تجربة حياة 2

[عمر عباس]

سأحكى لكم ما حدث ردا على الموضوع هل تصارح شريكك بماضيك ولا تخلي الطابق مستور؟

طبعا هذا حدث منذ حوالى 24 سنة فاتت ... كنت مهنس جديد مخلص جيش وأعمل فى وزارة التعمير .. فى هذه الاثناء تعرفت على بنت كانت بتعمل مدرسة انجليزى ثانوى ... توطد العلاقة بينا وكنا شباب وفى ضلالة... وجدت فيها حرية تامة لدرجة المبيت معى فى احد الشقق .. لم تكن عذراء .. المهم كانت قصة حب كبيرة جدا ... تعرفنا على اهل بعض ... حكت لى عن كل حاجة بالضبط قالت لازم كمان اعرى داخلى علشان تعرفنى كويس....قالت انها حملت مرتين سفاح ... وانها الان تابت ... وفعلا اصبحت محجبة .. وتصلى وتصوم .. وفعلا تراعى الله .. .. قالت لى اعتبرنى كنت كافرة واسلمت ... وتزوجنى ..... كانت فعلا بتحبنى بصدق واعرف ذلك من تصرفات كثيرة لا داعى لذكرهاوكنت ايضا احبها بصدق ... كان السؤال بداخلى .... هل اتزوجها ؟

دار فى نفسى الحوار الآتى ، انت تتزوج علشان تبنى اسرة وأطفال .. مش كده ... طيب الاطفال دول مش لازم تكون امهم مقدسة فى نظرهم ...

طيب افرض مت وهى رجعت تانى لنفس اسلوب الحياة السابق .... ماذا عن اولادك ؟ هل تترك لهم ام مقدسة ؟ قلت لا .. مش اولادك اغلى منك .. لازم تضحى علشانهم .....وتضحى بحبك وبقلبك مثلما انت مستعد تضحى بحياتك فى سبيل المحافظة عليهم... لازم تجيب لهم ام مقدسة ... طبعا انا لم انجب اولاد حتى هذه اللحظة ولكن كنت افكر فى ما سيكون .

قلت ماذا يحدث لو ماشى فى الشارع وهى معك وبتضحكوا وفى نفس اللحظة كان فيه رجلين ماشيين وبيضحكوا وتقابلت عيونهم معها وانت رأيت ذلك اكنت تقول آه دى لازم تعرفهم ؟ طبعا ستعيش انت وهى فى جحيم .. موضوع الجواز منها كان عايز بطل بصحيح مش انسان عادى مثلى انا ... دا انا ممكن اعذبها بالماضى حتى وان كانت هى تائبة بصحيح ......دى نفسى واناأعرفها ...

كانت هى محاصرانى فى كل مكان ؟

كان الهروب منها باننى سافرت بره مصر ..... ولما رجعت بعد سنين طويلة تزوجت من انسانة تانية لا أعرفها بشكل قوى ولكن جواز صالونات كده من ريف مصر العظيم .... المهم متدينة واهلها متدينين وسمعتهم كويسة والبنت لما سألت عنها فى كل مكان وخليت بعض الاصدقاء يجمعوا معلومات عنها وجدا انها سمعتها كويسة .. المهم تزوجت وتركت هذه الانسانة وعرفت انها تزوجت هى ايضا وانجبت اولاد وسعيدة مع زوجها .... قابلتها بعد ذلك صدفة .....تلاقينا فعلا لقاء الغرباء

[مصرية الهوى]

ليه الرجل الشرقي بالذات يرضى لنفسه ما لا يرضاه لغيره ..

انت يا عمر بتقول " توطد العلاقة بينا وكنا شباب وفى ضلالة... وجدت فيها حرية تامة لدرجة المبيت معى فى احد الشقق .. "

يعني انت وهي كلكم غلطانين .. متساويين في الغلط .. مش هي لوحدها ..

هل ممكن الرجل يقدر يعترف انه فعلا هو غلطان كمان في أفعاله مش الست بس ..

وخصوصا في موضوع العلاقات الغلط .. الراجل والست .. كل واحد منهم ساعد التاني على الغلط ..

مفيش حد احسن من حد ..

طيب الرجل بيدور لعياله على أم مقدسة .. عشان متغلطش بعد ما هو يموت .. وتسيء لأولاده ..

طيب .. أليس من حق المرأة كذلك إنها تدور على أب مقدس لأولادها عشان هي كمان تطمن على أولادها .. لو هي ماتت وكانت متجوزة راجل بيغلط .. يمكن ده يسيء لأولادها ...

