الكيلين

[ezzat afifi kotb]

الكيلين

لما لحمنا ع الرمل شاط

واتفلقنا من العياط

يومها زعيم البلاط

ادانا خطبة فى الانضباط

ونهاها بكلمتين

مطرزين بالعنترية

والامانى الشاعرية

بعدها نامت عينية

وكأن الجمر مية

مخلوط بعطر الياسمين

مش مقهورين ولا مكسورين

الاشيا معدن متكيفين

وقمنا غاسلين الايدين

ولمعنا المكيلين

وكيانا بكيلين

لو جعان يسرق فى لقمة

نكبله

ولو زعيم دمر فى شعبة

نقبلة

ويبقى الفكر اخرة

واوله

ونبقى فى الصدق ببالين

لما كيلنا بكيلين

حتى الشهيد

ينزل فى كشف المفقودين

ونوفر حديد

اللى اسمة النياشين

ومن بعيد فى الركن الحزين

اولاده مشردين لا مكرمين

لما كيلنا بكيلين

اما العروسة

فجاها موسى

ورملها فى شهر العسل

ولما مولودها وصل

حنكته بمية بصل

وفى السبوع

ربطتله شريطة سودة

وبرجلاتك

قصة ابوه اللى اتقتل

ودانه سمعت النحيب

مش دق هون

واليتيم دمعه قريب

جنب الجفون

طب مين يقوله تارة فين

ولا السيناريو ساب له تارة

ع الجبهتين

لما كيلنا بكيلين

وقلنا اه

وتعبنا م الاندفاع

والانقضاض

وقلنا اه

وتعبنا من مشاع

الانقباض

وقلنا اه

كيلنا ماله قاع

لكنه فاض

حتى ابنى قاللى

ديكنا الشجاع

م الهم باض

بس بيضة بصافرين

علشان بياكل من كيلين