حكايتى مع ياسمين

[ragab2]

اللي بنى مصر كان حلواني وأمين

عشان كدة أهلها ناس عال وحلوين

بس يا خسارة طول عمرهم  مظلومين

حبيت أغير من ابو السواركة وابقى م المتجوزين

كل يوم كان يطلق واحدة ويتجوز اتنين

وعنده م  العيال  أكتر من مية  وعشرين

العز وز و مادام عنده فلوس هايوفر لمين

ونقاوته ع الفرازة وكلهم حلوين

طب الفلوس موجودة  والصحة منين

ده حتى يشتكى ويقول الستات راحت فين

ما فيش يا حسرة على ذمته غير أربعة وبنتين

وما دام راجل كسيب يبقى بدل الفرح فرحين

امسكوا الخشب وبلاش نق ياحسدين

أحسن يجيب ليكم م الشرطة أمين

روحت خطبت بنت اسمها ياسمين

أموره ومقطقطة وملكة جمال الحلوين

نغزة خدها تهوس وتودي سراية المجانين

بصة عينها تشدك وتحس بالحنين

ضحكتها ترجع شبابك عشر سنين

خطوتها واحدة شمال وواحدة يمين

دلوعة أمها وسنيورة أبوها المسكين

أصلها  آخر العنقود لإخوانها  المدلعين

وقلت من حلاوتها كفاية  اشمها زى الياسمين

أخوها قاللى عاوز تجوز هات شاهدين

يشهدوا ع الحلاوة الرباني والتفنين

وهات لها عقد ألماظ وخاتم ماس واسورتين

واكتب باسمها شقة تمليك في البساتين

وهات معاك أكياس بلاستيك وشيكارتين

وطبعا هايكون فيه فى البيت سكاكين

ماخبيش عليكوا لعب في عبي بدل الفار فارين

أصل الطلبات شويه غريبة حبتين

وافتكرت المرحوم صاحبي اللي اتجوز من سنتين

وحسيت إن عروستى وأهلها غدارين

وهربت بجلدي قبل ما اشرف في البساتين

وسبت الجمل بما حمل ومعاه الحملين

وقلت مش مهم الجمال واظفر بذات الدين

حتى لو كانت دميمة أو حتى من غير ودنين

أكون مرتاح  معاها وعلى نفسي أبقى  أمين

روحت خطبت  بنت  المعلم  ولعة  نادين

ما تشوفش  في الضلمة  ألا سنانها  منورين

جسمها مبعجر وايديها  قصيرين

بقها جاى بالعرض ونهايته قبل الودنين

عندها عين مقفولة والتانية بتفتح يوم الاتنين

مناخيرها ضربة شمال وحجمها قد اتنين

ومافيهاش إلا شعر خشن عاملاه ضفيرتين

قلت أهي برده اسمها ست زي الستات التانيين

ومكتوب إنها أنثى في شهادة التسنين

أبوها جزار بشنبات وراجل تخين

كل عجل متعلق على باب جزارته يأكل بلدين

قلت له على الفول واللحمة على مين

قال هاتفطر وتتغدى وتتعشى لحمة راس وسمين

ما انا داخل على طمع وناوى على عيشة طين

وممكن نضارة غامقة وأكون م الصابرين

وبعدها أبلغ الآثار وأقول لقيتها مع المهربين

أو أعرضها فى بلاد بره مع موميات المصريين

افتكرت أستاذى أبو السوارك المجدع اللى دوب تسعين

وعرفت ان احنا لسة تلامذة  واحدة بس  ومش نافعين

(Edited by ragab2 at 7:27 pm on June 24, 2001)

[abla]

حلوة قوي قوي .... مش كفاية انك شاعر ... لا دمك خفيف كمان هاهاهاها .... ربنا يزيدك من نعيمه  ومنتظرين باقي الحكاية ;) ;) ;) ;)

[ragab2]

شكرا يا اختنا العزيزة  الدكتورة عبلة

جزاكى الله خيرا وفيرا

[ezzat afifi kotb]

