تجربة حياة

[عمر عباس]

تخرجت من كلية الهندسة وجائنى التكليف فى وزارة التعمير ... كان المرتب ضئيل فكرت فى السفر حتى أكون نفسى ... ذهبت الى أسبانيا ضمن محموعة رحلة على مركب ... المهم البحث عن عمل .. انتهت فترة الرحلة وبدأت المجموعة فى العودة

وانا لم أجد عمل .. ولكن كيف أعود بخيبة تقيلة الى أهلى وأنا مستدين منهم مبلغ محترم .. سافروا هم وبقيت أنا ابحث عن عمل أى عمل .. خلصت الفلوس .. وبعد ان كنت اركب مواصلات .. اصبحت أمشى ولمسافات طويلة فى البحث عن أى عمل .. كان همى أن أسدد أقامة الفندق .. وحتى لا تصل الامور للبوليس والترحيل المخزى .. ثلاثة أيام وأنا أهيم بدون أكل فقط المياه .. وطبعاً المجهود قل فى المشى .. جلست فى حديقة عامة لا أدرى ماذا أفعل .. جوعان .. ألهث .. متعب .. خائب الامل ..ياس ..الدنيا ضيقة .. مفيش مساء الخير أغرفى .. فى هذه اللحظة وجهت وجهى للسماء .. قلت يارب انت ترزق الكلاب فى الشوارع .. ليه مش عايز ترزقنى ..بكيت لدرجة النحيب .. ارتحت .. قمت اجر اذيال الخيبة وامشى وانا لا اعرف ماذا افعل .. وجدت باب صغير عليه يافطة لم اعرف ايه المكتوب عليها .. كنت لا اعرف الاسبانية وقتها .. المهم دخلت .. سألت عن عمل ( كنت اجيد الانجليزية وشوية المانى ) رد الرجل وقال وماذا تعمل ؟ لا استطيع ان اقول له انا مهندس .. قلت له فنى كهرباء .. قال هذه لوحة توزيع مكينات طحن زلط آلى عاطلة .. تعرف تصلحها .. قلت فيه رسومات لها .. قال خذ .. المهم .. وانا بدور يمين وشمال وطبعا اول مرة اشوف لوحة مثل هذه .. كانت ايدى بتمسك الاسلاك وبراجع مع اللوحة .. يدى توقفت عند سلك طرى شوية هزيته وشديته وجدته مطاط قمت قطعته فلم اجد سلك نحاس بداخله يعنى مقطوع من الداخل لكن من بره سليم .. المهم وصلته وطبعا ناديت على الرجل وقلت له تعال نجرب واذ باللوحة تعمل وهنا ضحك الرجل وقال عظيم .. ستعمل معنا .. كان هذا الرجل المدير التنفيذى لشركة سيمنس وتعمل من الباطن لشركة اسبانية .. هنا احسست بان الله كان بجوارى .. ليس ذكاء منى ولا شطارة فقط احسست بالله معى وكان هذا اول اشارة لى .. وعملت مع سيمنس فى اسبانيا لمدة ثلاث سنوات وانتقلت للعمل معها فى بلاد كثيرة حسب مواقع العمل .. وامتحنت بعد مدة فى مقر الشركة فى ميونخ لأعمل كمهندس معترف به والحمد لله ..

المهم بعد لفة السنين والغربة الطويلة رجعت اتزوج من اعماق ريف مصر العظيم ..

الحمد لله

لَوْ أَنزَلْنَا هَذَا الْقُرْآنَ عَلَى جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ( الحشر 21 )

[فولان بن علان]

باشمهندس عمر

وأنا أقرأ تجربتك تذكرت قصة سيدنا موسى عندما خرج من مصر هاربا

متوجها إلى مدين وانقطعت به السبل وتوجه إلى الله

( فسقى لهما ثم تولى إلى الظل فقال رب إني لما أنزلت إلى من خير فقير )

فكان الفرج قريباً جداً وظيفة وزوجة

لو صدقنا اللجوء إلى الله فلن يخذلنا

(أم من يجيب المضطر إذا دعاه ويكشف السوء ويجعلكم خلفاء الأرض أءلاه مع الله قليلا ما تذكرون )

نشكرك على سرد هذه التجربة الجميلة ونتمنى لك التوفيق

[الاسكندرنى]

