4 ريشه فى زمن ردىء !!

[قهوجى]

جارى و حبيبى الحاج عمرو و اللى بينى و بينه معاملات مادية و صداقة وطيدة لاقيته اٍمبارح زعلان و متأثر علشان زبون سأله على حاجه و ما كنتش عنده فوصف محلى له لأنها موجوده عندى .. فما كان من الزبون الغتت اٍلا اٍنه قال له لا يا عم ده 4 ريشه :sad:

يعنى يقصد اٍنى قبطى و ما يصحش يشترى من عندى .. فحاول الحاج عمرو أنه يفهمه أن الكلام ده غلط و أن النبى عليه الصلاة و السلام كان بيتعامل مع المسيحيين و اليهود و حتى المشركين المعتدلين بدليل أن دليله لرحلة الهجرة من مكه للمدينه بصحبة صديقه أبو بكر كان من كفار مكه و أنه تزوج من السيده ماريا القبطية بنت مصر المحروسه و أنجب منها أبنه الذكر الوحيد اٍبراهيم و كمان قال من آذى ذميا فقد آذانى .. و شواهد كتير بتدل على مدى عظمة و تسامح النبى و رؤيته العميقة للمستقبل اللى قرا فيها أنه لابد من التعايش بين المسلمين و أصحاب الأديان الأخرى بسبب أن الاٍسلام سينتشر و يتوغل فى شتى أرجاء المعموره و بالتالى لا يمكن أبدا للمسلمين أن يتعاملوا اٍلا بالحسنى مع المسيحيين و غيرهم ..

المهم .. صاحبى و أخويا الحاج عمرو كان زعلان على الحالة الفكرية الضحلة و العنصرية التى وصل لها الفكر الجاهل الضيق فى المجتمع .. و من ضمن ما قاله أنه حتبقى مصيبة لو جاء اليوم اللى البائع يطلب من الزبون أن يبرز له بطاقته الشخصية ليتأكد من دينه و دين أهله قبل ما يبيع له !!!

يا عالم خافوا ربنا شويه لو مش علشان مستقبل عيالنا اللى شئنا أم أبينا فهم مطالبون بالتعايش السلمى يبقى علشان خاطر وطننا اللى بيجمعنا و مستحملنا و مستحمل غلاستنا و سطحيتنا و ألاطتنا ..

يا اٍخوانى نتيجة الممارسات العنصرية التافهه اللى من تحت لتحت حاندى فرصة لأمريكا النيكا كونيكا أنها تلعب لعبتها القذرة بحجة حماية الأقباط المصريين اللى هم أصلا محمييين بحب أصحابهم و جيرانهم و اٍخواتهم المسلمين ..

و يا شباب الكفاتسه اٍرجعوا لعقلكم و تسامحكم و اٍمتنعوا عن تداول شريط مصر بلدنا اللى بدأ ينتشر سرا بشكل عنكبوتى سرطانى مش عارف اْزاى !!! و أرفضوا فكرة الرد بالمثل لتنافيها مع تعاليم يسوع المعلم ..

و يا حبيبى الحاج عمرو كل الود و الحب اللى بينا برضو مش حايخلينى أنسى صندوق البيبسى الفارغ اللى بتحاول تغالطنى فيه :sad:

[yasovinas]

كارثة؛؛؛ بل اكبر داء في الدنيا هو الغباء- ما الفرق بين المسلم والمسيحي في تعاملاتنا اليوميه وفي حياتنا المدنية؟؟؟

الدين لله والوطن للجميع - نعم؛؛ فانا اعيش منذ طفولتي ومن حولي المسيحي والمسلم ولم نشعر اطلاقا باي فرق

