هل طبيعة المرأة مختلفة عن الرجل ؟؟

[ذات الوشاح]

بسم الله الرحمن الرحيم

كان نفسى دايما اسأل حد

هل طبيعة المرأة في الحب تختلف عن طبيعة الرجل ؟؟

طبعا السؤال كده عام و مش مفهوم اوى

اوضح شوية

قصدى هل المرأة مثلا تحب الرجل الذى يحبها ؟؟

اوضح اكتر

البنت لما بتحب واحد

و هوا مش حاسس بحاجه كالعادة

الناس دايما تنصحها سواء دينيا او اجتماعيا انها تشيله من دماغها و تفكر احسن في اي حاجه تانية و بلاش تحلم و الاحسن تستنى في الحلال

بينما لو الولد اعجب ببنت و صارح الناس على طول هيقولوا : اتقدم لها و شوفها

حتى لو كان معجب شكلا بس

اه حتى لو كان معجب شكلا بس

طيب مبررات الناس في حالة البنت :

1- الولد مش بيحبها و لا حاسس بيها اصلا فليه تحلم و تعلق نفسها .

2- ازاى هيا تحب شخص لمجرد شكله بس مش يمكن وحش و يمكن مجرم و يمكن و يمكن ؟؟؟

3- ده مجرد اعجاب و ممكن لما تتعرف عليه اكتر مش تعجب بيه _ اكمالا للنقطة رقم 2 _

4- ازى هتقوله او توصل له انها معجبة بيه ؟؟؟ ازاى كرامة البنت تسمح لها بكده

5- غير طبعا ان في عائلات تحرم تماما الحب من جهه البنات مادام مش جوزها و تعتبرها قليلة الادب تستحق الذبح

في حالة الولد :

1- هوا صحيح اعجاب شكلى لكن اكيد في الخطوبة هيتعرف عليها اكتر و يعرف اذا كانت كويسة و لا لأ

2- لو محصلش نصيب هيسيبوا بعض بالمعروف

3- سالنا عليها و لقينا اهلها كوييسين

4- الولد محصلش _ من وجهه نظر اهله و اكيد البنت هتوافق عليه _

طيب سؤالى بقى

هل البنت طبيعتها مختلفة عن الولد يعنى لما يتقدم لها واحد لا تعرفه و لا حاجه و تلاقيه بيحبها هتحبه و ليه الناس مش زي في حالة البنت مش بتحط احتمال ان البنت ديه مش بتفكر فيه و مش ممكن تحبه ؟

اما في الحالة التانية لأ بمعنى ان لو البنت اتقدمت للولد حتى لو كان معجب بيها مش هيوافق

طيب مهى طبعا مش هتتقدم لكن ممكن توسط حد يسال عليه و يشوف من غير ما يمس كرامتها

مهى السيدة خديجه رضى الله عنها عملت كده مع رسول الله صلى الله عليه وسلم

ليه دلوقتى مش بيحصل كده ؟؟

هل اختلاف المجمتع و لا العادات

و لا الدين

انا مش فاهمه حاجه

طب في حد فاهم ؟؟

[yasovinas]

الغاليه ذات الوشاح اعجبني السؤال ولكن اعترض تماما على التحليل :o

تعالي نبص للموضوع من الناحية الاخرى :huh:

تخيلي شاب يعمل في مكان وتوجد فتاه او اكثر في هذا المكان ،،، الشاب اعجب بفتاه من العمل حاول يتقرب لها او يكلمها وهي مش معجبة بيه -_- طبعا هتصده وهيرجع قفاة يقمر عيش وهو اللي هيحاول يفكر في حاجه تانية :D

اما لو حدث العكس,,, يعني الفتاه هي التي اعجبت بالشاب وهو مش واخد باله مثلا او لنقل مش بيفكر في الموضوع ,,, هنلاقي الفتاه هتكلمه طبعا من منطلق الوضعية زمالة عمل, زمالة دراسة,, جيرة،، اقارب - اياً كان الوضع - هتكلمه وطبعا عمر ما في شاب هيصد بنت بتكلمه {مش عارف ليه :o }