الحمد لله و الشكر لله

قصه يا عمر بنشوف فيها مدى قرب الله عز وجل من عباده

قصه تقريبا بتحدت مع كل مغترب عارف ان الله موجود ولكن تختلف ردود الناس على ذلك منهم من يدرى انه الله واراده و منهم من يقول انا الواد الفتك

بجد تعرف يا عمر احسن حاجه فى الغربه انك رايت الله على وصف د,مصطفى محمود فى كتابه رايت الله

و يقصد فى كتابه ان تحلم و تفكر فى الله فى كل شى تفعله حتى تجد الثمار التى لم يستطيع عقلك ان يتخيلها

[sendrella119]

كل عناء المحنة ومشقتها بيزول

لحظة عطاء ربنا

لينا

المهم

بعد لحظة العطاء

هل بنظل بمثل ذلك الاحتياج لله .....

هل ابتهالاتنا ....وقربنا منه بتبقي

انا بحس ان المحنه بتبدا من لحظة العطاء

هل سابقي كما كنت

مبتهلة ساجده.... داعية راضية

ام كل هذا يتحول الي اهتمام بالدنيا

وينتابني الشعور بالصغر

واني

خذلت نفسي امام الله

ربنا يقوي عزيمتنا جميعا

[المدهش]

شوف يا عمر ..أنا متفق معاك في كل شئ إلا حكاية ريف مصر العظيم ..ومش عارف ليه احنا كمصريين ما بنقدرش نتكيف مع زوجة أجنبية حتى لو عشنا سنوات طويلة جدااا في الغربة..وبصراحة أكثر ما بنقدرش كرجالة شرقيين نتحما حكاية الزواج من فتاة خوجاية واحنا عارفين إنها في الغالب الأعم مش هتكون عذراء ..فيا ترى هو ده السبب اللي رجعك لريف مصر العظيم ولا ايه..أما حكاية كفاحك فهي تعطي الأمل لأي شاب يائس وربنا يكرمك ويوفقك ..وبالمناسبة ايه رأيك بصراحة في موبايلات سيمنس.

[khedr]

عمي عمر

هي الحياه

كفاح

ايمان

استعداد

جزاء

..... ....... ......

واقعيه قصتك ...وتعبك الذي احسست به في كل حرف

وفرحك وسرورك وشكرك لربك بعد ان عدت الي جذورك

تجعلني احترمك واحييك يا اجمل مثل لي ولاخواننا الشباب

[اسود وتعالب وارنب]

ده عشان انت في بلاد الخوجات لكن تعالي الي بلاد العرب انا بقالي هنا 9 سنوات بكافح بس عشان اكل ولا فائده

[مسافر زاده الخيال]

تحية للباشمهندس عمر عباس..............

تصدق انا منهك من الكتابة في الكمبيوتر طول الليل ...........لكن قصتك اجبرتني على كتابة تعليق لها

بصراحة قصتك مختصرة ومفيدة وبتتصدق ولا فيها ادعاء ولا عنطزه ولا ادعاء عبقرية محصلتش مش عارف اكمل بس تجربتك تستحق التقدير

[متمردة]

هاى استاذ عمر عباس

القصه بعد لما قراتها اشعرتنى وخصوصه فى كلمه

.. هنا احسست بان الله كان بجوارى .. ليس ذكاء منى ولا شطارة فقط احسست بالله معى وكان هذا اول اشارة لى .. وعملت مع سيمنس

ربنا يوفقك يا استاذ عباس :P فعلا قصتك تسحتق انها تتعمل فيلم بدل الافلام الخايبه بتاعت اليومين دول

فى فيه سؤال محيرنى ؟؟؟؟؟؟؟؟؟؟؟؟؟

فيه تشابه كبير بينك وبين قصه فى فيلم لاحمد زكى الله يرحمه هو بيحكى قصه مماثله لقصتك ؟ اسم الفيلم النمر الاسود بس هو راح المانيا

سؤالى بقى ؟

هل كانت نظرة الناس الاسبانين ليك اقل لانك مصرى ؟

هل اتعملت مع يهود كانوا بحتقروك مثلا ؟

كيف كنت بتفكر بمصر فى الوقت اللى انت عايش فيه القصه ؟

[بنت النيل]