خلال الشهر الماضي اتى الى العمل معنا من مصر شابين حديثي التخرج بعض الشيء "ولكنهم اصحاب خبرة في مجال الصناعه التي نعمل بها" الشابين اتيا معا،ً وطلبا ان يتم تسكينهم معاً, وهم يقتسمون كل شيء سوياً , حتى عندما اتو الي لفتح حساب في احد البنوك اقترحت عليهم مصرف "ابو ظبي الاسلامي" فرحبا وذهبا الى هناك معاً ؛؛؛ كل هذا واحدهما "اسحاق ذكي" والاخر" محمد احمد" وهو شاب ملتحي واظنهما على خلق ولم اشعر انا شخصيا باي شعور مخالف اتجاه اي منهم ؛ كما لم اشعر منهما اي فرق في التعامل سبحان الله نحن لا نشعر بهذه الفرقه فلماذا ياتي الينا من يريد ان يْشعرنا بها ؟؟

تم تعديل 4 مايو 2006 بواسطة yasovinas

[فولان بن علان]

تحية لك واجبة يأستاذ قهوجي على روحك المتسامحة الجميلة

لقد كدت أن أفقد الأمل أن يتحدث قبطي بشكل منصف

وها أنت تعيد لي الأمل من جديد

إلى أولائك الهابطون علينا بأجندات مشبوهة

بل وتعالى وتذاكي وخبث غير مستتر

تعلموا كيف تكونوا مصريين

ونحن جميعاً نتعلم منك يا أستاذ قهوجي درساً هاماً

على فكرة أين يوجد محلك لنشتري منه :D

[Hammer]

شئ يدعو للغثيان و القرف أن يتم التعامل مع الناس أو عدم التعامل معهم علي أساس طائفي .. و كأن السعر الأفضل و جودة البضاعة و الأمانة في التعامل لا نحصل عليها إلا من أبناء ديننا فقط !!!

و لكن أرجع و أقول دي ثقافة شعب بأكمله و ليست حكراً علي جماعة معينة .. من الأخر , نحن شعوب عنصرية .. المسلم و المسيحي .. البحراوية و الصعايدة .. المصريين و الخليجيين .. حتي الأهلاوية ( :o ) و الزملكاوية ( :D )

:o :huh:

تم تعديل 4 مايو 2006 بواسطة Hammer

[mickey_egp73]

للاسف الشديد المسألة ليست عنصرية و لكن كما ذكر الاستاذ قهوجي هي دين فالاصل ان التعامل مع اهل الكتاب مباح و لا غبار عليه الا في حالة ان يكون معادا للدين الاسلامي مظهرا لهذا العداء و للاسف الشديد الممارسات الحالية التي تحدث من "كثير" من الاقباط لا تدع مجالا للشك في عدائهم "العلني" للدين الاسلامي و محاولتهم ايذاء المسلمين و التهجم "علنا" علي مقداستهم بطريقة فجة "غير علمية" و لذلك فبعض المسلمين يرون ان مقاطعة هؤلاء واجبة..ليس لانهم من ديانة مغايرة و لكن لانهم قد صاروا في خندق معادي دينيا ووطنيا ..

و اعتقد انه عقلا لا يمكن ان اساعد شخصا او جماعة هناك شكوك في نواياها تجاهي و تجاه ديني ووطني علي ان يؤذي ديني ووطني و الا سأكون شريكا له في هذا الايذاء و من هناجاءت تلك المقاطعة من بعض القلة من المسلمين و لكن و عن خبرة فالاكثرية من المسلمين ما زالت تطمع في ان يثوب الضالون عن ضلالهم و يعودوا الي حضن هذا الوطن و يعلموا ان الجزاء الذي ينتظرهم ممن يظنون انهم درع لهم لن يكون سوي جزاء سنمار وهذه الاكثرية من المسلمين لا تمارس اي نوع من انواع المقاطعة سواء علي المستوي الاجتماعي او العملي...

