مدرسة المحاورين

[ragab2]

فين الكتاب .... وفين الاخوة المحاورين

هما كلهم بيشتغلوا فى المدارس مدرسين

وبيصلحوا الامتحانات عشان كدة غايبين

ولا هما طلبة بيدرسوا ....ومش فاضيين

ولا موضوعات جديدة ... ولا حتى ردين

ياترى هما فى الامتحانات ولاهما فين

عاوزين نعمل اعلان عن طلب محاورين

بشرط يكونوا فاضيين .. وغير مشغولين

ومقطوعين من شجرة وللكتابة متفرغين

وممنوع دخول الطلبة ولا حتى المدرسين

والا حانفتحها مدرسة . واللى مش حافظين

نججيب لهم عصاية وفلكة وكمان خرزانتين

ومفيش لعب الكل يذاكر وحنحتاج سبورتين

واللى حايجيب ساندوتش للأستاذ له نمرتين

والدروس الخصوصية مهمة جدا .... للمهملين

والى مش عاوز دروس يدفع تبرع للمدرسين

هو ده قانون وضعه حضرة الناظر والمشرفين

ومنتظرين الرد السريع من الطلبة والمحاورين

[عادل أبوزيد]

عزيزى رجب

لقد لمست موطن الألم      يبدو انه عندما تزداد الموضوعات الهايفة (عذرا من هذا التعبير )  يتقوقع الجادين و يتركون الساحة  ..  و ليستهذه اخلاق الفرسان  الست معى فى ذلك  هل نترك الساحة للأطفال الذين يبحثون عن طريقة لقطع وقت الفراغ

فقط لى ملاحظة هل تقصد شيئا بمسألة  سندوتشين للمدرس انا اعتقد انها  فقط حكم القافية   فحقيقة منذ اشتركت هنا  - و انا من اوائل المشاركين - لم جد اى محاولة لتوجيه النقاش وجهه معينة  و فعلا اصدق انها محاورات المصريين

ايها المحاورون  اتحدوا   ولك حبى و تقديرى

سؤال جانبى:  سمعت اشاعة كدة يعنى  هل بدأتم فى جمع اشتراكات لباب الشعر و الأدب  ام هذه مجرد مؤامرة

تحياتى

[abla]

[b:post_uid0]اخونا رجب شاعر المحاورين

نعمل ايه في الدراسة والمدرسين

الوقت ضيق والمناهج ترمين

والامتحانات برضه مرتين

والطلبة مطلعين عين المدرسين

فيهم الشطار وفيهم الخايبين

وفيه منهم متربي وفيه منهم ... ين

بذمتك الموضوعات الجديدة تتحط فين

وهي ياولداه مش سالمة من المخربين

حتى لو مارديتش ح تروح منهم فين

وراك وراك ويجيبوك لو رحت فين

اشرب بقى منهم واوعي تقول اروح فين

ماانت اللى عملت مناقصة لتوريد محاورين

لامؤاخذة ياشاعرنا العزيز القافية تحكم وانت اللى جبت سيرة المدرسين

[/b:post_uid0]:biggrin: :biggrin: :biggrin:

[ragab2]

أخونا عادل أبو زيد  من الناس الحلوين

فيه مجدعة ومروءة وشهامة المصريين

مخلص للمنتدى والاخوة  المحاورين

وبيقترح  علينا نلم قرشين

من شعرنا ونبقى مستفيدين

بس المهم نلاقى قراء مريشين

يقدروا الشعر الحلبنتيسى والشعراء التعبانين

ومش مشكلة ان نكون دلوقت مغمورين

يمكن ربنا يكرمنا ونبقى مشهورين

وبدل التذكرة نبيع لنا تذكرتين

اختنا عبلة ايه الشعر الجميل ده اتضح انك  من الشاعرين

ومش هانعرف  ناكل عيش ويا الشعرا المحترفين

والمواهب الجميلة ديه كنتى مخبياهه فين

ده احنا مش عايشين فى البلد واتضح اننا جاهلين

وعشان خاطرك هانقبل تلامذة جداد ومدرسين

بس انت نخليكى الناظرة ونعينلك مشرفين

وانا وعزت اعتبرينا طلبة  غير متفرغين

ونبيع بيت الشعر للطالب الفاشل بسندوتشين

واذا فاض معانا بيوت نبقى نسكن فيها المهجرين

الواد بسكوت ابن طنط نادين

لعبى وبيمشى مع العيال الوحشين

وبيزعل اخواته  ومابيسمعش كلام الوالدين

وبيعض الايادى اللى ساعدته  وسقته م النيلين

حتى شيطانة بقت انسانة وبتحاور المحاورين

حنلاقيها م البنآدمين ولا من الشياطين

والبسكوت والقشطة بقم مغشوشين

وحطو فيهم سموم وتوكسافين

وافتكرونا هاناكل ونبقى مستطعمين

ده احنا بنشمها ياعالم  على بعد ميلين

وكفاية الحاسة السادسة لعبلة باريالين

وكم مرة حذرناهم  وقولنا لهم مش لاعبين

حتى النيل اتعكرت ميته بعد ما نزله المخربين

وقسموا النيل وعملوا له فرعين

فرع للحلوين وفرع  للحاقدين

أحلام ى ان أشوف فيهم يوم من رب العالمين

(Edited by ragab2 at 8:07 pm on June 29, 2001)

