قصيدة للشاعر اللي اعتقلته الحكومة من يومين

[عصفور طاير]

أكيد طبعا سمعتو عن الشاعر أمين الديب اللي اعتقلته حكومتنا الرشيدة مؤخرا، والتي فيما يبدو فقدت صوابها، ا, أن الختيار بتاعنا أصيب بزهايمر جعله يرجع لعصر اعتقالات الشعراء والكتاب.. سبب اعتقال الشاعر من وجهة نظر الحكومة أنه قال قصيدو تهاجم قانون الطوارئ، دا طبعا غير إنه عضو بتنظيم محظور (الأخوان المسلمين)، ودي طبعا زي مانتو عارفين إنها جماعة محظورة لا تمثل حوالي ثلث مجلس الشعب ولا حاجة.

في الحقيقة لم أجد القصيدة ذاتها (لا للطوارئ)، فأتيت لكم بقصيدة أخرى له حتى تعرفوا هذا الشاعر المتميز,, وعلى فكرة الراجل من جيل نجم والأبنودي، يعني حوالي 70 سنة.. ورغم ذلك لم يكن مشهورا جماهيريا و إعلاميا، طبعا للأسباب سالفة الذكر.

البت باتعه

شعر: أمين الديب

البت باتعه... بنت زيد عبد الصبور

اللي أمها يوم عرسها

كان عفشها... حلّة وبابور

ومعاه كمان صندوق خشب

كان أصله سحارة صابون

فيه بنستين والمكحلة

ومراية والفلاية والملقاط

وحجر وليفة ومبخره

وقزازة كان فيها البخور

وجوز صحون

ومنٍخُلين..

والطشت والقروانه والغربال..

ومقشّه ليف...

ومقشتين عرجون

وزير وزلعة وقلتين وماجور

وحصيره من سوق التلات

ولحاف بإيدها منجداه

ومخدتين

والوش كان دمُّور

في الانفتاح

علي رأي صاحبي ولانبطاح

وفتحنا مصر سداح مداح

ونسينا حي علي الكفاح

والشعب محكوم بالسلاح

اتلخبطت كل الأمور

وقيم كتير

وعادات كتير اتغيرت

من ضمنها غًلو المهور

البنت دي

بنت أم باتعه

مش عاجبه حد في مشيها

إكمنًّها.. مشيت طريقها لوحدها

والأسرة غابت عنًّها

مشغولة عنها بعبئها

سايبينها هيًّ وشأنها

وإكمنًّها مستهدفه

الأجنبي ومعاه غبي

فكّر لها

قال أولا:

ترفض معيشة أهلها

ترفض أوامر ربها

ترمي الحياء والانتماء ورا ضهرها

تقطع جدورها بنفسها

أوعز لها

إزاي حتعرض لحمها

وتبان مفاتن جسمها

من ضفرها.. لأعلي خصله ف شعرها

عمل الصالات... تعرض موضات

والاعلانات... ماليه الشاشات

بالشنبوهات والتسريحات

وحاجات كتير فرحت بها

تاهت ونسيت نفسها

وتكلًّمك ربع الكلام بالأجنبي

وتقول هالو...

بنت أم باتعه تقول هالو

مرسيه يا شوشو وثانك يو

وكَمٍ يا توتو وياللا جو

وكبار شيوخ المسلمين

ما عرفش ليه مًتلجًّمين

والمسئولين... فتحوا الببان علي وًسعها

قام قال سلامة ألمًّها

يمكن تغيّر فكرها

ترجع لدينها وربها

وتعيش حياتها بحلوها وبمرها

راح لـ أمها...

يخطبها منها وقال لها

بصراحه بنتك..

عاوزه حد يلمّها

وأنا قدّها

قالت: وماله

البنت يلزمها الجواز

شخشخ جيوبك.. واشتري ياللا الجهاز

قال: اطلبي...

قالت: تجهز شقه.. قد أربع إوض

أحسن نابوليا في البلد

وتجيبها من دمياط

وتجيب نجف من غير عدد

والمكنسة بشفاط

والدًّش قبل الدُّش

والفديو والبوتاجاز

وتجيب لها تلاجة ستاشر قدم

وتجيب لها قبل الجواز...

