِكَ ذَبِيحَةَ إِثْمٍ إِلَى الْكَاهِنِ. 7فَيُكَفِّرُ عَنْهُ الْكَاهِنُ أَمَامَ الرَّبِّ فَيُصْفَحُ عَنْهُ فِي الشَّيْءِ مِنْ كُلِّ مَا فَعَلَهُ مُذْنِباً بِهِ»

و في الاسلام: عن حميد عن امه ام كلثوم بنت عقبة قالت ما سمعت رسول الله يرخص فى شىء من الكذب الا فى ثلاث كان رسول يقول لا اعده كاذبا الرجل يصلح بين الناس يقول القول ولا يريد به الا الاصلاح والرجل يقول فى الحرب والرجل يحدث امراته والمراة تحدث زوجها .كتاب كنز العمال فى سنن الاقوال والافعال

طيب نتنقل لعكس الكذب و بالطبع اي واحد هيقول علي طول انه الصدق...... صح عشرة علي عشرة يا جدع

طب ايه هو الصدق؟؟؟

ما أحسن الصدق إن تحدثت و ليكن ... لكل حديث من حديثك حين

الصدق مطابقة القول و الحكم للواقع و هو ضد الكذب بطبيعة الحال..

و في سياق الحديث الإسلامي السابق في المشاركة الاولي أن الصدق يهدي الي البر و أن البر يهدي إلي الجنة و ان الرجل يصدق حتي يكون صديقا.... يا سلام علي الكلام.... يعني البني آدم الصادق... بار و مصيره للجنه و الصادق معروف في محيطه بالصدق و الأمانة ... ليه بقي منبقاش من الصادقين في الاقوال و الافعال.. مش بس نقعد نهاتي و نمط و نلت بكلام منفوخ زي البالونات و نضحك بيه علي بعض و الاواحد لو بص لنفسه أو خد منها عينة و رماها في انبوب مختبر لتحليلها و بدون أية اضافات هيلاقي لونها اسود من قرن الخروب؟!!!

أصدق حديثك إن في .... الصدق خلاص من الدنس

ودع الكـــذوب لشأنه .... خير من الكــــذب الخرس

و الصدق هو قول و عمل و حال .... يعني حاسة الكلام و النطق مرتبطة بحاسة الفعل و اللمس و منعكسه علي صفة الانسان .... ايه الكلام الجميل ده .... يعني عكس الفيروس المرضي المعدي بتاع الكذب ...ده عطر طبيعي من زهور البرية نفحاته بتطلع من نفس شفافة عفوية بنسمعها من لسان مهذب صدوق... و بتخلينا نحب و نحترم قائلها و نستني اية كلمة منه تكون شفاء و بلسم لأذاننا.

طب ازاي نحكم علي بني آدم انه صادق في زمن صعب زي اللي احنا عايشينه..... بسيطة خالص....نشوف قاعدة الصدق بتقول ايه؟ ....بتقول... أن للصدق حقيقة .. و حقيقته أن تصدق في مواطن لا ينجيك منها إلا الكذب.. يا سلام علي الشجاعة و سلامة النية و صدق النفس مع القول و العمل...

و قال الريحاني ... ازرع الصدق و الرصانة تحصد الثقة و الأمانة

و أخيرا..

الصدق أولي ما به .... دان أمرؤ فأجعله دينا

و دع النفاق فما رأ .... يت منافقـــا إلا مهينا

كتبه: المعلم هاري بوتر ساحر الكلمة و عاشق البيان

تم تعديل 20 أبريل 2006 بواسطة المعلم هاري بوتر

[tarek_almeghallawy]

المعلم هاري بوتر ساحر الكلمة وعاشق البيان

أنا حبيت أرحب بيك

لغاية الأستاذ الدكتور محمود الأفوكاتو ما يوصل ويستقبلك رسمي

أصل أنا أحب الأعضاء الجدد اللي دخلتهم الأولى سخنة مولعة

لأ وإيه عندهم تواضع

اتفضل اسحرنا بكلامك يا عاشق البيان

وأهلا وسهلا بين اخوانك في المحاورات

[المعلم هاري بوتر]

المعلم هاري بوتر ساحر الكلمة وعاشق البيان

أنا حبيت أرحب بيك

لغاية الأستاذ الدكتور محمود الأفوكاتو ما يوصل ويستقبلك رسمي

أصل أنا أحب الأعضاء الجدد اللي دخلتهم الأولى سخنة مولعة

لأ وإيه عندهم تواضع

اتفضل اسحرنا بكلامك يا عاشق البيان

وأهلا وسهلا بين اخوانك في المحاورات

شكرا يا سيد/ طارق و أتمني أن أكون ضيفا خفيفا في أوقات الاتفاق و الاختلاف في الرأي و النهج لا يجمع بيننا سوي الاحترام المتبادل..

الله يعلم أنه ما سرني .... شئ كطارقة الضيوف النزل

تم تعديل 20 أبريل 2006 بواسطة المعلم هاري بوتر

[الأفوكاتو]

أعتذر للأخ " هارى بوتر على التأخير فى تقديم فروص الترحيب بالأخ الكريم.

كما أشكر أخى العزيز طارق المغللاوى على لفت نظرى لهذه الهفوة.

أرجو أن تستمر فى عملية التسخين,

و تقبل تحياتى و تمنياى الطيبة.

تم تعديل 20 أبريل 2006 بواسطة الأفوكاتو