إزاي تعرف انك اتربيت في بيت مصري

[yasovinas]

مش عارف دايما بلاقي مواضيعكم ومداخلاتكم الجميلة مستفزة لي ومصدر الهام لمواضيع جديده

فمن واقع مواضيع ومداخلات الغالي "هشام" و"النسرالمصري" فتحت موضوع الزواج ومن واقع شكاوي "كليو" عما يحدث معها في شوارع المحروسة فتحت موضوع اذاي تعرف انك في مصر وهكذا كذا موضوع

النهارده ومن واقع مواضيع التربية لاطفالنا وغيرة الطفل ومواضيع اخرى عن كذب الطفل وغيرة فكرت ثواني - اه ما انا ساعات بفكر برضه - ومرت عليه ايام الطفوله وبعدها ايام طفولة بنات اختى الكبيرة ومن بعدهم طفولة اولادي ؛؛؛؛؛ وجدت ان الوضع متشابه مع تغير الابطال فمن والدي ووالدتي الى اختى وزوجها الى ياسو وزوجته ؛؛؛؛ فاولادنا ونحن من قبلهم واجيال اخرى بيننا وبينهم وعلى مدى سنوات الطفولة والمراهقه نستمع - في الرايحه والجاية - الى نفس الاساليب ونفس النصائح وحتى كلمات التوبيخ هي هي لدرجة اننا حفظناها وكنا نكمل لاهالينا المحفوظات والتيمات وحاليا "محمد" ابني الكبير يفعل نفس الشيء

اذكر في طفولتي - ولاني كنت شقي جدا - فكانت الوالده الله يمسيها بالخير دايما تقول لي "لو تعرف انا بحبك قد ايه ما تزعلنيش ابداً " تأثرت بهذه الكلمه في اول مرة وتاني مرة وبعد ذلك اصبحت كلمه مثل غيرها من الجمل والديباجات

اما الان فيتكرر الموضوع بين "محمد" و"امه" الا انه ولان محمد نتاج مختلط بين اتنين لبط {انا وامه} فلقد قلب الآية وكلما تبدأ "امه" في الغضب منه او التوبيخ ينظر اليها بحنية وسهتنه ويقول لها (لو تعرفي انا بحبك قد ايه ما تشخطيش فيه خالص ) وتكررت نفس المأساه ؛؛؛ تاثرت "امه "بالجمله اول مرة وتاني مرة وبعد ذلك اصبحت نكته بيقولوها لبعض هم الاتنين

المهم هذه المقولات او الجمل المكررة خلونا نحاول نسترجعها مع بعض فهي بما تحمل من معاني حب وقلق الاهل الا انها ايضا لها الكثير من الواقع الكوميدي في حياتنا

وهي ايضا تبين لنا مدى ما تحمله اهالينا حتى نقف نحن اليوم كباراً نفخر براي الناس وهم يقولون عنا {شكله متربي وابن ناس }

ها مين قال انا سمعونا صلاة النبي

[yacho]

انا فى كلام لغايه دلوقتى ما انساهوش وبقى مصدر ننكش بيه ماما لما نفكرها بيه .

للمذاكره .. بابا الله يرحمه

لما نكون قاعدين ادام التليفزيون يقوللنا .. هو الفيلم ده ف المقرر السنه دى

او خلليكوا حيجيلكوا ف امتحان اخر السنه :blush:

لما يتضايق من اخويا عشان بيشخط في انا واختى ..كان ينادى اخويا كل مره

ويقول له .. يابنى انت قريت نعيي ف الاهرام هو انا مت .

ماما كانت دايما تزعق وتقول لنا .. ان قلت كام مره مش عايزه لب ف البيت ويتبعها :huh:

اتقوووووووووووووووووا الله <_<

برضه ماما عالمذاكره كانت دايما تقول لنا

بكره النتيجه تبان والايييييييييييييييييييييام بيننا.

