زوجي الحبيب اسمحلي ان......!!

[بنت شعنونة]

زوجي الحبيب اسمحلي ان اخونك...

اسمحلي اضحك عليك وافهمك اني بخونك

اسمحلي اني اعمل ان الموبايل ب يرن وانه احد زملاء العمل بيكلمني عشان اغيظك

مع انه مافيش حد؟

اسمحلي اسيبك واقعد على النت لأنك خنتني وقعدت تلعب جيم

اسمحلي اغيظك واروح انضف البيت مع انك كنت مسافر لمدة اسبوع؟

اسمحلي اغيظك واخرج مع صديقاتي في نفس الوقت اللي انت مطحون فيه شغل؟

زوجي العزيز المعذرة

ولكن هذا ما جناه زوجي علي...

ف انت تتركني بالساعات لتنام مرهقا

او ترحل لساعات اخرى على العاب الكمبويتر

او تتركني وتذهب لأهلك

ولا تترك لي من الوقت الا ما ندر

ف المعذرة

حتى هذا الوقت انا لا اريده

بل وازيد

ناوية اغيييييييييظك واكييييييييدك...

----------------------------------

لو مراتك عملت كدا بجد

تعمل ايه؟؟ :lol: :D

[محمد عبدالعزيز]

مش كل اﻷزواج ممكن يكون لهم نفس رد الفعل على اﻷسلوب ده

وأعتقد إن ده بيتوقف على شخصية الزوج يعنى مثلاً أنا شخصيتى عنيدة ممكن اﻷسلوب ده يجيب معايا نتيجة سيئة جداً تهدد استمرار الحياة الزوجية خصوصاً إن كل الاعتراضات التى ذكرتيها لا يجب أن يكون الرد عليها بهذه الطريقة بمعنى إنه ماينفعش زوجتى تعمل نفسها حد بيكلمها فى الموبايل أو بيعاكسها يعنى عشان أنا باقعد مع أهلى ومش باقعد معاها حتى لو كنت باقضى اليوم كله بعيد عنها والزوجة اللى تعمل كده تبقى بصراحة مش ذكية.

أنا مش معترض إن الزوجة تعاتب زوجها على حاجة هى شايفاها غلط أو بتضايقها بس مايبقاش باﻷسلوب المستفز ده, وبأكد للمرة التانية ﻷن كل أفعال الزوج اللى ذكرتيها مش حاجة عيب ولا حرام إنما ممكن نسميها سوء تصرف أو عدم خبرة أو يمكن الزوج أصلاً شايف فى زوجته حاجة غلط وبيحاول إنه ينبهها بطريقته دى رغم إنها ممكن ماتكونش مناسبة برضه لكل الزوجات.

يعنى رأيى باختصار إن الزوجين يجب أن يتفاهما فيما بينهما إذا كانا حريصين على الحياة الزوجية وكذلك فهم شخصية الطرف اﻵخر وردود أفعاله وطرق تعبيره عن آرائه ورغباته.

[بنت شعنونة]

استاذ محمود

رد حضرتك منطقي جدا

انما لو فرضنا انه حصل حاجا زي كدا و وقع طلاق فعلا

مع انه مراته فاهمته بعدها على طوووووول انها كانت بتغيظة

ما طولتش الخدعة عليه غير دقايق

لكن في الدقايق دي وقع المحظور وطلقها

يبقى الغلط على مين فيهم؟

[dr khaled]

زوجي الحبيب اسمحلي ان اخونك...

اسمحلي اضحك عليك وافهمك اني بخونك

اسمحلي اني اعمل ان الموبايل ب يرن وانه احد زملاء العمل بيكلمني عشان اغيظك

مع انه مافيش حد؟

صحيح يازوجتي الحبيبه انك رايقه و دماغك فاضيه

صحيح انك استاده في حرق الدم و الغيظ

اسمحلي اسيبك واقعد على النت لأنك خنتني وقعدت تلعب جيم

اسمحلي اغيظك واروح انضف البيت مع انك كنت مسافر لمدة اسبوع؟

اسمحلي اغيظك واخرج مع صديقاتي في نفس الوقت اللي انت مطحون فيه شغل؟

ياريت احسنلي و احسنلك

علي طول قاعده مبوزه

وكل كلامك امك عملت و اختك سوت

ياشيخه حرقتي دمي

زوجي العزيز المعذرة

ولكن هذا ما جناه زوجي علي...