الفرو والمحمول

وتجيب لها غسالة فول

أنا قصدي فول توماتيك

شقتها كاملة..

زي أي بوتيك

وتجيب لها قبل الجهاز

الشبكة طقم من الدهب

أنا مش حاقولك ألماظ

وتجيب لها فستان زفاف

من غير كمام من غير كتاف

علشان يبين صدرها

وتبان مفاتن جسمها

وتجيب غوازي تزفها

واللي اسمه إيه شهر العسل

في الشرم واللا الغردقة

وبلاش أمور البعزقة

آدي مطلبي

إن كنت قادر مهرها

قرَّب لها

أنا مش حاميّل بختها..

قال: يا ام باتعه حاجيب منين

أنا لاني راجل مرتشي

ولا أحب أجيب بالدّين

ولا أرضي بالتقسيط..

الطاق بيبقي طاقين

ويكتّبوني شيكات

أو أمضي علي ايصالات

علي إنها امانات

وحكاية مش هيّ

لو بس فات شهرين

مادفعتلوش قسطين

بدل المحامي اتنين

حايجيب له رفض الشيك

ومصيبه وقضيه

ومش حاقولك عالقرف

وحاجات مخلًّه بالشرف

اما البوليس والمحكمه

حابقي ف نظرهم منحرف

وباكسر القوانين

شوفي يا ام باتعه

أنا عندي شقه محندقه

معقوله ماهش ضيقه

فيها يادوب أوضتين

وعملت جمعيه

مع ناس أماره زيكم

وقبضتها ألفين

وادي اللي عندي وقلتلك بصراحه

وبإذن واحد أحد

ربًّك حايفرجها..

وباتعه حتريَّحك.. وتعيش مرتاحه

قالت له: قم من هنا

قم فضها سيره

أنا احترمتك.. عشان الأهل والجيره

بتقولي الفين جنيه?!!

وانا اللي قال بافتكر..

باتعه حاتخد بيه

حافظ علي كلمتك يا اهبل..

وخلًّيك زوق

دي باتعه طول عمرها

دايما تبص لفوق

لاحمر ولاخضر

وشي محزَّق وبنطلونات

والشعر فوق كتفها سايح

وفي الكوافير

مش كل طير يندبح

خد دش وانت تفوق

وتفوق لنفسك

وتتكلم كلام موزون

وفرضنا انت اللي عاقل

والمستمع مجنون !

ألفين جنيه للغوازي واللا للمأذون?!!

فيه ناس كتير زيكم مش عايشة في الدنيا.

مابتسمعوش الرداوي.. واللا تلفزيون?!!

شفت اللي بيقدمه الحاج متولي?!!

الشقه بالعفش كامله..

وفلوس كتير في البنك

كتبه لعروسته..

دَا غير اللبس والمصاريف

شايفاه بعيني

ولا واحد غريب قالًّلي

كل المسلسل تابعته دقيقه بدقيقه

والحاج متولي إلاهي لم يشوف ضيقه

راجل صحيح مًقٍتًدًر

كل البنات عاوزاه

وباتعه بنتي..

إلاهي يكون نصيبها معاه

مش جاي تقولي الشباب !!

أنا ناقصه هَمٍ تقيل

قال: يا ام باتعه اسمعيني

كل دا تمثيل

قالت له: ده قصر ديل

وبلاش كلام فاضي

الشعب راضي

مافيش غيرك عامل لي تقيل

ما تكونش ماهر يا شاطر

واسم أبوك عطار

والشاي علي النار

وقاعد لسَّه عالرمله

والحلوه تيجي تلاقيك

فارش لها المنديل.?!

قال: يا ام باتعه

دي ناس بتوزع الأوهام

ساعدوا العدو بجهلهم

في الحرب عالإسلام

وأنا مش بالوم جهلهم

اللوم علي الإعلام

قالت: خلاصة الكلام

أنا بنتي مش من وقمكم

شوفولكو ناس علي قدًّكم

أنا بنتي حلوه مثقفه

حافظه الأغاني كلها.

أحدث شرايط عندها.

دي لما تلبس بنطلونها الجينز

كل الشباب تجري وتخطب ودّها

ونانسي عَجرم نفسها

ما تجيش في خصله ف شعرها

ولا تيجي ضفر ف رجلها

طب والنبي...