طيب لما الست بتقول ماضيها لجوزها ..

هل الرجل مستعد انه يقول ماضيه لمراته .. !!

عالم محيّر فعلاً ....

[مهيب]

العزوزة جيجى ..

الفكرة مش كده بالظبط .. السؤال هو ايه اللى الراجل المفروض يقمه أو يعمله علشان يبقى اسمه (معترف بغلطه) .. أنه يروح و ينقى واحدة (معترفة بغلطها برضه) فيبقى كده طهر نفسه ؟؟

أى انسان .. سواء الكويس أو الوحش .. المذنب أو البرىء من حقه انه يتمنى لنفسه الأفضل .. و ليس تمنيه الأفضل لنفسه معناه اعتراف ضمنى انه مش مقتنع انه مذنب مثلا .. و لنتخيل مع بعض مثال .. ولد و بنت .. اصحاب .. بيخرجوا و يقابلو بعض و تمام التمام .. هو غلطان و هى غلطانة .. لكن الولد ده حب يتجوز .. مش معنى انه يدور على واحدة مؤدبة و متدينة يبقى هو شايف نفسه أفضل من البنت التانية اللى كانت غلطانة برضه .. لأ .. هم الاتنين غلطانين ... لكن من حق أى بنى آدم بيفكر انه يتمنى الأفضل ليه ..

المسألة عاملة بالظبط زى اللى بيتفرج على ماتش كورة لفريقه المفضل .. عمال يعدل عليهم و يتمنى انهم يفوزوا و يزعق لما حد منهم يعمل غلطة أو يضيع كورة مثلا .. مش معقول ولا منطقى اننا نقوله ساعتها انك لو نزلت الملعب ورينا انت هتعمل ايه .. هو مش لاعب ولا ده تخصصه .. لكن مع ذلك من حقه انه يتمنى فوز فريقه حتى لو هو مش بيعرف يلعب كورة

فاهمانى و لا كلامى ملخبط .. أنا حاسس انه ملخبط

مهيب

[مصرية الهوى]

أنا معاك يا مهيب العزوز :blink: إن أي إنسان يتمنى لنفسه الأفضل .. وعلى فكرة أنا مش قصدي إنه كان المفروض إنه يتجوزها .. بالعكس .. لأن العلاقة هتكون مبنية على الشك من أولها وده مؤشر خطير على الأسرة وهي في بدايتها ..

أنا أقصد إن الرجل حتى لو بيشوف إنه وحش وغلطان بس المرأة اللي معاه هي الأوحش والغلطانة اكتر .. لأن المرأة هي الشرف والعفة والطهر و و و .... وهي اللي بتخون أهلها و أخاف تخوني في المستقبل وعيالي هيتربوا ازاي ومش عارف ايه ..

مع إن دي مفاهيم لازم تكون عند المرأة والرجل ....

ولا يمكن الرجل يفكر انه طيب يمكن هو يعمل حاجه غلط بعد الزواج ....

يعني دايما المراة هي الغلطانة أكتر ....

فاهمني والا لخبطت لك الدنيا :unsure: ؟!!

عالعموم التفكير ده أنا شايفة انه لا يمكن يتغير في المجتمع ابدا ..

وابعد عن الشر وغني له ..

[مهيب]

عارفة يا جيجى .. بالرغم من محاولتنا ادؤوبة لسكب أطنان من المنطقية على المفاهيم دى ... لكن فى النهاية بيبقى فى ثوابت ... حجم الاثم و الجرم و الذنب اللى بينتج عن خيانة الرجل مثلا هو هو بالظبط حجم الاثم لخيانة المرأة ... دى حقيقة منطقية و دينية لا جدال و مراء فيها .. لكن ليه الموضوع مع المرأة بياخد حجم أكبر فى حياتنا ... لأنه ببساطة خيانة المرأة مينفعش الحياة تستمر على نفس الوتيرة بعدها .. أما خيانة الرجل ففى أحيان كتيرة ممكن الحياة تستمر .. ده مش معناه انه تصريح للرجالة بالخيانة .. و مش معناه طبعا انه صح أو ان الغلط أقل .. مطلقا .. لكنه وضع أو معامل داخل فى المعادلة ..