ف انت تتركني بالساعات لتنام مرهقا

او ترحل لساعات اخرى على العاب الكمبويتر

او تتركني وتذهب لأهلك

ولا تترك لي من الوقت الا ما ندر

ف المعذرة

حتى هذا الوقت انا لا اريده

بل وازيد

ناوية اغيييييييييظك واكييييييييدك...

ناويه تغيظيني و تكيديني يا مثقفه يا متعلمه

كل هدفك كده برضه ياعاقله يابنت الناس

روحي.................و انتي

حبيبتي و مراتي وقدري

لازم استحملك برضه

امضاء

زوج مسالم ( د. خالد سابقا )

[محمد عبدالعزيز]

استاذ محمود

رد حضرتك منطقي جدا

انما لو فرضنا انه حصل حاجا زي كدا و وقع طلاق فعلا

مع انه مراته فاهمته بعدها على طوووووول انها كانت بتغيظة

ما طولتش الخدعة عليه غير دقايق

لكن في الدقايق دي وقع المحظور وطلقها

يبقى الغلط على مين فيهم؟

يبقى الغلط على الزوجين ﻷنهم أساؤا الاختيار من البداية وبصراحة أفضل لهم وأفضل للمجتمع حدوث الطلاق خصوصاً لو كانوا لسه ماجابوش أولاد أما فى وجود الأولاد الحسابات بتختلف أكيد.

ليه بقى الغلط على الاتنين

لأن الزوجة هايفة وسطحية ومش مقدرة حجم مسؤولية الزواج ودفعت زوجها إنه يفكر فى الطلاق بتصرفاتها دى رغم إن المشاكل دى ممكن تتحل بطرق أفضل كتير.

والزوج غلطان عشان مش متحمل مسئولياته الزوجية ومش عارف يمشى حياته بطريقة منظمة ويعطى كل ذى حق حقه, وكمان متهور إنه فى دقايق راح واخد قرار الطلاق.

بس أنا ماكنتش أقصد بتهديد استمرار الحياة الزوجية إن الحدعة لا تتعدى دقائق, ﻷنه صعب جداً أن أتخيل رجل يطلق فى دقائق إلا إذا كان متهور زى ماقلت.

عموماً الطلاق حاجة صعبة جداً بس إذا كان هو الحل الوحيد فأهلاً بيه.

تم تعديل 22 أبريل 2006 بواسطة محمد عبدالعزيز

[yasovinas]

ممكن جدا ان يحدث ما قالته شانا من اي زوجه والاسباب كثيرة منها نقص الخبرة، ونقص الحكمه والعقل ، وايضا التعالي والاعتداد بالنفس !! فهي لن تقول له - اهتم بي قليلا ارجوك - فهذا في حد ذاته يشعرها بالنقص او يقلل من كرامتها (او هكذا تتخيل) بعض هذه الاساليب ممكن ان تكون مقبوله خصوصا في حالة الزوج "الغبي او الغتيت" ولا مؤاخذه ما عدا موضوع الموبايل وارسال رساله وهميه بالخيانه فهذا الشيء غير مقيول باي شكل من الاشكال واي فتاه او سيده تقوم بهذا فهي على اعلى درجات {الغباء} مهما كانت مرحلة تعليمها او ثقافتها فاسؤ شيء هو دخول الشك ولو لمدة "فيمتو ثانيه" من بتوع عمنا زويل - الى عقل او قلب الرجل فهذه الزرة سوف تظل في مكان خفي في عقل الرجل على استعداد للتفاعل والإنشطار ومن ثم الانفجار في اي وقت ولاي سبب

