ست اسمها فتاكات

[ragab2]

عرفت ست اسمها فاتاكات

بلاعة فلوس وكتيرة المصروفات

كل ما تشوفنى تقول هات وهات

كلت مرة  دراع جوزها  ومات

وكانت أكبر تاجرة مخدرات

المخبر  جندها  مرشدة .. مع  المرشدات

بشرط تجيبلهم قواضى وتشتغل فى الممنوعات

واما ازنق البيه  فى ترقية جابت له قضية جنايات

راحت جابتله الواد بلية ابن أخو عرفات

مع انه مالوش فى الصنف ولا أى ممنوعات

البنت دى وصلت لأعلى المرتبات

وتعرفت على كل الرتب والبهوات

وبقت تبيع حتى الواسطات

واتفتحت ليها جميع البوابات

وتخرج المساجين وبدون كفالات

واللى يوصل  فى بلدنا السالك وبدون شهادات

وأدى حكاية الست اللى اسمها فاتاكات

[Imhotep]

و الله عفارم عليها فتاكات

   حركه و مدردحه.. وليها

  في شغل التعلب فات

  و بسرعه وزي الهوا

  لمت الوفات....

[abla]

بقى معقول ياشاعر المحاورات

مش عاجباك الست فتاكات

دي بمقاييس النهاردة ست الستات

حركة وفتكة ومن شطارتها سموها فتاكات

عرفت السكة الصح في بلد الشهادات

لا علام ولا وجع قلب ولا تلبس نضارات

عرفت تجيب التايهة وتعكم الالوفات

________________

ضحكوا علينا وقالولنا هاتو شهادات

أدينا جبنهالهم من احسن الجامعات

وكان مصيرها  براويز تزين الصالونات

حبينا نشتغل قالوا لنا استنوا الدرجات

مالقيناش قدامنا غير الست فتاكات

أخدت المعلوم ولايمتنا ع المرتبات

ياحسرة ماتجيبش جزمة ولا جوز شرابات

شوف هي فين واحنا فين يابلد شهادات

عرفت بقى ليه الست فتاكات

ستنا وتاج راسنا ياشاعر المحاورات

________________

أنا بقى أقولك شجرة عيلة الست فتاكات

طلعت متجوزة العضو بياع التأشيرات

واخواتها الصايع والضايع واللى بينام في الجلسات

وباقي العيلة انعم واكرم نواب السلفيات

اللى لموا شقانا وهربوا بالمليارات

ده غير باقي قرايبها اللى بيعملوا مشروعات

اشي شاليهات واشي فيلات على شوية عمارات

واحنا ياولداه مش لاقيين نسكن خرابات

ياخوفي بكرة ييجي مانلاقيش جبانات

ماهو أكيد ده مشروع مستقبل الست فتاكات

قرافة مفتخرة لصفوة المجتمعات

________________

عرفت بقى ليه ياشاعر المحاورات

الست تاج راسنا وست الستات

[ragab2]

دانتى طلعتى فعلا ست الكل وخطيرة ع الكل

لدرجة هانروح نغير المهنة فى البطاقة

ونخليها صبى شاعرة

وشاعر سابقا

ايه الشعر الجميل الخفيف ده

واللى طلع على السجية

واسترسلتى فيه بدون تكلف

برافوا عليكى يا أحسن شاعرة

سقفة يا جدع لاختنا عبلة المبدعة

ونرجو المزيد

جزاكى الله خيرا

[ezzat afifi kotb]

قولى يا ست الكل وزيدى

قولى م الاول وكمان عيدى

حقول الله وح امد ف جيدى

واحفظ شعر يزيد ف رصيدى

ومن السحر لو سكينه ف ايدى

حجرح نفسى واقطع ف وريدى

[Imhotep]

  امسك عندك... الكلام الحلو ده لازم يتغني و يتعبى في شرايط... حد يشوف لى فين حسن سلكه... الله ينور يا شعراء.