وبعدين فى صفات دايما بيبقى ارتباطها بالبنات أو بالمرأة أكتر .. نفس الحكاية بالنسبة للرجل .. بالرغم من انها مطلوبة بنفس القدر فى الاتنين ... خدى عندك .. قد ايه معانى البراءة و الرقة و الطهر و النقاء و الحنان و الطيبة مرتبطة أو مرغوبة قوى فى المرأة .. و قد ايه قوة الشخصية .. و سعة الحيلة و الأمان و الاعتمادية ورجاحة التفكير .. مثلا مرتبطة أو مرغوبة فى الرجل .. بالرغم من ان الصفات كلها مهمة انها تتوافر عند الاتنين ... فلما بيحصل خلل واضح فى حاجة مرتبطة ارتباط و ثيق بالمرأة أو بالرجل بتبقى مشكلة ...

وزى ما فى ست ممكن تتمنى ان جوزها يبقى راجل كده و يعتمد عليه و تحس جنبه بالأمان و قوة الشخصية ولو على حساب اخلاصه ليها مثلا .. لأنها بتعانى قوى من خلل عنده فى حاجات مهمة جدا ... هتلاقى فى رجالة ممكن يتخلوا عن الصفات دى فى زوجاتهم مقابل الاخلاص و هكذا ... مسألة نسبية ليس لها علاقة بأفضلية أحد على أحد

و بمناسبة الكلام عن المرأة و الرجل .. ادخلى كده و القى نظرة ع السريع على الموضوع ده

مهيب

[مسافر زاده الخيال]

السلام عليكم ورحمة الله وبركاته اما بعد

ان قرار الاستاذ عمر عباس منطقي وواقعي جدا ............................

وبالنسبة للاخت جيجي ولكثير من بنات حواء من مؤيدات نغمة المساواة والراجل زي الست وال...........خ من خزعبلات الغرب اقول ...........

ان المساواة قيمة والعدالة قيمة اخرى (قد تتطابقان احيانا) وفي حالة شرف البنت وما الى ذلك نجد انه مجال العقوبة كحد اسلامي ان المرأة والرجل متساويان ومتطابقان (لان الوضع يتطلب ذلك) اما في حالة الاثار والانعكاسات الاجتماعية والخلقية وما الى ذلك فلا يمكن ان نساوي بينهما والا ((لماذا جعل الله غشاء بكارة للمرأة فقط؟)) اليس معنى ذلك ان المرأة الشريفة اعلى من الرجل الشريف؟

فلنتخيل ان رجلا اغتصب امرأة ثم شكت لاهلها فقام اهلها (الاب او الاخ) بعمل كمين للرجل فقيدوه وربطوله وقالوا لابنتهم (الان هذه فرصتك لتغتصبيه كما اغتصبك فلم تصدق خبرا وقامت بذلك فهل تكون قد اخذت حقها؟؟؟؟؟؟؟؟؟)

ولو سألنا اي فتاة لو انها خيرت (بعد الشر عن الجميع) ان تكون ابنة زير نساء او ان تكون ابنة امرأة خائنة فماذا ستختار (كلاهما سىء ولكن ايهما اقل ضررا وقذارة؟؟)

اخيرا اقول يجب على مجتمعاتنا السير على خطى الاولين في مسألة الشرف والعرض والمرأة التي لاتعرض نفسها لذلك لن يستطيع الرجل ان ينال منها (الا لو اغتصبت غصبا عنها فما باليد حيلة مثلما حدث في البوسنة والعراق الان)

وتبا لدعاة المساواة عمال على بطال

والسلام عليكم ورحمة الله وبركاته

[nancy]

المشكلة ان الراجل الشرقى يحب مبنطق ويتجوز بمنطق المشكلة هى الانفصام فى الشخصية

لازم نكون اقوى من المفهيم السلبية انت حبيتها وعشت كل الجنان معاها وهى كانت واضحة

وصريحة انا عرفة انك متقدرش تتجوزها مش علشان هى وحشة لا انا مش شيفاها وحشة

علشان انت كنت جواك مش متقبل الفكرة للاخر رافض ماضيها رافض جنانها حتى لو شركتها فية

لازم نوصل ان الى معانا دة انسان ممكن يغلط اذا كان ربنا غفر لة احنا البشر معندناش القدرة على

السماح ابدا ليه

انا مكنش عندى مشكلة ابدا انى اتجوز واحد ماضيه اسود وعلاقات زى الزفت

لو حسيت ان جواة نظيف وانة واضح معايا وانة رما كل حاجة وراء ظهرة علشانى

بالعكس لما تغفر حتحس انك انسان قوى جدا اقوى من الضعف البشرى

انا ديما بفكر بطريقة كتير بيعتبروها غير منطقية مع انى شايفة ان الدنيا

ممكن تكون احلى

[khedr]

ياربي علي مواضيع الايام دي

احنا تركنا الفساد ومسكنا في الرجل والست ولحد مايرجع الدكتور خالد

المهم.............