اجمل واهم شيء في الزواج ومن واقع حبرة امتدت 15 سنة - ومازالت ممتدة والحمد لله :unsure: الصراحه والشفافيه بين الازواج اياك واياكي ان تخلدا للنوم وفي قلب او عقل اي منكما زرة زعل او قلق اتجاه الآخر

تحياتي

[ابن بلد]

تجاهل الزوج لزوجته عشان بيلعب جيم او بيخرج لزياره اهله او اصدقاءه

لايكون الرد الفعل هو توصيل شعور الخيانه للزوج لانها منطقه حظر فطرى عند الزوج

ولو حصل طلاق ان ذاك لا قدر الله تتحمل الزوجه الجزء الاكبر من المشكله

[nancy]

مش عرفة يا شانا الغيظ فى موضوع حساس زى دة مينفعش

والست الشاطرة هى الى تقابل الاهمال بالهتمام وتتبعة بالحوار وبالكلام الحلو

يعنى راح لاهلة تتصل علية وتقولة حشنى ومستنياك ياروحى ومجهزالك عشاء وقاعدة تجنن ومقاجاءة محصلتش ان مكانش يجى بعد 5 دقايق مبقاش انا

لو عيان وقولتيلة دة انا كنت خارجة مع اصحابى بس اعتزت لهم ونبقى نخرج احنا لما تخف يا حبيبي

حيضربك بالكرسى اكيد حايقولك حاضر

الموضوع مفيهوش غيظ فية حب تكسبى كل معركة بية

[kokowawa1979]

من الآخر المواضيع دي بالذات مفيش فيها هزار لإن بكدة الزوجة تبقى بتدق المسمار الأخير في العلاقة الزوجية لإن نرجع ونقول الزوج الشرقي يفضل شرقي لحد مايموت .

لإن أي تصرف للزوجة أيا كانت بساطته للفت نظر الزوج وإثارة غيرته سيؤول في النهاية إلى الشك !!!

وعلى راحتكم ياستات عاوزين تجربوا جربوا بس بعد كدة صدقوني هاتندموا :unsure:

[بنت شعنونة]

يا عيني عليك يا يااااااسسسسسسسسسسسسو اجابتك دي في الجون

انا طبعا مع كلامكم انه كل دا غلط في غلط لكن اسمحولي اقولكم قصة غريبة جدا قريتها في بريد شكاوي احدى المجلات... وهيا اللي خلتني اكتب الكلام دا

زوجة بتشتكي انه زوجها طاحونة الحياة واخداه غصب عنهم زي ما بتقول يعني لازم يشتغل طووووووول اليوم عشان يعرفوا يعيشوا مستورين

و الوقت اللي بيبقى فيه فاضي بيقعد يلعب العاب جيم او يروح يزور اهله

وانها حست انها مش موجودة على قائمة احتياجاته لآنها لما بتطلب منه وقت خاص بيها بيقولها ما انتي بتشوفيني كل يوم!!

ف خطرت في بالها انها تعمل انها بتكلم احد اصدقاء العمل وانهم ها يطلعوا يتغدوا سوا

طبعا زوجها اتجن وهزقها واتخانقوا وفي خلال دقايق كانت اعترفتله انها عاملة مقلب فيه عشان تغيظة!

:blink:

لكن الموضوع تطور

وطلقها بعد ما سمع الحقيقة لأنه اتغاظ اكتر

فهيا بتسأل مين فيهم الغلطان وليه المجتمع يديله الحق انه يغيظ مراته بانه يقولها ها اتجوز عليكي وما يديش المراة الحق انها تغيظ جوزها...

استفزتني انا بقى حتت اتجوز عليكي :unsure:

طبعا انا عارفا حزب الحنفي ها يقول انه دا حلال وبتاع

طب ما حزب الفكيهة ممكن برضه يروح يقول انا عاوزة اتجوز واحد تاني

واحدا بواحدااااااااااااااااااااااا

اشمعنى انتوا صحيح؟ :blink: :blink:

[kokowawa1979]

شعنن كتبت :

طب ما حزب الفكيهة ممكن برضه يروح يقول انا عاوزة اتجوز واحد تاني

واحدا بواحدااااااااااااااااااااااا

اشمعنى انتوا صحيح؟

مش هايبقى إسمه حزب الفكيهة يادكتورة - بالطريقه دي يبقى اسمه حزب نوال السعداوى !!!!