و الله اعلي و اعلم

تم تعديل 4 مايو 2006 بواسطة mickey_egp73

[ابن بلد]

لا اعتقد انه يوجد كثيرا ما يسمى بالاحتقان الطائفى بين المسلملين والمسيحيين

لانى اعيش واعمل فى حى يقطنه الكثير من المسيحيين

ولم نشعر نحن كمسلمون ولا هم كمسيحيين بادنى تغيير حتى لحظتنا تلك

وحينما نتحدث سويا عن احداث الاسكندريه سواء ما حدث من اسبوعين او ماحدث منذ شهور

نتحدث على انها مؤامره وباشخاص ماجوره سواء من المسلمين او المسيحيين

وتهدف تلك المؤامره تفكك المجتمع المصرى

وبالنسبه لى شخصيا لدى تعاملات ماديه كثيره مع مسيحيين تتحلى بكل ثقه

ويحكى لى احد اصدقائى المسيحيين عن مداومته مع صديق قديم له مسلم

بانهم اعتادوا منذ سنوات طويله

على ان يقوم بتجهيز افطار للصديق المسلم فى رمضان

ويقابلها الصديق المسلم بعزومه لحم وبط لصديقه المسيحى بعد قضاء فتره صيامه فى نهايه ابريل

حكايه اخرى لاحد اقاربى وهو خطيب وامام مسجد وملتحى ومن اللى بيوقولوا عليم سنيه

وعندزواجه صمم ان الذى يصنع له الجهاز احد اصدقاءه المسيحيين

وكان ان ذاك ليس فى مصر بل كان فى مكه يعمل لدى رابطه العالم الاسلامى

ويوجد لدى الكثير والكثير من اشكال العلاقه الجيده بين المسلم والمسيحى

والتى هى الاكثر انتشارا وليست نوادر حتى نقول ياللعجب

ولكن ذلك لا يمنع وجود بعض النفوس البشريه المريضه ولكنها ليست كثيرا

وقد تكون علاقتهم بالتدين والالتزام الدينى ضعيفه او خاطئه احيانا

وتجده دون اى مبرر يكون له موقف سواء كان هذا الشخص مسيحى او مسلم

[أبو محمد]

تكلمت فى أحد الموضوعات السابقة عن صديق الصبا والدراسة ورفيق السلاح المسيحى .. وعن رأيه المستنير فى أحداث الاسكندرية ..

اليوم كان لى قضية قيد التحقيق فى المحكمة .. وكان لابد من شاهدين من الجيران لإثبات حقى .. تكلمت أول ماتكلمت مع أقدم جار مسلم وطلبت منه شهادة الحق وذكرته بقوله تعالى :

بسم الله الرحمن الرحيم

".... وَلاَ تَكْتُمُواْ الشَّهَادَةَ وَمَن يَكْتُمْهَا فَإِنَّهُ آثِمٌ قَلْبُهُ وَاللّهُ بِمَا تَعْمَلُونَ عَلِيمٌ"

ولكنه رفض الشهادة للأسف .. ثم تكلمت مع جار مسيحى وطلبت منه شهادة الحق فوافق على الفور قائلا إنه بشهادته لا يخون خصمى لأن ما سيشهد به هو الحق .. ثم وافق جار آخر مسلم .. وهكذا ذهبت إلى المحكمة وبرفقتى شاهدين أحدهما مسيحى عمره 65 عاما والآخر مسلم عمره 71 عاما .. ذهبنا ثلاثتنا فى سيارة واحدة .. حضرنا جلسة التحقيق .. وخرجنا وبدلا من الذهاب إلى بيوتنا تمشينا على شاطئ الميناء الشرقى متشابكى الأذرع .. نتحدث عن ذكريات الخمسينيات والستينيات

"الدين لله والوطن للجميع"

[sendrella119]

انا ما شفتش حد بيتعامل بالطريقة دي .............

