سؤال بجد محيرنى... و ماحدش يضحك ارجوكم

[نورية]

فيه بجد سؤال محيرنى بقاله كتير

بس بجد ماحدش يقولى شكلك مابتفهميش ولا انتى عبيطة ولا ايه :closedeyes:

لانى بجد غير مطلعة على مسائل الاقتصاد بتاتا

دلوقتى الفلوس و العملات اللى كل يوم بنتعامل بيها مش بردو بتتعمل عن طريق ماكينة و طباعة شكل العملة على الورقة؟؟

لحد كدة تمام؟؟

طيب ليه مانطبعش عدد كبــــــــــــيـــــــــــــــــــــــر من الورق و مايبقاش فيه ازمة مالية؟؟؟ :blush: :P

انا سألت السؤال دة لشخص ما قبل كدة و قال ( عشان مايبقاش فيه تضخم)!!!!!!!!!!!

طبعا انا هزيت راسى و رفعت حواجبى كأنى فاهمة :D

بس الحقيقة انى ماستوعبتش الموضوع اساسا

فممكن حد يفهمنى ارجوكم؟؟

-_-

[wagdi]

الأخت نورية...

شوفي يا ستي...

الفلوس إلى في جيبنا دي مجرد ورق...أخترعوها أصلاً علشان تبقى بديل للذهب والفضة.... يعني مثلاً بدل ما تشيلي دنانير ذهبية تقعد تشخلل في جيبك بتشيلي ورقة أو أوراق بنكنوت... والورقة البنكنوت دي في الأصل هي مستند من الحكومة أو البنك المركزي او بيت المال أو اي كان المسمى بتثبت أن هذه الورقة تمثل ما قيمته كذا وكذا من الذهب موجود عندهم... يعني بمعنى أخر الجنيه إلى إيدك ده عبارة عن مستند يقول أن هناك ما قيمته كذا جرام أو كسر جرام من الذهب محفوظ في البنك المركزي مقابل هذه الورقة...

فلو إحنا قعدنا نطبع في ورق بنكنوت بدون ما يكون هناك ما يقابلها من دهب (او حاجات تانية حاقولهالك كمان شوية) ده معناه إن ورق البنكنوت ده مش حيبقى له قيمة فعلية...يعني من الأخر يبقى زي ورق الشوكولاتة كدة مايسواش غير الحبر...

طبعاً الدهب مابقاش هو الحاجة الوحيدة إلى ممكن يبقى مقابلها بنكنوت... ممكن بترول ممكن فضة ممكن يورانيوم ممكن روديوم ممكن صناعات تقيلة ممكن أرض زراعية ممكن استثمارات عقارية ....وإلى ممكن يستفيض في شرح الموضوع ده حد بتاع إقتصاد....

ومش حتصدقي لو قلتلك إن إنجلترا مثلاً من حوالي خمستاشر سنة تخلصت من حوالي 75 في المية من مخزون الذهب لديها ... والموضوع ده عمل هزة جامدة اوي ايامها في اسواق العالم...المهم هنا هو إن إنجلترا علشان تعوض الذهب ده أشترت أعمال فنية نادرة جداً وأثار تاريخية.... فمثلاً بدل ما كان كل جرام ذهب يقابله 9 جنيه إسترليني بقى مثلاً التمثال الفلاني أو اللوحة الفولانية مقابلها كذا وكذا من الجنيهات... وطبعاً ده ذكاء منهم لأن الحاجات دي قيمتها بتعلى أكتر من الدهب ع مرور الوقت....

ما علينا... مش عارف أنا أضفتلك حاجة ولا لأة... وعامة لو حد دارس إقتصاد هنا في المنتدى أكيد حيصحح ويضيف...

تحياتي.. :closedeyes:

[sendrella119]

انتي نويتي

خلاص

اول بنك في الخطة بنك ايه

يمكن تكوني عايزة مساعده ولا حاجة :closedeyes:

و

:blush: ها ها ها

مش حد حاضحك عليكي

يا نوريه

[MZohairy]

بالرغم اني راجل مالي مش بتاع اقتصاد الا اني ححاول اشرحهالك بالبلدي

يا مسهل

لو عم أحمد بتاع الفول في الحي الشعبي وصلته اخبار ان حسين افندي و على افندي و مرقص افندي جالهم فلوس على غفله كده تفتكري حيعمل ايه ؟

طبعا حيرفع سعر الفول بدل الطبق ماهو ب جنيه حيبقى باتنين جنيه لأن الناس جالها فلوس زياده على غفله

و طبعا عم شحاته البقال و عم خليل السباك و عم طه النجار كلهم حيعملوا زي بتاع الفول

هو ده التضخم نتيجة طباعة للنقود بدون وجود تطور صناعي أو تجاري أو زراعي أو سياحي ............

بينما لو حدث هذا التطور

حتلاقي في مصانع اتفتحت و مزارع اتزرعت والناس اشتغلت و بقى معاها فلوس واتفتح محل فول تاني ينافس عم أحمد بتاع الفول الأولاني فميقدرش يرفع سعره و هكذا

ده شرح مبسط طبعا ارجوا انه يكون مفهوم شويه

وشكرا

تم تعديل 6 مايو 2006 بواسطة mzohairy

[مصرية الهوى]

لا يا نورية مش هنضحك عليكي ..بالعكس

السؤال ده يتسئل كتير ...