مش عارف الواقعيه في الكلام ده مع اخويا عمر واللا اسمع للعزيزه جي جي..واللا افكر مع مهيب واحتار مع مسافر

او اقف احتراما لشجاعه نانسي

وجهات نظر كلها تستحق ان يتبعها الواحد منا وكلام جميل كله

لكن احس ان احنا كده كلنا سننا قريبين من بعضنا يعني كده تقريبا نفس السن والعمر

نفسي اسمع لرأيين واحد لسه لم يدخل تجارب الحياه واحدهم مما يعدون ابائنا الكرام

هل النظريه والكلام مختلف واللا ايه

الحياه وما فيها تجارب وخبرات

فهنيئا للذي اكرمه الله بمن يعينه عليها ان كان اب صالح او ام حنونه

تجارب الحياه مدفوع فيها ثمن واي ثمن.....

انه الحياه

[مصرية الهوى]

اول شيء الحمد لله على السلامة يا مسافر ..

بس يمه خوفتني .. دخلتك مرعبة :wub:

الصراحة استفزتني جدا جملتك ..

وبالنسبة للاخت جيجي ولكثير من بنات حواء من مؤيدات نغمة المساواة والراجل زي الست وال...........خ من خزعبلات الغرب اقول ...........

ياريت تجيبلي كلمة وحده قلتلها من أول يوم لي هنا إلى الآن .. أؤيد فيها نغمة المساواة والراجل زي الست وخزعبلات الغرب على رأيك !!!!!!

بعدين انت كملت كلامك وقلت ان الإسلام ساوى بين المرأة والرجل .. يعني الله بحكمته وعدله ساوى بين المرأة والرجل في العقوبة ..

هل هذه المساواة من خزعبلات الغرب ؟؟!!

والا برأيك نترك مساواة الاسلام ونقول المجتمع والعادات والتقاليد ..

يا سيدي ليس معنى أنه يوجد فرق في التكوين الجسمي والفسيولوجي بين المرأة والرجل .. يجعلنا هذا نحلل للرجل أن يعمل الغلط لأنه ببساطة لن يكشفه احد .. مقابل أن المرأة سوف تكشف لذلك لا تعمل الغلط ..

الله ساوى في العقوبة بين المرأة والرجل وهو الخالق سبحانه لهذا الفرق في التكوين ...

والرسول صلى الله عليه وسلم أقام الحد على الرجل والمرأة ...

أنا لا أقصد بكلامي أن المرأة لا بد أن تغلط لأن الرجل يغلط .. لا أبداً ومستحيل ..

لكن أريد أن تصبح قيم الشرف والعفة والطهر تخص كليهما .. يعني مثلما يحرص الرجل على شرف أخته أو أمه أو زوجته يحرص على شرفه وعفته هو ..

ولا يذهب الرجل ليدنس شرفه وعفته وطهره .. لأنه ببساطة لن يكتشف !!

أتمنى أن تكون فهمت ما أقصده من كلامي ..

الذي هو يا سيدي من صميم إيماننا وعقيدتنا وليس من خزعبلات الغرب ..

تم تعديل 9 مايو 2006 بواسطة مصرية الهوى

[مسافر زاده الخيال]

السلام عليكم ورحمة الله وبركاته اما بعد

تحية لجميع الاعضاء من اخوة واخوات ونخص بالذكر الاخت جيجي (مصرية الهوى سعودية الهوية)..........

واقول لها حينما قصدت بقول خزعبلات الغرب .............لم اقصد ابدا رأي الدين وقد ذكرت صراحة ان الدين ساوى في الحد (لان الوضع يتطلب ذلك) وذكرت ايضا على وجود قيمتي المساواة والعدالة بوصفهما قيمتين مختلفتين -قد تتطابقان احيانا ............وفي مسألة الشرف تحديدا لانريد ان تعتقد النسوة انها معركة بين جيش الرجال المتحد ضد النساء الغلابى .......

بل هي عادة معركة يقودها الرجل ضد رجل اخر معتدي على انثى له بها علاقه(امومة-زوجية-اخوة ال.....خ) فلم اسمع ان رجلا يقول لرجل اخر اعتدى على عرضه (روح مدام احنا رجاله زي بعض ......لكن السبب كله من الست-زوجته او اخته وهي اللى حتدفع الثمن) بل لو امكنه قتله لفعل دون تردد.............