طبعا الكارثه بقى انه ممكن وبعد ما تكلمه او تتناقش معاه وتعطية "ريق حلو" تكتشف بعد ذلك انه (موش من التيب بتاعي :o )

يعني اللي عايز اقوله ان في اغلب الاحوال بيكون الاختيار في ايد الفتاه وليس في ايد الرجل حتى ولو تقدم الشاب للفتاه فالقرار ليس قرارة في النهايه بل في ايدها هي قد تقبل وقد ترفض ؛؛؛ اما مقوله انه هو اللي اختارها فاظن انه في اغلب الاحوال بيكون اختيار موجه عن بعد من الفتاه,,, يعني هي من ترسل له الاشارة الاولى لان يختارها

[عصفور طاير]

طيب سؤالى بقى

هل البنت طبيعتها مختلفة عن الولد يعنى لما يتقدم لها واحد لا تعرفه و لا حاجه و تلاقيه بيحبها هتحبه و ليه الناس مش زي في حالة البنت مش بتحط احتمال ان البنت ديه مش بتفكر فيه و مش ممكن تحبه ؟

شوفي يا ذات وشاح.. أولا أسئلتك وموضوعك جيد في رأيي..

بالنسبة لسؤالك الأول، فالحقيقة إن الأصل في المجتمع إن مافيش حاجة اسمها حب في الزواج، يعني كانت الواحدة قاعدة طول الوقت مستنية (نصيبها)، وبالتالي بعد كده تحبه تكرهه هي طبعا ونصيبها.. يعني كانت طرف سلبي في هذه العلاقة تماما، ولا يمكنها أن تتخذ فيه أي قرار.. وبالتالي كانت البنت (ومازالت بنسبة كبيرة جدا) هدفها الأول والأخير والوحيد هو الجواز.. وفي الغالب هي قاعدة ظابطة المؤشر بتاعها، وماسكة الزرار في إيديها، لو قالها هاخطبك، تروح دايسه على الزرار بتاع الحب وحاباه، أو على الأقل تحاول، ويا تنجح التجربة يا تفشل.

يعني فعلا البنت طبيعتها مختلفه عن الولد تماما، في الحب والاختيار، وأعتقد أن أغلب البنات زي ما قال الشاعر: (قلوبهن هواء).

اما في الحالة التانية لأ بمعنى ان لو البنت اتقدمت للولد حتى لو كان معجب بيها مش هيوافق

طيب مهى طبعا مش هتتقدم لكن ممكن توسط حد يسال عليه و يشوف من غير ما يمس كرامتها

مهى السيدة خديجه رضى الله عنها عملت كده مع رسول الله صلى الله عليه وسلم

ليه دلوقتى مش بيحصل كده ؟؟

ظروف المجتمع المعقد اللي احنا عايشين فيه اعتقد انها خلت كل شيء معقد، وطبعا بنسبة كبيرة جدا مش هايوافق، أو على الأقل هايقلق (برضه عقد)..

انتي عارفه ايه المشكلة.. ان العلاقة بين الولد والبنت في المجتمع لم تنضج بعد.. بيحاولوا يكونوا منفتحين وفي واقع الحال همه مازالوا بعقليات متخلفة.. هو بيحاول يعرف البنت لغرض في نفسه، وهي بتحاول تعرفه بس عشان يتجوزها، أو على الأقل يخطبها ومش مهم تكمل، بس المهم قانونية العلاقة.. يعني المسألة مناورة من الطرفين.

أما الحب ده.. فيا له من مسكين.. فكم من الجرائم ترتكب باسمه

[nancy]

شوفى يا ذات الوشاح

المشكلة مش فى طبيعة الراجل والست

بل فى تفكير المجتمع الى بيلجم البنت من صغرها

وكل ما تعمل حاجة عيب عيب عيب لما بتحس ان افكارها عيب وجسمها عيب وتصرفاتها عيب وتعبرها عن مشاعرها او ابداء رايها عيب بيكسروا شخصيتها وبعدين يفضل كل ترتيب البنت من اهلها انها تتعلم وتزاكر وتسمع التعليمات وتحلم بالعريس

مش الحبيب مش الصديق لا الزوج وبس حتى الدعوات كلها حوالين اشوفك عروسة وبس

اما الولد فلما يبفكر دة نبية ولما يبص على البنات دة نمس ولما يحب او حتى يشرب سجاير اصلة بقى راجل