ومع ذلك ان وجد..........فده قليل جدا يكاد لا يذكر

[khedr]

استاذي قهوجي...واخواني واخوتي

لا اجد غير

نعيب زماننا والعيب فينا... ...وما لزماننا عيب سوانا

[Posted by 81.10.96.9 via

[المدهش]

أحييك على هذه الروح التقدمية يا أخ قهوجي ، لكني لم أسمع أو أ‘رف أي شئ عن الشريط الذي تقول إنهم يروجون له تحت عنوان مصر بلدنا فيا ريت تعطينا فكرة عنه ولو من باب العلم بالشئ ولك جزيل الشكر.

[محمود الشاعر]

بس يا عم قهوجي

بصراحة أنا مابقتش فاهم حاجة أزاي أنتم مضطهدين ومين اللي مضطهدكم الشعب ولا الحكومة

أنا ولدي شيخ فى الاوقاف وكان ( لانه طلع معاش ) شيخ أكبر مسجد فى القاهرة ويعد من علماء المسلمين ( مشهور عنه انه مش من علماء السلطة )

عارف مين صاحبه مسيحي فاتح صيدلية بجوار بيته بيسئلوا عن بعض و بيعيدوا على بعض عمري ما شكيت أن الدكتور سمير منافق أو بيخفي عداوة وعمري ما شكيت ان والدي منافق أو بيكرهه أنا نفسي ليا أصحاب كتير مسيحين كانوا بيصموا معايا رمضان ( علشان ميدخنوش قصادي ) بس بأمانة كنت بتطلع ندل معاهم و مصمش معاهم المهم صدقني كل اللى بيحصل ده ملخبطني ابني بيرجع من المدرسة هو فى اولة ابتدائي سئلني عن صاحبه مايكل اللي بيحبه جدا سئلني مايكل مخاصمني سئلته انت ضربته قال لي لا بس هو بيقوللي اننا مسلمين وعوزين نقتلهم طبعا أنا فهمتوا على قد ما اقدرت بس والله معرفش اقول له ايه اطفال مالهمش فى الطور و لا البرسيم وبيتكلموا فى القتل يا نهار اسود والله العظيم مش عارف اعمل ايه طبعا مايكل ملهوش زنب ويمكن ابوه كمان ملهوش زنب لكن انا مش عارف ده زنب مين

ثم مش المفروض ان المصريين كلهم أقباط مسلم ومسيحي اشمعنا خدوتها ليكم انتم بس ولا احنا مش مصريين زيكوا

احنا كلنا بشر ولاد أدم وحوا ولاد نيل مصر وتربها الزعفران عموما بحبك يا قهوجي و بحب كل مسيحي على ارض مصر بشرط اني يحبني بأخلاص

شكرا

[khedr]

بشرط اني يحبني بأخلاص

شكرا

[قهوجى]

بس يا عم قهوجي

بصراحة أنا مابقتش فاهم حاجة أزاي أنتم مضطهدين ومين اللي مضطهدكم الشعب ولا الحكومة

أنا ولدي شيخ فى الاوقاف وكان ( لانه طلع معاش ) شيخ أكبر مسجد فى القاهرة ويعد من علماء المسلمين ( مشهور عنه انه مش من علماء السلطة )

عارف مين صاحبه مسيحي فاتح صيدلية بجوار بيته بيسئلوا عن بعض و بيعيدوا على بعض عمري ما شكيت أن الدكتور سمير منافق أو بيخفي عداوة وعمري ما شكيت ان والدي منافق أو بيكرهه أنا نفسي ليا أصحاب كتير مسيحين كانوا بيصموا معايا رمضان ( علشان ميدخنوش قصادي ) بس بأمانة كنت بتطلع ندل معاهم و مصمش معاهم المهم صدقني كل اللى بيحصل ده ملخبطني ابني بيرجع من المدرسة هو فى اولة ابتدائي سئلني عن صاحبه مايكل اللي بيحبه جدا سئلني مايكل مخاصمني سئلته انت ضربته قال لي لا بس هو بيقوللي اننا مسلمين وعوزين نقتلهم طبعا أنا فهمتوا على قد ما اقدرت بس والله معرفش اقول له ايه اطفال مالهمش فى الطور و لا البرسيم وبيتكلموا فى القتل يا نهار اسود والله العظيم مش عارف اعمل ايه طبعا مايكل ملهوش زنب ويمكن ابوه كمان ملهوش زنب لكن انا مش عارف ده زنب مين