لكن المشكلة احيانا هو اخفاء الانثى شخصية الرجل الاخر بحجة الحب او اي سبب عبيط..................عموما في مجتمعنا الشرقي لا يمكن ان نجعل خطأ البنت زي الولد والا على الدنيا السلام ففي اوربا الان الوضع عادي جدا (مثال بريطانيا .....تشارلز عارف ان ديانا خانته وهو خان صديق عمره زوج كميلا وبعدين هز تزوجها رغم معرفته بماضيها واولادها واولاد تشارلز من ديانا اصحاب مع بعض ............حاجه قذرة جدا ولو انتقدهم قالوا عليك متخلف ورجعي ومنتاش سبور)

اللهم ادم علينا التخلف اذا كان التقدم يعني الدياثة وكلوا زي بعض (بصراحه انا احيي الصعايدة واهالي الاردن فيما يخص بمسألة الشرف )وللمعلومية اننا قد تشربنا هذه القيم من امهاتنا تحديدا ولذلك حرصنا على البنت اكبر من حياتنا شخصيا ................

ولكن بعض الغربيين لايريدوننا اخذ علومهم وتكنلوجياتهم ولكن لا باس باخذ حرياتهم وتشجيع العلاقات المثلية والشاذه ال.............خ

ياختي جيجي انا اعلم انك في داخلك تحتقرين الرجل الذي لايهتم بشرف المرأة ويعتبر المسألة عادية البنت زي الولد (الا على فكرة ليش ربنا ماخلق بكارة للرجل؟؟؟؟؟؟؟؟؟؟؟؟؟؟؟؟؟)

وشكرا لكم جميعا والسلام عليكم ورحمة الله وبركاته

[مصرية الهوى]

وعليكم السلام يا مسافر

بس شكلك راعي طويلة ويبيلك قعدة يعني قهوة وتمر وحلا وفلة :angry:

بصراحة يا مسافر ما فهمت بالضبط وش تقصد ؟؟!!

يعني دخلت الافكار على بعضها ..

انا بس اللي كنت أريد قوله ، إن مسألة الشرف والمحافظة على الشرف مهمة ، ومن الرجل والمرأة ..

وكما ان الاسلام ساوى بينهما في العقوبة فهذا يعني أنه لا فرق بين المرأة والرجل في هذه المسألة ..

لكن المجتمع هو الذي أوجد فروق بين خطأ المرأة وخطأ الرجل ... فخفف خطأ الرجل وأثقل من خطأ الأنثى ..

اما قولك :

بصراحه انا احيي الصعايدة واهالي الاردن فيما يخص بمسألة الشرف

بصراحة لم أفهم بالضبط ما تعنيه ..

كل الناس في مجتمعاتنا تحافظ على شرفها ، لكن الذي أعرفه فيما يختص بالأردن مثلا .. أنهم يقومون بقتل الفتاة بمجرد الشك في وجود علاقة بينها وبين رجل !!!

والاسلام لا يقيم الحد بمجرد الشك بل لا بد من وجود شهود ..

فكيف نترك حكم الإسلام لنرتكن لاحكام عرفية قبيلة مردها فورة الدم العربي لمجرد الشك في وجود علاقة ..

أنما سؤالك :

(الا على فكرة ليش ربنا ماخلق بكارة للرجل؟؟؟؟؟؟؟؟؟؟؟؟؟؟؟؟؟)

صحيح ان كل شيء خلق لحكمة .. وقد نجهل الحكمة أحيانا ..

لكن هذا السبب لا يخفف الغلط عن الرجل ..

[مسافر زاده الخيال]

السلام عليكم مرة اخرى للجميع وخصوصا للاخت جي جي

اعتقد اننا متفقان مع بقية الاعضاء في ادانة الخيانة من الاناث والذكور ويبقى شبه الاختلاف في تقييمنا عن درجة ذلك بينهما ففريق يعتبر ان درجة خطأ المرأة اكبر (وانا منهم) واخر يعتقد ان المسألة سواء (اي انه اذا اخطأ الرجل ستقوم اخته بقتله غسلا للعار ولن تستطيع هي ان تمشي بين زميلاتها مرفوعة الرأس وسيعيرها الناس باخيها ابد الدهر وربما اجبرت اخيها بان يتزوج المرأة للستر ودرء الفضيحة اقول ربما)

اخيرا اقول ان هناك قيمتين متباينتين ----المساواة والعدل

ودمتم

[محمود الشاعر]

