اكتر شخصيات أثرت فيك

[احمد هادي]

اتأثرت في حياتي بشخصيات كتيره

حبيتها .....كرهتها مش مهم

المهم انها حفرت فيا

ابويا الله يمسيه بالخير - وهو في حد متأثرش بأبوه ؟

أمي - ربنا يديها طولة العمر - وهو في حد ينسي امة ؟

بس في ناس تانيه كتير اثرت فيا

خدو عندكو

مدرسة الحساب في ابتدائي اللي كرهتني في الحساب لدرجة اني مش عارف آخد الماجستير لحد دلوقتي لفشلي في اختبار الاحصاء مرتين

دكتور شكري اللي علمني يعني ايه ترجمة

الشاويش ال*** اللي كان بيحاول يبهدلني في الجيش لمجرد اني بحترم نفسي

رائد الصاعقة -قائد كتيبتنا- اللي كان عمره 39 سنه وبيجري معانا كل يوم 25 كيلو ومتنزلش منه نقطه عرق - لسه بيسخن - واحنا نكون فطسنا وعلي مشارف الهلاك رغم اننا في أوائل العشرينات

صديقي العزيز اللي انقطعت أخباره عني بعد ما سبت مصر اتجوز وخلف وكان مرتبه 250 من وظيفة مؤقته - ومتسألونيش ازاي جاب عيلين وكان بيربيهم وعايش وكان يقولي انا متأكد ان ربنا مش هيضيعني .

وغيرهم كتير .....

فاكر الناس اللي كان لها تأثير علي تفكيرك وحياتك ؟

احكيلنا عليهم

[yasovinas]

موضوع جميل يا هادي

اتاثرت جدا بابلة" دولت" مرسة ابتدائي كنا زمان في المدارس الابلة تمسك الفصل من اولى لغاية رابعه تدرس لنا كوووول المواد عربي وحساب وعلوم مش عارف دلوقت ايه اخبار التعليم ؟؟؟

المهم ابلة دول كانت شخصية رائعه جدا ضحوكه وكانت ررررهييييبة ما فيش كلمه تعدي من تحت ايدها غير لما تعلق عليها ويا ويلة اللى يغلط قدامها ياخد كلام وتريقه بس بضحك وحب فكنا كلنا بنحاول ما نغلطش ابدا قدامها ؛؛؛؛بس بيني وبينكم كنت ساعات كتير اتعمد اغلط علشان اسمع قفاشتها وتعليقاتها

اثر في كثيراً استاذ ميشيل مدرس اللغة الانجليزية في اعدادي كان رهيب بيدرس لنا الانجليزي بالملعقه يعني بيشربه لنا؛؛ الراجل دا كان دايما شايل معاه كيس طباشير فيه ما لا يقل عن عشرة الوان طباشير ومن اول حصة قال لنا مفاتيح الالوان الاحمر فعل والاخضر اسم والاصفر صفه والازرق مش عارف ايه

طبعا احنا ايامها كنا عيال خايبة بعيد عنكم وما اهتميناش وما فيش حد كان بيكتب وراه واللي بيكتب مش بيعمل زيه بالالوان يعني - فضاع مني الانجليزي ولغاية دللوقت مش لاقيه :unsure:

ايضا اثر في كثيراً صديقي من ايام ثانوي حتى انهينا الجامعه معاً وتأثيرة كان تعليمي اكثر من اي شيء فصديقي هذا كان ذكي وللاسف يعلم ذلك مما ادى الى انه تعامل مع كل من حوله على انهم اقل منه ذكاء وفي النهاية وبعد عودتي في احدى الاجازات الى مصر وجدته للاسف في السجن بسبب ذكاؤة،، تعلمت منه الا اتذاكى على احد وان احترم ذكاء الآخرين

[kfaya]

ثلاثة دكاترة فى الجامعة كان لهم أكبر الأثر فى تعليمى كيف هى الحياة خارج أسوار الجامعة و كيف يجب أن نعيش الحياة و نؤثر فيها و نستمتع بها .