لو شافها واحد أجنبي

ليجيب لها.

كل اللي ييجي ف نفسها

[nemr111]

تسلم يا عصفور و دايما طاير

[yacho]

جميله يا عصفور.. انا اول مره اسمع عن امين الديب على فكره .

تم تعديل 28 أبريل 2006 بواسطة yacho

[Cleo]

رائعة... شكرا يا عصفور....

(وردة)

[nancy]

حلوة اوى يا عصفور ياريت تكتب لنا حاجات تانية من قصائدة

[MZohairy]

أول مره أشوف عصفور حريف غناء و حريف شعر :)

[عادل أبوزيد]

حقيقة أول مرة أسمع عن الشيخ أمين و لم أسمع من قبل عن القصيدة التى تم إعتقاله بسببها و هنا هذا هو رابط الموقع الذى يحمل قصيدة الشيخ أمين عن قانون الطوارئ.

استمع لشعر الحاج أمين الديب عن الطوارئ والذى اعتقل بسببه

و الجديد فى هذه القصيدة أنها تشرح للرجل البسيط لماذا يجب مقاومة قانون الطوارئ وذلك بلغة بسيطة تضع رجل الشارع البسيط فى مكانه الصحيح فى مواجهة النظام.

و ربما تكون هذه القصيدة و أشباهها بداية الطريق لصياغة الحلم المصرى و الذى يسد الفجوة بين المثقفين المتحذلقين و رجل الشارع البسيط الذى يستطيع فعلا الدفع بقاطرة الإصلاح السياسى.

نسيت أن أقول أن رابطة الموقع أعلاه تتبع جماعة الإخوان المسلمين

[علاء زين الدين]

حقيقة أول مرة أسمع عن الشيخ أمين و لم أسمع من قبل عن القصيدة التى تم إعتقاله بسببها و هنا هذا هو رابط الموقع الذى يحمل قصيدة الشيخ أمين عن قانون الطوارئ.

و ربما تكون هذه القصيدة و أشباهها بداية الطريق لصياغة الحلم المصرى و الذى يسد الفجوة بين المثقفين المتحذلقين و رجل الشارع البسيط الذى يستطيع فعلا الدفع بقاطرة الإصلاح السياسى.

أنا أيضا سمعت عنه لأول مرة منذ يومين حين نشرت إحدى قصيدتين مسموعتين له على موقع آخر. وكان تعليقي (معذرة على التشبيهات السكندرية):

عبقري .. زجل يحتوي على فكر شامل يعجز عنه الكثير من المثقفين .. لكن بأسلوب يصل إلى أهالي الحضرة وكرموز ببساطة ووضوح.

واضح أن هذا مكمن الخطر الذي أدى إلى اعتقاله.

الرجل أسلوبه رائع وبسيط يمكن أن يستجيب له عشاق شعبان عبد الرحيم وأمثاله من الفنانيين الشعبيين. تخيل لو انتشرت شرائطه في سيارات الأجرة والميكروباس؟ خطر حقيقي.

القصيدة الأخرى التي سمعتها كانت تدفع الناس إلى الذهاب إلى الانتخاب. تفصل كل مشاكل البلد وتدعو الناس ألا يخافو من الضرب والرصاص ولا يجعلوا التزوير يثنيهم عن الانتخاب، الرسالة كانت أنت تذهب للانتخاب وتجعل الذنب على المسئولين إن زوروا. والقصيدة تتناول كل شيء بوجه العموم مع التشجيع بلطف على انتخاب مرشحي الإخوان.

وقد يكون انتمائه أو ميله إلى التيار الديني أحد أسباب عدم شهرته. فللأسف أرى من التيارات السياسية الأخرى شيئا من التجاهل للمجهود المعارض الذي يأتي من جانب التيار الديني. ومثال ذلك موقع كفاية الذي يكاد يتجاهل نشاط كتلة الإخوان في مجلس الشعب في حين يذكر قضايا اضطهاد المرأة في بلاد آخرى. المسألة تحتاج إلى تعاون أكثر من هذا.

تم تعديل 6 مايو 2006 بواسطة علاء زين الدين