السلام عليكم مرة اخرى للجميع وخصوصا للاخت جي جي

اعتقد اننا متفقان مع بقية الاعضاء في ادانة الخيانة من الاناث والذكور ويبقى شبه الاختلاف في تقييمنا عن درجة ذلك بينهما ففريق يعتبر ان درجة خطأ المرأة اكبر (وانا منهم) واخر يعتقد ان المسألة سواء (اي انه اذا اخطأ الرجل ستقوم اخته بقتله غسلا للعار ولن تستطيع هي ان تمشي بين زميلاتها مرفوعة الرأس وسيعيرها الناس باخيها ابد الدهر وربما اجبرت اخيها بان يتزوج المرأة للستر ودرء الفضيحة اقول ربما)

اخيرا اقول ان هناك قيمتين متباينتين ----المساواة والعدل

ودمتم

يعني أيه لما المرأة تغلط يكون غلطها أكبر من الراجل يوم القيامة ربنا هيحاسب الست ويديها سيئات اكتر

أعتقد أن المرأة مخلوق غاية فى الضعف و المسئولية تقع على الرجل الست اللي تخون جوزها اكيد فى اسباب ( انا ما بدفعش ومحدش يقول اني مع الخيانة او بشجعها انا بحاول افكر بهدوء و بحياد ) يمكن الراجل اناني يمكن يمكن يمكن ( مش كلهم ملائكة ومش كلهم ساقطات العكس صحيح انا ماشفتش راجل الا و عينه زيغة اشمعنا بنحب نتساهل مع نفسنا و نعلق المشانق لغيرنا ( والله العظيم ده رأي ومحدش يقول اني غير محايد )

[مسافر زاده الخيال]

السلام عليكم مرة اخرى ..................................

الى الاستاذ محمود الشاعر

انا لا اريد ان يفهم ان هناك فريقين ضد بعضهما الرجال ضد النساء ويجب التحزب لاحدهما ضد الاخر .......اطلاقا فلو راجعتم ردودي السابقة ستجدون اقراري بان الدين ساوى في الحد (لان الوضع يتطلب ذلك)

ولكن ان نعتبر ان انعكاسات الافعال اجتماعيا وخلقيا ونتائجيا على نفس المستوى فاسمحولي ان اعتبر ذلك خارج المنطق والعقلانية ..................وحتى لا نفتعل معركة رجال ضد النساء ابتداء ...............

فلنبدأ بالرجل وحده

هل لو خطأ اب وقور ذو اولاد له نفس الانعكاس لو قام بذلك شاب او مراهق ؟؟؟؟ (اذا كانوا متزوجين مثلا)

طبعا لا رغم ان العقوبة واحده . هل يتساوى الاشمئزاز والشعور بالعار لو ان من قام بالعمل الاب او العم او الاخ او ابن العم؟؟؟؟؟؟؟؟؟؟؟

وسؤالي لك وللاعضاء الاخرين بصراحه ((ايهما اقل وطأة وعارا؟؟ ان يكتشف الشخص ان اباه زير نساء او ان امه خائنة مع رجال اخرين؟ لا نضحك على انفسنا وندعي مثالية وطهرانية غير موجودة ونعتبر ان انعكاسات الفعلين متساويتين)) وقد ذكرت قبل ذلك هل لو اعتدى رجل على فتاة ثم قام اهل الفتاه بتكبيل الرجل وقالوا لابنتهم -هيا خذي بثارك واعتدي عليه مثلما اعتدى عليك هل في هذه الحالة تكون المراة قد اخذت حقها؟؟؟؟؟؟؟؟؟؟؟؟؟؟؟؟؟؟

لالا دي مش زي دي ..................

ورغم اعترافي انني من الشرق الاوسط المتخلف تقنيا امام الغرب الا انني لن اكون (free) زي الغرب كلو ماشي مادام الراجل يصاحب اي وحده مفيش مانع ان اخته تصاحب اي واحد وتحمل منه كمان (حرية وديمقراطيه بقى)

وانا مع قيم مجتمعنا الشرقي بل ارغب بتشديد اكثر-في حدود الدين والاعراف والا

لن يمر وقت طويل حتى نكون والغرب سواء بسواء في اخلاقياتهم

وشكرا لكم مرة اخرى

[محمود الشاعر]

أخي و صديقي العزيز مسافر زاده الخيال ( معلهش سمحت لنفسي أنك تكون صديقي ههههههههههههه صديق رغم انفه )

انا مش مع التسيب ولا بدعوا للانحلال ( هتقول اني مفهمتش ردك انا عارف انك مقلتش ده بس احب اوضح ) بل بالعكس احب جدا ان قيمنا الاسلامية ( والمسيحية ) الشرقية انها تسود لكن ان بتكلم عن واقع للاسف كلنا عيشين فيه ولازم نحاول نصلحه وعلشان تصلح شيئ لازم تبدأ بنفسك و تشوف اخطائك الشخصية و تفهم الاخر و تحاوره من خلال وجهة نظره علشان تقنعه بوجهة نظرك أو تقيم الحجة عليه

