إزاي تعرف انك اتربيت في بيت مصري

[yasovinas]

• ومالها الكتب بتاعة الوزارة ؟؟!!!
  
• بص كويس وانت بتعدي الشارع
  
• لفرد ظهرك وانت بتذاكر
  
• ما فيش مذاكرة على المزيكا ؛؛؛او ؛؛؛بتذاكر ازاي والبتاع دا شغال - اللي هو الراديو او الكاسيت -
  
• ما تمشيش حافي في السقعة دي
  
• صليت العصر ؟؟!
  

[Farida]

تخيلى يا نانسى انا كمان كنت الكبيرة ولو بنتفرج على فيلم و بابا الله يرحمه يدخل فجأة و ياويلى و يا سواد ليلى لو الفيلم كان فيه مشهد مش اللى هو يمسكنى بستفه هى دى القدوة لأخواتك و لو اتاخرنا فى النادى يسيب اخواتى و يمسكنى انا القدوة و اللى مش عارفه ايه

من الأقوال المأثورة :

- لو كنتى سيبتى التليفزيون شويه كان زمانك طلعتى الأولى -انا كل مذاكرتى امام التليفزيون و اقعد اذاكر نص ساعه و اريح امام التليفويون ساعه و مع ذلك جبت 94 فى الثانويه .... :huh:

- امشى على الرصيف

- خدى بالك من اخواتك انتى الكبيره

- الكتب و القصص دى بتبوظ الدماغ اقرى لك حاجه تنفعك احسن

- مش عارفه حا تفتحى بيت ازاى قومى ساعدينى و اتعلمى لك حاجه تنفعك بدل ما جوزك يدعى على انى ماعلمتكيش تكونى ست بيت

- كل اللى على ذوقك و البس اللى على ذوق الناس ....انا يا بنتى اللى شايفاكى اللون ده مش حلو عليكى و التفصيله دى مش بناتى خالص ......

[بنت شعنونة]

ههههههههههههههههههههههههههههههههههههه

انتوا كارثااااااااااا

اه ياني

فكرتوني ب ايام صعبببببببببببببببببببببببببة :)

انا كمان كلمة ابقى تعالى على قبري دي اتقالت كتير

وكلمة ان شاء الله بقيت حافظااااااااااها خلاص وعارفا انها الجواب المقنع ل لاءءءءءءء

انا بقى عندي مرافات عجب...

لما ابقى زعلانة وضاربة بوز

- يا بنتي ارحمينا ايه البووووووز دا... الفقري ها يفضل فقري..

ما تقعديش مقرفصة كدا!! اقعدي مربعة وانتي بتاكلي

- افردي ضهرك ........... بكره الكلمة دي موووووووووووووووووووووووووووت كانت بتتقالي الف مرة في الدقيقة لما بقيت مجرد ضهههههههههههر بسسسسسسسسسسسسسسسسسسسسس

[emmyyy]

كان في جملة غيظني أوي ماما بتقولها لي لما أقول لها علي حاجه إني مش بعرف أعملها فكانت تقول لي

إنت إللي قدك إتجوزوا و خلفوا من زمن ( أنا كان عندي 10 سنين ) إزي متعرفيش

متقربيش من التلفزيون عينك هتروحححح

محدش يشرب مية من التلاجة (امال حطين أزايز المية في التلاجة ليه علشان نتصور جنبها)

[yasovinas]

ايه الجمال والهنا اللي انا فيه دا يا ربي

ايمي بنت عمي وجارتي هنا وهناك ؛؛؛؛ الليله عيد يا ولاد

نزل مشاريب يا واد يا زعلان للزباين كلهم على حسابي ،،،،،،،،،،،ايمي ام سكندر عندنا النهارده

زغرطي يا كليو وطبلي يا اثينا .............. وسيبوا الرقص عليه

خلاص رحبنا وقلنا الكلمتين الواجب نرجع بقى لموضوعنا :huh:

اهم شيء اننا لازم نفكر ايه تأثير ما قيل لنا زمان على شخصيتنا دلوقت

يعني فريده ونانسي كبيرات العائلة القدوة والملطشه في الرايحه والجاية اكيد اللي حصل فيهم دا كله كان له تاثير وله نتاج عليهم يعني هن الاثنتان بسم الله ما شاء الله تفوقن في الدراسه واهو واحده دكتورة قد الدنيا في مستشفى ام العواجز :P والتانيه مقاول انفار قد الدنيا :P يعني برضه لازم بعد كل مداخلة تقولوا زي ما انا بقول (شكراً والدي العزيز)

• اوعى تقول لحد هاتلي حاجه
  
• اقفل صدرك
  
• بلاش وقفة الشبابيك و البلكونات دي
  
• كُل على مهلك ؛؛؛امضغ كويس ؛؛؛؛ما تاكلش وانت واقف الاكل ينزل قي رجليك (نفسي افهم اذاي)
  
• كُل من قدامك وما تحفش
  
• كفاية رغي في التليفون
  
• ما تقعدش قدام المروحه وانت مستحمي
  

[Farida]

كان في جملة غيظني أوي ماما بتقولها لي لما أقول لها علي حاجه إني مش بعرف أعملها فكانت تقول لي

إنت إللي قدك إتجوزوا و خلفوا من زمن ( أنا كان عندي 10 سنين ) إزي متعرفيش

تخيلى يا ايمى و الله العظيم كنت داخله اكتب الكلمتين دول

اهم شيء اننا لازم نفكر ايه تأثير ما قيل لنا زمان على شخصيتنا دلوقت

يعني فريده ونانسي كبيرات العائلة القدوة والملطشه في الرايحه والجاية اكيد اللي حصل فيهم دا كله كان له تاثير وله نتاج عليهم يعني هن الاثنتان بسم الله ما شاء الله تفوقن في الدراسه واهو واحده دكتورة قد الدنيا في مستشفى ام العواجز والتانيه مقاول انفار قد الدنيا

دكتورة فى مستشفى ايه انا دكنورة مهندسه ........عموما ما علينا على رأى واحد صاحبنا .......انا فعلا تفوقى فى الدراسه بيرجع لأمى انا و اخواتى على فكرة واحده طبيبه و معاها دكتوراة و التانيه مهندسه ....لأن امى ما كملتش تعليمها رغم تفوقها فى المدرسه الدائم و حصولها على شهادات و الذى منه فطلعت كل طموحها فينا و من اقوالها المأثورة :

- مش بناتى اللى يجيبوا نمر وحشه ....او فلانه الأولى دى تزيد عنك ايد و لا رجل .....انا عايزة بناتى اجدع من صبيان العيله كلها ......

لكن موضوع انى الكبيرة و ملطشه فى الرايحه و الجايه فادتنى مش فى الدراسه فادتنى فى تحمل المسئوليه و انى اعتمد على نفسى فى حاجات كتير كل تقديم فى مرحله دراسيه جديده حتى مكتب التنسيق ما شفتش امى و لا ابويا راحوا معايا ....شراء اللبس و ركوب المواصلات و السفر و الرحلات و الأشتراك فى المكتبات العامه تقديم لأخذ كورسات كمبيوتر ولا لغات ولا ولا ...اتفاق مع المدرسين الخصوصيين فى ثانويه عامه ...من ثانوى و انا باقوم بالمواضيع دى لوحدى الله يرحمه بابا متهيألى فعلا هو اللى زرع فى المواضيع دى .....انا مش قادرة اطبق المواضيع دى مع البنات كنت باقول يمكن الزمن اتغير او الجيل الجديد لكن اكتشفت ان الرك كان على شخصيه الوالد لأنه مش حا يتكرر تانى ......ليه كده ياياسو فكرتنى الله يجازيك بقه .....الا ما قولتليش انت ناوى تاخد مين فى البنات لأبنك علشان ابقى فى الصورة بس

تم تعديل 29 أبريل 2006 بواسطة Farida

[nancy]

ماشى ياعم ياسو بقى انا مقاول انفار من مهندسة ديكور لمقاول انفار عموما مش حارد عليك

المهم

الى حصل معايا دة خلى كل الناس متخيلة انى دماغى ضربة وعنيدة وانا كنت عنيدة فعلا فعملش الا الى انا عوزة