ثم مش المفروض ان المصريين كلهم أقباط مسلم ومسيحي اشمعنا خدوتها ليكم انتم بس ولا احنا مش مصريين زيكوا

احنا كلنا بشر ولاد أدم وحوا ولاد نيل مصر وتربها الزعفران عموما بحبك يا قهوجي و بحب كل مسيحي على ارض مصر بشرط اني يحبني بأخلاص

شكرا

يا محمود يا شاعر مافيش اٍضطهاد و لا حاجه .. و أنا عمرى ما حسيت اٍنى مضطهد وسط أهلى و أصحابى المسلمين ..

و لكن فيه تصرفات غبيه بتصدر عن بعض الناس اللى عقلهم ضعيف و تفكيرهم أضعف و ما ينفعش تقول لى لأ مافيش لأنها بالفعل هذه التصرفات موجوده نتيجة ما يحيط بنا جميعا من أجواء فيها شىء من العصبية ..

و لا أستثنى أيضا بعض الأقباط من هذه التصرفات و هذا بالضبط ما يريده المتربصون بهذا الوطن الحبيب ..

و خد عندك يا عم دى .. عمركش سمعت أن فيه دورات كرة قدم شراب بالأماكن الشعبية بين فريق المسلمين و فريق الكفاتسه ؟؟ :angry:

صدقنى بيحصل .. و دى ظاهره جديده فى الشرابيه !!

يعنى أصبح فيه تمييز و معترف به و ده حايجر وراه بلاوى بس على المدى الطويل ..

ربنا يستر ..

[محمود الشاعر]

يا محمود يا شاعر مافيش اٍضطهاد و لا حاجه .. و أنا عمرى ما حسيت اٍنى مضطهد وسط أهلى و أصحابى المسلمين ..

و لكن فيه تصرفات غبيه بتصدر عن بعض الناس اللى عقلهم ضعيف و تفكيرهم أضعف و ما ينفعش تقول لى لأ مافيش لأنها بالفعل هذه التصرفات موجوده نتيجة ما يحيط بنا جميعا من أجواء فيها شىء من العصبية ..

و لا أستثنى أيضا بعض الأقباط من هذه التصرفات و هذا بالضبط ما يريده المتربصون بهذا الوطن الحبيب ..

و خد عندك يا عم دى .. عمركش سمعت أن فيه دورات كرة قدم شراب بالأماكن الشعبية بين فريق المسلمين و فريق الكفاتسه ؟؟ :angry:

صدقنى بيحصل .. و دى ظاهره جديده فى الشرابيه !!

يعنى أصبح فيه تمييز و معترف به و ده حايجر وراه بلاوى بس على المدى الطويل ..

ربنا يستر ..

بس انا معاك فى من الجانبين ( للاسف ماكنتش احب ابدا اقول جانبين اتنين مش واحد ) مسلم و مسيحي ( برضه للاسف مضطر افرق ) رفضين الاخر مهما كان متسامح او عقلاني فى فى المسجد والكنيسة ناس فهمة الدين غلط سيدنا محمد عليه الصلاة والسلام لما جاره اليهودي اللي كان بيحط على بابه شوك وازى لما خرج سيدنا محمد عليه الصلاة والسلام وملقاش الشوك سئل عن اليهودي وعرف انه مريض راح زاره ( انا عارف ان فى مسلمين هيقولوا انه كان فى بداية الدعوة وان الوقت مختلف وانه نبي طب ما هو النبي او الرسول ربنا بعته علشان نقلده فى اعماله ) وسيدنا محمد اوصى اصحابه باقباط مصر خيرا لانهم أخواله واخوال ابنائه كذلك فى المسيحية سيدنا عيسى علية الصلاة و السلام حث على التسامح و المحبة ( الله محبة ) التطرف موجود فى الاتنين المسيحي الاوربي ميعرفش المسلمين وبيخاف منهم لانهم فى ناظره مستعمرين يمكن يكون عنده حق لانه ميعرفش ان الاسلام حاول يغير العالم مش لمسلمين لكن لبشر عيشين بكرامة و سلام بيحبوا بعض مهما كان دنهم او لونهم لكن تقولي ان فى ماتش كورة بين كفاتسة ومسلمين تبقى مصيبة وكارثة ولازم كلنا نحاول نعمل حاجة بجد