هى دى واحدة او زوجات ؟         الله يسامحك قولوا امين

يعنى تسيب ست الستات         وتقوللى بخاف م السكاكين

طب لو منها جبت بنات        فى الحسن راح يشبهوا مين ؟

او يمكن دى شروط الجات         والعولمة ع البنى ادمين

ابقى قابلنى فى الكيت كات        اديك جايزة عن الصابرين

حشمة طبيعى بلا اشربات          ولا شربات ولا فساتين

واللى توفرة فى الحجابات           تدفعه للكوافير ضعفين

بعد ما شفت حداك فتكات         انا حقول وانتوا الشاهدين

من غير حلفان او بصمات         العفة شعارى ليوم الدين

واسمع من بيرم حكايات            وادى شروطه للسامعين

" جدع معلم قال                          لخلتك ام هلال

شوفى لنا بنت حلال                    تكون اصيلة وعال

عايزها لحم فصوص             مش عود قصب ممصوص

ومحربقة بعصعوص                  وفاكرة روحها غزال

عايز قوام يتهز                             ان غزتيه ينغز

وف كل مفصل حز                           يفكرك بهلال

وان جبتهالى بكرش                       من الحمير متغيرش

ما اخدها حتى بقرش                       واحط فوقها شوال   "

[ragab2]

ياقطب عاوز تخلص منى بعيد عن السامعين

وانا اللى كنت فاكرك  صديق حميم

انت مش عارف ياسمين تبقى مين

أهلها طلعوا سوابق ومش محترمين

أنا عاوز بيت مش تربة فى البساتين

وياما فيه بنات خفة وذوق وحلوين

فاكر نورا اللى كانت مرات حسانين

طلقها بعد ماجابت له ولد وبنتين

قالت أنا عاوزة ع الأقل شقتين

شقة للعيال وشقا لينا احنا الاتنين

ويوم أكون معاك ويوم مع البنتين

ويوم الجمعة يكون أجازة منكم الاتنين

طب وباقى الأيام هاروح أنا فين

أروح عند امى والا  أخويا  فى الحسين

ده انا عاوز زوجة مش موظفة عندى بالتعيين

ماطولش عليك ياقطقط  رفضت نظام الشقتين

البت حورية أخت الواد زكريا راحت فين

من يوم ماسابت الحارة واتجوزت سماعين

بتشتغل سمسارة وسافرت البحرين

وبتبعت لأخوها  فلوس  تملا زكيبتين

اشتغلت فى تهريب الملابس وأدوات التزيين

ديك النهار مسكوها مهربة شنطتين

مدير الجمرك سابها وخد بلوزتين

والوزير شطب لها القواضى ولهف باكوين

هى الحلاوة تشيلنى واشيلك ونقسم اتنين

والواحد اللى يسلك أموره  يبقى زين

وبلدنا دى بيضة حلاوتها انها بصفارين

فاكر البت  المدلعة  شيرين

اتجوزت عربى وبقت من المجنسين

وعندها بنت حلوة هناك من المواطنين

نفسها تجوز مصرى وتجيبله معاها فيزتين

بس المهم يكون راجل ملو هدومه وعليه العين

وفهمت من كلامها انها عاوزة راجل مكسور العين

يقعد فى البيت بالعيال  ومايقولهاش كنتى فين

ياعم خلينا فى بلادنا بكرامتنا حتى ولو بالدين

(Edited by ragab2 at 10:31 pm on June 27, 2001)

[Imhotep]

اخويه رجب... فاكر لما عرضت عليك من خمستاشر سنه تشتغل معايا في موضوع بيع الدول العربيه للخواجات.... مرضتش و مسكت لي في المبادئ و الشعر!!!!! اديك اهه ... اتهريت اكل فول و مش عارف تتأهل... ما كنت سمعت كلامي... كنت زمانك بقيت زيي ... و عندك بدل العروسه اتنيين... و بدل سكنه الشقق... كنت ملكت قصريين... واحد في القبه.. و التاني في عابدين....

[MuslimaEgyptian]

yahhh...el wa7ed ba2alo moda mad7ekshi men albo keda :) Masha'Allah, Great poetic abilities...Keep up the great work..

[ezzat afifi kotb]

يا رجوب احوال الدنيا تغيظ

تزرع ياسمين تحصد جميز

صعب عليك كتر البهريز

ع العميانى بدون تمييز

رسم الجن عليك براويز

وحط الفيروس ف التركيز

تشوف الحلوة غارات وازيز

والوحشة تشوفها ذهب ابريز

ادينى اثرك فى الدهليز

وح افك العكس ولو ف باريز

علشان اخويا عليه عزيز