لما كنت اصفر او اتكلم بصوت عالى كانت ماما على طول تقوللى

المدموازيلات الحلوين ما يعملوش كده :P

ياللا لو افتكرت حاجه تانى حاجى تانى.. وميرسى يا ياسو على مواضيعك الجميله :closedeyes:

تم تعديل 29 أبريل 2006 بواسطة yacho

[yasovinas]

ياشو الغاليه اول زبون في الدكان استفتاحك حليب باذن الله

دايماً كانت هذه الكلمة تتكرر في بيوتنا كلنا {مش عايز اسمع صوت} وبالطبع السبب بيختلف ؛ ممكن يكون علشان بابا عايز ينام ساعه الظهر؛؛ او علشان في حفلة ام كلثوم في التليفزيون ؛؛ او في عندنا ضيوف مهمين ؛؛ بس المهم انها كانت بتتقال كتير

وهي تعتبر تدريب مبكر على تقبل القمع والديكتاتورية اللي شفناهم وشايفنهم في حياتنا - حقيقي "اشكرك يا والدي العزيز "

ومن الجمل الثابته واللى يا ما سمعتها وتوقعتها ونفذتها من قبل ما تتقال {ما تردش علية } وطبعاً كان لها عظيم الاثر في حياتي العمليه لما كبرت ونفذتها مع رئيسي في العمل - مش بقول لكم اشكرك يا والدي العزيز :huh:

وللحديث بقية

تم تعديل 27 أبريل 2006 بواسطة yasovinas

[ATHENA]

ياااااه يا ياسووو..فكرتنا باللذي مضى..

خد عندك...

أوعي حد يقولك بابا عايزك او مستنيكي في و تروحي معاه .. سرخي علطلول :P

أوعي تركبي الأسانسير مع أقطاي خالص مالص..إستني لحد ما يركب و اركبي بعده واحد تاني..

أوعي تردي على الأبلة لو زعقتلك :huh: ( دروس كيف تكون مواطن سلبي )

يلا إصحي بقه يا دودو الفته جهزت و أبوكي لو جه من الصلا و لقاكي نايمة هي.... <_< (يوم عيد الأضحى)

بطلي دلع بقه و مش شايلاكي و هوديكي للعسكري أهو أقوله بنت مش بتسمع الكلام :closedeyes:

تم تعديل 27 أبريل 2006 بواسطة ATHENA

[yacho]

لما حد يضربك ف المدرسه قولى له ربنا يسامحك

لغايه دلوقتى مش عارفه اخد من الدنيا لا حق ولا باطل

تم تعديل 29 أبريل 2006 بواسطة yacho

[yasovinas]

وادي كمان زبون ابعت يا اللي بتبعت

الجمله دي كانت بتغيظني قوي وكانت دايماً ا تهيء لي خيالات وخزعبلات شريرة ولها رائحه وحشة

{لو فلحت ابقى تعالى ؛؛؛ اعمل ولا مؤاخذه بيبي على قبري :huh: }

اية الخيال والشاعرية دي كلها

اجمل جمله كنت بسمعها وكنت بتغاظ قوي لاني مش قادر ارد عليها {نسي تاكل نسيت تشرب نسيت تاخد المصروف نسيت تعكنن عليه ؟}

ولسه يا ما في الجراب يا حاوي

تم تعديل 27 أبريل 2006 بواسطة yasovinas

[yacho]

وادي كمان زبون ابعت يا اللي بتبعت

الجمله دي كانت بتغيظني قوي وكانت دايماً ا تهيء لي خيالات وخزعبلات شريرة ولها رائحه وحشة

{لو فلحت ابقى تعالى ؛؛؛ اعمل ولا مؤاخذه بيبي على قبري :huh: }

اية الخيال والشاعرية دي كلها

اجمل جمله كنت بسمعها وكنت بتغاظ قوي لاني مش قادر ارد عليها {نسي تاكل نسيت تشرب نسيت تاخد المصروف نسيت تعكنن عليه ؟}

ولسه يا ما في الجراب يا حاوي

بتاعه البيبى دى كانت بتتقال عندنا برضه :P

[ATHENA]

اجمل جمله كنت بسمعها وكنت بتغاظ قوي لاني مش قادر ارد عليها {نسي تاكل نسيت تشرب نسيت تاخد المصروف نسيت تعكنن عليه ؟

أهو دي بقه ليها حكاية

إيه .. إيسيييت..إيسيييت تاكل إيسسسيت تشرب..مش عارفه ليه ماكنتش تتقال نسيت..زيادة تقريع يعني

يا بجاحتك يا أخي..اللي إختشوا ماتوا...