[khedr]

سعادتي لا توصف بكما

احتراماتي وتقديري لكما

..... .....................

اكملا بنفس الروح وبنفس الحب

وعلينا ان نسمعكما يا احلي صوتين من زمن اشتقنا لهما

...................................

اكملا

محمود الشاعر

قهوجى

[Blue_mind]

الكلام التالي كنت وضعته في موضوع اي كلام بتاريخ 24/4 .... نظرا لاني لم اجد الموضوع المناسب له وقتها ...

ولكني اظن ان هذا الموضوع يناسبه ...فانا متفق مع راي الزملاء الاعزاء في انه لا يوجد في مصر ما يسمى بفتنة طائفية...ولكن الموضوع عبارة عن بعض التيارات التي تريد ان تركب الموجة لتحقيق مصالحها.... و بعض التيارات التي تريد نشر فكرها.... بالاضافة الى الارزقجية من الاعلاميين وضيوفهم المحفلطين اللي واخدنها اكل عيش عشان يعملوا برامج ويطلعوا في التلفزيون ...هؤلاء هم من سيكونون السبب في الفتنة الطائفية ...وليس الشعب المصري

اليكم المداخلة ...ومعذرة على التكرار

النهاردة كان راكب جنبي وفي الكنبة اللي ورايا في الميكروباص عائلتين قبطيتين...واضح من اسمائهم وهما بيندهو على بعض وكمان واضح من لبس العيد اللي لابسينه.

اول ما الميكروباص بدا يتحرك, ونظرا لطول المسافة طلعت مصحف الجيب وقعد اقرا .....الحمد لله على هذه العادة

وفي هذه الاثناء استمر اطفال العائلتين القبطتين في الهزار والكلام...طبعا تضايقت لاني لم استطع ان اركز خصوصا اني كنت اقرا سورة الفرقان وهي من السور التي تؤثر بي...واحساسي بالضيق طبيعي لاني لا احب دوشة الاطفال وهزارهم في المواصلات العامة ...بل بصراحة لا احب دوشة الاطفال وهزارهم خصوصا عندما يكونوا في سن معينة

المهم بذلت مجهود لحد ما قدرت اركز اكتر في قراءة القران...

واحنا بنلم الاجرة لقيت رب الاسرة القبطية الذي بجواري يسالني عن فكة 100 جنيه....طلعت المحفظة وفكيتله ...وبعد كده لميت الحساب من الناس وقعدنا انا وهو نحسب مع بعض مين باقيلوا كام ...وفي الاخر اديت الفلوس للقدامي وقلتله انا كده عاوز نص جنيه ...لقيت جاري القبطي بيقولي لأ انت ليك اكتر... وقعدنا نحسب تاني لحد ما اتاكدنا

الاسرتين القبطيتين نزلوا عند ملاهي السندباد -شكلها الفسحة بتاعة العيد- قمت عشان افسح الطريق ليهم ويعرفوا ينزلوا من الميكروباص...