وبرضة زى ما قالت فريدة كنت باعتمد على نفسى كتير

ومش حتصدق ان من كتر قوتى ان اختى معرفتش بموت بابا الله يرحمة لا بعد اسبوع لان كان عندها امتحان ثانوية عامة

وخفت السنة تضيع عليها

فية بنت عندها 18 سنة ممكن تكون قوية للدرجة دى معتقدش

ان اعرف امسك اعصابى ومابكيش علية وانا كنت بموت فية دى مش سهلة ابدا

وكل الى شفت ماما وشدتها معايا خلانى اعمل العكس فى كل حاجة يعنى اصاحب بناتى واستحمل الجدل واخلى اعلى غضب عندى هو العصبية والنرفزة

دى مش سهل على حد ممكن يتعصب بسهولة

طبعا انا عملت كل حاجة تخص دراستى بنفسى وكنت كتير ارتب حاجات لاختى واخويا فى حياتهم حتى ماما كمان

لانى اتعودت انى اشيل كل المسؤلية

لدرجة انى بضايق لو حد عدل عليا

علشان كدة جوزى سيبنى فى حتة الترتيب او توضيب هو سيبنى ادير كل حاجة وهو يديرنى انا شخصيا

[yasovinas]

يا سلام عليك يا واد يا ياسو يا ابن فيناس شايفين اذاي عرف يحرك مكنوناتكم الداخلية ويخليكم تبعبروا عما في خوالج نفسوياتكم المستخبية في اللاشعور ;) mfb:

دكتورة فريده انا شخصياً عندي مرح فياريت علشان نكمل المجموعه ايه رايك احنا هناخد فرح لمحمد ولو عندكوا حاجه اصغر من عمر نشيل برضه يا فندم ؛؛ عمر طبعا ولد محترم وكبير واعقل اخواته :wub: هو عنده سنتين ونص وما عندهوش كبير :wub: اتخن شنب ما يعجبهوش يبص له من فوق لتحت ويقول له هبببببللله

[Farida]

ياسو ....فرح عندها سنتين و نصف و اخواتها التؤام عندهم 8 سنين و نص .......نقى يا عم و اختار براحتك احنا فى ديكى الساعه

[yasovinas]

خلاص يا مدام فريده يبقى نشيل الشيله كلها وعندي الواد ابن اخت المدام الفرده التانية لمحمد ابني ياخدوا التؤم وفرح نشيلها عمر وربنا يعينها عليه ايه رايك

اوستبينا mfb:

• المسلسل مش هينفعك ؛؛؛ قوم اقرالك كلمتين
  
• وانت فاكر اننا مستنيين منك حاجه ؛؛؛بلا وكسه
  
• وطبعا لازم تتبعه مصمصة شفايف من ست الحبايب يليها المقوله الشهيرة "يا مستني من النمله سمنه؛؛؛؛" ( اللي غايظني ان الحاجه عمرها ما كملت المثل ونفسي اعرف كمالته ايه ;) )
  
• ما تعليش صوتك :wub:
  
• بلاش لعب في الشارع :wub: وطبعا لو لعبت في البيت يبقى البيت مش ملعب :wub:
  
• يا ابني اللي ذاكر ذاكر خلاص قوم نام :wub: - انا كنت بتلكك على الكلمه دي وعلى طول اتقلب وانام -
  
• بلاش اللعب بالمقص بيجيب الفقر - نفسي اعرف اذاي ما الخياط طول النهار بيلعب بالمقص وما جابلوش الفقر والحلاق طول الليل والنهار بيطرقع بالمقص وبرضه مش فقران ؟؟!!!
  

[Farida]

خلاص يا مدام فريده يبقى نشيل الشيله كلها وعندي الواد ابن اخت المدام الفرده التانية لمحمد ابني ياخدوا التؤم وفرح نشيلها عمر وربنا يعينها عليه ايه رايك

اوستبينا

يا سلام كده الواحد اطمن على الشيله على بركة الله بس الرأى رأى ابوهم .....