السلام عليكم

كيفك يا اخ عمر

قصتك وكفاحك وصبرك واهم شىء هو ايمانك بالله شىء جميل وعوضك عن كل اللى صبرت عليه فعلا اذا كان الانسان صادق مع ربه ربنا بيكون معاه بكل المحن والظروف وكمان احيك بشدة لفكرة زواجك وهى من ريف مصر او المدن المهم هى فكرة الزواج من مصرية بنت بلدك عارفه عاداتك وتقاليدنا ومؤمنه بالله وعارفها دينها كويس احيك وانحنى لك كمان والله يوفقك

لكن عندى كلمة لشباب المغترب ياريت من كل شباب انه لما يسافر وربنا يكرمه انه لا يتحمل على بلده مصر ويقول شفتو انا فى مصر كنت اذاى ولما سفرت عملت ايه وبقيت اذاى لا صدقونى ده اكبر غلطه بنقع فيها ويكمن كمان هى اللى بتخلى نظرة اهل البلد المغترب فيها ليناغير لانك بتعطيهم الاحساس بانهم هما اصحاب الفضل عليك وهما اللى عملوك

وده مش صحيح برده لولا مجهودك ونشاطك وخبرتك وذكاءك ما كانو تعملوا معاك ولا استفادو منك بشىء انت بتاخد منهم على قد ما بتديهم

وبعدين يا شباب قبل ماتقولو كدا قارنو بين البلد اللى انتم فيها وبين بلدك من كل النواحى من عدد سكان من دخل من اقتصاد مثلا كل شىء انتم لو جيتو تقارنو بين مصر وبلاد تانية مصر اعظم بكتير وافضل

كمان فى حاجة صحيح بيكون الدخل اكبر لكن فى حاجة ان الشاب مستعد للعمل فى الخارج باى وظيفة مهما كانت رغم رفضه الشديد للعمل بنفس المهنه بمصر ولا ايه :P

يعنى مثلا الاستاذ عمر بيقول فى قصته ماقدر يقول للراجل انه مهندس بعكس لو كان فى مصر هيقول مهندس ويطلب كمان يتقال له يا باش مهندس صح مع احترامى لاخ عمر لكن ده للتوضيح فقط

مصر هى الخير والبركه والامان مهما كانت ولا غنى لنا عنها الله يحميها ويبعد عنها كل من يريد السوء بها

ادخلو مصر امنين

[ياسر ابو احمد]

مش عارف .. فيه حاجه مش مستريحلها في القصه .. المدير التنفيذي لشركة سيمنس .. وطواحين .. وبيعمل من الباطن .. يعني اليافطه الصغيره دي كان وراها مصنع كبير مثلا .. في حاجه مش متركبه صح .. معذره

[^^^hi^^^]

انا حعلق على نقطه واحده انا نفسى التمستها كل شى بيحصل حلو للانسان مش شاطره يا عمرو فعلا دى اراده ربنا سبحانه و تعالى فعن تجربه شخصيه و الله بجد و عن تجربه قريتها معاكم و عن تجارب سمعتها الجاء الى الله وتوكل عليه (مش تتواكل الفرق كلنا عارفينه ) وشوف ايه اللى حيحصل جرب بس وتوكل على الله بجد و انت واثق اهم حاجه تكون واثق من النتيجه

ويجعلوا عامر بحب الله و التوكل عليه

[عمر عباس]

الأخوات والاخوة الافاضل /

أسعدتنى تعليقاتكم على الموضوع ..... وشرفنى وجودكم معى ..... ودائما أحمل بعض تعليقاتكم فى ذهنى ....

أرجو منكم العفو لردى المتأخر عليكم

عمر

[إسلام طلعت]

ان مع العسر يسر

انا مغترب حديثا منذ 3 شهور ونصف فقط

وحياتي الجديدة اصعب ما تكون

وما يتعبني ويرهقني في هذه الحياة هي طبيعة عملي التي تغيرت عما كنت اعمله في مصر ولكن انا بحاول ان اصبر نفسي يوم بعد يوم

وانا واثق ان الله لن يضيعني

واحمد الله على كل شئ لانني كنت ادعو الله ليلا ونهارا ليرزقني بالسفر وبالفعل رزقني به والحمد لله

تحياتي لك عمر عباس ومبروك على استجابة دعوتك وان شاء الله يكون جزء منها للآخرة

وتحياتي للجميع