نحلل كل حاجة للولد ونحرم كل حاجة على البنت رغم ان فعليا البنت بتكون اكثر ذكاء واكثر مثابرة من الولد

لازم البيت يخدم الولد والولد يعمل راجل على امة وعلى اختة

بعدين كل المقدمات دى وبعدين توصل للبنت لمرحلة انها بتحب لو صرحت لحد بانها بتحب تبقى مصيبة ولو قالت له انها بتحبة

تبقى رامت نفسها علية ومش حتى زى البنت حترفض او تبعد لا دة يمكن كمان يشتغلها

لازم تغيرى تفكير المجتمع الاول وطرق التربية وبعدين نتكلم

عن الحب والصداقة وان الولد والبنت ند لبعض مش حد احسن من حد

لازم نتعامل على ان كل واحد فينا انسان مش ست ومش راجل

بيحب ويكرة ويعمل وينتج ولة هدف وامل وحلم وعندة ناس بغض النظر عن النوع منهم اصحاب ومنهم زى الاخوات ومنهم احباء ومنهم اعداء ومنهم ناس مش عاوز تعرفهم وبس

لما نوصل لدة نبقى نتكلم عن الحب ومين الى يقول مين

[Hammer]

علي الرغم إنني من المؤمنين ( بكامل إرادتي :o ) بحرية المرأة وحقها في العمل و التعليم و المساواة في الحقوق المدنية و الإجتماعية, إلا إنني من المعارضين لمحاولة المرأة الدؤبة بالمساواة الكاملة مع الرجل, ببساطه لانهم مختلفين عاطفياً و نفسياً و جسمانياً و أولوياتياً :D

فالمرأة كتلة من العاطفة , هذه هي أهم مزاياها و أكبر عيوبها في نفس الوقت و لولا هذا التركيب العاطفي لما إستطاعت أن تتحمل أدوارها الموكلة إليها من خالقها تجاه أولادها و جوزها ( الي هو برضه طفل في الأخر ).

و بناءاً عليه فأن التركيب النفسي لكلا الطرفين الرجل و المرأة يجعل موضوع التقرب من أدوار الرجل و موضوع القبول و الرفض من أدوار الأنثي , هذا هو القانون الذي هيئ التركيب النفسي لتنفيذه .

و لأن الله خلق الذكر و الأنثي في مخلوقات كثيرة , فسنجد أن هذا هو القانون مع جميع مخلوقاته , فمثلاّ - و أرجو إن ماحدش يزعل من المثل ده - عمرنا ما شفنا قطة بتعاكس قط و لا أنثي الجاموس البري بتنطح إختها الجاموسة من أجل الفوز بالذكر :o

[nancy]

معلش ياهمر مدام حنتلكم على الحيوانات

الطاوس بيتجمل علشان الطاوسة تختارة

ومعظم الحيوانات بتتجمل علشان تعجب الانثى

ولو عجبها تخدة وممكن ترفضة

وفى الحيوانات كمان بيحارب علشان يفوز بيها وينطحن كمان علشان ينول الرضا

والبشر ميقدروش على كدة يا همر

[Hammer]

معلش ياهمر مدام حنتلكم على الحيوانات

الطاوس بيتجمل علشان الطاوسة تختارة

ومعظم الحيوانات بتتجمل علشان تعجب الانثى

ولو عجبها تخدة وممكن ترفضة

وفى الحيوانات كمان بيحارب علشان يفوز بيها وينطحن كمان علشان ينول الرضا

والبشر ميقدروش على كدة يا همر

ده موضوع تاني ..

و مع ذلك كله بتساوي قبل الجواز في لفت النطر و وضع الجيل علي الشعر و البارفان و الصوت الهادي و الرومانسية و الريش الملون و ضرب إبن الجيران اللي بيحاول يلفت نظر الأمورة .

