سلام سلاح

[ezzat afifi kotb]

                  سلام سلاح    

                   -------

انا رحالة باستمرار             والباسبور مليان اسفار

لما اخش ف اى مطار              استقبالى دايما حار

يستقبلنى الامن بهمس         وابقى كتاب يقروه باللمس

والتفتيش ف حواسى الخمس        وف احشائى بالمنظار

ومن الحيطة والاستحراص      يجى كبير الامن الخاص

ومعاه عدسة يفلى الراس            قشرة راسك بالقنطار

وامشى ورايا الكاميرا تلف          وتصورنى بالبس خف

يمكن ديه اشارة العنف              تجرى عليه كتيبة النار

وشى اصفر وراح ميت لون     والكل مصوب ف المضمون

هى مبادئى ضد الكون            او طول دقنى يجيب العار؟

رئيس الامن بيدى تمام                وابدأ بالعرق استحمام

صنبور ذاتى مفهش صمام             اتبليت من غير امطار

مسك الخف وشده بقوة             وسحب الحشو الملزوق جوه

وناوله لواحد جنبه فتوة                 يحل الشفرة والاسرار

استدعوا خبير بجهاز تفجير      وشاشات ع الخف بتدى صفير

كردون الامن وقف طوابير               يمنع جماهير النظار

اشتبكت اسلاك الترويض              مع عدسات ليها وميض

حشو الخف كرتون بيض                  فك الشدة والاستنفار

قال له يا باشا الخف امان              قال لفة ف ورقة جرنان

واربط فوقه فيونكه ستان            ويبصم خفه ما فهش عوار

قال يا اخينا الخف اتمزق                واللى تمزق يوم يتلزق

اوع تحس ان انت مهزق              وقع دوغرى بدون اعذار

قبضة حسرة ف قلبى بتعصر        لو اخوك يظلم من راح ينصر

تيجى ايزيس تبكى ف الاقصر           او يطلع حورس م الغار

صوت بيحشرج ف المذياع             صاحبة بيعلن ع الاقلاع

وامانى الرحلة والاستمتاع               واقرا الورد والاستغفار

وهبطنا ومطارنا وصول              اجرى ع الجوازات مبلول

يقابلنى واحد مسؤل                      يسألنى فين الاخطار ؟

بسبورى كان ملفوف ف شريط          شافه وركبه ميت عفريت

ياللى حكومتك راهنة الزيت              جاى بالكوسه ولا خيار ؟

قلت يا ربى انا متهان                       جوة بلدنا وبرة كمان

طيب فين حقوق الانسان                    ولا دى بس للاخيار ؟

قاللى يا واد انا شاكك فيك                    قلت له ليه الله يخليك

قاللى قشف ف كعوب رجليك              من حزب الله او قندهار ؟

قلت ايه بتقول يا خواجة ؟                 بقى يفحصنى بكل سماجة

مش لافف على وسطك حاجة ؟           او منشور من كودية زار ؟

قلت ليلتنا ما ليها نهار                       ابقى المارد اقع منهار

وخواجة قزم صبح جبار                    ويوجهنى ف كل مسار

قاللى بتعرف انك جاهل                       والجاهل دايما يستاهل

وف حقة لازم يتساهل                     مش عارف طبله من طار

فيه ف بلدنا امخاخ جبارة                    ومناخ علمى لكن يخسارة

بيردم ع التنوير بيشكارة                         لو فكرنا راح نختار

شوف يا خواجة العلم عتيق                   شارب منه وكان ع الريق

نمت صحيت ومسكت طريق                    حكمونا الوكلا بالنار

جربو فينا شرقى وغربى                  ومطلوب منا نجرب عبرى

ونعدل كل نظامنا العربى                     امين جامعتنا بن اليسار

عزت عفيفى قطب

[Imhotep]

  الله ينور يا شاعر.... بس انا عندي ليك حل... خلصلي الكام اغنيه الهابطيين للواد حسن سلكه, و انا حطلع لك باسبور احمر عليه توقيعي... قوم لما تسافر تعدي من صاله كبار الزوار.... اي خدمه يا قطب يا خويه!!!!

[abla]

الله ينور عليك يااستاذ عزت ... والله من طالع سعدنا اننا بنطالع كلامك الجميل ده

[ezzat afifi kotb]

اختى الدكتورة عبلة

والله استحسانك لما اقول هو وسام اعتز به

وعلشان اخونا امحوتب ما يزعلش ويقدر يدى حسن سلكة اغنية ... اسمع يا سيدى ...

حدرجة بدرجة

نظروك فى الداخلة....حسدوك ف الخرجة

يام الضفاير ليل .... وام السما الزرقة

ابكى بفيض النيل ... على ماضى كان ارجى

ولا على حاضر ....هدمتك خرجه

يامين يبكينى ...ولا تنطفى الحرقة

وقدس اقداسك ...للمس والفرجة

واللى شرب كاسك ... باعك بورقة

ويوم ما اكل ناسك ... صاب رجلك العرجة

عودنا اكل المش ....وف العيد ناكل مرقة

ولا كان حدانا الغش .... ونكره السرقة

جابولنا طبق الدش ...ولهونا فى الفرجة

مبسوط يا عم خاللى حسن سلكه يلعلع

[Imhotep]

الواد سلكه اول ما بلغته اغمى عليه... كتو نيله اهبل و قلبه خفيف... نعمل ايه يا قطب يا خويه... شرايط الاهبل ده بتتباع حلاوه!!!! عمومآ ادي باكوين اخضر تحت حساب الاغنيه الجديده... يسلملي شعرك يا مأكلنا الشهد.

[search4truth]

الاخ عزت عفيفي قطب..

وحشتنا اشعارك الجميلة ..

لعل المانع خير.. ونقرا لك قريبا انشاء الله..