إنتخابات الرئاسة على ال CNN

[maksoof]

كان فيه برنامج عن إنتخابات الرئاسة المصرية على ال CNN قمت بتسجيله (أعتقد إنه كان فى شهر نوفمبر 2005) و كان فى نيتى إنى أشوفه فى وقت لاحق. بس طبعا (زى حاجات كتير باسجلها عشان أبقى أشوفها لما الوقت يسمح و بيكون مصيرها النسيان) نسيته لغاية يوم السبت الماضى - كنت بادور على برنامج تانى فعثرت عليه.

فى الحقيقة أنا مش عارف أقول إيه عن الإنتخابات دى ؟

هل مبارك على علم باللى حصل فيها؟

أنا بصراحة مش قادر أتخيل إزاى شخص يقبل إن وظيفته تكون مبنية على هتك عرض فتاة المفروض إنه يكون هو حاميها! الشخص ده (مش قادر أقول "الراجل ده" لأن اللى يعمل العمايل دى لا يمكن أن يتصف بالرجولة) داخل على سن الثمانين فهل وصل به الإفتراء إنه مش بيفكر حيقول إيه لربه اللى قرب يقابله؟

الفتاة اللى فى البرنامج إسمها رباب المهدى - مدرسة بالجامعة الأمريكية. و بتوصف إزاى عساكر البوليس (أو بتوع الأمن) زنقوها بين ثلاث حيطان و سدوا عليها المنفذ الوحيد و ضريوها بالعصى و بعدين سمحوا للبلطجية إنهم يصلوا إليها و يعتدوا عليها.

أنا نقلت الجزء الخاص برباب و الملف حجمه حوالى 90 ميجابايت و رفعته هنا للى عايز يشوف و يسمع البنت البطلة دى و هى بتحكى عن مأساتها.

كلام رباب مقلق و هى بتوصف بالتفصيل اللى عملوه فيها. و بصراحة أنا حاسس بقلق و خايف على بنات مصر كلهم اللى الحاكم ما عندوش مانع إنه يبنى كرسى حكمه فوق عرضهم.

[على عينه]

اخونا الفاضل مكسوف

يا افندم انت بتتكلم عن نظام همجى ..نظام لا يعرف معنى كلمة الاستحياء والخجل...نظام بنى على البلطجة ...نظام سوف يذهب الى مزبلة التاريخ من اوسع ابوابه...انت تقول ان الريس لا يعرف بهذه الحوادث انا اقول العكس فكل مايجرى من خروقات تجرى بموافقة مسبقة من سيادته...واكيد انه تأتيه تقارير خارجية بالخروقات وانتهاك حقوق البشر فى مصر ولكن للاسف هو عامل ودن من طين وودن من عجين ولا حياة لمن تنادى...هو يحكم عن طريق هتك الاعراض وامتهان حياة الانسان فى مصر ..هو يحكم بالتعذيب...

هو يحكم بالتزوير

هو يحكم بالبلطجة

هو يحكم بالقوانين سيئة السمعه وقانون الطوارئ

هو يحكم بواسطة مجموعة خارجة عن القانون وليس لهم اى سند شرعى ويكفى مايحدث فى مصر من احداث يومية لتبرهن على صحة ما اقول ..نحن لا نتجنى على احد.ولكنهم هم الجناة .سوف يحاكمهم الشعب يوما من الايام على ما اقترفوه من جرائم فى حق هذا الشعب وسوف يكون الحساب عسيرا وعسيرا للغاية

[White heart]

جهد مشكور يا عزيزى maksoof ... أعتقد ان المشكلة ليست مشكلة رئيس فقط .. انما هى مشكلة ثقافة عامة منتشرة بدرجة كبيرة بكل أسف ... انا أعنى ثقافة العنف ( إحدى نتائج التكدس و الزحام ) ... ثقافة عدم النظام ( الغوغائية ) .... ثقافة عدم التوحد ( فكل يغن على ليلاه ) ...

كان العزيز " ali10 " قد بذل الجهد فى تجميع فضائح مشابهة نشرتها مختلف وسائل الأعلام حول العالم فى هذا الموضوع هتك عرض فتايات كفايه ... كما وضع لنا أيضا العزيز " ahmadkli " ... هذه الـــ دعوة من رابطة الأمهات المصريات ... و غيرهم من المواضيع التى تبين مدى الخجل الذى يسببه تناقل مثل هذه الأفعال المؤسفة حول العالم ... و لكن فى نفس الوقت هى مدعاه للفخر و الإعتزاز بالأعمال الجادة فعلا منها على الرغم من ضألة أعدادها أو أحجامها ....

تحياتى.