بعد ما نزلوا لقيت رب الاسرة بيقولي باحترام مع السلامة يا شيخ -انا دقني في العادة خفيفة بس اليومين دول مش مهذبها -..... المهم رديت عليه تحيته وقلتله كل سنة وانتم طيبين

يصراحة مش عارف اخوانا اللي بيتكلموا عن علاقة المسلمين والاقباط في مصر وعن البركان اللي احنا عايشين فوقه وعن الفتنة الطائفية بيجيبوا الكلام ده منين!!!

انا لا ابسط الموضوع او اهونه ولكن ما حدث وما يحدث في مصر لا نستطيع ان نفصله عن الاخلاقيات التي راينها في الانتخابات البرلمانية , ما حدث وما يحدث لا نستطيع ان نفصله عن ممارسة جماهير الكورة ....هوجة تفلت فيها الاعصاب وتخرج خلالها التصرفات الغير مسئولة....ما حدث وما يحدث اخلاقيات اختلاف وليست فتنة طائفية

ارحموا بلدكم يا ساسة ارحموا بلدكم يا اعلامين ارحموا بلدكم يا من تصطادون في المياه النتنة

بس خلاص

تم تعديل 9 مايو 2006 بواسطة Blue_mind

[محمود الشاعر]

عمنا khedr لك كل تحية واحترام على تشجيعك وبصراحة انت اللي شجعتني على المشاركة لاني لقيت حد متابع شغلي مشكور كتير

[khedr]

انا لا ابسط الموضوع او اهونه ولكن ما حدث وما يحدث في مصر لا نستطيع ان نفصله عن الاخلاقيات التي راينها في الانتخابات البرلمانية , ما حدث وما يحدث لا نستطيع ان نفصله عن ممارسة جماهير الكورة ....هوجة تفلت فيها الاعصاب وتخرج خلالها التصرفات الغير مسئولة....ما حدث وما يحدث اخلاقيات اختلاف وليست فتنة طائفية

كده تقريبا قربنا من المشكله الحقيقيه

التي في النهايه لن تخرج عن ذلك

ولكن تؤدي الي المهالك

محمود الشاعر

سيدي واخي وحبيبي ...

هناك مجموعه اخوه انضموا حديثا الي المنتدي

الحمد لله كلما تحاورنا معهم وجدنا انه كان ينقصنا الكثير

فأدعو الله ان تزيدونا من خيركم وتستمروا في عطائكم مهما ... .... .....

[ابو محمود]

بسم اللة الرحمن الرحيم

لما نكذب ونجمل الكلام ؟نعم لابد من مواجة المشكلة

السيد /قهوجى مصرى* وانا مصرى ولاكن ثقافة مختلفة نعم من الجهل ان نقول ليس هناك اختلاف او خلاف لماذا ظهر هذا الخلاف ؟لان كل من المسجد والكنيسة .يقوم بواجباتة الارشاديةفى غير محلها مثلا هل يتكلمون عن كيف نجاهد ونرتقى بفكرنا فى ما نعمل هل يؤكدون من على منابرهم ان نتعامل مع مشاكل الوطن من بطالة وكساد تجارى وصناعى وعلمى وادبى؟لا اظن الكل ينحاز الى طائفتةنعم فلنكن صرحاء مع انفسنا نحن مقبلون على مصائب كبرى العالم من حولنا طامع فى مواردنا وكنوز اراضينا ان هذا الوطن هناك من يطمع فية ولابد لنا ان نفيق الوقت ازف لابد ان نتكاتف ونتعاون فى ما بيننا نعمل بكل جهد فى اماكن عملنا ان كانت مصانع او معامل او ورش كبيرة اوصغيرة نكمل بعضنا بعضا حتى نفوت الفرصة على من يتربص بنا ولا نطلب المدد من اعداءنا (اميركا) وغيرها ممن يسمون انفسهم العالم الحرلان العدو لن يفرق بين ريشة وهلال مع الاعتزار للتشبية لاننا اصحاب هذا الوطن (مصر) هلال وصليب مهما كان تعداد النصارى فهم ليسو اقلية لاننا ليس بيننا اقلية فلهم ما لنا وعليهم ما علينا الكروز لن يفرق بين مسجد وكنيسة واساءل اهل العراق ونساء العراق هم ابلغ رد ومثل لناهل تعلمون كم امراءة مسيحية اعتديى عليها واغتصبت ومن المسلمات كم من طفل اعتدى علية وتعرض للاغتصاب وكم من راهب وامام كفانا كفانا قبل ان نلحق بموتانا لابد من كل عاقل ان كان مسلم ام نصرانى علمو اولادكم السماحة والاعتدال كفانا جهل كفانا بوش لن يحمى اقلية او اغلبية انة يتكلم بلسان الشيطان وليس المسيحية انها الحرب على كل مقدس اساءلو من اتى لمن نحن ام هم من يطمع فيمن من يقتل من افيقو لن ينفعكم اتحدو كما كنتم دائما اقراؤ التاريخ اين لويس التاسع اين ريتشاردملك الانجليز اين مصرلن نضيع لن نهرب نحن معا فى مركب واحدة نشد من ازر بعضنا نبيد اعداءنا ****