الأول : دكتور فارس ميناو ... هندسة عين شمس

الثانى : دكتور مصطفى كمل حلمى ..... هندسة عين شمس

دكتور : محمد على صالح ...... رئيس قسم الهندسة الكيماوية جامعة القاهرة

دعاء بالصحة للأحياء منهم .. و رحمة واسعة لمن قضى أجله

[nancy]

انا عندى التاثيرات مختلفة

يعنى اثر فيا مكان الى هو مدرسة الابتدائى الفرنشيسكان بالابراهيمية

دى حببتنى فى التدريس المحترم والمكان الظيف المرتب العريق

حبيت عندهم الكنيسة كنت بعد ما كل الفصول تدخل اتحجج باى حاجة علشان الحق اشوف الشمس

وهى دخلة من ورا الزجاج المعشق الى علية ( مريم العذراء)

والالوان مفروش فى المكان باشعة الشمس

احب الحوش الى فية الشجر وحصة الالعاب الى كانت بالموسيقى والما سور وهى لازم نقولها ارفوار

واحنا مشيين والا تندهنا تانى

فية كمان التاثير العكسى

يعنى ماما الله يخليها كنت اشوف كل تصرفتها من ناحية العصبية والحدة وقررت انى اكون العكس

وفية تاثير بالكرهه

انى كرهة اول مكان اشتغلت فية

وكرهه الحضور والنصراف المحدد والناس لى لازم تصبح عليها وانت مش عايز وتكون ظريف واتايدهم يتبقى من المغضوب عليهم

فكرهة رئيستى المبشرة جدا

التاثير الايجابى كان من جوزى

لانى عرفتة وانا طالبة فعلمنى ان اوسع طموحى وان الثقافة مش قراية انما بتكون من احتكاكات بالبشر وتعامل مع العالم الخارجى

خلانى افكر انى اعمل دراسات عليا

مثل اعلى معيد كان عندنا كنت بحب فية انة عاوز يعلم انة بيدى كل الى عندة

هو دلوقت دكتور اسمة معتز

[مصرية الهوى]

حمد الله على السلامة يا احمد كنت غطسان فين :angry: ؟؟!!

ناس كتير اثروا في حياتي بالسلب او الايجاب ..

طبعا أكيد بابا وماما .. وخصوصا ماما اكتر حاجه تعلمتها منها التضحية .. تعلمت منها فعلا ازاي تضحي بسعادتك ووقتك وحتى لقمتك في سبيل الناس اللي تحبهم .. تعلمت منها قيمة الإيثار بشكل كبير .. كمان تعلمت منها قيمة الصبر والتحمل .. أصبر على تعب الدنيا واتحمل عشان خاطر جوزي وعيالي ..

تيته الله يرحمها .. لا يمكن انسى موقفها ابدا في يوم موت جدي .. كان الله يرحمه ويسامحه مبهدلها شويا .. ويوم موته لا يمكن أنسى كلماتها عنه .. كانت وهي بتتكلم عنه والدموع في عينيها .. حسيت قد ايه كانت بتحبه وتموت فيه رغم كل اللي شافته منه .. كانت تقول : الله يسامحه .. ربنا يشهد إني سامحته على كل حاجه عملها فيا .. فعلا في الموقف المؤثر ده تعلمت قيمة العفو والسماح ..وهنكسب ايه لما نزعل والا نشيل على حد ؟؟!! ... مفيش احلى من ان الواحد يبقى طيب وقلبه كبير ويسامح ويغفر ..

مدرسة العلوم وأنا في إعدادي .. تعلمت منها قيمة اننا نفصل بين عواطفنا وشغلنا .. يعني مثلا لما مدرسة تانية تتخانق مع بنت بتاخد منها موقف واحيانا بياثر ده على درجات البنت وتلاقي المدرسة خلاص بتعامل البنت بقرف واحتقار .. الا المدرسة دي .. مكنش عندها أي تفريق بين البنات وحتى لو اتخانقت مع بنت مليون مرة .. بس داخل الفصل بتعاملها زيها زي البنات التانيين ..لا يمكن تظلم الناس اللي تحتها بالاحتكام للعواطف ..

فعلا مفيش حد علمني القيمة دي غيرها ..

فيه برضه مدرسة التفصيل والخياطة في اعدادي .. ربنا يسامحها بقى ..

أنا خدت منها موقف من قبل ما تدرسني .. كانت بتدرس اختي .. ومرة اختي رجعت من المدرسة متحطمة نفسيا ومحبطة وبتعيط وكل حاجه .. والسبب ان اختي معرفتش ترسم الباترون صح .. ايش عرفها اول مرة ترسم باترون ؟؟ .. الطبيعي ان المدرسة تعيد الشرح للطالبة وتفهمها كويس ازاي ترسم الباترون .. المدرسة دي بقى عملت ايه .. خدت الكراسة من اختي وقطعت الورق ورمت الكراسة في الزبالة وقالتلها بكل احتقار .. روحي هاتي كراستك !! .. وتخيلوا قدام اكتر من 30 بنت في الفصل !!