تم تعديل 22 أبريل 2006 بواسطة kokowawa1979

[yacho]

االلى احنا بنكتب فيه هنا هو المشكله الازليه بين الراجل والست .. اللى مهما اتكلمت فيها الست عمر الراجل ما حيغير فيها

اسلوبه لانه وبكل بساطه شايف نفسه صح وانه مش مقصر وان الست هي اللى خنقه والجواز هو اللى قيد وان الستات نكد

الى اخره ......

المهم عانيت زى اى ست من الاهمال من وجهة نظرى اللى هو عادى من وجهة نظره :unsure: .. توصلت للحل المريح ليا واللى

تبين لى بعد كده انه مش مريح له .. واد ايه كنت سعيييييييييييييييييييده وهو بيقوللى انتى مش بتهتمى بيا زى زمان ..

يييييييييييييييييييييا سسسسسسسسسسسسلام .. عالراحه .. لا بجد بجد كنت مستكنيصه قوى :blink: .. خللى بالكم كل دة بدون ما ازعله

ولا اقصر ف حقه ..

ما تخلليش محور اهتمامك الاول ف الحياه جوزك اعملى له كل حاجه .. حقه .. بس كل حاجه بتحبيها كمان لازم تعمليها

وقت فراغك بتاعك .. اشغلى نفسك فيه بكل حاجه بتحبيها انتى :blink: .. واوعى يكون ترمومتر يومك طالع نازل مع مود الزوج

العزيز .. ومفيش حاجه غلط .. مش محتاجه تخلليه يغير ويشك لان كده حتيجى على دماغك :blink: .. وكل الناس تغلطك انتى .

كونى دايما علامه استفهام .. مش معروف انتى بتفكرى ف ايه .. ومتصرحيش بمشاعرك كلاما .. خلليها تصرفات ..حنيه ..

اكله بيموت فيها .. دلع خفيف بلاش تقيل عشان ساعات خلقهم بيبقى ضيق يحدفك بحاجه تقولوا ياشو اللى قالت لنا ..

انا عن نفسى لقيت ان الفراغ هو اللى بيخللي الست مركزه عليه .. ولذلك اشغلى نفسك بكل ما هو ممتع لكى حتى لو كان بسيط

زى فنجان قهوة تشربيه وانتى قاعده ف البلكونه بتسمعى مزيكا بتحبيها .. او تقرى كتاب بتحبيه .. النت ..انا بالنسبه لى كان ترجمه الكتب زمان

نزوله لذيذه مع اصحابى وحاجات تانيه كتير اقدر اعملها واستمتع بيها لوحدى .. اروح جيم اشمعنى هو لان الزوج بيعمل كل ده وعادى مره سجلت

نفسى ف الكونسرفتوار قسم اصوات وكان حفلات وتدريبات وبروفات .. وبتعملى حاجه لنفسك بتحبيها وبتتعرفى على ناس جداد عشان .. هو دايما

مشغول .. هو دايما مهدود ..هو دايما بيفكر .. هودايما .. هو دايما ..

شعنن كتبت :

طب ما حزب الفكيهة ممكن برضه يروح يقول انا عاوزة اتجوز واحد تاني

واحدا بواحدااااااااااااااااااااااا

اشمعنى انتوا صحيح؟

مش هايبقى إسمه حزب الفكيهة يادكتورة - بالطريقه دي يبقى اسمه حزب نوال السعداوى !!!!

اسمحى لى يا شانا صحبتك دى مش فاهمه يعنى ايه راجل .. فى زرار عند الراجل المفروض الست الذكيه تبعد

عنه خالص .. الشك وانعدام الثقه .. انا عندى .. احسن انه طلقها .. لانه لو كمل معاها بعد الموضوع اللى هي عملته ده

كانت عيشتهم حتكون صعبه وغلسه .. لانه مش حينساها لها اببببببببببببببببببببببببببببدا ..