إبقى قابلني لو فلحت يا فلان :huh:

[مصريه بالكويت]

ابقى قابلينى لو فلحتى فى بيتك ، يا بنتى تعالى ادخلى المطبخ اتعلمى حاجه تنفعك وسيبك من التلفزيون

بس الايام خيبت ظنها وفلحت ف المطبخ :huh:

[سقراط المصري]

امي تلم كتب الثانويه العامه بعد ظهور النتيجه ونجاح سقراط بدون

اي استعانه بدروس خصوصيه

فقط شوية كتب جارجيه ومش فكل المواد

امي

ايه ده يا سقراط يا متنيل على عينك

سقراط

خير يا اما فيه ايه علىالصبح

امي

كتاب التفاضل لسه ملزق الورق في بعضه

سقراط يا امي الكتاب يجي 300 صفحه هقراه امتى

امي ونجحت ازاي انت ماعندكش كتاب فاضل خارجي

سقراط انا قبل الامتحان كنت مستعوض ربنا في التفاضل يعني الله

الغني عن درجاته

امي نهارك ملحوس امال عملت ايه في الامتحان

سقراط حليت اللي فاكره من حصص المدرس في المدرسه

امي وانت كنت بتفهم من المدرس في المدرسه

سقراط

لا لانه كان بعد لما يحل المساله على السبوره يقوم يقعد يغير في

الارقام واحنا بننقله ونيجي نراجعها في البيت نلاقي الحل مختلف

امي منه لله

سقراط بقولك ايه ياحاجه انا مؤمن بان العلم في الراس مش في

الكراس

امي طيب عاوز تفطر

سقراط اه ياريت شوية فول ورغفين عيش بلدي

[سقراط المصري]

اولاد الموظفون في الارض

سقراط ينظر الى امه وهي جالسه على ماكينة الخياطه ماركة سينجر

ويدور الحوار الاتي

سقراط

انت بتعملي ايه ياحاجه

امي

بعملك بنطلون ياسقراط

سقراط

الله بس انتي ماسكه بدلة ابويا في ايديك

امي

ايوه ماهي انا هقلبها بنطلون لك

سقراط

طيب فين البنطلون بتاعي الكحلي

امي

عملته شورت لاخوك الصغير

تحياتي

سقراط

[سقراط المصري]

التوقيت

مساء احد ايام ربنا

سقراط

مساء الخير ياحاج

ابويا

اهلا سقراط يابني بقالي يومين ماشفتكش

سقراط

ماهو يابا انت بتخرج قبلي الصبح وانا لسه ساعات بكون نايم

ولما برجع من الكليه بتكون انت مقيل ساعة العصاري

ولما بتصحي بكون انا جرجت مع اصحابي

ولما برجع بتكون انت جيت مهدود من الشغلانه التانيه وبتكون نمت

ابويا

ماشي المهم شكلك عاوز حاجه

سقراط

طول عمرك فاقسني ياحاج

ابويا

خلص انا تعبان وعاوز انام

سقراط

والله ياحاج فيه رحله عملاها الكليه للاسماعيليه والاشتراك 15 جنيه

يعني لو امكن يعني ممكن يعني اروحها

ابويا

تروحها ... 15 جنيه.. الاسماعليه

سقراط

يابا انا بقول لو امكن يعني مش ضروري

ابويا

اه وماله بكره الصبح هديك الفلوس

التوقيت

صباح اليوم التالي

ابويا

تعالي يا سقراط

سقراط

صباح الخير ياحاج خير

ابويا

خد يابني ال15 جنيه اللي كلمتني عليهم امبارح عشان رحلة

الاسماعيليه

سقراط

اسماعيلية ايه ياحاج امبارح باليل بعد لما اتكلمت معاك لقيتهم في التليفزيون جايبين فيلم في السهره والفيلم كله متصور في

الاسماعيليه

ابويا

يعني ايه يا سقراط يابني

سقراط

يعني يابا انا شفت الاسماعيليه خلاص ومش هطلع الرحله

ابويا

ياسقراط لو عاوز تطلع الرحله خد ال15 جنيه واحجز

سقراط

والله يابا ما انا عاوز اطلع انا خلاص صرفت نظر

ابويا

طيب ياسقراط انا رايح الشغل عاوز حاجه

سقراط

سلامتك يابا

وعلى باب الشقه ينظر ابويا في عيني وانظر في عينه ويكون الصمت

ثالثنا

تحياتي

سقراط

[هادي]

مشهد صباحي

انا افتح باب الشقة وادخل برجلي اليمين ممسكاً بأجندة !! فقط (مع اني لسه ف تانية ثانوي .. بس تقدر تقول تدريب على حياة الجامعة )

اغلق الباب برفق .. مش عاوز حد يحس بيا

ساعة الجدار - عليها من القدر ما تستحق - تفضحني برنات رتيبه تعلن تمام الثالثة

امي تخرج من المطبخ لابسة المريلة المعتاد (ما هو مفيش غيرها) وفي ايدها آلة حاده !!