[Imhotep]

 و طلعت  من كلام اختي عبله و اخويه رجب بحكمتين:

   الاولي: اننا انشغلنا في الفتره الاخيره حبتين

  و التانيه: اننا-و الشكر لله- خلصنا عل المجنديين

[abla]

اخجلتم تواضعنا ياشاعر المحاورين

وأنا ح آجي جنبك وجنب عزت فين

أنا لو فعلا زي مابتقول من الشاعرين

يبقى باشعر وأحس باللا كويسين

موافقة ياعم على الناظرة والمشرفين

بشرط اقف ع الباب بخرزانتين

وأضرب اللى يغلط في الاخوة المحاورين

ولو رسيت امد اللى بالي بالك ع الرجلين

ولو كتر اسكنة قرافة المجاورين

الواد بسكوت ابن طنطك نادين

مش بس رايق لكن عفريتين

حب يعكر دمنا انما على مين

ح يسمع كلام الوالدين فين

لو الوالدين كوابيس وشياطين

كلهم محتاجين خرزانتين معتبرين

البسكوت والقشطة مش بس مغشوشين

دول طلعوا من فضلات المستوردين

ريحتهم فاحت انما على مين

الحاسة موجودة والاريالين جاهزين

إيه رأيك بقى ياشاعر المحاورين

تحب اوديهم بجد ع المجاورين

ولا نخليهم والايام بيننا جايين

:biggrin::biggrin::biggrin:

:biggrin::biggrin:

:biggrin:

[Imhotep]

   امسك يا عم رجب... الدكتوره باين عليها سابت توريد المرارات الكاوتش و نازله في الشعر بتقلها!!!! الله ينور صحيح....

[ragab2]

ايه ده اللى بيحصل

معقول الشعر الجميل يطلع من اختنا عبلة

امال كانت فين المواهب دى من زمان

خدتى العهد من مين

خللى بالك ما تطلعيش سر المهنة لحد

بس بينى وبينك ممتازة وشعر خفيف ومسترسل فى سلاسة

عاوزينك بقى تكتبى للطعمية احسن اتظلمت معانا

الله ينور عليكى

[abla]

[b:post_uid0]صباح الفل يامحاورين

والله ماعرف الكلام ده جاي منين

البركة في ابو رجب والناس الحلوين

بس على ماقلت الكلمتين دول فقعت مرارتين

الاخوة الافاضل والله ماكنت اعرف اني ممكن اقول كده ... اعمل ايه اخونا رجب بهت على ...وده من كتر الاعجاب بشعره وشعر الاستاذ عزت .. بس ماتاخدوش على كده ... انا نفسي مااعرفش ح يكون فيه تاني ولا دي نزوة شعرية ونزلت على وبعدين اصحي من النوم على كابوس من الكوابيس اياها ... بس تعرفوا مادام سوق المرارات الكاوتش واقف بسبب الكساد ممكن نعمل شوية اغاني وطنية ونرشهم في المناسبات القومية ... ماتخافش ياابو الرجوب ماحدش ح يعرف سر المهنة بس قوللى عليه الاول [/b:post_uid0] ;) ;) ;)

[Imhotep]

متقليش كده يا اختي يا عبله... ده احنا عوزيين من الشعر الجميل ده كمان و كمان و كمان.... خلينا كده نكيد العزال و نعرفهم ان ابو رجب و قطب دول بس البدايه...و

ياما في الجراب يا حاوي...

[ezzat afifi kotb]

الله يبارك الله يزيد

شعر رقيق وبحس وليد

وعكاظ سوقه حيرجع عيد

فى محاورات الوفد جديد

ورجب قاللى يا واد مغاورى

بضاعتك كاسدة مالكى وثورى

قلت له يعنى خسرنا الدورى

قال وكمان الكاس الفورى

قلت له فيه دورى المظاليم

ومعايا ربابة وقوسها سليم

ونسلط ضوؤنا على التعتيم

ومسير الشمس تعدى الغيم

---------------------

[ragab2]

فين المحاورين الحلوين

[ابو حلاوه]

يا دكتور رجب

كلامك عجب

محاور اراري و راجل عميئ

يعجبني رأيك تملي جرئ

و ان كنت عايز محاور صغنن

حلاوه اهو بيحاول يفنن

لكن ايش يجيب حلاوة لرجب

يا خوفي يقولولي يا حلاوة يحنن

[ragab2]

أبو حلاوة راجل نقاوة

فكره ومحاوراته شقاوة

قاعد فى باريس ويحب الطراوة

فى الطب وعلم النفس , براوة

أخوة ومجدعة آخر غلاوة

شكرا يادكتور أبو حلاوة

[ragab2]

ومازلنا

فى انتظار المحاورين

[ابو حلاوه]

بصلة و قوطة و كام خيارة

و سمورة و كوسة و حبة شطارة

و حبشهم بقرموطة و دنيس

في بلدنا كفاية يخلوك رئيس