درستلي المدرسة دي .. كنت بخاف منها جدا .. بأموت من الرعب لما بشوفها قدامي .. أحاول قدر الامكان اني افهم كل حاجه عشان الموقف اللي حصل لاختي ميتكررش معايا .. وفعلا شفتها بتقطع كراسات بنات كتير .. وتهزئهم قدامنا ..

ربنا يسامحها ..

نيجي بقى لمرحلة الكلية وطبعا دي اهم مرحلة انا شايفه ان الواحد يتأثر فيها باللي حواليه .. ودايما الافكار وفلسفة الواحد في الحياة بتتشكل في المرحلة دي ...

4 أشخاص تقريبا اللي أكتر حاجه اثروا فيا ..

اكتر حاجه الاستاذ عمرو خالد .. الراجل ده فعلا أثر فيا بطريقة مش ممكن .. غير حاجات كتير جوايا .. وخصوصا برنامجه صناع الحياة ..

دكتور مهندس عندنا .. درسني كذا كورس في الصيانة والشبكات وكمان هو المشرف على مشروعي التخرج .. فعلا فعلا الدكتور ده اثر فيا جامد .. غير كتير من طريقة تفكيري ونظرتي للدراسة وللعلم ..

برضه كمان دكتورة درستني كورسين تربويين.. الدكتورة دي اثرت فيا فعلا .. انسانة في منتهى الطيبة والاخلاق والذوق الرفيع .. تعلمت منها حاجات كتير ....

فيه برضه استاذة تربوية كانت بتدرسلي طرق تدريس الحاسب .. تعلمت منها قيم تربوية وتعليمية كتير جدا .. خلتني فعلا افكر اني اكمل دراستي في موضوع المناهج وطرق التدريس ..

وطبعا فيه ناس غيرهم كتير بس دول اكتر حاجه ..

يعني احيانا تقابل شخص لمدة بسيطة وتتعلم منه حاجات ويؤثر فيك ..

حتى في المحاورات تعلمت قيم جميلة من ناس تكتب هنا..

[khedr]

يا أخي بارك الله فيك في الموضوع ده

كنت لسه ناوي اكتب عنه وطبعا دائما انت صاحب الضربه الاولي ...بس مش زي صاحبك

المهم الشخصيات

ولله في خلقه شئون

ابويا لكن الله يرحمه بعد ما توفي

كان وهو في حياته بيني وبينه خلاف في كل شئ

ولكن الان وبعد مرور تسع سنوات علي وفاته افتقده بشده

وكلما الايام تمر...يزداد افتقادي اليه اكثر

ولسسسسسسسسسسسسسسسسسسسسه فيه كمان

يتبع

[نورية]

ياااااااااااااااااه .... موضوع جميل بجد....

انت كدة يا احمد خليت حياتى كلها تمر قدام عينى زى شريط السينما..

افتكرت ناس كتير.. كانوا السبب فى تشكيل شخصيتى او التأثير فيها سواء بالايجاب او بالسلب.. و ممكن تلاقى نفس الشخصية و ليها تأثيرين متضادين فى نفس الوقت...

بابا.... اتعلمت منه الصبر و التفاؤل و انى لازم يكون عندى ايمان و ثقة كبيرة فى ربنا..اتعلمت منه انى لازم ابقى هادية و انا باواجه اسوأ المواقف..و انى لازم ابقى عارفة ان النصيب دة مكتوب عند ربنا و دة اللى هو سبحانه و تعالى كاتبهولى..بس للاسف ماعلمنيش تحمل المسئولية من صغرى و انى مش دايما راح الاقى اللى يتحمل مسئوليتى الشخصية...

اخويا.... علمنى ان الدنيا مش كلها بيضا... و ان فيها نقط سودا بس ساعات ماقدرش اشوفها بعنية .. و ممكن اقع فى حفرة و انا مش واخدة بالى... لان مش كل الناس طيبة.. مش كل الناس امينة... مش كل الناس اديلها الامان... زى مابيقولوا ( حرّص ولا تخون و من خاف سلم)..بس للاسف ماعلمنيش ازاى ممكن اواجه فراق احب الناس لية(عاشر من تعاشر فلابد من فراق)..

مسز ايمان... مدرسة الانجليزى فى مدرستى الثانوية (لوران)... احييها .. لانها علمتنى ازاى احب الانجليزى..و لم ينحسر تأثيرها فى المجال التعليمى فقط و لكن كمان اثر فى شخصيتى من حيث تعاملى مع الاخرين... و طرق التعبير ... و مواجهة اى شئ فى الدنيا بالمثابرة و الصبر...

izzy و ماحدش يقولى يعنى ايه دة.... بس بجد علمنى يعنى ايه حياة.. يعنى ايه بشر بيتعبوا فى حياتهم و بيعانوا عشان يوصلوا لهدفهم و يمشوا فى طريق طويييييييل عشان بس يلمشوا نجاحهم بايديهم... بس للاسف نسى يعلمنى معنى كلمة الفشل...