انا دائما بسأل أسئلة اقتصادية ..

ويقعدوا يشرحوالي ساعة وبالكروكيات كمان بس :closedeyes:

طيب يا وجدي .. طيب العملة اللي بتبقى برخص التراب .. يعني معندهموش دهب والا الحاجات اللي قلت عليها ...

يعني مثلا الدينار العراقي ..؟؟!!

طيب ايه اللي يحدد ان العملة تبقى قيمتها كذا مقابل الدولار ؟؟

يعني مثلا الدولار3،75 ريال ...والين الياباني بيبقى كتير اوي مقابل الدولار ..

طبعا اليابان من الدول الصناعية واقتصادها جيد ... هل سعر صرفية العملة مقابل الدولار

يدل على اقتصاد البلد .؟؟؟

حد فاهم حاجه :blush:

ولا انا -_-

فعلا فعلا .. دايما الاسئلة الاقتصادية بتحيرني ..

ومش قادرة افهمها ..

يعني مثلا يموت شخص يرتفع سعر البترول والا يقل ...

مش عارفه يحصل ايه ترتفع اسعار الاسهم في البورصات والا تقل ..

ازااااااي .. مش فاهمه :P

[MZohairy]

لأ طبعا يا مصرية

والا كان يبقى الاقتصاد المصري أقوى من الايطالي نظرا لتدني قيمة الليرة الايطالية سابقا !

[لخبطه]

سعر عمله أي بلد مرتبط بمجموعة حاجات

منها قيمة الغطاء الذهبي لديها لكن فيه حاجه تانيه إللى هيا الثقه في اقتصاد البلد نفسه بمعني لو دول العالم فقدت الثقه في اقتصاد بلد ما تنهار عملتها ( زي ما حصل ف العراق )

فكره التضخم تعني ان الدولة تطبع عملات نقدية عمال على بطال ودا بيأدي إلى ان القيمة الشرائية للعملة تنزل بشكل كبير والقيمة الشرائية تعني أنه قمية الجنيه من المشتريات ايه ؟؟؟؟؟؟؟؟ يعني لو الجنيه يشتري كيلو أرز تبقا دي قيمة الجنية الشرائية

لو غلى الأرز وبقا بعشرة جنيه دا معاناه أن القيمة الشرائية للجنيه نزلت عشر مرات ودا اسمه التضخم

الاستاذه مصريه الهوي

بخصوص علاقة موت شخص بسعر البترول أو ارتفاع الاسهم في البورصه دا هيكون طبيعي لو فهمنا الفكره الإساسيه للبورصه ( مش الفكرة اللى عندكم يامصريه :closedeyes: ) الفكرة الأساسية أنه الناس تشترى سهم شركة معينه علشان تأخد أرباح من الشركة صاحبة السهم أخر السنة المالية يعني أنا هدفع 1000 جنيه لشراء 10 اسهم في شركة ما قيمة السهم فيها 100 جنية لنقل إنها شركة نقل هشتريهم بغرض أني اخد ربح 100 جنيه بواقع 10 % على السهم اخر السنة المالية بتاعتهم لو طلع خبر في السوق يقول أن الشركة دي أخدت تعاقد كبير للنقل بين مصر و السعوديه فالطبيعي أن ربحها هيزيد وعليه كل الناس تجري تشتري الأسهم بتاعها ودا يخلق تنافس على شراء سهمها فيغلى السهم من 100 جنيه إلى 150 أو أكثر وعلى العكس من كدا لو كان الخبر سيىء بيقول ان الشركه اتوقف لها خط النقل بين مصر والسعوديه المفروض دا يؤدي لرخص سهمها في السوق

[yasovinas]

معلش رد سريع مؤقتاً لحين العوده مرة اخرى

ما فيش دوله في العالم حالياً تتعامل بغطاء الذهب خلاص الموضوع دا اصبح في خبر كان

ولنا عوده

[نورية]

بجد بجد بجد مش عارفة اقولكم ايه

اخيرا فهمت...

والله ممكن حد يقولى دة سؤال هايف او اجابته معروفة... بس والله عمرى ماعرفتله اجابة

ماكنتش اعرف كل المعلومات دى

عارفة يا مصرية الهوى... كنت بردو عايزة اسأل ازاى بتتحدد اسعار العملات بردو

و الحمد لله انتى سبقتينى و سألتى

خسارة ان الواحد مادرسش اقتصاد

استاذ وجدى تحية كبيرة منى ليك و اشكرك على بذلك مجهود فى تبسيط المعلومة

سندريلا.... مش راح اقبلك عميلة عندى فى البنك بتاعى

زهيرى باشا.... حلوة اوى حكاية عم احمد دى.... عشان لو حد سألنى نفس السؤالابقى ابعتهم لعم احمد على طول... بس والله فهمت .. و التكرار يعلم الشطار

لخبطة..... ممكن تفهمنى اكتر موضوع الاسهم دة؟؟؟

ياسو.... اومال بيتعاملوا بايه ؟؟؟ يعنى ممكن يتعاملوا على حسب ثروات البلد زى البترول مثلا زى ما بيحصل فى دول الخليج؟؟؟؟