[ATHENA]

مع إني لسه في السيف سايد و مجربتش غتاتة الجواز و لله الحمد بس هقول رأيي و محدش يضرب :blush:

لما الزوجة تبدأ تغيظ زوجها بالموبايل و تتصنع أحداث ده بيدخل في خانة عدم الصدق و عواقبه على المدى الطويل مش كويسه خالص مهما بدا تصرف صغير..صحيح صغير بس معطياته و تحليله بيظهر حاجات كتير ممكن تحصل في المستقبل...و كمان بتكون كده بتداوي غلط بغلط..

لما الزوج يبدأ يغيظ زوجته و يعد يلعب جيمز أو يعتقد إن واجب عليها تكون فاهمة ظروف شغله و متعترضش من غير ما يتعب نفسه و يحاول يخليها تتفهم و تقبل الواقع مش تحس بالكبت و يشوف كده تأمر و دلع برضه تصرفه ده في رأيي بيوصل الأمور لطريق مسدود...لأنه جنابه وقت الخطوبة كان فاضي اربعة و عشرين ساعه و التغيير الكبير اللي بيحصل وقت الجواز و كشف المستور و كون الواحد يعيش الواقع مش بيبقى سهل تقبله..

لما إتنين يرتبطوا لازم على الأقل قبل الإرتباط يكون في بينهم جسر من التفاهم و التفهم من كل واحد فيهم لشخصية التاني و إتفاق على صيغة تصرف مع بعض وقت الزعل و الغيظ بدري بدري كده لأان ده في رأيي اللي بيخلي أي مؤسسة تنجح و منها طبعا مؤسسة الجواز..{يعني خطة الطوارئ و فن إدارة الأزمات}...لكن لما الامور توصل لشغل الأطفال و كل واحد يغيط التاني يبقى المشروع في نظري مش ناجح أوي لأان معنى كده إن الواقع أثبت إن مفيش وسيلة تفاهم بينهم ...

يعني هيحصل إيه لو كان في صيغة تفاهم قبل الزواج للتصرف في امور الزعل....

يعني لو إنت زعلت مني او حاجه دايقتك أو إنتي زعلتي مني مثلا تبين زعلك بالشكل ده او نكلم في الموضوع و نحاول منعندش مع بعض لأان ملناش غير بعضتشينا :sad: وكده يعني .. الإبداع هنا بيلعب دور حتى لو وصلت للإتفاق على إدارة الأزمة بالساطور و الاكياس البلاستيك:sad:

بإختصار شديد معظم امور الزعل و الغيظ بتكون بسيطة جدا و التراكمات و الكبت هو اللي بيضخمها و بيهد الدنيا مع إنها بتصرف بسيط جدا مش هيقل من كرامة طرف من الطرفيين ممكن تتحل في دقايق.. و بتصرف عند و غل ممكن تهد البيت كله..

و كلمة كده لأاخونا أقطاي الشرقي :huh: : يا فندم العند بيولد العند و كلنا كائنات بشرية عنيدة فحاول تتعامل مع الموضوع بمساواة شوية و تجاوب على أسئلتها و تفهمها بليز يعني .. ها:blush:

سوقوا بأه:blink:

[Sherief AbdelWahab]

برين ستورمنج :

1-فيه عبارة في الاخوة كارمازوف "أحياناً يريد كل واحد منا قتل أبيه" أو مش عارف نصها بالضبط .. ممكن الزوجة تعمل كدة في جوزها لو كان مزاجها دموي ، وبتحبس كوباية الشاي مع جولتين من جولات المصارعة الحرة ، ولا فيلم kill bill بأجزائه!

2-يمكن تفتكر إنها بدة تقدر تفك برود الشخص اللي متجوزاه ، طالما هو جراح بريطاني وبيتعامل معاها بسقوعية لم تؤت لأحد..

لكن أرجع تاني وأقول إن فيه ستات كتير ما يعجبهاش العجب ..

تغير عليها .. تقول له خنقتني يا بعيد ..