ماما..حبيبتى و روح قلبى....علمتنى بجد معنى كلمة تضحية... و للاسف علمتنى العصبية و الاعصاب النارية..

خطيبى... بغض النظر عن انه خطيبى.. و بالنظر اليه على انه انسان اخر... فهو مثال حى امامى للعزيمة و الاصرار ... و اتعلمت منه ان الدنيا بتدينا (شلاليت)... و ( بتوقعنا على بوزنا).. بس الشاطر هو اللى اللى يخللى (الشلاليت ) دى دفعة للامام ... و كل وقعة نقوموا منها و راسنا مرفوعة بعد ما اتعلمنا طعم مرارة الفشل عشان ننجح...

اممممم... اقولكم على حاجة تانية.... بس تصدقونى....

انتوا بجد علمتونى حاجة حلوة اوى... اتعملت منكم ان الاخوة و الحب لسة موجودة.. و لما تحب بجد راح تلاقى اللى قدامك بيحبك اد ما تحبه..

رغيت كتير صح....

كفاية كدة

[ATHENA]

سمعت عن دراسة بتقول إن اللي بيأثروا في حياة الشخص هما خمس شخصيات بس على مرور الزمن...

ما علينا نشوف

والدي كان من أكتر الشخصيات اللي أثرت عليا لأنه إنسان مثقف جدا و ذكي و بيتنبأ بشكل صحيح لمعظم الاحداث عن طريق إستقرائها و كان دايما حاطط أمل فيا فخلاني أتطبع ببعض طباعه لدرجة إني كنت ممكن أعد مع أصدقائه و معاه و اسمع نقاشاتهم { مش عشان بابا بقول كده و إسئلوا اللي يعرفوه :lol: } طلعت زيه إلى حد ما و بقيت شخصية مسؤولة جدا و بفكر كثير للأسف و اكبر من سني في صداقاتي و طريقة تصرفاتي و ده كان له أثر سلبي و إيجابي عليا في وقت واحد...كمان إتعلمت منه إزاي أقدر أعيش بأقل قدر من الناس و المعارف مين غير ما أحس بأي خوف من الوحدة

نبعد عن العيلة شوية

تاني أكتر شخصية أثرت فيا كان أحد المعارف اللي وراني الدنيا على طبيعتها بدنائته ووضاعة أخلاقه في وقت كنت فيه أعتبر شابة بريئة جدا و يمكن لسه طفلة شوية في تصرفاتي و توقعاتي فكانت تصرفاته كما الصدمة الي فتحت عيني على الدنيا

كمان شخصية هي مس الإنجلش في الثانوية العامة اللي كنت سيدة سورية لطيفة جدا و رائعة و حببتني في المادة و فيها و كانت دايما تشجعني ففعلا جبت معدل يعتبر عالي جدا في الثانوي القسم الأدبي و كنت من أوائل الإمارة و الحاجة و عشرين على الدولة :lol:

شخصية كمان صديقة مصرية هنا هادية جدا علمتني الهدوء باللي بشوفه بيحصلها و صمتها على كل شيئ فكنت دايما بحسدها على هدؤها و بندم على سرعة غضبي..أعدت أتعلم منها لحد ما فعلا قدرت أوصل لحل وسط و أوظف الغضب و الإنفعال لوقته فقط و بحدود وعدت نفسي عمري ما أتخطاها فكان ده تغيير كبير في شخصيتي بسبب مراقبتي للبنت دي <_<

شخصية كمان أثرف فيا اكتر لأنها عرفتني على جانب مكنتش عارفاه في نفسي بسبب إحدى تصرفاتها و اللي كانت فيه متنبأه برد فعلي ففاجئت الناس و فاجئتها برد فعل مغاير تماما مكنتش متوقعة أبدا إني اخده و كان قاسي شوية يمكن بسبب قسوة العمل نفسه فعرفت جانب في نفسي مكنتش عارفاه كويس و نميته جدا و هي التصرف بعقل و بدون أي تأثر عاطفي و بدون تحيز لحد مهما كانت معزة الشخص و إني أعامل عقلي على إنه وحده مستقله قادرة تشتغل لوحدها بدون أي عاطفة في بعض المواقف التي تتطلب كده و بالتالي مكنش أسيرة عواطفي أبدا

تم تعديل 11 مايو 2006 بواسطة ATHENA