اشكرك يا مسافر وحدك وسيبني

[nancy]

بص يا مسافر وحدك

انا مع راى محمود

مفيش حاجة اسمها لو ابويا غلط دة حيجرحنى زى ماامى تكون غلط حيجرحنى نفس الجرح

الغلط غلط والصح صح بغض النظر عن النوع

[wa7d]

الرجل سواء شرقى أو غربى يختلف تماما عن المرأة من ناحية نظرة كل منهما للجنس . إزاى ؟؟

المرأة إذا أحبت رجل وتمنت أن تقيم علاقة جنسية معه فهذا لأنها تحبه جدا ، وكلما إزدات رغبتها له كلما كان ذلك مقياس على حبها له أكثر . الجنس مقياس قوى جدا عن الحب عند المرأة - الطبيعية طبعا .

الرجل يفكر أن يقيم علاقة جنسية مع إمرأة لا لأنه يحبها أو حتى يشتهيها ، هو فقط يريد الجنس . أحبها أم لا . الجنس ليس هو مقياس الحب عند الرجل - الرجل الطبيعى .

هذه خلقة ربنا فلا نتحداها ونحاول تغييرها .. فقط نفهمها .

فعندما تشعر المرأة أن الرجل يشتهيها جنسيا .... تظن أنه لابد أن يكون حبه لها كبير ، بينما هو حقيقة لا يفكر فى الحب . وكذلك إذا شعر الرجل أن المرأة تشتهيه ، فحسب تفكيره هو ، هى قد تفعل نفس الشيء مع أى رجل آخر ، وسوف يخاف منها .

أرجو أن تفهم النساء هذه النقطة جيدا لأنها سوف توضح الكثير من الغموض .

أما إذا كانت المرأة متزوجة وخانت زوجها ، فمعنى ذلك أنها لاتحب زوجها بل تحب الرجل الآخر الذى تخون معه . والنتيجة ربما يكون مولود تنسبه لرجل ليس أبيه الحقيقى . يعنى الخيانه هنا تدخل فى خلط الأنساب . وأيضا أن يكون الأب ليس هو الأب البيولوجى للطفل سوف يسبب مشاكل كثيرة لأنه فى هذه الحالة الجينات مختلفة بينهما .

أما إذا خان الرجل المتزوج زوجته مع إمرأة أخرى فلا يعنى ذلك أنه لايحب زوجته أو إنه حتى يحب المرأة الأخرى . وطبيعى لن ينتج عن هذه الخيانه مولود للزوجة تظن أنه إبنها .

[محمود الشاعر]

الرجل سواء شرقى أو غربى يختلف تماما عن المرأة من ناحية نظرة كل منهما للجنس . إزاى ؟؟

المرأة إذا أحبت رجل وتمنت أن تقيم علاقة جنسية معه فهذا لأنها تحبه جدا ، وكلما إزدات رغبتها له كلما كان ذلك مقياس على حبها له أكثر . الجنس مقياس قوى جدا عن الحب عند المرأة - الطبيعية طبعا .

الرجل يفكر أن يقيم علاقة جنسية مع إمرأة لا لأنه يحبها أو حتى يشتهيها ، هو فقط يريد الجنس . أحبها أم لا . الجنس ليس هو مقياس الحب عند الرجل - الرجل الطبيعى .

هذه خلقة ربنا فلا نتحداها ونحاول تغييرها .. فقط نفهمها .

فعندما تشعر المرأة أن الرجل يشتهيها جنسيا .... تظن أنه لابد أن يكون حبه لها كبير ، بينما هو حقيقة لا يفكر فى الحب . وكذلك إذا شعر الرجل أن المرأة تشتهيه ، فحسب تفكيره هو ، هى قد تفعل نفس الشيء مع أى رجل آخر ، وسوف يخاف منها .

أرجو أن تفهم النساء هذه النقطة جيدا لأنها سوف توضح الكثير من الغموض .

أما إذا كانت المرأة متزوجة وخانت زوجها ، فمعنى ذلك أنها لاتحب زوجها بل تحب الرجل الآخر الذى تخون معه . والنتيجة ربما يكون مولود تنسبه لرجل ليس أبيه الحقيقى . يعنى الخيانه هنا تدخل فى خلط الأنساب . وأيضا أن يكون الأب ليس هو الأب البيولوجى للطفل سوف يسبب مشاكل كثيرة لأنه فى هذه الحالة الجينات مختلفة بينهما .