اللهم انى قد بلغت اللهم فاءشهد (مع خالص تحياتى الى احبابى مسيحين ومسلمين .محمود مصطفى)

[قهوجى]

أشكركم جميعا للردود التى شاركتم بها فى موضوعى ..

و أود بعد اِذنكم أن أوضح بأن القصد ليس فى اٍبداء كم المحبة و التعاون بين مسلمى و أقباط مصر فهذا أمر غير مشكوك فيه و لا يحتمل الاٍنيان بشواهد و دلائل عليه .. و لكن القصد هو كيف ننقى سلوكيات البعض من شوائب الطائفية البغيضة التى هى جديدة علينا و مدخولة اٍلينا من عدة جهات ..

بشكل محايد وبغض النظر عن كونى 4 ريشه فأنا مصرى من ساسى لراسى و أرى أن الأقباط غالبيتهم يعيشون فى حالهم و ماشيين جنب الحيطه اٍما عملا بتعاليم المسيح و اٍما عملا بالطبيعة التى جبلوا عليها من أيام الحاكم بأمر الله الفاطمى و تابعه قراقوش ..

و يوجد مثل مصرى صميم حين يقول الفرد الذى وقع عليه ظلم و مطالب من الآخرين ببلع هذا الظلم و عدم الرد عليه : ليه .. هو أنا القبطى بتاعك ؟؟!!

لو وضعنا رؤوسنا فى الرمال و قلنا اٍن الأحداث الأخيرة بسبب تهور مختل عقلى و اٍن الأمور على ما يرام و المحبة بين دول و دول دوبت قلوب المصاروه سنكون بنضحك على روحنا !!

الأحداث الأخيرة يا أصدقائى هى نتيجمة حملات منظمة على المستوى الشعبى لحشد الكراهية بين سكان الوطن و خلق نوع من الفرقة و البغض .. و أنظروا لحوادث الكشح و وفاء قسطنطين و أحداث الاٍسكندريه و غيرها .. كلها تصب فى بئر الفتنة و الكراهيه التى لن يستفيد منها سوى أقباط المهجر الذين يستقوون بالغرب على اٍخوانهم المصريين مسلمين و أقباط لغرض فى نفس يعقوب ..

صدقونى يا اٍخوانى خذوا اٍخوانكم الأقباط تحت جناحكم .. و خذوا العبرة مما حدث فى العراق و أعلموا أن كل المترجمين و الأدلاء لقوات المارينز هناك من الفئات التى كانت تشعر بالظلم فى وطنها قبل الغزو ..

و أما بعض الدعوات الهبله التى نسمعها اليوم كمثل أن تعود الجزية على الأقباط مقابل عدم تأدية خدمة الجيش فهى دعوات سيكون لها مردود خطير للغاية ..