ما يغيرش عليها .. تقول له انت جنس جبلتك إيه ؟

يغير وما يبينش : شرحه!..

المسألة هات وخد .. مش تشويح متبادل ، ولما الست تعمل عملة زي اللي قلتي عليها يا دكتورتنا العزيزة ، دي مش بتباصي .. دي بترزع ، وفي وش جوزها!

مدام شعنونة مرة أخرى :

فهيا بتسأل مين فيهم الغلطان وليه المجتمع يديله الحق انه يغيظ مراته بانه يقولها ها اتجوز عليكي وما يديش المراة الحق انها تغيظ جوزها...

م الآخر ، وقبل ما أحط اللزمة الختامية الشهيرة :

ساعات المجتمع بيكون غلطان ، لكن ياريت ما نحطوش كدة زي نقص الأكسجين والشمس والزلزال والحكام الأفارقة وأسود ملك الحبشة ، شماعة تعبانة نعلق عليها كل أخطائنا ، وتقع بيها على الأرض!

خلص الكلام

[عصفور طاير]

سبحان الله.. الستات شاغلين دماغهم برجالتهم بشكل غريب جدا.. وبيقعدوا طول الوقت يفكروا ويدبروا ويدوروا ويصوروا لنفسهم حاجات ما أنزل الله بها من سلطان.. في حين إن الراجل مش شاغل نفسه بأي حاجة من اللي في دماغ الستات دي خالص، بما فيهم طبعا مراته.. وبيتعامل بعفوية وتلقائية وسلامة نية على الآخر.

وللأسف ممكن حكاية زي اللي عايزة تعملها (بنت شعنونة) دي تخرب الدنيا كلها، وفي الآخر تقول ماكانش قصدي.. ودا برضه كلام بذمتكم؟ دا شغل شعانين ده يا شعنونه

[بنت شعنونة]

يالهوي؟

عصفور

انت لبستني تهمممممممممة يا سيد!!!!!!!!

حد قال اني عاوزة اعمل كدا؟

انا بكتب موضوع عن قصو قريتها في بريد مشاكل وخلالالالالالالالالاص

مش كل موضوع اكتبه في المنتدى بالضرورة يكون شخصي والنبي يا جماعة الخير!!

[nancy]

معلش يا شانا احنا عرفين الموضوع من الاول انا من كتر ما قريت الى بتكتبية معتقدش ان الفكرة العبيطة دى بتاعة اثارة غيرة الزوج دى تكون من اختراعك هى كل الحكاية موضوع لفت نظرك

بس عصفور طاير بتهايائلى انه كان غايب من كام يوم وتلاقية استغرب من الموضوع بس

[بنت شعنونة]

يكرمك ربنا يا نانسي :angry2:

انا عموما بخلي زوجي يقرا كللللللللل حاجا انا بكتبها هنا

لما زهققققققققتة مني يعني :ph34r:

عشان انا ضد اني اقعد ع النت بقعد الجواز " ضد اننــــــــــا نقعد"

لكن هوا ضد انـــــــــي اقعد ع النت بعد الجواز

لكن اهو بحاول اوسطن الأمور بين الأدمان و المفروض يعني!!

[عصفور طاير]

والله ما تخافي.. أنا قصدي باللي عايزة تعمله شعنونة، مش يعني عايزة تعمله شعنونه.. أنا

قصدي الفكرة اللي طرحتها أو أثارتها.. ماهي الأفكار والأطروحات بتنسب لأصحابها برضه، ويجوز

ان نناقش الأديب في سلوك بطل روايته وكأنه هو البطل.. وعموما يا ستي ماتنسيش انك مش انتي..

انتي واحدة تانية احنا مانعرفهاش.. يعني قولي اللي انتي عايزاه من غير دفاع عن نفسك.. يكفي إنك

تدافعي عن طرحك ورأيك بس.

أنا عموما عارف ان نانسي هيه اللي عايزة تعمل الفكرة دي :angry2:

[MZohairy]

حاسس كده ان الموضوع محتاج اني اتدخل و أهدي النفوس :angry2: