هيكل وايزمان ---- سليمان سابقا

[ezzat afifi kotb]

هيكل وايزمان ---- سليمان سابقا

اخر تقرير كان ع الاقصى ...... نمت ويومها النوم استعصى

قمت ازور دارس للاحصا .... ونرصد فى مواكب الجنازات

عندك حزمة من الستات .... وادى حزمة صبيان وبنات

مع حزمة شباب القيادات .... بالميات وف ظرف ساعات

كان الكشف برصدنا زاخر .... قبر وبابه مفتوح ع الاخر

جثمان لرفات بيقول اتاخر .... الشهدا ورانا بالاولوفات

قلنا نصنف فيه كام حزمة ... مين استشهد جوة الازمة

ومين بميوعة اخد بالجزمة .... وحصن نفسه بالحراسات

قمنا لقينا صنفين م الناس ....صنف ووطنه فوق الراس

والثانى مات فيه الاحساس .... ردة فعله خرس وسكات

ومع البلوة بليد بيهزر .... والبيانات تشجب وتحذر

والشهدا ترجع م المجزر .... ادفن واترحم بايات

نستجدى فى رياسة الكون .... حبل الصبر مهوش مضمون

داب الحبل ف ايد ميمون .... ونسى الرقصة والحركات

ميمون ف الشارع بيزمجر .... وف طوابير العيش بيغجر

وازاى ح نحافظ ع المنظر .... فى امان وبدون انفلاتات

الاستجداء دا شغل خطير .... رؤسائها خبرا التخدير

شجب وتنديد الشغل كثير .... حقنة تخدير قبل البيانات

بعد التخدير يزرعوا فهامة .... عصب استنكار باشعة جاما

ونعارض حكومات فى باهاما .... ونطاوع اسوأ حكومات

وبرامج ضد الفيروس .... موضوعه بفكر الهكسوس

واللقمة تحتاج لغموس ....غمسها بحبر معاهدات

وقالوا لنا هيكل سليمان .... كان مبنى بايادى الجان

قوم بخر حبة خلونجان ... شمهورش يجيب الرسومات

لو يبنى الهيكل انسان .... صار هيكل نسل وايزمان

ما حيبقى هيكل سليمان .... والتحريف شغل الحاخامات

ونزمر ونهايته بطيط ....فين عقد مقاولة عفريت

مع سابقة اعمال البيت .... والخبرة ف شغل مقاولات

والجن الاحمر والازرق .... فى القدس بيبنى ويسترزق

ونضخ البترول ونفرق ..... ثروتنا ف بنوك اشتات

والهيكل تسليم مفتاح .... والمفتاح عند الاشباح

والاشباح عايزة الارواح ....ارواح اطفال الانتفاضات

وشعوبنا فيها مناضلين ....فاهمين فى سياسة وف الدين

لوتاهت حبة فلسطين .... ف عيون الامة حتبات

عزت عفيفى قطب