أنا : سلامو عليكو

أمي : كنت فين

انا (وبراءة الاطفال في عينية) : كنت ف المدرسة

راجع الساعة تلاته ؟! أمي متساءلة بشك وريبه

أنا : ماهو النهاردة سبع حصص

أمي : سبع حصص !! .. ده حسين ابن طنطك فكيهة راجع من الساعة واحدة في البيت .. شفته بيخبط وشايل شنطة المدرسة وانا طالعه ع السلم وراجعه من الشغل .. حتى شال معايا اكياس الخضار .. وسعادتك كنت بتتصرمح فين لغاية دلوقت ..

أنا ( الوجه يميل الى الاحمرار واللسان يبدا يتقل ) : أبدا والله أصل .. أصل .. لما

أمي مقاطعة : انت هتقصقص لي .. انت لسه ملموم على شلة الصيع بتوع السجاير

انت عمرك ما هتفلح

اهوه (اهو ايه مش عارف لغاية دلوقت)

لو فلحت وشفت نجاح عمرك

هتفضل موكوس طول عمرك

لما ييجي ابوك يشوف له صرفه معاك

مرة سجاير

ومرة كورة

هو انت دريان بالدنيا

هو انت عارف بتطفحوا ازاي وعايشين ازاي

هو انت فالح غير في التقميع والسبسبه آخر النهار

كل يوم خروج

كل يوم كورنيش

مبتزهقش

محفظتش الكورنيش ده

لما ييجي ابوك

فترة سكات .. لالتقاط الانفاس .. كحة .. سعال ..

ابادر : ما هو ياماما

ماما : غور من قدامي

أنا : .....

لاتعليق .. أغور

اعمل ايه طيب

[ذات الوشاح]

بسم الله الرحمن الرحيم

الجملة المعتادة الى اسمعها من امى و انا جالسه على جهاز الكمبيوتر :

قومى بقى من على الزفت ده

او ايام الامتحانات و انا مش لاحقة اخلص مذاكرة عشان مش بذاكر من اول السنه :

يوم الامتحان يكرم المرء او يهان

و باب لما يحب يجبلى تانيب ضمير يقوم يقولى :

بقى كه بابا حبيبك تعبان عشانك و انت .. و يسكت بقى

بس تعرفوا انا بتأثر فيا اوى اوى اصل بابا حبيبى الذكى مش بيستخدما كتير و على فترات متباعدة

و لما اعد قدام التليفزيون بابا كان يقولى :

هيا ديه القصة المقررة السنادى ..

و هكذا بقى

[قهوجى]

موضوع حلو و فكرته أحلى ..

أبويا الله يقدس روحه كان شديد الرقة و الحنان عليا أنا و الواد أخويا الدكتور اٍميل و أختى أم فادى .. و كان دايما ياخدنا فى حضنه اٍحنا التلاته و يفضل يبوس فينا لحد لما نزهق و يشوكنا بدقنه و يقول : ربنا يباركم و يبعد عنكم شر اللى ما يخافش منه .. و كانت أمى دايما على لسانها كلمة : مش عاوزه أسمع نفس لما نغيظها و نجادلها ..

الحقيقه أنها ما كنتش بتدينا فرصة للكلام و الحوار بعكس أبويا اللى كان بيسمع الرأى الآخر لأنه كان ديموقراطى و يميل لليسار :huh:

[yacho]

بابا برضه لما كنت اعمل له القهوة من غير وش يبص لها ويقوللى

هوه دا كمان كتاب انجليزى مش عارفة تذاكرية :huh:

تم تعديل 28 أبريل 2006 بواسطة yacho

[Farida]

ياسو ايه المواضيع الجميله دى .....أمى ربنا يديها الصحه كانت دايما تقولى ربنا يرزقك ببنت تعمل فيكى اللى بتعمليه فى ......

[yasovinas]

بسم الله ما شاء الله الزباين كترو اهو

نقول حبة كمان ؛؛؛ وطبعا كل واحد يختار اللي كانت على مقاسه

دايما الله يرحمه كان يقولها لي كل سنه في اول يوم في الدراسة (تفعد في اول صف قدام السبورة ) مع اني طويل وما ينفعش - وكل سنه اقعد في اول صف وابله " دولت " الله يصبحها بالخير ترجعني ورا - طبعاً هذه الجمله يجب ان تكون عودتنا على ان نكون في المقدمه دايما - :huh:

اللي كانت بتعجبني قوي من ابويا خصوصا ايام ثانوي {لو مش فاهم حاجه ...ارفع ايدك وقول للاستاذ مش فاهم !!! ما تتكسفش}