أما إذا خان الرجل المتزوج زوجته مع إمرأة أخرى فلا يعنى ذلك أنه لايحب زوجته أو إنه حتى يحب المرأة الأخرى . وطبيعى لن ينتج عن هذه الخيانه مولود للزوجة تظن أنه إبنها .

wa7d يا عمنا

ايه الكلام اللي انت بتقوله ده الخيانة خيانة

بتهدم البيت وبتدمر كل القيم

أحنا ليه بنلف وندور ونجيب مبررات ملهاش لازمة

الاسلام قال ( لا تزر وازرة وزر اخرى )

و المسيحية قالت من كان منكم بلا خطيئة فليرمها بحجر

اليهود وحدهم اللي شيفين أن المراة سبب كل الفساد وشيئ دنس غير طاهر ( مع الاعتزار لكلمة شيئ دي مش بتاعتي بتاعتهم هما )

هو احنا عوزين نرمي التهمة ( نتخلص من الجثة فين فين فين ) ولا بناقش اسباب المشكلة علشان نحاول نحلها وهتكلم بصراحة واللي يحصل يحصل

الصح اني افهم مراتي أو بنتي او أختي رأيهم ايه ومشاعرهم ايه وافكارهم ايه علشان امنع ندمها و الالمها بعد ما يكون اللي حصل حصل ولا أدفس راسي فى الرمل لحد ما تيجي فى الطين

لازم اعرف ايه اللي يخلي بنت بكر تفرط فى شيئ غالي أكيد هو الحب الاغلى ( أنا مابتكلمش عن المريضة بالهوى و الجنس واللعب انا بتكلم عن أخوتنا و بناتنا و اللي هتخده الكرامة وتعميه عن الحقيقة هو حر ) لما افهم ده هفهم بنتي و اختي ان فى حا جات أغلى من الحب وهي شرع ربنا و مبادئ الدين سواء الاسلام أو المسيحية

أيه اللي يخلي زوجة محترمة ومتدينة تخون زوجها ما هو زوجها الحمار اللي مخدش باله من مشاعرها ومتطلباتها الزوجية ؟؟؟؟؟؟؟؟؟ ...............

سيدنا محمد لما قال أن الستات كلهم زي بعض قاله للرجالة اللي عنيها زيغة وعيارها فالت و مقلش أن الرجالة كلهم زي بعض

سيدنا محمد قال لنا اننا لانكون كالبهائم مع زوجتنا ( الحمد لله معظمنا ؟؟؟؟؟؟؟؟؟؟؟ )

المشكلة مش مين يخون مين

ومين اللي خيانته اكبر

طب ما تسأل نفسك لو أختك أو زوجتك أو بنتك عرفت أنك عملت كده ؟؟؟؟؟؟ هيكون رأيها فيك أيه

نفس راي و ألم راجل عرف أن زوجته أو بنته أو اخته عملت كدة بل بالعكس يمكن يكون أكبر خصوصا لو هو كان حاجة كبيرة فى نظرها

و للاسف كلنا كبار قوي فى عيون الناس اللي بيحبونا بس احنا نفهم

تم تعديل 13 مايو 2006 بواسطة محمود الشاعر

[wa7d]

wa7d يا عمنا

ايه الكلام اللي انت بتقوله ده الخيانة خيانة

إسمحلى أختلف معك عزيزى محمود الشاعر .... الرجل إذا عرف واحدة تانية لا يكون خيانه ، لأنه من حقه أن يتزوجها ، يعنى الرجل غير المرأة . الرجل إذا عرف واحدة غير مراته يقدر يصلح غلطته بأن يتزوجها ، هل ممكن المرأة التى تخون زوجها أن تصلح غلطتها وتتزوج الرجل الآخر ؟؟؟؟؟ هيه جاوب بأه !!!

[nancy]

ادة يا واحد

يعنى انت شايف ان مدام الراجل يقدر يصلح غلطتة يبقى مفيش مشكلة انما هى متعرفش تصلح غلطتها

لا ياعم تعرف تصلح غلطتها ترفع على الراجل الى معاها قضية خلع وتسيبة وتروح للى غلطة معه ويصلحوا سوى

اوعى تكون فاكر ان الست عاجزة عن انها تقرر وتنفذ لا طبعا يا

جماعه بالاش النظرة القاصرة دى للامور

الراجل ممكن يغلط والست كمان احنا بنتكلم على البشر بشكل عام عندنا ضعف واحتياجات متختلفش من نوع للتانى

لازم نفكر فى الانسان مش ست وراجل