وطبعا لازم تتبعه مصمصة شفايف من ست الحبايب يليها المقوله الشهيرة "يا مستني من النمله سمنه؛؛؛؛" ( اللي غايظني ان الحاجه عمرها ما كملت المثل ونفسي اعرف كمالته ايه )

يا مستنى السمنه من بطن النمله يبقى عمرك ما حا تقلى

[yasovinas]

• يا بني النوم لحد الظهر بيجيب الفقر
  
• لازم تاكل السلطه
  
• بلاش اكل برة
  
• انت فاكرنا نايمين على ودانا
  
• وطي المدعوق دا شوية
  
• انت فاكرنا بنلاقي الفلوس في الشارع
  
• ما تعليش صوتك في الحمام
  
• يا بني ما حدش بينفع حد
  

[Cleo]

قومى اعملى شاى

قومى هاتى كباية مية

قومى سخنى العشا

قومى وطى التليفزيون

قومى ردى على التليفون

- اشمعنى أنا اللى كل شوية أقوم :sad: ؟؟

- عشان انتى الصغيرة mfb:

- نحن لاااااااااا نزرع الشوك :sad:

تم تعديل 3 مايو 2006 بواسطة Cleo

[فنكوش]

يا طناش انا قلت لك ايه

هو انا اتولدت كبير ؟؟؟؟ الحركات دى كنا بنعملها

الا الكدب

[فنكوش]

كصه واكعيه

سنه اولى في الجامعه اتصلت بصاحبى اساله على النتيجة قال لى شايل 3 مواد B) مرضيش يقول اربعة تخفيفا للصدمة

رحت قلت لامى عندى مادتين تخفيفا للصدمه :sad:

امى قالت لابى عنده مادة واحدة بردوا تخفيفا :sad: للصدة

قبل الامتحان باسبوع ابويا عرف الكيكة معرفش ازاى وكانت ليله مجندله mfb: :blink: mfb:

دخات الدور الثانى وسقطت وكانت وا......................

ساعتها الكليه اللى انا كنت فيها تسمح بالدور التانى ب4 مواد حد يعرف يخمن هي ايه الكليه دى؟؟؟؟؟؟؟؟

بعدها الله يرحمه صالحنى بساعه لسه معايا للان ولا اظن انى اقدر اغيرها

الله يرحمه

[NoorJehan]

هل تتفقون معى إننا إذا تركنا الجانب الطريف فى الموضوع، سنجد خلاصه واحده...وهو الحب الذى يخنق...ويشل أحيانا بسبب خوف شديد علينا من الوقوع والفشل...كلما تناقشت مع والدتى حول ذلك، تعترف وبل تفتخر إنها مثل القطه التى أكلت أولادها من فرط خوفها عليهم...

أظن إنه خطأ تربوى بأن تظل تهدد وتنذر أولادك بكلام مر علينا كلنا من نوعيه القربه المخرومه التى أشار إليها الاخ ياسو...خاصا فى أمور حياتيه بسيطه لن تضر إن كانت نتيجتها الفشل...فمتى يثق الآباء فى قدراتنا على الطيران خارج العش؟

وحتى المسلسلات مليئه بآلاف الأمثله حيث ترى واحد متزوج وشنبه يقف عليه الصقر وأهله بيزعقوا فيه ويقولوا "ياما قلنالك ونبهناك لكن مفيش فايده" حول أمر تحسبه عظيم ولكن يتضح إنه قرر يسافر الإسكندريه بالسياره بدل القطر وإتعطلت السياره فى السكه !!!!...أو "قلبى وربى غضبانين عليك ليوم الدين"..كلمات كبيره للغايه وخطيره عن عدم رضا الوالدين ولكن تقال بسهوله فى الرايحه والجايه تجاه أبناء يشهد لهم الجميع بحسن الخلق والتربيه !!!

كل ذلك لا يمكن أن ينتج غير شخصيات ضعيفه، تفشل فى إتخاذ أبسط القرارات وتتحمل بشجاعه عواقب قراراتها...