[future]

يا جماعة الست فتاكات دى بطلة

بس احنا اللى منساويش بصلة

يا ترى يا زمان هتعمل ايه فى الغفلة

اللى مستنيين نصيبهم وواخدين غفلة

[ragab2]

وقتنا ده ياعبلة تنسى كل الشهادات

وقتنا فتح عينك تاكل ملبن ياأفنديات

زمانا دلوقت هو زمن الست  فتاكات

تغير اسمك وسنك وعنوانك  بس هاتقولك هات

خسارة الفلوس اللى أبويا دفعها فى الجامعات

لو يعرف كان وفر فلوس الكتب والكراسات

ده حتى وكيل الوزارة  بيشتغل دلوقت شحات

واللى ايده طويلة بيسرق بالملايين والألافات

ده غيرالعلاوات وبدل جلسات واجتماعات

وهو كله سرقة واختلاس  وفرض اتاوات

وكله بيساعد كله فى السرقة والاختلاسات

والكبير كبير مالوش محاكمة ولا محاكمات

ولما يقع تشتغل الواسطة ويطلع بالتليفونات

ويطلع لنا لسانه ويقول أبوكوا السقا مات

والصغير يرموه فى السجن ويدخلوه المعتقلات

ولو اتكلمنا يقولوا لنا وجعلناكم درجات

حتى السرقة عندهم فيها درجات ومقامات

المهم ربنا يستر ويبعد عنا كل البشاوات

[Imhotep]

مالهم بس البشوات يا عم رجب... هو انته مصرفتش اخر عشر تلاف دولار اتوزعوا على اعضاء المؤتمر?? عمومآ و لا يهمك... ادي كمان عشره !! متنساش تسجل اسمك في مؤتمر العربي.. واهى سبوبه برده !!

[ragab2]

ماصرفتش لسة حاجة

من يوم ما صرفت نصيبى فى بيع شركات القطاع العام

بس الحديد والصلب اتباعت رخيصة

هما كلوا فيها

[ragab2]

فتاكات دلوقت تعملك عاهات

اذا زعلتها تدخلك المعتقلات

دلوقت كل أصحابها خواجات

بعد ماعملوا اتفاقية الجات

حتى أخوها اللى كان شحات

بيركب  مرسيدس . بالمرايات

أول ماشافنى شغل المساحات

وبص لى  بصة عنطزة  وبهاوات

الله يرحم أبوه عم  صيام  اللى  مات

كان بيصوم طول السنة ما عدا برمهات

ودفنوه فى مقابر الصدقات

والا  مامتة .. الست  عدالات

كان لسانها بيطلق رصاصات

وفى مرة ضربت جوزها بالبوكسات

وكل يوم تدب معاه خناقات

وتسمع صراخهم  ع النيل سات

ونكمل الحكاية بعد الاستراحات

[abla]

فتكات دلوقت بعد الجات

بقت بتروح مؤتمرات

وبتصرف بدلات

وبتاخد عمولات

ولما ترجع بيعملوا لها تشريفات

ويعلقوا يفط مليانة تهاني وقبلات

معلوم هو احنا ف ديك الساعات

لما تمثلنا فتكات في المؤتمرات

وتجيب لنا اكبر الصفقات

وتستورد لنا نصابين من مختلف الجهات

ماهو ده برضه تبع عقدة الخواجات

ابعد عنها ياعم يكفيك شر العاهات

احسن اللى بيتعرض لها بيشيلوه ع النقالات

والبودي جارد بتوعها جاهزين بالبوكسات

ولو عايز تستجم يودوك غرفة العمليات

---------------------

أما اخوها اللى كان شحات

عقبال الحبايب عنده طقم فتوات

بيسموهم اليومين دول بودي جاردات

بالمطاوي والسنج بيشطبوا الحفلات

مالنا احنا ومال البشاوات

كفاية علينا الفول والبصل والحلو مغات

نعمة غيرنا مش طايلها ولا في المنامات

لا بنشوف اللحمة والفاكهة حتى في المناسبات

ولو شفناهم بيحصل لنا هلع وإغماءات

معلوم هو احنا زي البشاوات ولا البهاوات

ح نفتري ونطلب ناكل حاجات ومحتاجات