الله يرحمه كان فاكر المدرسين بتوعنا زي المدرسين على ايامه هيييييييييييه اياااام

الكلمه دي كانت دايما بتشعرني باني مبلول ومحتاج اغير (انت حر انا مش هقول لك تاني "اللي بيشيل قربه مخرومه بتخر علية وحده" )

من النصايح الجميلة والتي سمعناها كلنا وطبعا كان لها تاثير مفيد جدا فيما بعد

{ما تتاخرش بعد المدرسة وتقعد تصيع مع اصحابك }

وطبعاً تأثيرها كان بعد الزواج فتعودت ان تكون رجلاً من الشغل للبيت ومن البيت للشغل

مش قلت لكم من الاول شكراً يا والدي العزيز :o

[nancy]

انا عندى ماما كانت شديدة اوى فكان جملة البيبي دى تقولها ديما واحيانا تتبعها ب اتفووووووا

-وكمان بلاش صوت بابا نايم لو صحى على صوتك انت عارفة الى حيصل (وهو كان ظابط فكانت ايدة طرشة)

فبما انى كنت انا الكبيرة فلازم اكون العبرة والمشنوق الى متعلق على باب زويلا سواء عمل او معملش

-يعنى لما حد يغلط اختى ولا اخويا شفتى اه انت السبب لو كنت قدوة كويسة مكانش عملوا كدة

-بصى على فلانة ضفرها برقابتك شطرة فى المدرسة ازاى

-انت حتموتينى ناقصة عمر (وهى قاعدة اهه زى الفل ربنا يديها الصحة)

-انت بتذاكرة ولا بتعدى غرز الكنافا (دى حاجات كانت عملها ماام فى اوضة السفرة )

-بطلى ترسمى فى كل الكتب اللكلام مبقاش باين

-الاكل دة للضيوف الفاكهه دى للضيوف الصالون للضيوف على الله تدخولى الصالون والناس هنا

-حسابك لما نروح حتاخدة حتة علقة محترمة يا ناننسى(طبعا مش بينى وبنها ادام الناس )

ماما كانت هى بس الى بتزعق

انما بابا الله يرحمة كان طيب اوى ويحب الهزار معايا بس لما يزعل كان يضرب ضربة واحدة بس طرشة

بلاش افتكرة لحسن كل ماتيجى سرتة اعيط يلا الله يرحمة واشوفة فى الجنه

[nancy]

اه نسيت

لما كانوا يحبوا يخلصوا من الزن فيقلولى ان شاء الله

فاقول متقوليش ان شاء الله تبقى مش حتجيب الى طلبتة

وكمان حكاية الدعوة دى ربنا يرزقك ببنت تطلع عينك و تزهقك فى عشتك زى مانت قرفانى ومكرهانى فى الدنيا

وحصل عندى بنتين عوزين ضرب النار

ولما كنا ننزل نجيب جزمة يفضل يعدد لى فضل جزم باتا وزاى انها بتعيش وزى الفل واحسن ناس بيجيبوا منها

كل اسبوع واحنا بنتفرج على العالم يغنى ماما تيجى تكشر وتقول اية الارف الى بتشفوة دة دة برنامج ولا دى مذيعة

لما اكون فى عيد ميلاد وحدة صحبتى والساعة بقيت 9 ونص تكلمنى على التليفون والغريبة كل الناس تسكت لان صوت ماما عالى فى التليفون (مش تيجى بقى مش كفاية كدة)

حتىاختى الله يصبحها بالخير كانت عملة زى عسكرى المرور نسخة من ماما

فلما اخدها معايا ونقعد شوية تقولى ادام اصحابى مش حنروح باه ولا انت متستريحيش الا لما ماما تهزقك

انا عملت فى بابا مقلبين بس هربوا دمة

مرة وانا راجعة فى اولى ثانوى من المدرسة خبطت على الباب وقعدة على الدربزين وبولع برجلى نور السلم واحنا فى السادس بابا شفنى من العين خاف يفتح الباب اتخض واقع

مرة تانية استدعوة فى المدرسة فى اولى اعدادى فكنت مش شاطرة فالمدرسة بتقولى انت مش بتزاكرى لية

فقلت لها اصل بابا بيسافر كتير ونفسيتى تعبانة من كتر غيابة

فوهوا ادام المدرسة قالى انا سفرت فين يابت مانا قاعد كل يوم معاكم

طبعا اخدة علقة محترمة فى البيت من ماما مع قرصتين فى اعلى الرجلين دة كان تخصصها