والآن البعض المفضل لى:

مفيش خروج الدنيا بتمطر :huh:

متحاوليش، أنا عجناكى وخبزاكى :o

متحاوليش، دنا جيباكى من بطنى دى :o

تيجى تتناقش بهدوء وموضوعيه حول أمر ما...والرد: "فلا تقل لهما أفا" :o

(المناقشه دايما تساوى جدل وعدم إحترام خاصا لو إختلفت الآراء)

بكره لما تخلفى هتقدرى قد إيه إحنا صح :D

---

يا أهلنا الأعزاء...رفقا.. -_-

[مصريه بالكويت]

اقفلى المروحه انت لسه خارجه من الحمام واخده دش سخن :D :o :o

[nashwa]

سمعيلى كدة الواد والبنت فى نهر الحب كانوا بيقولوا ايه لبعض :o :o :D

[الاسكندرنى]

معلش اعذرنى يا ياسو انا بقول ان معظم اقوال الولدين فى البيت المصرى عبارة عن توسلات لفتقدى ليها الان فى غربتى

إصحى يا حبيبى الساعة بقت سبعة

المحاضرة حتضيع منك

أنا نازلة الشغل دلوقت

محدش حيصحيك

إصحى عشان خاطرى

يا اميرماتنزلش غير لما تفطر

طب بلاش

خد الساندوتش ده معاك

عشان خاطرى

إيه العيب انك تاخد ساندوتش معاك !!!!

وليه أصحابك يضحكوا عليك ؟؟

هو طالب الجامعة عيب ياخد ساندوتش معاه !!!!

طب معلش

عشان خاطرى يابنى

معلش يا اميرأختك الغلطانة

نسيت تقولك على الزيت وأنت نازل تجيب الحاجة

معلش

عشان خاطرى تناولنا واحدة

عشان خاطرى يابنى

الماتش مش حيضيع منه كثير

عشان خاطرى

عشان خاطر ماما

يا امير عشان خاطرى تذاكر ..

أبوس إيدك ..

لو مانجحتش السنة دى أبوك حينيل الدنيا ..

عشان خاطرى يا ابن بطنى

إحنا مش ناقصين

يا امير عشان خاطرى كفاية كلام فى التليفون

يابنى ده ما يرضيش حد

وبعدين ما انتوا بتقابلوا بعض فى الكلية

ايه لازمتها التليفونات !!!!!!!!

عشان خاطرى كفاية

أبوك طلعت روحة من فواتير التليفون

توسلات .. توسلات .. توسلات

إنها أكثر الكلمات التى تصف تلك الحالة الفريدة فى البيت المصرى فهى وقود الطاقة الوحيد الذى يدفع هذا الشاب ليكون إيجابيا إما بأن بفعل الصواب من تلقاء نفسة أو يرحم والديه من جبال الاخطاء والاستهتار وعدم تحمل المسئولية

ففى البيت المصرى

لا تنقطع التوسلات ليل نهار لم أدرك تلك النعمة التى من الله بها علينا نحن المجتمع المسلم حيث نسجت كلمة التضحية جميع ملابس أبائنا وأمهاتنا لا يستشعرها هذا الشاب أبدا طالما أنها وجدت متوفرة تملئ جنبات المنزل وأركانه وبامتداد حياته فى أسرته فأصبحت فى نظرة وبكل أسف بلا قيمة وباتت هذة التضحيات فى دستور البيت المصرى المكافح فرض وواجب

وحق مكتسب كونى أنتمى لتلك الاسرة

ومع حجم المسئوليات الرهيبة والذى لم أعتاد عليه من قبل أدركت تلك الحقيقة المرة فقد أصبحت مسئولا عن أسرة كاملة ولكنها مسئوليات أسرة كاملة وهنا لن تسمع صوت التوسلات إلا من داخل نفسك وحدك ولكن

هل تكفى التوسلات فى تلك الحالة ؟؟!!!

أم أن التدريب على تحمل المسئولية

هو الضمان الوحيد للنجاح فى هذا الاختبار الشرس ؟؟!!!

وهل بإستطاعتك تحمل الاعباء النفسية لتلك المسئوليات ؟؟!!

أسئلة لا أول لها ولا أخر ..

انا تعبان تعبان مرهق والله انا لا ادرى ماذا كتبت و لماذا كتبته ولماذا هذة التساولات فى اخر مشاركتى اعذرنى يايسو

تم تعديل 5 مايو 2006 بواسطة الاسكندرنى

[nancy]

ادة دة انت يا اسكندرانى مطلعتش امير خالص كنت مطلع عنيهم

احنا كان كلة بالزغر يعنى نظرت تهديد ووعيد تخليك تجرى تنفز بدل البهدلة :closedeyes: