مصرع مراهق

[ezzat afifi kotb]

مصرع مراهق

واحد صاحبى قاللى اتمسى .... خلينا ناخد جنبك حصة

قلت يا صاحبى ايه القصة ... قاللى عارف جارنا ابو قصة

قلت له كل الناس عارفاه .... شفته لما الشرطة كانت عفقاه

ومن الضرب يا ولداه ............ وشم صوابع على قفاه

قاللى الواد كان عيل طايش .... صاحب بنت الجار ابو قايش

قاله فى عينى منك رايش .... طب والميرى ما تفضل عايش

قبل الفجر الناس نايمين .... طبوا عليهم بنى ادمين

بس الفاتحة عنيه وارمين ... وباقى القوة يقولوا امين

امه يا عينى صاحية تولول ... فى هدوم نومها بقت تتكعبل

ماسكة فى ديل جلابية العيل .... الشلوت خلاها تميل

نور الشقق ابتدا يتنور .... والردارات تبحث وتدور

م البلكونة اوم المنور .... وعيون بتسجل وتصور

تسمع كدة الله يخليك .... اياك تنزل فيه شبابيك

دا المفترى ممكن يأذيك ... والمفتاح شوف مين يديك

واللى يقول فضك م السيرة .... فين يا وليه حقوق الجيرة

اللى ف وشى شنب مش عيرة ... حتى دى تبقى فى حقى كبيرة

عندك اهوه الواد حسنين .... جه يتدخل خد قلمين

وكمان ابوه اداه بوكسين ... حتى الهدمة جابوها اتنين

واللى يقول ما هو احنا جيران ... زوجته تقول للحيطة ودان

نام والنبى واعمل عيان .... بكرة يا سيدى الحق يبان

ادى صحيح شغل الحريفة ... تيجى الكبسة بدون تشريفة

لجل حياتنا ما تبقى نضيفة ... ايه يعنى اما تلم الجيفة

بعد شوية جانا جواب ... قالوا الواد تبع الارهاب

ومعاه كم ضرس وناب ... لو فجرها حنبقى كباب

بعد البصمات بعد الفيش ... قالوا للود عندنا تفتيش

اخفى ف اى مكان متجيش ... اصل يا عينى وش ما فيش

شافلك نفسه وحيد فى الساحة ... قام متسحب كدة بالرحة

عدى السور وبكل بجاحة .... الطلقات راحت مجتاحة

قلت يا صاحبى صعبة القصة ... قاللى الغصة نفس الغصة

بس ابو قايش يومها اتوصى ... عزى وشال ويانا الجثة

عزت عفيفى

[White heart]

برافو يا عزت...

شدنى فى قصتك اول حاجة "القافية" ...

و تانى حاجة انها Update :

شفته لما الشرطة كانت عفقاه

اما المغزى من وراها فمفهوم و واضح

يا ريت تكتب اكتر....