ولكن بعد الجواز كل الحيوانات دي بتبطل التنطيط ده و تعقل زي الرجل بالظبط , يعني الطاووس بينزل ديله و الجاموس بيبطل نطح ..و الراجل بيربي كرشه :D

[nancy]

على رايك ياهمر

زى ماكل الرجالة بتشتكى من الست بعد الجواز بتلبس لبس البيت على طول ومش بتهتم بنفسها

كل الستات بتكرة الراجل الى بيسيب نفسة يكرش وتلاقية عنة مركزة على التليفزيون وفى دنيا تانيا

[ذات الوشاح]

بسم الله الرحمن الرحيم

هرد واحده واحده عشان نفسى اناقش الموضوع

اخى العزيز ياسو _ الموضوع نور بوجود حضرتك _ نا مع حضرتك في ان الفتاة الايام ديه _ و لله الحمد _ نم حقها تقول رأيها بوضوح و صراحة

و طبعا البنات خصوصا يتفنن في ردود الصد في لباقة و ذوق محلصتش بحيث الولد في الاخر يعد فترة طويلة لحد ما يفهم انها بتقوله انا مش موافقه

تقوله انت اخ عزيز جدا عليا .. كان نفسى يبقى عندى اخ زيك و هكذا كل الردود فيها اخ اخ اخ اخ و الحدق يفهم

لكن برضة المشكلة ان من حق الولد في المجمتع انه يحب و يختار

طيب هضرب لحضرتك مثل

لو ابن حضرتك جالك و قاالك : بابا انا معايا زمليتى في الكلية و بحبها هتقوله ايه ؟؟؟

طبعا بعد الاسئلة عنها و احوالها و شخصيتها و عائلتها و الخ الخ لو البنت كويسة و حضرتك مقتدر هتعملوا ايه ؟؟؟؟؟

هتروحوا تخطبوها على طول

و غالبا البنت بتقول اه

طيب لو بنت بقى حضرتك جالتك و قالتك بابا انا بحب زميل معايا في الجامعة ؟؟ :o

:huh: :o طبعا حضرتك هتتخض و يمكن لو اب حمش قلمين و على اوضتك يا بنت

او لو اب طيب يا بنتى الحياة فيها و فيها و محاضرة طويلة عريضة باختصار حاولى تنسيه خصوصا لو هيا مش عارفه اوى او مش متأكده منه

و بعدين مين الى قال ان الولد مش بيصد البنات ؟؟؟؟؟

على فكرة البنات غالبا بيفهموا اذا كان الولد معجب بيها و لا لأ

بينما الولد بيعد كتير جدا جدا على بال ما يفهم ان البنت معجبة بيه _ من ناتج تحاليل الاولاد في اسرتنا الحبيبة :D _

[ذات الوشاح]

اخويا الفاضل : عصفور طاير

رأيك مهم برضه و على فكرة انت جبت المفيد و هوا ان العيب في المجتمع غالبا

و حكاية بقى البنت ماسكة ريموت على فكرة صح

هدف البنات اصبح انه تتجوز باي طريقة

بس عشان كده انا بسأل : هل بقى ديه طبيعة المرأة تختلف عن الرجل ؟؟

ان دايما البنت نفسها تتجوز و خايفة جدا من لقب عانس بينما الولد و مهما كبر وب رضه نفسه بيجوز بيكون مش خايف قد البنت

و بعدين بقى لما البنت يتقدم لها واحد حتى لو مش بتحبه تلاقى اهلها

ربنا يخليكى اقلبيه ده شاب زي الفل و معاه عشقة و عربية و شغله حلو و مضمون و الخ الخ الخ

خسارة يضيع من ايديك

حاجه غربية كانه عرض تليفزيون في محل و نازل بسعر التخفيض

زمان و انا صغيرة :D كنت فاكرة ان الجواز هوا عبارة عن اتنين اتقابلوا و اتعرفوا و حبوا بعض فقرروا انهم يتجوزا لان ده الحل الامثل لقضاء بقية حياتك مع من تحب

لما كبرت بقى اكتشفت ان الموضوع مختلف تماما عما كنت اتصوره فهو عبارة عن مشروع اهم شئ عند الطرفين العريس و العروسة هوا ان يكون العريس لقطة و غنى ومقتدر و عند العروسة جميلة و حلوة و اهلها كويسين و مش مستغليين

طيب و الحب

ايه الكلمة الغربية ديه

و لى عودة للرد على بقية الردود